Mweemye Wira Yehova Oophwanyiheni Otaphuwa wekeekhai
‘Mutthokeleleke ikano somalela sinopola’.—YAK. 1:25.
MUNNIWERYA OTTHOKIHERYA?
Ikano xeeni simphwanyiha otaphuwa wekeekhai, nto tani anittottela mureerelo?
Etthu xeeni enikhaliherya ophwanya otaphuwa wekeekhai?
Otaphuwa xeeni onrowa aya ophwanya atthu aneetta ephiro ya okumi?
1, 2. (a) Exeeni eniiraneya ni otaphuwa wa mulaponi, nto mwaha wa xeeni? (b) Otaphuwa xeeni onilipelela aya arumeyi a Yehova?
NINKHALA okathi atthu anitepa aya okhala a nrima, oohiiwelela ni oowali. (2 Tim. 3:1-5) Tivonto ikuvernu sinnincererya malamulo, waalipiha mapolisia, ni ohela ikaamera siniweha-weha. Mmwaha wa ikrime, ilapo sikina atthu annimuhela alarme vapuwani vaya, annikhalana-tho ikhattiyatto, ni ikintaali sa araami eleetriku. Anamunceene annoova weetta ohiyu ni khanaahiya anaaya etthekulaka vate voohikhala mutthu onaaweha, ohiyu wala othana. Tthiri otaphuwa onnivukuwa, masi itthu sowoopiha sinnincerereya.
2 Oxardim wa eDeni, Satana aahithipelela ohimya wira ohimwiiwelela Yehova, ti etthu enikumiherya otaphuwa. Itthu siniiraneya sinooniherya wira waari wootha wootepexa otakhala! Tthiri, vaavo atthu antepa aya ohicalela mweettelo wooloka ni sooruma sa Muluku, atthu otheene annitepa ohaawa. Otepa otakhala wa itthu onnahaaxa-tho arumeyi a Yehova. Masi, niinnikupali wira opottha wa apinaatamu mwaha wa yoottheka ni eyuutte, onoomala. Nto nnoophwanya ohakalala Biibiliya onihimya awe okhala “otaphuwa n’uvuwa w’àna a Muluku”. (aRom. 8:21) Tthiri Yehova oopacerya waareherya arumeyi awe wira ephwanye otaphuwa. Moota xeeni?
3. Ikano xeeni Yehova aavanhe awe atthareli a Yesu, nto makoho xeeni anrowa ahu othokorerya?
3 Waakhuliwa waya oniphwanyaneya mmasu alempwe mBiibiliyani ni Yakobo ani: ‘ikano somalela sinnopola’. (Mmusome Yakobo 1:25.) ABiibiliya akina anitaphulela so: “nlamulo ninnivaha otaphuwa” (João Ferreira de Almeida), “nlamulo nooloka na otaphuwa” (The New American Bible). Okhala wene, atthu khansiveliwa ni malamulo, anoona okhala etthu yooxankiha. Masi sai voohimya sa ‘ikano somalela sinnopola’? Ikano iyo sinitaphula sai?
NLAMULO NIMPHWANYIHA OTAPHUWA
4. Exeeni ekhanle ‘ikano somalela sinopola’, ni tani anittottela mureerelo?
4 ‘Ikano somalela sinopola’ khahiyo Nlamulo na Moise, maana saapakiwe wira sooniherye yoottheka khumaleliheriwa ni Kristu. (Math. 5:17; aGal. 3:19) Nto ikano xeeni Yakobo saahimya awe? Aahimya “ikano sa Kristu” wala ikano sinikumiherya ‘wamini’ ni ‘sinnikhaliha òtaphuwa’. (aGal. 6:2; aRom. 3:27; Yak. 2:12) Nto ‘ikano somalela’ sinihela mpuwa khuta etthu Yehova enniruma awe. Makristau oothanliwa ni “ipwittipwitthi sikina”, annittottela mureerelo ikano iyo.—Yohani 10:16.
5. Xeeni ikano sinoopola sihinrika aya weettela?
5 Moovirikana ni malamulo a ilapo sinceene, ‘ikano somalela’ khasinvila ni okhweya weettela, okhala wira khasinxankiha ni malamulo maalupale ahinimala. (1 Yoh. 5:3) Yesu aahimmye so: ‘Muritti onoreyakani ti woveya ni ti wokhweya’. (Math. 11:29, 30) Ohiya-vo, ‘ikano somalela’ khasirina elista yoorakama ya ihukhumu wa ale ahineettela, maana ophenta tori mathipelo nave silempwale mmuru ni vamurimani ohiya va mapawe a maluku.—Mmusome aHéberi 8:6, 10.
MOOTA SINNITAPHULA AYA ‘IKANO SOMALELA’
6, 7. Mireerelo xeeni sirina aya sooruma sa Yehova, nto sooruma iyo sinnitaphula sai?
6 Mikano Yehova aavanhe awe apinaatamu ni malaikha, sinnaakumiherya mireerelo. Ntakiheryo: nkawehani moota malamulo eephattu aneettiha makhalelo a itthu anikhaliherya aya. Atthu khaninlaseya hata woona okhala oohaaxa. Masi, annoona oreerela ni otthuneya waya mweekumini mwaya. Moolikanasa, mweettelo wooloka onitumereriwa ni Yehova, niire so, ‘ikano somalela’ sa Kristu, sinnikumiherya mireerelo sinci wa apinaatamu.
7 Sinnikhapelela sai ikano iyo? Weettela ikano sinoopola onninivaha eparakha ya opaka itthu sooloka sinnisivela, voohiphwanya maxakha ni ohaakumiherya mixankiho akina. Okhalana soophavela sooloka, sinivarihana ni sooruma sa Yehova, ti etthu eniphwanyiha ootaphuwa wekeekhai, eyo piiyo, opaka itthu sinnisivela siri sooloka. Nihimye so, weettela ikano sinoopola, onoonikhaliherya wiixutta ophenta ele Yehova eniphenta awe, ni onyokha ele eninyokha awe.—Amosi 5:15.
8, 9. Mireerelo xeeni siniphwanya aya ale aniiwelela ikano sinoopola? Nvahe ntakiheryo.
8 Mwaha woottheka, khivanikhweya okhootta itthu soohiloka. Masi weettela moororomeleya ikano sinoopola, onooniphwanyiha ikuru sinnitaphula. Nlikanyiho: Jay, yoowo aapacenrye omusoma Biibiliya, aahikhalana yoolema ya omulya soona. Nuumala wiixutta wira yoolema ele khenimusivela Muluku, owo ahaana opaka yoothanla. Niireke aarowa ovikaniha wiiwelela erutthu awe, wala aarowa omwiiwelela Yehova? Mwa miruku aahithanla omurumeela Muluku nnaamwi nlelo murima awe waaphavela omulya soona. Nto nuumala oxintta yoolema ele ari sai? Muhoolo mwaya aahimye so: “Koophwanya otaphuwa wuulupale ni woohakalaliha”.
9 Etthu yaamwiiranenle Jay yaahimooniherya wira otaphuwa wa mulaponi oniwiiriha atthu ophavela itthu sa werutthuni, onnikumiherya opottha. Otaphula Yehova onnivaha awe tonimwiiriha mutthu ophavelaka opatthana ni yena, ni ophwanya “ekumi ni murettele”. (aRom. 8:5, 6) Nto Jay aaphwanye woowi ikuru soowerya oxintta yoolema awe ele? Mekhaweru khaawerya, Muluku tanvanhe ikuru. Jay onihimya so: “Kaamusoma Biibiliya moohihiyererya, ovekela munepa wootteela ni nikhaliheryo noophenta na muloko oneettihiwa ni Muluku”. Itthu iyo, pooti onikhaliherya-tho okathi onaavya ahu otaphuwa. Nrowe niwehe moota woopaka eyo.
MUTTHOKELELEKE NUULUMO NA MULUKU
10. Ontaphulela exeeni otthokelela ikano sa Muluku?
10 Masu vakhaani a Yakobo 1:25 anihimya so: ‘ale antthokelela ikano somalela sinopola, enettela orattene, . . . anophwanya oreriwa mwaha wotthara ikano seiyo’. Nuulumo na Ekriki nitaphuleliwe ‘otthokelela’, nintaphulela ‘weemela wira owehe saana’, eyo enooniherya wiimananiha wa mutthu owo oniweha. Tthiri, naaphavelaka wira ikano sinoopola sikele mmuupuweloni ni mmurimani mwahu, niimananiheke omusoma saana Biibiliya, ovekela ni wuupuwelela saana ele enisoma ahu.—1 Tim. 4:15.
11, 12. (a) Yesu oonihenrye sai otthuneya waya weettela ekeekhai? (b) Ntoko sihimmwale aya vasulu-vo, yowoopiha xeeni amiravo enitthuneya aya osyaka?
11 Okathi omosaru, nihaana olipiherya ni ovilela wira neetteleke Masu a Muluku mookumini mwahu. Yesu olavulaka ni atthu yaamwaamini aahimmye so: “mwakhalela nthiti molumo aka, vekekhai munokhala awixutti aka; munosuwela ekekhai, vano ekekhai yeyo enimokhalihani òtaphuwa”. (Yoh. 8:31, 32) Eliivuru ekina enihimya wira nuulumo nna noowi ‘munosuwela’, nintaphulela “ovaha efaita mwaha woowi ele mutthu enisuwela awe ti yootepexa otthuneya”. Nto ninnisuwela ekeekhai akhala wira ninnirumeela saana mweekumini mwahu. Mweettelo owo onooniiriha ohimya wira ‘masú a Muluku annivara muteko’ wa hiyo, yeettihaka makhalelo ahu wira nimutakiheke saana Tiithi ahu a wiirimu.—1 aTes. 2:13.
12 Nto mwiikoheke so: ‘Kinnisuwela tthiri ekeekhai? Okumi aka onnivarihana ni ekeekhai eyo? Kiireke nlelo kineettela murima aka ntoko atthu a mulaponi?’ Uupuwelaka okathi wa omiravo awe, murokora mmosa ahuuwale ni anamuyari awe maKristau, aalempe so: “Mutthu oninnuwa mwekeekhaini, onnikupali wira Yehova ookhala. Masi, miyo nkaamusuwela, maana nkaanyokha itthu sininyokha awe. Nkaakupali wira mweettelo aka waanimuriipiha murima. Okathi wa mixankiho nkanvekela Yehova. Kaaroromela murima aka, vano kinnoona wira murima aka khiwaalonke maana nkaasuwela etthu”. Moohakalaliha, murokora ole aahoona tthiri wira muupuwelo awe khiwaafai, nto aahipaka mirukunuxo sinceene. Mpakha ophwanela orumeela ntoko pioneero okilaatheya.
MUNEPA WOOTTEELA ONIMOOPHWANYIHANI OTAPHUWA
13. Munepa wootteela wa Muluku onnitaphula sai?
13 Yoolepa ya 2 aKorinto 3:17, eni: ‘Vavo vankhala aya eroho [munepa], vavo-tho onniphwanyaneya otaphuwa’. Nto munepa wootteela onniphwanyiha sai otaphuwa? Munepa wootteela onniniphwanyiha mikhalelo sa faita sinitaphula, ntoko: “ophentana, otteliwa murima, murettele, ovilela, othunku, orera murima, ororomeleya, wiyeviha, wisumaliha”. (aGal. 5:22, 23) Voohikhala mikhalelo iyo vanceenexa ophenta, khuuvo oniwerya otaphuwa; tivonto mahiku ala atthu vahitaphunwe aya. Nuumala ohimya yoowiima ya munepa, murummwa Paulo, onincererya so: ‘khivo ekano envirikanya makhalelo ala òrera’. Nto aaphavela ohimya exeeni? Yoowiima ya munepa wa Muluku khahiyo ntoko nlamulo, masi ennimwiiriha mutthu wunnuuherya mikhalelo sikina sooreera. (aGal. 5:18) Nto nlamulo nno ninvekela exeeni? Yehova oniphavela wira nitakiheke mikhalelo sa Kristu mahiku otheene ni nooniheryeke mookumini mwahu mohoovelela.
14. Atthu yaale anisiveliwa itthu sa mulaponi anipakeya sai ipottha sa elapo?
14 Ale aniphenta itthu sa mulaponi pooti woonaka wira aataphuwa, maana aneettela otthuna wa erutthu aya. (Mmusome 2 Pedru 2:18, 19.) Masi, khataphunwe. Maana aapakiwa malamulo manceenexa aanaakhoottiherya atthu opaka itthu soohiloka siniphavela aya. Paulo oni: “Ikano khisinakhalela anaxariya: sokhalihiwa mwaha w’ale ahinìwelela ahinlèleya”. (1 Tim. 1:9, 10) Atthu awo annikhala-tho ipottha sa etampi, khiyapaka ‘sintthuna erutthu aya’, masi mweettelo owo khahiyo wooloka. (aÉf. 2:1-3) Atthu awo anlikana ni axiitthu aniipurula wira yalye oravo oheliwe munikulani. Mwaha woophavela olya oravo, axiitthu awo anniphara munikulani.—Yak. 1:14, 15.
MPHWANYE OTAPHUWA MMULOKO WA OKRISTAU
15, 16. Moota xeeni wataana wahu ni muloko wa oKristau oryaaya wootthuneya, nto otaphuwa xeeni orina ahu?
15 Okathi waapacenrye anyu othukumana ni muloko wa oKristau, nyuwo khimwaaronwe opuro wootthekula. Muhoorwa mmulokoni mwaha woothanliwa ni Yehova. (Yoh. 6:44) Exeeni emwiirinhe Yehova woothanlani? Niireke mwaha wa omoova Muluku wala okhala a xariya? Woonasa wene “nnaari!” Nto Muluku owenheni? Owo owehale murima anyu oniphavela weettela ikano sawe sinoopola, ni wiiwelela sooruma sawe sooreera. Mmulokoni, Yehova oowiixuttihani nuulumo nawe, ootaphulani mwa sowiixuttiha soowoka sa itiini, itthu seethiru, ni owooniheryani moota wookhalana mweettelo wa oKristau. (Mmusome aÉfeso 4:22-24.) Eyo ehoophwanyihani eparakha yookhala eriyari ya nloko nimosa paahi ‘nitaphunwe’.—Yak. 2:12.
16 Nkuupuwelani ela: Yookhala enoova anyu okathi onikhala anyu ni atthu animphenta Yehova ni murima aya wotheene? Niireke okathi owo nyuwo munooweha-weha mwaha wa woova? Niireke okathi onivaanela anyu oSalau ni anna, munnoovelela wiiyeriwa mirupa sanyu? Nnaari! Nyuwo munikhala ootaphuwa. Masi niireke mwaarowa okhala ootaphuwa muryeene eriyari ya atthu ahikhanle anamoona? Nnaari! Otaphuwa orina anyu vano ni atthu a Muluku, onooniherya etthu yootepexa otthuneya enrowa wiiraneya muhoolo.
‘OTAPHUWA WA OVUWA WA ANA A MULUKU’
17. Moota xeeni otaphuwa wa apinaatamu onivarihana aya ni ‘woniheriwa w’àna a Muluku’?
17 Okathi Paulo aalavula awe sa otaphuwa Yehova onrowa awe waavaha arumeyi awe valaponi, owo aalempe so: ‘sopattuxiwa sinnilipelela ni wunlela okathi Muluku onrowawe woniherya ovuwa w’ana’we’. Owo aahihimya-tho: “Okhala wira seiyo-tho sinrowa wòpoliwa mwakhalihiwaya ipottha, mwapwetexiwaya, wira sikaweliwe otaphuwa n’uvuwa w’àna a Muluku”. (aRom. 8:19-21) ‘Sopattuxiwa’ iyo, anihimmwa apinaatamu anrowa okhala valaponi, yaale anrowa ottottela mureerelo wa ‘woniheriwa’ wa aana oothanliwa a Muluku. Wooniheriwa iwo onrowa opacerya vaavo ‘àna a Muluku’ aronwe wiirimu nuumala ohihimuxiwa, vanrowa aya omukhaliherya Kristu waapwetexa atakhali ni owoopola atthu a ‘muttitthi mulupale’ wira akele elapo esya.—Wis. 7:9, 14.
18. Onrowa wuncerereya sai otaphuwa wa apinaatamu owiiwelela, nto wanikisa waya anrowa ophwanya otaphuwa xeeni?
18 Nto apinaatamu owoopowa anoophwanya otaphuwa ohitonko aya woona, otaphuwa woohilupatthiwa ni Satana ni minepa sawe. (Wis. 20:1-3) Otaphuwa wekeekhai! Nto, Kristu ni mamwene wala alipa a mukuttho a 144.000, anoovikaniha waataphula apinaatamu, evarelaka muteko mukuttho wa yowoopola mpakha omaliha etampi eravihiwa ahu ni Adamu. (Wis. 5:9, 10) Nuumala wooniherya ororomeleya hata alupatthiwaka, apinaatamu anoophwanya otaphuwa woomalela Yehova olakenle awe wa apinaatamu, eyo piiyo, “otaphuwa n’uvuwa w’àna a Muluku”. Nkuupuwelani ela: Khamunrowa-tho woonaka ovila opaka yootthuna ya Muluku, okhala wira erutthu enrowa okhala yoomalela, nto mikhalelo sanyu sinoolattanaka ni mikhalelo sa Muluku.
19. Olelo va, exeeni enitthuneya ahu opaka wira nitaphuwe tthiri?
19 Nyuwo munniphavela woona “otaphuwa n’uvuwa w’àna a Muluku”? Akhala wira munniphavela muhaana weettihiwaka ni ‘ikano somalela sinopola’. Nto mwiimananiheke omusoma Biibiliya. Mweemye ekeekhai wira yeettiheke okumi anyu. Nvekeleke munepa woowaarya. Muttottele mureerelo muloko wa oKristau ni sowiixuttiha sa Yehova. Satana ohoowokeni ntoko anwonke awe Eva, khiyuupuwela wira sooruma sa Muluku ti soovila weettela. Tthiri ekeekhai wira Satana mulavilavi. Masi ntoko ninrowa ahu woona muru onittharelana, khaninrowa ‘oweriwa ni Satana, mana nosuwela simphavelawe’.—2 aKor. 2:11.
[Ilatarato sa epaaxina 14]
Kiireke nlelo kimphavela ‘weettela murima aka ntoko atthu a mulaponi’?
[Ilatarato sa epaaxina 14]
Kinniiriha ekeekhai okhala mweettelo aka wa okumi?