Moota Yehova Sinnaattamela Awe

‘Mmwattameleke Muluku, owo onowattamelani’.​—YAK. 4:8.

MUNOONELA SAI . . .

Nlattulo na Yehova wira nimwaattameleke?

Marehereryo a Yehova voohimya sa yowoopola?

Muluku orumiha wira Nuulumo nawe nilempwe mwa enamuna enona ahu okhweya wiiwexexa?

1. Etthu xeeni enitepa waasivela apinaatamu, nto ti pani onirowa waakhwaniherya yoophavela eyo?

APINAATAMU waasivela opatthana ni atthu akina. Atthu pooti ohimmwa wira “apatthani, akhala wira atthu awo, anniphentana ni osuwelana saana mukina ni mukhwaawe”. Okhala wene hiyo onisivela opatthana atthu yaale anniphenta, annivaha efaita ni onoonela vatthu. Hata vari siiso, ole onitthuneya ahu opatthana vowaavikana atthu otheene ti Mpattuxa ahu Muulupale.​—Mus. 12:1.

2. Yehova onnileiherya exeeni, masi xeeni atthu anceene ahinikupali aya?

² Yehova onnintumererya mBiibiliyani wira ‘nimwattamele’, nave owo onrowa ‘onattamela’ hiyo. (Yak. 4:8) Tthiri masu awo toohakalaliha! Hata vari siiso, atthu anceene anuupuwela wira khivaniweryaneya Muluku owaattamela, maana anoona wira khanifai, ni wira Muluku ootepa waarakamela. Nto niireke tthiri khivaniweryaneya omwaattamela Yehova?

3. Etthu xeeni enisuwela ahu voohimya sa Yehova?

³ Ekeekhai eri-vo tiila “Muluku khankhala ottaiwene ni hiyo”, nto khula mutthu onrowa omphavelasa, onoowerya omusuwela Yehova. (Mmusome Miteko 17:26, 27; Esalimo 145:18.) Muluku ahu oniphavela wira hata apinaatamu aryeene oohimalela amwaattameleke, nave owo ori oolikaneene wira owaakhelele ntoko apatthani awe a vamurimani. (Yes. 41:8; 55:6) Mwaha woomusuwela saana Yehova, nasalimo mmosa aalempe so voohimya sa Yehova: “Nyuwo munniwìwa ale anovekelani, tivó atthu othene annorwelani. Òreriwa t’ale anathanlanyu, ale anaroihelanyu okhala vaté vanyu”. (Esal. 65:3, 5) Yowiiraneya enihimmwa mBiibiliyani sa Mwene Asa a oYuda, ennivaha ntakiheryo na mutthu aamwaatamenle Muluku ni moota Yehova saamwaakhunle awe.a

MWIIXUTTE ETTHU MWA NTAKIHERYO NA KHALAI

4. Ntakiheryo xeeni navahale awe Mwene Asa, wa atthu a oYuda?

⁴ Mwene Asa aahikhalela nthiti okokhorela wa ekeekhai, khuwoomola anamararuwa yaakhala mutemplo, khupwexakasa ilatarato suulaanale mulaponi mme. (1 Mam. 15:9-13) Olavulaka vohoova, Asa ahaatumererya atthu otheene wira ‘amphaveleke Yehova, Muluku a axitithi aya, ni wira yetteleke ikano ni soruma sawe’. Yehova aahireeliha iyaakha 10 soopacerya sa omwene wa Asa, khunvaha murettele wowaatta. Nto Asa oona wira murettele ole wotheene waakhuma wa pani? Owo ahaaleela atthu wira: “Elapo ahu yophwanya murettele, okhala wira nihaphavela Apwiya Muluku ahu. Nattharaka sisale Apwiya, awo ànivaha murettele mulaponi mwahu mothene”. (2 Wah. 14:1-7) Vano nwehe ele yaakhumelenle muhoolo mwaya.

5. Etthu xeeni yaakhumelenle yaamwiirihale Asa omuroromela Yehova, nto wuukiseryani waya yaakhumelenle exeeni?

⁵ Nkahaya muupuwele, nyuwo muryeene mwene Asa. Mwene Zerahi a wEthiyopia, orineene anakhotto 1.000.000 ni ikaaro 300, onnoorwa owana ni aYuda. (2 Wah. 14:8-10) Nyuwo mwaarowa opaka exeeni okathi waarowa anyu owoona anakhotto anceene arwaaka otuphela omwene anyu? Nyuwo moosuwela wira anakhotto anyu ari 580.000 paahi! Nto niireke osuwela wira khula nakhotto anyu mmosa, onrowa owanaka ni anyokhani anli, waarowa owiiriha wiikoha muriki xeeni Muluku onaahiya awe awanani ahu arwaaka onituphela? Niireke mwaha wowoova mwaarowa ororomela osuwela wanyu paahi? Etthu yapakale awe Asa enooniherya wira owo aanimuroromela vaalupale Yehova. Oryeene ooluttuweliwa aahilompa oriki: “[Yehova] Muluku ahu, munikhaliherye! Tthiri ti nyuwo ninlipanahu; ni nsina nanyu ti nirwiyahu womola muttitthi ula w’atthu. [Yehova], nyuwo mwà Muluku ahu, ahikhalé mutthu ontthuna woweryani”. Vano Yehova aakhunle sai nivekelo nooluttuwa na Asa? Yehova ‘ahaxintta anakhotto’ a wEthiyopia. Khuuvo nnakhala nakhotto mmosa aawenrye woopowa ekhotto ele!​—2 Wah. 14:11-13.

6. Etthu xeeni yaapanke awe Asa ekhanle ahu oomutakiha?

⁶ Exeeni yaamwiirihale Asa ororomela waakiheriwa ni Muluku? Biibiliya onihimya wira “Asa ahira sorera va maithoni va [Yehova], ntoko sìralyawe Davidi”, nave ‘murima wa Asa wahimusivela Yehova’. (1 Mam. 15:11, 14) Hiyo-tho nihaana omurumeela Yehova ni murima ahu wotheene. Eyo etthu yootepexa otthuneya wira nenna-va niiraane ni yena mpakha muhoolo. Hiyo nihaana wooniherya oxukhurela wahu okhala wira Yehova topacenrye onaattamela hiyo ni onikhaliherya wira nivikanihe waattamana ni yena! Vano nrowe nithokorerye inamuna piili sa moota Muluku onikhalihenrye awe.

YEHOVA OONAATTAMELA HIYO ORWEELA WA YOWOOPOLA

7. (a) Etthu xeeni Yehova opanke awe enniiriha omwaattamela? (b) Mwa itthu sotheene Muluku sipanke awe, etthu xeeni yuulupale enooniherya onaattamela wawe?

⁷ Yehova ohooniherya waaphenta wawe apinaatamu mwaha wa opattuxa elapo ela yooreera enikhala ahu. Owo nlelo onnooniherya oniphenta wawe okhala wira onninivaha itthu sooreerela wira nikhale akumi. (Mit. 17:28; Wis. 4:11) Etthu yootepexa otthuneya ennivaha awe ti yoolya ya omunepani. (Luka 12:42) Muluku onnilipiherya wira owo mwaneene onrowa owiriyana mavekelo ahu. (1 Yoh. 5:14) Masi, enamuna emosa yuulupale Muluku ennaattamela awe ti niphento noonihenrya awe orweela wa yowoopola. (Mmusome 1 Yohani 4:9, 10, 19.) Yehova aahimuruma “Mwan’awe mmosene”, wira orwe elapo ya vathi wira onoopole mwa etampi ni okhwa.​—Yohani 3:16.

8, 9. Muritti xeeni Yesu orina awe mwa yoolakela ya Yehova?

⁸ Yehova ohiiriha wira hata atthu yaale yaatonko okhala valaponi ohinatthi orwa Kristu attottele mureerelo yowoopola enivanhe awe. Okhuma vaavale Yehova aahimmye awe vahinatthi wira aamoorwa Moopoli wa apinaatamu, Yehova oona ntoko wira yowoopola yaahiliviwa khuluwi, maana aanisuwela wira yoolakela kheninteeleya. (Maph. 3:15) Nuuvira iseekulu sinceene, murummwa Paulo aahimuxukhuru Muluku okhala wira ‘Yesu Kristu ophwanyiha wopowa’. Ahincererya-tho oriki: ‘Muluku ohòniherya exariy’awe, mana khalai ahivilela, khuhahukhumu atthu mwaha wa itampi saya’. (aRom. 3:21-26) Tthiri Yesu ookhalana muritti muulupale wowiiraaniha atthu ni Muluku!

⁹ Yesu tokhanle enamuna emosa paahi ya atthu omusuwela Yehova ni ophwanya wiiraana ni yena. Nto Biibiliya onittittimiherya sai ekeekhai ela? Paulo aalempe so: ‘Vano Muluku onithonyerya khuluwi oniphenta wawe. Tthiri Kristu ònikhwela hiyo, varyahu anatampi’. (aRom. 5:6-8) Hiyo khanivahiwe mukuttho wowoopola wa Yesu mwaha woophwanelela, masi nivahiwe okhala wira ninniphentiwa. Yesu aahimmye so: “Khavo onwerya okirwela miyo, ahithanliwe n’Atithi”. Okathi mukina aahimyale-tho so: “Khavo onwerya orowa w’Atithi, ahivinre wa miyo”. (Yoh. 6:44; 14:6) Tthiri Yehova onirumeela munepa awe wootteela ni Yesu wira waakhaliherye atthu omwaattamela yena ni okhala moophentani Mwawe wira yaakhele ekumi ehinimala. (Mmusome Yuda 20, 21.) Vano thokoreryani-tho enamuna ekina Muluku ennaattamela awe.

YEHOVA ONNINAATTAMELA ORWEELA WA NUULUMO NAWE NOOLEMPWA

10. Exeeni Biibiliya onniixuttiha awe ennikhaliherya omwaattamela Muluku?

¹⁰ Mpakha-va, hiyo noorumeela soolepa sa iliivuru sa Biibiliya sovirikana sowiiraka 14. Nahaarina Biibiliya, naarowa osuwela sai wira vanniweryaneya omwaattamela Mpattuxa ahu? Ahaakhanle Biibiliya, naarowa osuwela sai mukuttho wa yoowoopola ni wira ninnimwaattamela Yehova orweela wa Yesu? Orumeelaka munepa awe wootteela Yehova ahaaruma atthu omulepa Biibiliya, yoowo onnixuttiha makhalelo awe oovara murima ni yoolakela awe yuulupale. Mwa ntakiheryo, eliivuru ya Okhuma 34:6, 7, Yehova aahimuhimeerya Moise wira owo ti Muluku ‘òmoriwa ikharari ni òvilela, òpisa onanariwa, òrera murima ni òroromeleya. Onarerela murima atthu ni an’aya n’osulu aya mpakha oholo; onileva sottheka saya ni ohìwelela waya n’itampi saya’. Ti pani ohiniphavela wiiraana ni mutthu moota owo? Yehova onnisuwela wira vaavo vaniixutta ahu itthu sinceene silempwale mBiibiliyani, nnooweryaka omusuwela saana ni omwaattamela.

11. Xeeni varya aya vootthuneya hiyo ophavela osuwela saana makhalelo a Yehova? (Nwehe elatarato yoopacerya.)

¹¹ Etthokiheryaka moota nikhanle ahu owaataana saana ni Muluku, masu oopacerya a eliivuru Achegue-se a Jeová anihimya so: “Khula opatthani onikhumelela, onnilipa akhala wira atthu awo annisuwelana ni ovahana efaita. Tivonto makhalelo ooreera a Muluku ntoko sinooniheriwa aya mBiibiliyani, aniphwanela osommwaka ni otokosiwa saana”. Tthiri hiyo nihaana oxukhurelaka okhala wira Yehova ohiiriha Nuulumo nawe olempwa mwa enamuna hiyo apinaatamu nikhanle ahu owiiwexexa!

12. Xeeni Yehova ohalaka waaruma apinaatamu wira amulepe Biibiliya?

¹² Yehova anwerya oruma malaikha wira amulepe Biibiliya. Ekeekhai wira malaikha annisiveliwa owoona apinaatamu vamosa ni miteko saya. (1 Ped. 1:12) Tthiri malaikha yanwerya olepa mowaakuveya ihapari sa Muluku wa apinaatamu. Masi niireke awo yanwerya okhalana muupuwelelo ni moonelo woolikana ni apinaatamu? Niireke awo yaamusuwela ohimya itthu sinnithowa, sootteettheya sahu, ni iye sininlela ahu? Nnaari, Yehova onnisuwela wira mmwaha ola, malaikha khiyaarowa ovara saana muteko owo. Mwaha wa Yehova waaruma apinaatamu omulepa Biibiliya, onninikhweela omwiiwexexa. Hiyo nnooweryaka woona mupuwelo ni moonelo wa ale yaarummwale omulepa Biibiliya ni atthu akina aniromoliwa. Hiyo ninniwoonela othunku mwaha wa itthu saakhulumula, itthu saawiiriha ohoverya, woova, ni ohimalela waya ntoko apinaatamu, nave-tho ninnihakalala naasomaka itthu sawiiriha ohakalala. Ntoko profeta Eliya, atthu otheene yaamulepa Biibiliya yaari atthu “ntoko hiyo”.​—Yak. 5:17.

13. Xeeni munoona anyu masu a nivekelo na Yona okhala oovara murima?

¹³ Mwa ntakiheryo, nkuupuwelani akhala wira nlaikha nanwerya ohimya saana moonelo wa Yona, okathi profeta owo aatthyanwe awe muteko aarummwale awe ni Muluku. Tthiri ti vootepa oreera woona wira Yehova aamurumme Yona wira olepe itthu saamwiiranenle, ohela mpuwa onvekela wawe Muluku ni murima wotheene, okathi aarya awe mowiixani mphareya! Yona onihimya so: ‘Movelavelani mwaka kinnimwihana Yehova, owo onnikakhula’.​—Yona 1:3, 10; 2:1-9.

14. Xeeni munoona anyu okhweya wiiwexexa masu alavuliwe ni Yesaya?

¹⁴ Muthokorerye-tho ele Yehova aamurumme awe Yesaya olepa voohimya sa yoowo mwaneene. Nuumala woonihiwa ovuwa wa Muluku, profeta ole aahiixoona okhala namattheka khuhimya so: “Ayina! Korimela, kihokhwa! Miyo kikhanle mutthu a iyano sonanara, kikhalaka variyari v’atthu a iyano sonanara, ni siso komona ni maitho ak’ala Mwene, [Yehova] owerya sothene!” (Yes. 6:5) Nlaikha xeeni munoona anyu wira nanwerya olavula masu siisa? Masi Yesaya aahiwerya ohimya saana, ni hiyo nnowerya wiiwa saana moonelo awe.

15, 16. (a) Xeeni vanoona ahu okhweya wiiwexexa moonelo wa apinaatamu akhwiihu? Nvahe ntakiheryo. (b) Exeeni ekhanle oonikhaliherya omwaattamela Yehova?

¹⁵ Nyuwo munoona wira nlaikha nanwerya ohimya wira “nkiniphwanela”, ntoko Yakobe saahimmye awe, wala wira “miyo ki natampi”, ntoko Pedru saahimmye awe? (Maph. 32:10; Luk. 5:8) Niireke malaikha yaamukhala ‘owova’, ntoko sarya aya awiixutti a Yesu, wala munoona wira malaikha a xariya vamutthuneya wiixutta ‘olipa murima’ okathi woolupatthiwa yaalaleryaka ehapari atthu akina ntoko Paulo ni apatthani awe siira aya? (Yoh. 6:19; 1 aTes. 2:2) Nnaari, maana malaikha toomalela mwa inamuna sotheene toovirikana ni apinaatamu. Tivonto vakhala wira apinaatamu oohimalela annihimya moonelo aya, hiyo ninnoona okhweya wiiwexexa okhala wira hiyo ti apinaatamu ntoko yaawo. Okathi onisoma ahu Nuulumo na Muluku, tthiri nnoowerya ‘otteliwa murima vamosá n’ale antteliwa murima, ojikhula vamosá n’ale anìkhupanyerya’.​—aRom. 12:15.

¹⁶ Vaavo vanitthokelela ahu itthu sihimmwale mBiibiliyani sa moota Yehova saathokorerya awe arumeyi awe oororomeleya a khalai, nnoowerya wiixutta itthu sinceene voohimya sa Muluku, yoowo moopixa murima, ni moophenta oniwaattamela apinaatamu oohimalela. Eyo enoonikhaliherya omusuwela saana ni omphenta ni murima ahu wotheene. Nto eyo enooniiriha omwaattamela Yehova.​—Musome Esalimo 25:14.

MULIPIHE WATAANA WANYU NI MULUKU

17. (a) Miruku xeeni sooloka Azariya anvanhe awe Asa? (b) Asa akhoottale sai wiiwelela miruku sa Azariya, nto etthu xeeni yaakhumelenle?

¹⁷ Nuumala Mwene Asa, waaxintta anakhotto a wEthiyopia, profeta a Muluku Azariya, aahikhalana masu oreerela wa Asa ni atthu awe. Azariya aahimyale so: ‘Yehova onnikhala ni nyuwo, mwakhalakaru ni yoowo. Nyuwo mwamphavelaka, owo onrwa okumana ni nyuwo; masi nyuwo mwàmuhiya, owo onimonyanyalani’. (2 Wah. 15:1, 2) Muhoolo mwaya, Asa aahihiya wiiwelela miruku iye sooloka. Nuumala osuwela wira aarowa otupheliwa ni nwanani, mwene a onikela epheyo wa Isarayeli, Asa aavekale nikhaliheryo na atthu oSiria. Ohiya otthikela omuxonttelela Yehova wira omukhaliherye, Asa aapanke nivarihano ni atthu yahaamurumeela Yehova. Tivonto Asa valeeliwa awe so: ‘Muhira itthu s’ololo. Okhuma olelo mpakha oholo, munophwanya ikhotto’. Tthiri iyaakha sotheene saahanle sa omwene wa Asa, saahisareya ikhotto. (2 Wah. 16:1-9) Nto eyo enniixuttiha exeeni?

18, 19. (a) Etthu xeeni ekhanle ahu oopaka akhala wira noorakamelana Yehova? (b) Ninrowa owerya sai otepa omwaattamela Yehova?

¹⁸ Niheemye wira etthu ti etthu enrakamelihe ni Yehova. Akhala wira ehaavo etthu ennirakameliha ni yena, nihaana wiiwelela masu ari va Hoseya 12:7, yaawo ani: ‘Mmukupaliki Muluku anyu, muhokolowele wa yowo. Mwetteleke orera murima n’ixariya, mmuroromeleke Muluku anyu, muhojeyaka’. Vano nrowe nikhale ootepexa wattaana ni Yehova nooniheryaka oxukhurela yowoopola ni okhalela nthiti osoma Nuulumo nawe, Biibiliya.​—Mmusome Otumererya 13:5.

¹⁹ Nasaalimo mmosa aalempe so: ‘Oreriwa waka owattamelani nyuwo’ Yehova. (Esal. 73:28) Nto vaamureerela otheene ahu ophavelaka wiixutta itthu isya voohimya sa Yehova ni ophavelasa osuwela mathowa makina anniiriha omphenta yena. Niira siiso, Yehova ononaattamela nenna-va ni muhoolo wa mahiku otheene!

[Enoota]