Yesu Oovaha Ntakiheryo Na Wiiyeviha
‘Tthiri miyo kihovahani nthonyeryo, wira nyuwo-tho mwireke ntoko siwirenlyakani’—YOH 13:15.
MWAAROWA WAAKHULA SAI?
Mwaana a Muluku oonihenrye sai wiiyeviha ahinatthi okhala pinaatamu?
Ntoko pinaatamu, moota xeeni Yesu oonihenrye awe wiiyeviha?
Mareeliho xeeni akhumenle mwaha wa mweettelo woowiiyeviha wa Yesu?
1, 2. Ohiyu wookiserya wa okumi awe valaponi, etthu xeeni Yesu awiixuttinhe awe atthareli awe?
OLA ohiyu wookiserya wa okumi wa Yesu valaponi, nto oniphavela okhala ni awiixutti awe esaala ya vasulu oYerusalemu. Eriki olya yoolya ya ohiyu, Yesu aahivenya khirula ekaapa awe. Owo aahikuxa etuwalya. Nuumala vo, aahihela maasi mbasiyani anarapiha inawu sa awiixutti awe, khiyuuumiha ni etuwalya. Nuumala vo aahiwara ekaapa awe. Exeeni yaamwiirinhe Yesu ovara muteko ole wahooneliwa efaita?—Yohani 13:3-5.
2 Yesu ahaatthokiherya iiraka: ‘Nyuwo mosuwela ewirenlyakani? . . . Vano, ntoko miyo korapihalyakani inawu, kinari Pwiya ni Mwixuttihi, nave-tho nyuwo muhana orapihana inawu. Tthiri miyo kihovahani nthonyeryo, wira ni nyuwo-tho mwireke ntoko siwirenlyakani’. (Yoh. 13:12-15) Mwaha wa ovara muteko ole wahooneliwa vatthu, Yesu ahaavaha awiixutti awe ntakiheryo nooloka naarowa aya wuupuwelaka okathi wotheene wira yooniheryeke wiiyeviha muhoolo.
3. (a) Mwa ikwaha piili, Yesu aattittimihenrye sai otthuneya waya wiiyeviha? (b) Ninrowa othokorerya exeeni mwa yoosoma ela?
3 Okathi aarapinha awe inawu sa atthareli awe, khahiyo waari okathi woopacerya Yesu otumererya wiiyeviha. Khalai, okathi awiixutti awe akina yaapacenrye aya owanela ekhulupale, Yesu awooniheryaka mwaana aakilanthe vakhiviru vawe, ahaalela wira: ‘Ole onimwakhela mwanamwane ola mwa nsina naka, onikakhela miyo. Vano ole onikakhela miyo, onimwakhela ole okirumme. Tthiri ole ori mwamukhanixa mwa nyuwo othene, yowo t’uri mulupale’. (Luka 9:46-48) Asuwelaka wira aFarisi yaaniphavela ovuwihiwa, Yesu muhoolo mwaya aahilavula wira: ‘Tthiri othene ale anisinnuwiha, anoyevihiwa, vano ale aniyeviha, animwinnuwihiwa’. Ela ethoonyeryo yoowi Yesu aaphavela wira awiixutti awe yiiyeviheke, wala wisuumaaliha, ni osyaka nrima ni wiittottopa. Wira niwehe moota wootthara ntakiheryo nawe, nithokorerye saana ntakiheryo nawe na wiiyeviha. Ninrowa-tho oweha moota hiyo ni atthu akina anittottela aya mureerelo naiyevihaka.
‘MIYO NKIKHONTTE, NKITTHIKENLE OTTULI’
4. Mwaana oopacerya a Muluku ooniherye sai wiiyeviha ahinatthi orwa valaponi?
4 Mwaana oopacerya a Muluku, aahiiyeviha pooti ahinatthi orwa valaponi. Ahinatthi okhala pinaatamu valaponi, Yesu aahikhala iyaakha sihinikontareya ni Tiithi awe wiirimu. Eliivuru ya profeta Yesaya, elavulaka sa wataana wa Mwaana ola ni Atithawe enihimya so: ‘Apwiya Muluku àkixuttiha molumo aya, khukivaha miruku. Khula oxa, annitthukula máru aka wira kiwiriyaneke, ntoko mwixutti óleleya. Apwiya Muluku àkitthukula owaruni: vano miyo nkikhontte, nkitthikenle ottuli’. (Yes. 50:4, 5) Mwaana a Muluku ahooniherya wiiyeviha ni aaniwiriyana saana sowiixuttiha sa Yehova. Owo aanisiveliwa ni ophavela wiixuttihiwa ni Muluku ekeekhai. Tthiri Yesu ahaataana vanceene ni aahiweha ntakiheryo na wiiyeviha wa Yehova vaavo aamorela awe ikharari alipa oottheka!
5. Ntoko nlaikha nuulupale wala Mikhayeli, moota xeeni Yesu ovanhe awe ntakiheryo na wiiyeviha mmwaha ole waakhumelenle ni Diabo?
5 Khahiyo wira anamwane otheene wiirimu yaamwiiyeviha ntoko Mwaana ola oopacerya a Muluku. Ohiya wiixutta masu a Yehova, nlaikha nenlo naipanke okhala Satana Diabo, naahipacerya okhalana muupuwelo wowiixunuwiha ni wiipaka munyokhani, mwaha wa nrima ni omurukunuwela Yehova. Masi, Yesu aanisiveliwa ni okhulupale aavahiwe awe wiirimu; khonarumeele moohiloka okhulupale awe. Ntoko nlaikha nuulupale wala Mikhayeli, Yesu khatonko ovara etthu ehirummwe awe; ntoko okathi yoole ‘aanyakulihanne awe ni Diabo voohimya sa murutthu wa Moise’. Yesu aahiphavela wira Yehova yoowo ori Namaphuka Muulupale molumwenku mothene wira aphuke mwaha ole mwa enamuna yamusivela ni okathi woopthwanelela.—Mmusome Yuda 9.
6. Yesu oonihenrye sai wiiyeviha, vaavo eemerenrye awe orumeela ntoko Mesiya?
6 Moohaaniherya, itthu Yesu aaxuttale awe ahinatthi orwa valaponi, saahela muhina iprofesia saarowa wiiraneya mookumini mwawe valaponi ntoko Mesiya. Vano, aahisuwela itthu sootakhala saarowa omukhumelela. Nto Yesu aheemererya orwa valaponi wira akhwe ntoko Mesiya aalaiheriwe. Mwaha wa xeeni? Attittimiheryaka wiiyeviha wa Mwaana oopacerya a Muluku, murummwa Paulo aahilepa so: ‘Yesu owo khakhanyerenrye ovarexexa makhalelo awe òMuluku: masi ahirula oMuluku úwo , ahìkhaliha epottha, aìlikanyihaka n’atthu’.—aFil. 2:6, 7.
NTOKO PINAATAMU, OWO ‘AHIYEVIHA’
7, 8. Yesu oonihenrye sai wiiyeviha okhuma onamwane, ni okathi aavara awe muteko valaponi?
7 Paulo aalempe so: Yesu ‘òneyaka ntoko atthu akina, ahìyeviha nlelo, aìkhalihaka òwìwelela mpakha okhwa’. Ovinyerya onamwane awe, Yesu oovaha ntakiheryo na wiiyeviha. Nnaamwi aayariwe ni Yosefe ni Maria atthu yaawo yaari oohimalela, masi mowiiyeviha Yesu ‘aniwiwelela yawo’. (Luka 2:51) Tthiri nla ntakiheryo nooloka wa amiravo yaale anrowa oreelihiwa ni Muluku mwaha wa owiiwelela anamuyari aya!
8 Okathi annunwe awe, Yesu ahooniherya wiiyeviha vaavo aapweha awe opuro woopacerya yootthuna ya Yehova ohiya yootthuna awe. (Yoh. 4:34) Mmuteko awe woolaleerya, Yesu Kristu aanirumeela nsina na Muluku, Yehova ni anaakhaliherya ale yaaphavela osuwela saana mikhalelo sa Yehova, ni yoolakela awe wa apinaatamu. Nave Yesu aneettela sowiixuttiha sa Yehova. Mwa ntakiheryo, nivekelo nle noosuwelaxiwa, Yesu aahilavula wira: “Tith’ihu, muri wirimu! Nsina nanyu nivuwihiwe”. (Math. 6:9) Yesu aahiwiixuttiha atthareli awe wira ovuwiha nsina na Yehova ekhaleke etthu yoopacerya mookumini. Yesu aneettela masu awo. Ahalaka vakhaani omaliha muteko awe valaponi, Yesu aahilavula okathi anvekela awe Yehova ariki: ‘Miyo kihasuweliha [arummwa] nsina nanyu, nave kinotepa wasuweliha’. (Yoh. 17:26) Masi, okathi aavara awe muteko, Yesu anvuwiha Yehova mwa itthu sotheene apanke awe valaponi.—Yoh 5:19.
9. Exeeni profeta Zakariya aahimmye awe yaarowa omwiiraneela Mesiya, nto yaakhwanenle sai wa Yesu?
9 Voohimya sa Mesiya, mprofeta Zakariya aahilepa so: ‘Nyuwo atthu òSiyoni, mutthapeke, mutteliweke murima: nyuwo atthu òYerusalemu, mòpeke elulu votteliwa murima. Mòneke: mwené anyu onnorwelani. Owo t’òphentiwa ni Muluku ni t’òweryexa. Yowo t’òwiyeviha: onnorwa anwenlene bùru mwamukani’. (Zak. 9:9) Eprofesia ela yahiiraneya okathi Yesu aakela awe muYerusalemu ohinatthi Paskuwa eyaakha ya 33 E. C. Muttitthi waahirula ikaapa saya ni sahinta makukhu a mwiri ni enaatala mphironi. Nto, atthu a esidade yotheene yaahixenkereya ni okela wa Yesu oYerusalemu. Masi pooti okathi yoole Yesu aakhuweleliwa awe ntoko Mwene, owo aari owiiyeviha.—Math. 21:4-11.
10. Exeeni yoonihenrye wira Yesu aari owiiwelela mpakha okhwa?
10 Yesu oryeene valaponi, mwaha wa wiiyeviha ni wiiwelela wawe aahikhwa vamwirini wa nihaaxeryo. Mwekeekhai owo aahooniherya moohihoverya wira apinaatamu anoowerya okhala oororomeleya wa Yehova pooti yeehereriwaka mootepa. Nave Yesu ahooniherya wira Satana moohiloka aanihimya wira apinaatamu animurumeela Yehova mwaha wa nrima. (Yob 1:9-11; 2:4) Ororomeleya woomalela wa Yesu, onnooniherya exariya ni ophwanelela wa Yehova okhala mukhulupale a olumwenku wotheene. Nekeekhai Yehova onnitteeliwa murima vaavo onweha awe iweleliwaka mwanawe moohihiyererya.—Musome Miruku 27:11.
11. Mukuttho onoopola wa Yesu Kristu onikumiherya nlipelelo xeeni wa apinaatamu owaamini?
11 Okhwa wa Yesu vamwirini wa nihaaxeryo, wooliverya esisapo ya owoopola apinaatamu. (Math. 20:28) Mukuttho onoopola wa Yesu ohaavaha apinaatamu eparakha ya okumi woohimala vaavo aniiwelela aya sooruma sa exariya. ‘Sisale yottheka ya mutthu mmosá pahi yaphwanyalyaya ehukhumu atthu othene, siso-tho miteko sorera sa mutthu mmosá pahi sihaphwanyiha exariya atthu othene, khwavaha ekumi’. (aRom. 5:18) Okhwa wa Yesu woohula ephiro ya ekumi ehinikhwa wa maKristau oothanliwa, ni ekumi yoohimala valaponi wa ‘ipwittipwitthi sikina’.—Yoh. 10:16; aRom. 8:16, 17.
KAMUTTHU OOMAALA NI OWIIYEVIHA
12. Yesu ooniherya sai wiiyeviha ni omaala, mmoota aakhapelela awe apinaatamu?
12 Yesu aahaalattula ‘othene akhulumunwe’ ariki: ‘Mukirwele miyo: komumuliheni. Mukuxé muritti onovahakani: miyo ka mutthu òmala ni òwiyeviha mwirá siso, munophwanya murettele’. (Math. 11:28, 29) Mikhalelo sa wiiyeviha sa Yesu ni omaala, waahimwiiriha Yesu ohaathanla atthu okathi aaryaawe ni apinaatamu. Owo khaalipelela atthareli awe opaka itthu yahaawerya aya. Yesu aanaattottopela ni waalipiha. Owo khaawiiriha awiixutti awe woonaka wira khaniwerya etthu wala kharina efaita. Tthiri Yesu khaahaaxa atthu wala waalupattha. Masi, owo anaalipiherya wira yamurweela owo khiyeettela sowiixuttiha sawe, awo yaarowa omumula, okhala wira muritti awe ti wooveya ni owo tooreera murima. Alopwana ni athiyana a khuta munnuwelo khiyoova omwaattamela Yesu.—Math. 11:30.
13. Yesu aawoonela sai othunku atthu yaale yahaathokoreriwa?
13 Moota aataana awe ni anaIsarayeli yaari oohivuwa, enooniherya wira Yesu anaamorela ikharari mwaha woohicaleliwa; nto owo anaakhaliherya. Waattamela oYeriko, owo aahimphwanya mulipa-ahoona aihaniwa Bar-Timeyo ni mwaapara awe ohiromoliwe nsina. Awosa yaahivikaniha onvekela Yesu nikhaliheryo, masi muttitthi wa atthu wanaamaaliha ananariwe ene. Tthiri okathi ole vammukhweela Yesu ohaathokorerya alopwana ale yahoona! Masi Yesu aahivekela wira alopwana ale eruuhiwe, nto aahiwoonela othunku khitthukula maitho aya enoonasa. Tthiri Yesu aamutakiha Tiithi awe, Yehova vaavo moowiiyeviha onaamorela awe ikharari anatampi.—Math. 20:29-34; Mar. 10:46-52.
‘OLE ONÌYEVIHA, ONOTTITTIMIHIWA’
14. Mareeliho xeeni anikhumelela mwaha wa wiiyeviha wa Yesu.
14 Wiiyeviha wa Yesu Kristu valaponi onnikumiherya ohakalala ni mireerelo sinceene. Yehova aahitteeliwa murima onweha Mwanawe onimphenta awe aiwelelaka yootthuna ya Muluku mowiiyeviha. Murummwa Paulo aahilipihiwa ni mukhalelo wowiiyeviha wa Yesu. Ntakiheryo nawe, sowiixuttiha sawe ni waattottopela wawe atthu moophenta, waaniwiiriha akina okelela ohoolo momunepani. Hata atthu yaale oohivuwa yaanittottela mureerelo wiiyeviha wawe mwaha woowi yaaneemererya nikhaliheryo nawe, sowiixuttiha sawe ni olipiha wawe. Nto, atthu otheene aniiwelela anrowa waakhela mareeliho a mukuttho onoopola wa Yesu.
15. Yesu ottottenle sai mureerelo mwaha wa wiiyeviha wawe?
15 Nto Yesu aari sai? Niireke wiiyeviha waahimukhaliherya? Aayo, owo aahaaleela awiixutti awe wira: ‘ole onìyeviha, onottittimihiwa’. (Math. 23:12) Yesu aneettela masu ala mookumini mwawe. Paulo onitthokiherya ariki: ‘Tivó Muluku ònvuwiha [Yesu] vanjene, khunvaha nsina novikana masina othene, wira sothene sikokhorele nsina na Yesu, iye siri wirimu n’iye siri mulaponi n’iye siri mowixani, ni wira atthu othene elaleye wira: “Yesu Kristu ti Pwiya, ni siso envuwihe Muluku Tithi”. Mwaha wa Yesu okhala owiiyeviha ni ororomeleya valaponi, Yehova Muluku omwiinuwiha Mwanawe, khunvaha okhulupale ovikana soopattuxiwa sotheene siri wiirimu ni elapo ya vathi.—aFil. 2:9-11.
YESU ONROWA ‘OWANELA EKEEKHAI NI EXARIYA NI MURETTELE’
16. Exeeni enooniherya wira Mwaana a Muluku onoovikaniha wiiyeviha mmiteko sawe sotheene?
16 Wiiyeviha onrowa ovikanihaka mmiteko sa Mwaana a Muluku. Alavulaka moota Yesu aarowa awe owana ni awanani Awe nuumala ovahiwa okhulupale wiirimu, nasalimo aahiipa ariki: ‘Murowé, mwawanele ekekhai n’ixariya ni murettele’. (Esal. 45:5) Mwaha wa ekeekhai ni exariya, Yesu Kristu onrowa owana mwaha wa wiiyeviha mwa ekhotto ya Armagedoni. Exeeni enrowa wiiraneya wanikisa wa Olamulelo awe wa Iyaakha Ekonto Emosa, vaavo Mwene Mesiya onkela awe ‘wapwetexa makhulupale othene n’ikuru sothene n’uwerya wothene’? Niireke onimooniherya-tho wiiyeviha? Aayo, okhala wira ‘ononvahererya sothene Muluku Tithi awe’.—Mmusome 1 aKorinto 15:24-28.
17, 18. (a) Nthowa xeeni varyaaya vootthuneya arumeyi a Yehova omutakiha Yesu wira yiiyeviheke? (b) Ninrowa othokorerya exeeni esumana eyo?
17 Ankhi hiyo? Ninrowa otthara ntakiheryo na wiiyeviha nivahiwe ahu ni Yesu? Ninrowa okhala sai okathi Mwene Yesu Kristu onirwa awe ophukela va Harmagedoni? Etthu enkela awe owanela ori ophavela owoopola paahi anaxariya ni ale aniiyeviha. Nto wira noopowe, nihaana wiiyevihaka. Ntoko wiiyeviha wa Yesu onvahale aya mireerelo ni waakhaliherya akina, nto wiiyeviha wahu onookumiherya mireerelo sinceene.
18 Exeeni enrowa onikhaliherya otthara ntakiheryo na Yesu na wiiyeviha? Ninrowa wiilipiha sai wira niiyeviheke nnaamwi siniphwanyaka mixankiho sinceene? Makoho ala anrowa othokoreriwa yoosoma ya esumana enittharelana.
[Elatarato epaaxina 15]
Moota xeeni ntakiheryo na Yesu noowiiyeviha ninnikhaliherya aya?
[Elatarato epaaxina 16]
Omoriwa ikharari wa Yesu ntakiheryo nuulupale