“Kinnaphenta Atithi”

1, 2. Murummwa Yohani aahimmye exeeni voohimya sa ohiyu wookiserya arummwa yaari aya ni Yesu?

MULOPWANA mmosa oowuuluvala onnuupuwela itthu sinceene, nto moottharelana onnixuweya mureka awe muncucuni muri etinta. Nsina nawe ti Yohani, ni ti murummwa ookiserya a Yesu Kristu nlelo ohanle ory’ene mukumi. Soovira iyaakha 70 nuumala Yesu okhwa, vano, Yohani orina iyaakha sowiiraka 100, owo onnuupuwela itthu sotheene saakhumelenle ohiyu wookiserya yoowo Yesu aari awe ni arummwa awe ohinatthi okhwa. Okhaliheriwaka ni munepa wootteela wa Muluku, Yohani onniwerya wuupuwela ni olepa moohihiya etthu, itthu sotheene saakhumelenle.

² Ohiyu ole, Yesu aahihimya mowiiwanyeya wira moohipisa aarowa wiiviwa. Paahi Yohani tonihimya nthowa naya Yesu aahimmye awe wira aarowa wiiviwa mmukhalelo wootakhala. Aahimmye so: “Vano vanrerela wira atthu othene esuwele wira miyo kinnaphenta Atithi, ni wira kinnetta ntoko Atithi sikirummyaya. Venyani, nrowé”.​—Yohani 14:31.

3. Yesu oonihenrye sai wira onnaaphenta aTithi awe?

³ “Kinnaphenta Atithi”. Khiivo etthu yaari yootthuneya wa Yesu ovikana waaphenta aTithi awe. Masi, khahiyo wira Yesu aalavula paahi masu awo ikwaha sinceene. Mwekeekhai, masu awo alempwale nipuro nimosa paahi mBiibiliyani mu Yohani 14:31, vaavo Yesu vanihimya awe mooluluwanya waaphenta wawe aTithi awe. Hata vari siiso, okumi wotheene wa Yesu wahooniherya ekeekhai ya masu awo. Khuta nihiku, omphenta wawe Yehova waanooneya. Olipa murima wa Yesu, wiiwelela, ni ovilela wawe sooniherya omphenta wawe Muluku. Ophenta iwo ti waamwiiriha ovara muteko awe valaponi.

4, 5. Biibiliya onttittimiherya muthinto xeeni wa ophenta, ni exeeni enihimmwa sa moota Yesu amphenta awe Yehova?

⁴ Olelo va, atthu akina pooti wuupuwelaka wira wooniherya ophenta ti nthoonyeryo na olosowa. Awo pooti wuupuwelaka ipoema ni masipo oophentana, khino ophenta wookhummwa murima, waaniheryasa ophenta onihela muhina osivelana wa mulopwana ni muthiyana. Biibiliya onnilavula sa ophentana wa mulopwana ni muthiyana, masi onilavula mmukhalelo woottittimiheya, ohiya ntoko sinilavuliwa aya olelo va. (Miruku 5:15-21) Ikwaha sinceene Nuulumo na Muluku ninnilavula sa ophenta, masi ninttittimiherya muthinto mukina wa ophenta. Muthinto wa ophenta onttittimiheriwa mBiibiliyani khahiyo okuxeya murima paahi aahiiso osiveliwa okathi vakhaani; nnakhala khahiyo etthu ehirina yoolakela aya aahiiso etthu enaamwiixuttiwa oxikola. Muthinto owo wa ophenta onihela muhina murima ni muupuwelo. Onikhuma vamurimani, ohooleliwaka ni ovarihanaka ni malamulo maalupalexa, ni onooniheriwa ni miteko sooloka. Ophenta iwo khahiyo okhummwa murima mwa okathi vakhaani. Tthiri, Nuulumo na Muluku nnihimya wira “ophenta khummala-tho”.​—1 aKorinto 13:8.

⁵ Eriyari ya apinaatamu otheene atonko okhala, khuuvo amphenta Yehova monvikana Yesu. Tthiri, khuuvo mutthu onvikanne Yesu mu waakhwaniherya yooruma ya Muluku yeeyo Yesu yaahimmye awe okhala yuulupalexa oriki: “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene n’ikuru sanyu sothene!” (Marko 12:30) Exeeni yaamukhalihenrye Yesu wuncererya omphenta Yehova? Exeeni yaamwiirinhe Yesu ovikaniha olipiha omphenta Muluku okathi aary’awe valaponi? Ninrowa omutakiha sai?

Ophentana Wekeekhai Weiwo Opacenrye Khalaixa

6, 7. Ninsuwela sai wira eliivuru ya Miruku 8:22-31 enimuhimya Mwaana a Muluku, ohiya paahi miruku sirina ahu?

⁶ Mootoko ovara muteko vamosa ni mpatthani anyu ni khiweha wira ovara muteko hoothe woolipiha opatthani anyu? Yowiiraneya eyo yoovara murima, pooti okhaliherya osuwela oratteene ophentana okhanle eriyari ya Yehova ni Mwanawe mmoseene. Ikwaha sinceene hiyo noolavula sa Miruku 8:30, masi nrowe nthokorerye saana eversiikulu eyo, niwehaka itthu sinihimmwa mu iversiikulu siri ottuli n’iye sinttharelana. Okhuma eversiikulu 22 mpakha 31, ninniphwanya masu yuupuxeriwe ni Muluku yaawo anihimya sa miruku sirina mikhalelo sa omutthu. Ninsuwela sai wira masu awo animuhimya Mwaana a Muluku?

⁷ Mu eversiikulu 22, miruku sinihimya so: “Apwiya àkipattuxa, kikhalaka muraji mwa miteko saya, okhuma wopajeryani, ehinatthi opattuxa etthu ekina”. Tthiri, yookhala etthu ekina eniheliwa muhina ohiya paahi miruku, okhala wira miruku khasitonko ‘opattuxiwa’. Miruku khasirina ephattuwelo aya, okhala wira Yehova khorina ephattuwelo awe ni okathi wotheene owo namiruku. (Esalimo 90:2) Masi, Mwaana a Muluku “t’òpajerya mwa sopattuxiwa sothene”. Owo aaroopakiwa aahiiso opattuxiwa; toopacerya mwa soopattuxiwa sotheene sa Yehova. (aKolosi 1:15) Elapo ni erimu ehinatthi opakiwa, Mwaana iira okhanle ene ntoko sinihimya aya eliivuru ya Miruku. Ntoko Nsu, eyo piiyo, Namuhupi a mwaneene Muluku, Mwaana owo aari ethoonyeryo yoolokexa ya miruku sa Yehova.​—Yohani 1:1.

8. Muteko xeeni Mwaana aavara awe okathi wotheene ovinre ohinatthi orwa valaponi, ni nuupuweleke exeeni vaavo vaniweha ahu itthu sipattuxiwe?

⁸ Muteko xeeni Mwaana aavara awe, okathi wotheene ovinre ohinatthi orwa valaponi? Eversiikulu 30, NM, ennileela wira Mwaana owo aari ni Muluku ntoko “funti a miteko”. Eyo entaphulela exeeni? Eliivuru ya aKolosi 1:16 entthokiherya so: “Mwa yowo Muluku òpattuxa itthu sothene wirimu ni vathí, . . . Muluku òpattuxa sothene mwa Kristu: sothene sipattuxeriwe yowo”. Nto, Yehova Mpattuxa, aahivara muteko ni Mwanawe, Funti a Miteko, wira opattuxe itthu sotheene, opacerya soopattuxiwa somunepani siri wiirimu, khiyarowa olumwenku ola wotheene, elapo ya vathi ni itthu sooreera siri vathi vaava, ntoko miri ni inama sa khuta muthinto, ni wanikisa waya, aahipattuxiwa pinaatamu valaponi. Mmikhalelo sinceene, hiyo pooti olikanyiha wiiraana okhanle eriyari ya Tiithi ni Mwaana, ntoko nxinyero onivara muteko awe vamosa ni mulipa-ooteka, yoowo oniteka itthu ottharihelaka muupuwelo ni osuwela wa nxinyero. Vaavo vanttottopela ahu khuta etthu epattuxiwe, mwekeekhai, hiyo nninvuwiha Nxinyero Muulupale. (Esalimo 19:2) Nave-tho, hiyo nohaana wuupuwelaka wiiraana woohakalaliha okhanle okhuma khalai eriyari ya Mpattuxa ni “funti [awe] a miteko”.

9, 10. (a) Exeeni yaalipinhe ophentana wa Yehova ni Mwanawe? (b) Exeeni enrowa olipiha omphenta wanyu Tiith’inyu a wiirimu?

⁹ Vaavo apinaatamu anli oohimalela vanivara aya muteko hoothe, ikwaha sinceene sinnikhumelela mixankiho. Masi mixankiho iyo khasitonko omwiiraneela Yehova ni Mwanawe! Mwaana ola oovara muteko vamosa ni Tiithi awe iyaakha ikonto soohikontareya, ni okathi owo wotheene aari ootteeliwa “murima okhala vamaithoni vawe okathi p’ukathi”. (Miruku 8:30) Aayo, Mwaana aanisiveliwa okhala vamosa ni Tiithi awe, nave-tho Tiithi aanisiveliwa okhala hoothe ni Mwanawe. Mwekeekhai, Mwaana aahinnuwa otepaka okhala ntoko Tiithi awe, iixuttaka otakiha mikhalelo sa Muluku. Tivonto nihintikhina ahu wira wataana wa Tiithi ni Mwaana waari wuulupale! Nto, pooti ohimmwa moohivonya wira iwo ti ophentana wekeekhai weiwo opacenrye khalaixa molumwenkuni.

¹⁰ Ophentana iwo onniixuttiha exeeni? Waaniheryasa, nyuwo munuupuwela wira khamunwerya ophentana ni Yehova mmoota owo. Ekeekhai wira khuuvo mmosa a hiyo orina eparakha eyo yuulupalexa ntoko Yesu. Hata vari siiso, hiyo nookhalana okathi wooreerela wira naataane ni Muluku. Muupuweleke wira etthu yaamwiirinhe Yesu wataana ni Tiithi awe waari ovaraka muteko N’uwo. Moophenta, Yehova onninivaha okathi wooreerela wira ‘nivare vamosá muteko awe’. (1 aKorinto 3:9) Vaavo vanitthara ahu ntakiheryo na Yesu mmuteko woolaleerya, okathi wotheene hiyo nohaana wuupuwelaka wira muteko owo ninvara ni Muluku. Nto, vaavo vanivara ahu muteko ni Yehova, omphenta wahu onnincerereya ni onnilipa. Niireke wira yookhala eparakha ekina yuulupale enivikana ovara muteko vamosa ni Muluku?

Moota Yesu Aavikaninhe Awe Olipiha Omphenta Wawe Yehova

11-13. (a) Nthowa xeeni vary’aya vooloka woonaka ophenta orina ahu ntoko etthu ekumi, ni exeeni yaamukhalihenrye mmiravo Yesu ovikaniha olipiha omphenta wawe Yehova? (b) Moota xeeni Mwaana a Muluku oonihenrye awe ophavela wiixuttihiwa itthu ni Yehova, ohinatthi orwa valaponi, ni muhoolo mwaya ntoko pinaatamu?

¹¹ Mmikhalelo sinceene, ti vooloka woonaka ophenta orina ahu vamurimani ntoko etthu ekumi. Ntoko ifilori saaliwe mujardim, ophenta wohaana okhuwariwa ni okhapeleliwa wira wunnuwe ni okumiherye mireerelo. Ophenta ohincaleliwa aahiiso ohinkhuwariwa onkhala wootteettheya ni wanikisa waya onnimala. Yesu khaavevereiha omphenta wawe Yehova. Ory’ene valaponi, Yesu aanivikaniha olipiha ni weettiha saana omphenta wawe Yehova. Nrowe noone moota aawenrye awe opaka eyo.

¹² Nkahaya muupuwele-tho ele mmiravo Yesu aahimmye awe mowiiwanyeya, voohimya sa wataana waarina awe ni Yehova, okathi aary’awe mpaani mwa Muluku, oYerusalemu. Muupuweleke moota aawaakhunle awe axitiithi awe yaawo yaari ooxankiheya: “Mwakiphavelela-ni? Khimwasuwela wira kihana othokorerya itthu s’Atithi aka?” (Luka 2:49) Oryeene mmiravo, waaniheryasa Yesu khuupuwela etthu voohimya sa okumi awe wiirimu ohinatthi orwa valaponi. Masi, owo aanimphenta vanceenexa Tiithi awe, Yehova. Aanisuwela wira okhala wene, ophenta moota owo wooniheriwa mookokhorelani. Ti nthowa aya wahaakhanle aya opuro mukina valaponi waamusivela Yesu ovikana empa ya Tiithi awe yeeyo yaatekeliwe okokhorela wooloka. Owo aanisiveliwa okhala mpaani mwa Muluku ni khaaphavela okhuma-mo. Masi, khahiyo wira aamukilaathi paahi khiyaweha itthu saapakiwa mpaani mmo. Yesu aaniphavela vanceene wiixutta voohimya sa Yehova ni olavula itthu saasuwela awe. Ophavela iwo khahiyo waapacenrye okathi aarina awe iyaakha 12, hata khiwaamanle okathi yoole.

¹³ Okathi aary’awe wiirimu ohinatthi okhala pinaatamu, moohakalala Mwaana aahiixuttihiwa itthu sinceene ni Tiithi awe. Eprofesia emosa elempwale mu Yesaya 50:4-6 enooniherya wira Yehova aahimwiixuttiha Mwanawe itthu sa vameekh’aya voohimya sa muteko awe ntoko Mesiya. Nnaamwi itthu iyo saahela muhina mixankiho saarowa omphwanya ntoko Oowoottihiwa a Yehova, Mwaana ola aahiixutta itthu iyo moohakalala. Muhoolo mwaya, nuumala orwa valaponi ni wunnuwa, nlelo Yesu aanivikaniha orowa mpaani mwa Tiithi awe ni wiirela mpantta okokhorela ni wiixuttiha, weiwo Yehova aaphavela awe wira ovahiweke mpaani mme. Tthiri, Biibiliya onnihimya wira Yesu aahilimalela orowa mmithukumanoni, seiyo siiriwa mpaani mwa Muluku ni musinagoga. (Luka 4:16; 19:47) Akhala wira ninniphavela olipiha omphenta wahu Yehova ni okhumela saana, nohaana okhalelaka nthiti orowela mithukumano sa eKristau, seiyo sinnivaha okathi wa omukokhorela Yehova, wuncererya osuwela wahu ni omuxukhurela.

14, 15. (a) Nthowa xeeni Yesu aaphavela awe okhala mekhawe okathi mukina? (b) Moota xeeni mavekelo a Yesu wa Tiithi awe yooniherya aya wataana ni nttittimiho?

¹⁴ Nave-tho, Yesu aahivikaniha olipiha omphenta wawe Yehova ovekelaka ikwaha sinceene. Nnaamwi Yesu aari mutthu oopatthaneya ni oosiveliwa okhala n’atthu akina, ti vowooneya saana wira aanivaha efaita okhala mekhawe okathi mukina. Mwa ntakiheryo, Luka 5:16 onihimya wira: “Yesu ahilimalela orowa mapuro yahaviraviriwa, wira alompe”. Nave-tho, Matheyo 14:23 onihimya so: “Vàmwanre awe, ahiwela mekhawe vamwako wiphini wira alompe. Vailalyaya, nlelo ari weiwo, mekhawe”. Okathi owo ni okathi mukina, Yesu aahithanla okhala mekhawe paahi, eyo khentaphulela wira owo aari mutthu aatthuna okhala mekhawe paahi, aahiiso ahaaphavela okhala n’atthu akina, masi owo aaphavela okhala ni Yehova paahi, wira alavule mootaphuwa ni Tiithi awe munivekeloni.

¹⁵ Okathi aavekela awe, Yesu aanirumeela nuulumo noowi “Abbá, Tithi!” (Marko 14:36) Mmahiku a Yesu, nuulumo noowi “Abbá” naataphulela “tithi” ni nooniherya wataana wa mwaana ni tiithi awe. Ikwaha sinceene, nno naari nuulumo noopacerya wiixuttiwa ni mwaana onampacerya olavula. Masi, nuulumo nno nooniherya nttittimiho. Nnaamwi nooniherya wataana wa Mwaana onilavula ni Tiithi awe oophenta, nave-tho, nuulumo nno nooniherya ottittimiheya wa Yehova ntoko tiithi. Mavekelo otheene a Yesu yaawo alempwale mBiibiliyani annooniherya ovarihana okhanle eriyari ya wataana ni nttittimiho. Mwa ntakiheryo, mu ekapiitulu 17 ya Yohani, murummwa Yohani oolepa sa nivekelo nimosa noorakama ni nookhuma vamurimani nenno Yesu aapanke awe ohiyu wookiserya ohinatthi wiiviwa. Tthiri, ti woovara murima wiixutta yootaphulela ya nivekelo nne, nave-tho ti vootthuneya otakiha, ohiya otthikela olavula masu ale yaalavuliwe ni Yesu, masi wiixutta inamuna sa olavula ni Tiithi ihu a wiirimu ni murima ahu wotheene ikwaha sinceene siniwerya ahu. Opaka eyo onimwiiriha omphenta wahu Tiithi ihu okhala wekeekhai ni woolipa.

16, 17. (a) Moota xeeni Yesu oonihenrye awe waaphenta wawe aTithi awe orumeelaka masu? (b) Nlikanyiho xeeni na Yesu nnooniherya ovaha wa Tiithi awe?

¹⁶ Ntoko niwenhe ahu ottuli, Yesu khaarumenle ikwaha sinceene masu oowi “Kinnaphenta Atithi”. Masi, ikwaha sinceene owo aahooniherya waaphenta wawe aTithi awe orumeelaka masu. Moota xeeni? Yesu mwaneene aahimmye so: “Miyo kinnottottopelani, Tithi, mwanene wirimu ni vathí”. (Matheyo 11:25) Okathi othokorenrya ahu Mpantta 2 wa eliivuru ela, hiyo nihoona wira Yesu aanisiveliwa waattottopela aTithi awe, aakhaliheryaka atthu akina omusuwela Muluku. Mwa ntakiheryo, owo aahimulikanyiha Yehova ni tiithi aari oophavela omulevelela mwanawe oohiiwelela, yoowo aakhumme vatthokoni, masi nuuvira wa okathi, mwaana owo mmiravo aahirukunuxa murima ni aahuupuwela otthikela vatthokoni va tiithi awe, nto tiithi ole nuumala omoona mwaana ole orwaaka otteiwene, aahimutthimakela, khimukupaarela. (Luka 15:20) Niireke wira ookhala mutthu ohinikuxeya murima nuumala osoma nlikanyiho nno na Yesu voohimya sa ophenta ni olevelela wa Yehova?

¹⁷ Ikwaha sinceene, Yesu aahimuttottopela Tiithi awe mwaha wa ovaha Wawe. Owo aahirumeela ntakiheryo na axitiithi oohimalela wira ooniherye moota Tiithi ahu onrowa awe onivaha munepa wootteela nimphavela ahu. (Luka 11:13) Nave-tho, Yesu aahilavula sa nlipelelo nenno Tiithi ninvaha awe moohakalala. Yesu aahitthokiherya moohakalala yoolipelela awe ya ottikiheriwa wiirimu wira akhaleke ni Tiithi awe. (Yohani 14:28; 17:5) Aahaahimeerya atthareli awe voohimya sa yoolipelela yeeyo Yehova enivaha awe “nikoto namukhani” na Kristu, yoolipelela ya orowa wiirimu ni wiirela mpantta olamulelo wa Mwene a oMesiya. (Luka 12:32; Yohani 14:2) Nave-tho aahimmaaliha mutakhali mmosa yoowo aahala okhwa, omuleelaka sa nlipelelo na okumi onrowa okhala mParayiisu. (Luka 23:43) Olavula voohimya sa ovaha wuulupale wa Tiithi awe mmikhalelo iya, moohaaniherya waahimukhaliherya Yesu olipiha omphenta wawe Yehova. Atthareli anceene a Kristu annoona wira khiivo etthu ekina enlipiha omphenta waya Yehova aahiiso nroromelo naya, ovikana olavula sa Yehova ni yoolipelela enaavaha awe ale animphenta.

Nyuwo Munomphenta Yehova Mmutakihaka Yesu?

18. Enamuna xeeni yuulupalexa enitthuneya ahu omutakiha Yesu, ni nthowa xeeni?

¹⁸ Mu inamuna sotheene sintthuneya ahu omutakiha Yesu khiivo eri yootepa otthuneya ovikana ela: Omphenta Yehova ni murima ahu wotheene, okumi ahu wotheene, muupuwelo ahu wotheene, ni ikuru sahu sotheene. (Luka 10:27) Omphenta wahu Yehova mmoota owo, khontaphulela paahi okhalana muupuwelo wa omphenta, masi nohaana wooniherya-tho ni miteko sahu. Yesu khaahakalanle paahi ni muupuwelo wa omphenta Tiithi awe aahiiso olavula paahi wira “Kinnaphenta Atithi”. Owo aahimmye wira: “Vanrerela wira atthu othene esuwele wira miyo kinnaphenta Atithi, ni wira kinnetta ntoko Atithi sikirummyaya”. (Yohani 14:31) Satana aahimmye wira khuuvo pinaatamu onrowa owerya omurumeela Yehova mwaha wa omphenta. (Yobi 2:4, 5) Wira aakhule oratteene wootha wootakhala wa Satana, moolipa murima Yesu ohooniherya mulaponi motheene, moota samphenta awe Tiithi awe. Owo aahimwiiwelela Tiithi awe mpakha ovaha okumi awe. Niireke wira munoomutakiha Yesu? Nyuwo munoowerya wooniherya mulaponi motheene wira tthiri munnimphenta Yehova Muluku?

19, 20. (a) Nthowa xeeni nuulupalexa ninniiriha ohicompelaka mithukumano sa eKristau? (b) Nooneleke sai yoosoma ahu ya Biibiliya, wuupuwelela itthu siniixutta ahu, ni mavekelo ahu?

¹⁹ Ophavela vanceene itthu somunepani, onniniiriha wooniherya ophenta iwo. Yehova oopaka tthiri marehereryo wira nikokhoreleke mmukhalelo onikurunuxa murima ni onlipiha omphenta wahu Tiithi ihu. Okathi onikhala anyu mmithukumanoni, muupuweleke wira murowenle omukokhorela Muluku anyu. Inamuna sikina sa okokhorela, sinihela muhina owiriyana ni murima wotheene mavekelo anipakiwa, wiipa masipo animuttottopela Yehova, owiriyana itthu sinihimmwa ni ovaha ikomentaario vaaweryaneyaka vale. Nave-tho, mithukumano iyo sinnoovahani okathi wooreerela wira mwaalipihe anna eeKristau. (aHéberi 10:24, 25) Ohicompela omukokhorela Yehova mmithukumanoni sa eKristau onimookhaliheryani wuncererya ni olipiha omphenta wanyu Muluku.

²⁰ Nave-tho, omphenta wahu Muluku onnilipa vaavo vaniira ahu yoosoma ya Biibiliya, wuupuwelela oratteene itthu siniixutta ahu, ni ovekela. Mwaapakaka itthu iyo muhaana wuupuwela wira muri nyuwo ni Yehova paahi. Vaavo vanisoma anyu Nuulumo noolempwa na Muluku ni wuupuwelela ele esomme anyu, Yehova onnoosuwelihani muupuwelo awe. Okathi onivekela anyu, nyuwo munimuleela Yehova itthu siri vamurimani vanyu. Muupuweleke wira nivekelo khahiyo paahi onvekela itthu Muluku. Nave-tho, nivekelo okathi wooreerela omuxukhurela Yehova mwaha wa mareeliho mwaakhenle anyu ni omuttottopela mwaha wa miteko sawe sootikiniha. (Esalimo 146:1) Moowuncererya, omuttottopela Yehova moohakalala eriyari ya atthu akina, eri enamuna yooloka ya omuxukhuru Yehova, ni wooniherya wira ninnimphenta.

21. Moota xeeni omphenta Muluku ory’aya wootthuneya, nto exeeni enrowa ahu othokorerya mmiru sinttharelana?

²¹ Omphenta Muluku tekhanle esiiri enookhaliheryani ophwanya ohakalala woohimala. Wira Adamu ni Eva akhumele saana yahaana omphenta Muluku, masi awo khiyaarina ophenta iwo. Omphenta Muluku teri etthu yootepa otthuneya wira yookhaliheryeni oxintta khuta etthu eneehererya nroromelo nanyu, okhoottela soweeha, ni ovilela mixankiho sotheene. Eyo tekhanle etthu yootthuneya wira mutthu okhale mutthareli a Yesu. Mwekeekhai, omphenta Muluku onihela muhina waaphenta apinaatamu akhw’ihu. (1 Yohani 4:20) Miru sinttharelana, hiyo ninrowa ovarerya moota Yesu soonihenrye awe waaphenta atthu. Mmuru onittharelana, hiyo ninrowa othokorerya ele atthu anceene yoona aya okhala vookhweya olavulana Yesu.