NIIREKE OLAVULA WANYU ONIKHALA “‘Ayo’ ni ‘Hoye’”?

Nkuupuwelani etthu ela: Mutokweene mmosa yoowo oniirela mpantta Ekrupu ya Axitokweene Anilavula ni Ixipitaali, oopaka marehereryo wira alaleerye ni munna mmiravo Domingo vaasiisu. Nto vaasiisu wa nihiku nle, mutokweene ole onniligareliwa mootutuxerya ni munna mukina yoowo amwaarawe amwiirale asidente a kaaro nto khuroihiwa hospitali atthimakihiwaka. Munna ole onninvekela mutokweene wira amukhaliherye omphwanya mediku onrowa weemya omuloola mwaarawe voohimuhelela ephome. Vano, mutokweene ole onnimulela munna mmiravo, wira khonirowa olaleerya ni yena mwaha woophavela okhaliherya emusi ele ekhumeleliwe oretta wootutuxerya.

Vano muupuwele-tho ela: Maama mmosa oohitheliwa orina anamwane araru, oolattuliwa ni emusi ekina ya muloko awe wira orowe vapuwani waya makaaripi. Okathi onaaleela awe anaawe wira oolattuliwa, awosa annihakalala. Anamwane ale aahakalala mwaha woolattuliwa. Masi vahalaka nihiku nimosa, emusi ele yaalattunle enihimya wira ehaavo etthu ekhumelenle nto nlattulo nle khinniweryaneya-tho. Muhoolo mwaya maama ole onnisuwela etthu ene. Nuumala omulattula maama ole, emusi ele yaahilattuliwa orowa waaxukurya apatthani akina, nto khweemya.

Ntoko maKristau nihaana waakhwaniherya ele ehimyale ahu. Niheemye wira moolumo yaahimyale ahu wira ‘ayo’ akhale ‘hoye’. (2 aKor. 1:18) Masi, ntoko soonale ahu matakiheryo manli, khula etthu eniireya ti yoovirikana. Okathi mukina hiyo pooti ohiwerya waakhwaniherya etthu yaahimyale ahu. Hata murummwa Paulo yaahimwiiraneela etthu emosaru.

PAULO AHOOTHERIWA WIRA KHONAKHWANIHERYA MASU AWE

Mwaakha wa 55 EC, Paulo oryeene wÉfeso, mukwaha awe wa neeraru wa omisionaariyo, owo aaphavela olapuwa ephareya ya Egeu wira orowe oKorinto, nto avikane orowaka oMasedonia. Otthikelaka oYerusalemu, owo aahuupuwela oxukurya muloko wa oKorinto emaara ya nenli, woonasa wene ophavelaka okuxa soovaha saya wira aavahererye anna oYerusalemu. (1 aKor. 16:3) Ela ennooneya saana va 2 aKorinto 1:15, 16, ninsoma ahu so: ‘Kikupaliki siso, kahitthokelela opajerya woxekuryani, wira kòphwanyiheni oreriwa imara pili. Kivenyeryaka weiwo, kamurowa oMasedonia, katthika oMasedonia weiwo mwanwerya okikhaliherya mmukwaha aka wa oYudeya’.

Vanikhala ntoko wira Paulo khalai ene aahilepa ewarakha aaleelaka anna ale sa palano awe oorowa aKorinto. (1 aKor. 5:9) Nuumala waalepela epaphelo eyo, moohipisa Paulo aahileeliwa ni atthu a etthoko ya Klowe wira waahikhala oovaanyihana wuulupale mmulokoni. (1 aKor. 1:10, 11) Nto Paulo onnilakela omuturuka palano awe oopacerya, ni onnilepa epaphelo yeeyo vano enisuweliwa okhala 1 aKorinto. Mwa epaphelo ela Paulo onnivaha muruku ni soolaka. Owo onnihimya-tho wira ohaana omuturuka palano a mukwaha awe ni wira wanipacerya onirowa oMasedonia nuumala-vo nto orooke oKorinto.​—1 aKor. 16:5, 6.a

Vanikhala ntoko wira okathi anna oKorinto yaakhenle aya epaphelo ele, atthu akina yaihimya okhala “arummwa alupalexa” muloko ole, yaahimootherya Paulo ariki khonaakhwaniherya masu alaihenrye awe. Wira atthokiherye, Paulo aahimmye so: ‘Khino miyo kinorukuneya? Wala sotthokelela saka mwaha wa muteko aka, ti sowupuwela sa mutthu? Munona wira miyo kinihimya wira: ‘Ayo’ ni ‘Hoye’ okathi omosaru?’​—2 aKor. 1:17; 11:5.

Vano nikoheke so, niireke tthiri Paulo ‘amurukuneya’? Nnaari! Nuulumo nitaphuleliwe va ‘orukuneya’, nimmuhimya mutthu ohinaakhwaniherya ele ehimmye awe, mutthu ohinihimya ekeekhai, ohinroromeleya. Okoha wa Paulo wira ‘sotthokelela saka ti sowupuwela sa mutthu?’ waanimwiiriha mutthu wuupuwela saana, nto maKristau a oKorinto yahaana woona saana wira ele Paulo aalakela awe opaka, masi khuhipaka khahiyo waari mwaha wa ohiroromeleya.

Tivonto Paulo aahiruna wootheriwa wawe, olepaka so: “Muluku ti namona òroromeleya wira molumo kinohimeryakani, khahiyó ‘ayo’ ni ‘hoye’”. (2 aKor. 1:18) Tthiri etthu yaamwiirinhe omuturuka palano, Paulo aaphavela mureerelo wa anna ni arokora a oKorinto. Va 2 aKorinto 1:23, ninnisoma wira ‘nlelo nkitthikenle-tho oKorinto, wira kihokhupanyiheni’. Ekeekhai, Paulo ahaavaha okathi aKorinto wira alokiherye saana itthu ohinatthi orowa. Ntoko suupuwela awe, oryeene oMasedonia Paulo aahimwiiwa Tito wira anna yaahisoma epaphelo awe nto khuriipiwa murima ni opaka marukunuxo, eyo yaahimwiiriha Paulo ohakalala wuulupale.​—2 aKor. 6:11; 7:5-7.

YESU TONNILIPIHERYA

Wootheriwa wa Paulo wira kaakhwaniherya masu awe, waarowa otaphulela wira khonihimya ekeekhai okumi awe wa khula nihiku, ni wira ele yaalaleya awe yaari yoohiroromeleya. Masi, Paulo aahiwuupuxerya aKorinto wira owo ahaalaleerya voohimya sa Yesu Kristu. Mwaana a Muluku, Yesu Kristu, “yowo òlalenryahuni”, eyo piiyo, Paulo, Silvano ni Timótheyo, Yesu khahiyo ‘ayo’ ni ‘yohe’ masi ‘ayo’ tekhanle mwa yoowo. (2 aKor. 1:19) Okhala wira Paulo aamutakiha Yesu, niireke Yesu Kristu, aari oohiroromeleya? Nnaari! Yesu oryeene valaponi mmuteko awe woolaleerya, khula okathi aalavula ekeekhai. (Yoh. 14:6; 18:37) Akhala wira ele yaalaleerya awe Yesu yaari yekeekhai ni yoororomeleya, ni wira Paulo aalaleya ihapari simosaru, nto ele yaalaleya awe yaari-tho yekeekhai.

Tthiri, Yehova ti Muluku ‘òroromeleya’. (Esal. 31:6) Ninnisuwela eyo mwaha wa ele Paulo aalempe awe moottharelana wira: ‘Sothene Muluku sanihimenryawe sihakhuleliwa ni Yesu wira ‘Ayo’’. Yesu Kristu aahivikaniha okhala oororomeleya oryeene valaponi ni aahooniherya wira anatiri otheene a Muluku toororomeleya. Paulo onnivikaniha ohimya wira: “Siso-tho, mwa Yesu, ninnimwakhulela Muluku wira: ‘Ayo’, wira ninvuwihe yowo”. (2 aKor. 1:20) Yesu yoowo-tho ori “Amén” ti mutthu onnilipiherya wira khula natiri a Yehova Muluku tekeekhai ni onimwaakhwanela!

Ntoko siisaale Yehova ni Yesu sinilavula aya ekeekhai, Paulo khula okathi anaakhwaniherya ele yaalavula awe. (2 aKor. 1:19) Owo khahiyo aari mutthu oohiroromeleya, onipaka itthu ottharihelaka soophavela sa erutthu. (2 aKor. 1:17) Masi owo aneettihiwa ni munepa wa Muluku. (aGal. 5:16) Okathi aathokorerya awe atthu akina, owo aaphavela mureerelo aya. Tthiri moolumo awe oowi Aayo yaakhala Aayo!

NIIREKE MOOLUMO ANYU OOWI AAYO ANITAPHULELA TTHIRI AAYO?

Mahiku ala, eri etthu yoolema wa atthu yaale ahineettela malakiheryo a Biibiliya, olaiherya etthu nto khiyaturuka akhala wira ahoona muxankiho onayevaru, wala akhala wira ahoona etthu ekina enaasivela ovikana ele yaahimyale aya. Mmyaha sa anakoso, moolumo oowi “ayo” ikwaha sikina khantaphulela “ayo”, hata yaalempwale moolumo awo yaavarihaniwe. Anamunceene khanoona ekasamento okhala natiri wa atthu anli onitthuneya okhalaka mahiku otheene. Waatta wa nummero na atthu animwalana onooniherya wira anamunceene nlelo khanivaha efaita ekasamento, anoona okhala etthu ehinilipihereya.​—2 Tim. 3:1, 2.

Ankhi nyuwo? Niireke moolumo anyu oowi Aayo tthiri anitaphulela Aayo? Ekeekhai wira ntoko sithokorenrya ahu wanipacerya, ennikhumelela etthu ekhanle oomwiiriha mutthu omuturuka palano awe, ohiya mwaha wa okhala ohiroromeleya, masi mwaha wa ohiwerya opaka etthu eyo. Masi akhala wira nyuwo ntoko muKristau moolaiherya opaka etthu, nto muhaana wiimananiha opaka khuta etthu eniwerya anyu wira eweryaneye. (Esal. 15:4; Math. 5:37) Opaka eyo onowiiriha atthu woona wira nyuwo mutthu onikupaleya, oororomeleya, onilavula ekeekhai okathi wotheene. (aÉf. 4:15, 25; Yak. 5:12) Okathi atthu awo anoona aya wira nyuwo mutthu oororomeleya mwa itthu sa khula nihiku, woonasa wene vanimwaasivela wiiwa masu anilaleya anyu voohimya sa Omwene wa Muluku. Tivonto nrowe niimananihe wira moolumo ahu oowi Aayo akhale tthiri Aayo!

[Enoota]