Masu Anyu Owi Aayo Ekhaleke Aayo
‘Olavula wanyu wakhala Ayo okhaleke Ayo, Nnari akhaleke Nnari.’—MATH. 5:37.
MOONE AKHALA WIRA MUNNIWERYA WAAKHULA:
Exeeni Yesu olavunle awe voohimya sa ommana natiri wala olipela?
Nthowa xeeni Yesu oryaawe ntakiheryo nooloka voohimya sa olavula ekeekhai?
Inamuna xeeni mookumini mwahu, nintthuneya ahu olipiherya nuulumo nahu noowi Aayo okhala tthiri Aayo?
1. Exeeni Yesu aalavunle awe sa olipela, nave nthowa xeeni?
OKHALA wene, maKristau ekeekhai khanitthuneya olipela. Mwaha woowi aniiwelela masu a Yesu iirale so: ‘Olavula wanyu wakhala Ayo, okhaleke Ayo’. Owo aaphavela ohimya wira mutthu ahootheke. Nto owo aapacenrye olavula wira: ‘Muhilipelé mothaka’. Yesu aahilavula masu ala aapwapwelaka atthu yaale anilaphela itthu soohisuwanyeya okathi anivaanela aya ni khiyalipela ikwaha sinceene nnaamwi ehiphavelaka opaka ele enihimya aya. Mwaha wa otepiha waya wira ‘Aayo wala Nnari’ yoothaka; atthu awo anooniherya mukhalelo aya woohiroromeleya onikumiheriwa ni ‘mutakhali’.—Mmusome Matheyo 5:33-37.
2. Niireke khula enamuna ya olipela ti woohiloka? Mutthokiherye.
2 Niireke Yesu aahimya wira khula enamuna ya natiri ti yoohiloka? Vaniweryaneya sai okhala oohiloka? Ntoko niixuntte ahu muru ovinre, Yehova Muluku ni murumeyi awe a xariya Abrahamu, okathi wareerela aya yaanimmana natiri. Nave Nlamulo na Muluku naanihimya wira mutthu ahaana olapha okathi wa ophuka milattu. (Okhum. 22:10, 11; Moth. 5:21, 22) Waaniheryasa pooti otthuneyaka muKristau olipela mwekeekhai vaavo oniirela awe onamoona okathi wa ophukiwa milattu. Wala okathi mukina muKristau pooti woona oloka olipela wira aaroromelihe akina okathi onikhaliherya awe ophuka mwaha. Yesu khaakhoottale masi ahaakhula mweekeekhaixa vaavo aakohiwa awe ni Alipa oophuka milattu aYuda. (Math. 26:63, 64) Masi Yesu khaatthuneya omulaphela mutthu. Nnaamwi vari siiso, okathi Yesu aattittimiherya awe masu awe, owo aapacerihaka ni moolumo oowi: ‘Kinolèlani ekhweli’. (Yoh. 1:51; 13:16, 20, 21, 38) Nkahaya niwehe matakiheryo a Yesu, Paulo ni akina yaawo masu aya oowi Aayo yaakhala Aayo.
YESU—ORI NTAKIHERYO NOOLOKA
3. Okathi Yesu anvekenle awe Tiithi awe a wiirimu aamulaihenrye exeeni?
3 ‘Muluku aka, miyo kiri va. Kirwenle wira kìreke otthuna wanyu’. (aHéb. 10:7) Masu ala a ntaphulelo nuulupale a Yesu, ahiivahererya wa Muluku ovara miteko sothene salaiheriwe sa Osuulu, ohela muhina ‘olummwa nnawu’ ni Satana. (Maph. 3:15) Khaavo pinaatamu otonko wiivahererya mmuteko woovila ntoko owo. Yehova aahilavula wiirimu ooniheryaka omuroromela Mwanawe, nto Yesu khaatthuneya olipela wa masu awe.—Luka 3:21, 22.
4. Yesu ooniherya sai moolumo awe oowi Aayo okhala Aayo?
4 Yesu eettela masu aalaleya awe; iira Aayo, aakhala Aayo. Owo kheemerenrye wira itthu sikina simooceelihe ovara muteko aarummwe awe ni Atithawe wira alaleye ihapari sooreera sa Omwene wa Muluku ni waapaka awiixutti a atthu yaale Muluku aamuroihela awe. (Yoh. 6:44) Biibiliya onihimya ororomeleya wuulupale wa Yesu mmasu ala: ‘Sothene Muluku sanihimenryawe sihakhuleliwa ni Yesu wira ‘Ayo’’. (2 aKor. 1:20) Tthiri, Yesu ntakiheryo nooloka, ele enaalaiherya awe Atithawe ti yekeekhai. Moottharelana, nrowe nimoone iimananihale omutakiha Yesu.
PAULO—,MULOPWANA A MASU EKEEKHAI
5. Ntakiheryo xeeni murummwa Paulo onivanhe awe?
5 ‘Pwiya, kìreke exeni?’ (Mit. 22:10) Ni masu ala ekeekhai, Paulo, yoowo iiriwa Saulo, aahimwaakhula Pwiya Yesu oovuwa, yoowo aamukhumelenle moolohani wira ahiye waalupattha atthareli a Kristu. Nuumala Yesu okumana ni Paulo, mowiiyeviha aahittharuwa mweettelo awe woohiloka, khibatiziwa, ni eemererya muteko muulupale wa omulaleya Yesu maloko otheene. Okhuma okathi ole, Paulo aahivikaniha omwiihana Yesu iiraka ‘Pwiya aka’, okhuma woopaceryani weiwe mpakha mahiku otheene aaryaawe valaponi. (Mit. 22:6-16; 2 aKor. 4:5; 2 Tim. 4:8) Paulo khaalikana ni atthu akina Yesu awiirenle awe wira: ‘Munikirelela-ni: ‘Apwiya! Apwiya!, muhettelaka itthu sinohimeryakani?’’ Nto, Yesu aaphavela wira ale animukupali okhala Pwiya aya, yeetteleke ekeekhai ntoko murummwa Paulo.
6, 7. (a) Xeeni Paulo aarukununxe awe eprokrama ya oxukurya oKorinto, nto atthu ale yaahikhalana ehakhi ya omulavula moohiloka? (b) Niwooneleke sai anna athanliwe waakhapelelaka anna mmulokoni?
6 Mooluttuweliwa, Paulo aahilaleya ihapari sa Omwene, wAsia Menor mpakha wEuropa apakaka miloko ni oxukurya miloko. Okathi mukina anoona otthuneya waya olipela aphavelaka olipiherya masu aalepa awe eekeekhai. (aGal. 1:20) Okathi atthu akina oKorinto yamootherya aya, owo aahilepa mowiisaakiha wira: ‘Muluku ti namona òroromeleya wira molumo kinohimeryakani khahiyó ‘Ayo! Ni Hoye! okathi omosaru’’. (2 aKor. 1:18) Okathi aalepa awe masu awo, owo aakhuma wEfeso arowaka oMacedonia wira arowe oKorinto. Wanipacerya, owo aaphavela oxukurya oKorinto ahinatthi ophiya oMacedonia. (2 aKor. 1:15, 16) Ntoko siniiraneya aya ni axitokwene anixukurya miloko, ikwaha sikina Paulo aanirukunuxa eprokrama awe ya oxukurya muloko. Eyo kheniiraneya mwaha wa soophavela saya wala itthu saamukhaani paahi, masi akhala wira ti wootthuneya. Paulo aahipisa orowa oKorinto mwaha wa mureerelo wa muloko. Mureerelo xeeni?
7 Ampanke ene palano wira axukurye oKorinto, Paulo aahiiwa wira waanikhumelela ohiiwanana ni orupihana woohiloka oKorinto. (1 aKor. 1:11; 5:1) Owo khawenle ekalawa wEfeso wira arowe oKorinto mowaakuveya; masi, Paulo aaphavela waavaha okathi anna ale wira evarihele muteko miruku aavanha awe, wira okathi aarowa awe waaxukurya yakhale oolipiheya. Aasuwelihaka saana etthu yaamwiirinhe orukunuxa eprokrama awe owo aahilepa wira: ‘Muluku akikhalele onamona, akikumihe ekumi, kariki motha: nlelo nkitthikenle oKorinto’. (2 aKor. 1:23) Nisyake waatakiha ale yaamulavula moohiloka Paulo; nto naattittimiheke akhulupale annihoolela. Otthara ntakiheryo noororomeleya na Paulo ti vooloka ntoko owo aamutakiha awe Kristu.—1 aKor. 11:1; aHéb. 13:7.
MATAKIHERYO MAKINA OOLOKA
8. Ntakiheryo xeeni Rebeka onivanhe awe?
8 ‘Kinnitthuna ayo omutthara!’ (Maph. 24:58) Ni masu ala ookhweya, Rebeka aahiwaakhula amamawe ni murokorawe wira owo ahaakhulela okhuma vatthokoni vale nihiku nenle wira eette ekwaha ya 800 ikiloometro wira akhale mwaara a mwaana a Abrahamu, Isakhi. (Maph. 24:50-58) Waakhula wawe wira Aayo waari wekeekhai; tthiri Rebeka mwaara a Isakhi, aanimoova Muluku. Okumi awe wotheene, aakhala mmixaxani ntoko namurwa Elapo Yaalaiheriwe awe. Vanceenexa, owo aahireelihiwa mwaha wa ororomeleya, nto khukhala nloko naamuyanre Yesu Kristu.—aHéb. 11:9, 13.
9. Ruthi oonihenrye sai ororomeleya ni masu awe?
9 ‘Nintthuna orwa ni nyuwo, nakhaleke n’atthu anyu’ (Ruth. 1:10) Axinaamukhweli yiihaniwa Ruthi ni Orpa yaahilavula masu ala wa pwiya mwaana aya, Nowemi aari naamukhweli yoowo aakhuma oMowabi arowaka oBethelehemu. Nowemi aahiwerya omukhanyererya Orpa otthikela elapo awe. Masi Ruthi aahithipelela wira Nnaari, kinrowa ni nyuwo. (Mmusome Ruthi 1:16, 17.) Ruthi aahihiya emusi awe ni etiini ya oMowabi khuvikaniha moororomeleya okhala ni Nowemi. Ruthi aari namakokhorela oororomeleya a Yehova, nto aahireelihiwa okhala wira onniirela mpantta wa athiyana yaale athanu a emusi ya Kristu aniromoliwa ni Matheyo.—Math. 1:1, 3, 5, 6, 16.
10. Nthowa xeeni Yesaya oryaawe ntakiheryo nooloka wa hiyo?
10 ‘Miyo kiri va kirumekeni!’ (Yes. 6:8) Ahinatthi Yesaya olavula masu ala, aahiweha ovuwa wuulupale wa Yehova akilanthe ene veehiceni Vawe mpaani mwa Isarayeli. Okathi Yehova amwaavya awe mutthu oomuruma, Yesaya aahimwiiwa Yehova ariki: ‘Kinrowa omuruma pani: onrowa olaleya mitthaka saka t’ani’. Nla naari nlattulo Yehova anvahale awe wira akhale mulipa a mihupi sa Muluku wa atthu ale oohiiwelela. Yesaya aahooniherya masu awe okhala ekeekhai wira Aayo, okhala Aayo. Moororomeleya, ovikana iyaakha 46, aahirumeela ntoko profeta aalaleya masu a maphukelo ni nlipelelo na ottikiheriwa okokhorela wekeekhai.
11. (a) Nthowa xeeni varyaaya va efaita olavulaka ekeekhai? (b) Maalikanyiho xeeni a atthu oohiroromeleya ari yoolopola wa hiyo?
11 Mwaha wa xeeni Yehova olempe awe matakiheryo ala Munuulumoni mwawe? Nto xeeni oryaaya mwaha muulupale moolumo ahu oowi Aayo okhalaka Aayo? Biibiliya onnooniherya mowiiwanyerya wira ole ‘ohinroromeleya’ oniphwanela ‘okhwa’.(aRom. 1:31, 32) Farawo a wEgito, mwene Zedekiya oYuda, vamosa ni Ananiya ni Safira ari matakiheryo oohiloka a yawo aromoliwe mBiibiliyani yahaavara ele yaahimya aya. Otheene aya yahiitakhaliha nave matakiheryo antthuna ahu osyaka.—Okhum. 9:27, 28, 34, 35; Ezek. 17:13-15, 19, 20; Mit. 5:1-10.
12. Exeeni enkela onikhaliherya waakhwaniheryaka moolumo ahu?
12 Mwaha wa ‘okhala okathi wokiserya’, hiyo noorukureriwa ni atthu ‘ohiroromeleya’, yaawo anikhala wira annimoova Muluku masi eryeene anawoothe. (2 Tim. 3:1-5) Nisyakeke waataana ni atthu awo. Nto nihaana wiimananihaka khula okathi wataana ni ale moolumo aya oowi Aayo anikhala tthiri Aayo.—aHéb. 10:24, 25.
NUULUMO NANYU NOOWI AAYO, NIHAANA EFAITA YUULUPALE
13. Makoho xeeni a faita yuulupale yaawo mutthareli a Yesu Kristu onaakhulela awe iiraka Aayo?
13 Natiri orina efaita yuulupale ori mutthu wiivahererya wa Muluku. Mwa inamuna tthaaru, yaale aniphavela okhala atthareli a Yesu annikhalana Aayo vaavo vanikohiwa aya soophavela saya. (Math. 16:24) Okathi mutthu oniphavela awe okhala namalaleerya oohibatiziwa, axitokweene annimukoha wira: “Munniphavela tthiri okhala Namoona a Yehova?” Nuuvira okathi, vaavo mutthu owo onirowa awe vahoolo wira abatiziwe, axitokweene annithukumana khiyamukoha-tho so: “Muhiivahererya wa Yehova orweela mwa nivekelo?” Wanikisa waya, nihiku na obatizo khula mmosa onnikohiwa wira: “Orweela mwa mukuttho wa Yesu Kristu, nyuwo moottharuwa itampi sanyu khwiivahereray wa Yehova wira mpakeke yootthuna awe?” Nto, eryeene ohoolo wa anamoona, alipa owiivahererya awo annaakhula wira, Aayo; yooniheryaka olapha waya wira anrowa omurumeelaka Muluku moohihiyererya.
14. Makoho xeeni ikwaha sikina anitthuneya ahu wiikohaka?
14 Hata mbatiziwe ene niinaano wala munimurumeela Muluku okhuma khalai, nyuwo muhaana ikwaha sikina wiikohaka so: “Kinnimutakiha Yesu ovikaniha weettela masu kaakhulenle aka kiiraka Aayo”? Kinnivikaniha omwiiwelela Yesu, kilaleyaka mooluttuweliwa ihapari ni waapaka awiixutti?—Mmusome 2 aKorinto 13:5.
15. Inamuna xeeni mookumini mwahu nintthuneya ahu olipiherya moolumo ahu oowi Aayo okhala Aayo?
15 Okhala oororomeleya ni wiivahererya wahu, enooniherya wira nihaana-tho ororomeleya ni myaha sikina. Mwa ntakiheryo: Nyuwo moothela? Nto, nvikaniheke ottittimiha olipela wanyu wira munrowa ophentanaka ni omukhapelela ole othelanne anyu. Niireke nyuwo moolepa eformulaario ya muteko wala ya miteko sa Muluku? Nto mulavuleke ekeekhai ni wooniherya wira ele elavunle anyu ekeekhai. Mootoko olattuliwa wira mwalye vatthokoni va mutthu ohirina itthu sinceene? Nto, muhihiye orowa iwo mwaha woowi ookhala mutthu mukina orina mihakhu oolattunleni nihiku nle. Mootoko omulaiha mutthu mmulalenrye anyu otthika omwiixuttiha myaha sikina somunepani? Nto, mwa itthu sotheene, masu anyu oowi Aayo, ekhaleke Aayo; Yehova onkeka oreeliha muteko anyu.—Mmusome Luka 16:10.
EPARAKHA ENIRWA WA MWENE AHU ORI MUHOOLELI ANAMUKUTTHO
16. Nipakeke exeeni noona wira noottheka ni moolumo ahu?
16 Biibiliya onihimya wira hiyo apinaatamu oohimalela ‘othene ahu ninnittheka inamuna sinceene’ vanceenexa moota nnirumeela ahu nlumi. (Yak. 3:2) Niireke exeeni akhala wira noottheka ni moolumo ahu? Nlamulo Muluku aavanhe awe anaIsarayeli, yaahikhala enamuna emosa ya omoreliwa ikharari ole aatthenke mwaha wa ‘olavula ahitthokelenle’. (Onam. 5:4-7, 11) Makristau anittheka moota owo olelo va, ehaavo enamuna ya oleveleliwa. Namuleela yoottheka ahu Yehova, owo ononlevelela orweela mwa Mukhulupale Anamukuttho ahu Yesu Kristu. (1 Yoh. 2:1, 2) Wira nivikanihe wataana ni Muluku nihaana ottharuwaka natttheka; nisyakaka otthikela opaka etampi eyo vaavo vaniimananiha ahu ohiya olavulaka nihuupuwenle. (Mir. 6:2, 3) Ti vooloka wuupuwela saana nihinathi oleiherya etthu nihiniwerya ahu opaka.—Mmusome Musuweli 5:2.
17, 18. Nlipelelo xeeni arina aya ale anilipiherya masu aya oowi Aayo okhala tthiri Aayo?
17 Tthiri aakhala mareeliho maalupale anamakokhorela a Yehova aniwehererya aya mwaha wa ovikaniha wakwaniherya nuulumo noowi Aayo! MaKristau 144.000 oothanliwa, anrowa waakhela okumi ohinikhwa wiirimu ni Yesu, wira ‘yakhale mamwene mpakha iyakha ekonto emosá’. (Wis. 20:6) Imilyau sinceene sa atthu animwaakhela mareeliho a Omwene wa Kristu mParayiisu valaponi. Awo ankela okhaliheriwaka wira yakhale oomalela mweerutthuni mwaya ni muupuwelo aya.—Wis. 21:3-5.
18 Yaviriha yoweeha yookiserya nuumala Iyaakha Ekonto Emosa ya Olamulelo wa Yesu, khaninrowa-tho owokanaka ni masu. (Wis. 20:7-10) Khula nuulumo noowi Aayo ninrowa okhalaka Nekeekhai, nave Nnaari, ninrowa okhalaka tthiri Nnaari. Khuta mutthu onrowa okhala oomalela amutakihaka Tiithi ahu a wiirimu, Yehova ‘Muluku òroromeleya’.”—Esal. 31:5.
[Elatarato epaaxina 29]
Okhuma obatizo wa Yesu mpakha okhwa wawe, ohaakhwaniherya ele aalaihenrye awe Atithawe.
[Elatarato epaaxina 31]
Nyuwo munnilipiherya nuulumo nanyu nenle nootthuneyaxa noowi ‘Aayo?’