Yehova Onnithukumanya Emusi Awe
‘Kinotumereryani wira mukhapelele wiwanana’ wa munepa.—AÉF. 4:1, 3.
MUNROWA OTTHOKIHERYA SAI?
Tiivi eri yoolakela ya weettihiwa wa miteko sa Muluku?
Ninkhaliherya sai ‘wiiwanana’ wa munepa wa Muluku?
Etthu xeeni enrowa onikhaliherya waareerela murima akina?
1, 2. Yoolakela xeeni Yehova orina awe ni apinaatamu vamosa ni elapo ya vathi?
MOOLUMO oowi emusi, aniwuupuxeryani exeeni? Ophentiwa? Ohakalala? Ovara muteko mowiiwanana? Wala opuro woohakalaliha mutthu oninnuwa awe, wiixutta ni olavula mootaphuwa? Eyo enoweryaneya akhala wira emusi anyu ti yoophenta. Yehova topattunxe emusi. (aÉf. 3:14, 15) Owo oniphavela wira soopattuxiwa sawe sotheene wiirimu ni valaponi sihakalaleke, ororomelana, ni wiiraana saana.
2 Nuumala Adamu ni Eva ottheka awo yaahihiya okhala emusi ya Muluku, masi yoolakela ya Yehova khiyaamanle. Tthiri owo onrowa wiiriha eParayiisu osareya anamwane a Adamu ni Eva. (Maph. 1:28; Yes. 45:18) Yehova oopaka marehereryo wira yiiraneye yoolakela awe. Eliivuru ya Biibiliya ya aÉfeso ennitthokiherya marehereryo anittittimiherya wiiraana. Nto nrowe nthokorerye iversiikulu sikina sa eliivuru ela wira noone moota wookhaliherya yoolakela ya Yehova ya wiiraaniha soopattuxiwa sawe.
WEETTIHERIWA WAYA MITEKO SA MULUKU
3. Exeeni ekhanle weettihiwa wa miteko sa Muluku sihimmwale ni aÉfeso 1:10, nto epantte yoopacerya yiiranen’ye silini?
3 Moise aahaaleela anaIsarayeeli wira: Yehova ‘ti Muluku ahu, owo ori mekhawe’. (Otum. 6:4) Miteko ni soolakela sa Yehova ti sowiiraana. Tivonto ‘numala okathi wathanliwe’, Muluku oopaka marehereryo a weettiha miteko sawe, wira soopattuxa sawe sirina ankhili siiraane. (Mmusome aÉfeso 1:8-10.) Weettihiwa wa miteko iyo, onimwiiraneya ipantte piili. Mpantta woopacerya ori otthokihiwa wa muloko wa maKristau oothanliwa anrowa okhalaka wiirimu ni Muhooleli aya Yesu Kristu. Mpantta ola, waapacenrye mPentekoositi 33 E.C., vaavo Yehova aapacenrya awe waathukumanya ale yaarowa olamulela ni Kristu wiirimu. (Mit. 2:1-4) Okhala wira makristau oothanliwa annikhalihiwa anaxariya wira ephwanye ekumi mwaha wa mukuttho wa Kristu, awo annaakhulela okhala ‘àna a Muluku’.—aRom. 3:23, 24; 5:1; 8:15-17.
4, 5. Exeeni ekhanle epantte ya nenli ya weettihiwa wa miteko sa Muluku?
4 Epantte ya nenli ori otthokihiwa waale anrowa okhalaka mParayiisu valaponi, elamuleliwaka ni Kristu Mwene Mesiya. ‘Muttitthi mulupale’, toniirela mpantta ekrupu ela. (Wis. 7:9, 13-17; 21:1-5) Okathi wa olamulelo wa Iyaakha Ekonto Emosa, atthu awo anotakaahana ni ibilyau sinceene sa atthu anrowa ohihimuxiwa. (Wis. 20:12, 13) Nkuupuwelani moota ohihimuxiwa wa alipa ookhwa onrowa aya wooniherya wiiraana wahu! Savira iyaakha ekonto emosa ‘itthu sa valaponi’, sinookhalana yoweeha yookiserya. Ale anrowa wooniherya ororomeleya anookhalihiwa ‘àna a Muluku’ valaponi.—aRom. 8:21; Wis. 20:7, 8.
5 Ipantte soopiili sa weettihiwa waya miteko sa Muluku sinniiraneya vano, wiirimu ni valaponi. Nto khuta mmosa a hiyo onrowa okhaliheryaka sai weettihiwa wa miteko sa Muluku?
‘MUKHAPELELE WIIWANANA’ WA MUNEPA
6. Soolepa sinooniherya sai wira maKristau ahaana othukumanaka?
6 Soolempwa sinihimya wira maKristau ahaana othukumanaka. (1 aKor. 14:23; aHéb. 10:24, 25) Eyo khentaphulela okumana paahi, ntoko siniireya aya ni atthu yaale anrowa opuro onitumihiwa wala oxookuni. Wiiraana wekeekhai onihela muhina itthu sinceene. Ninniphwanya wiiraana iwo vaavo vaniiwelela ahu sooruma sa Yehova ni weemya weettehiwa ni munepa woowaarya wa Muluku.
7. Ontaphulela exeeni ‘okhapelela wiwanana’ wa munepa wa Muluku?
7 Nnaamwi Yehova aakhalinhe ene anaxariya maKristau oothanliwa ntoko anaawe, masi ipwittipwitthi sikina khukhala anaxariya ntoko apatthani mwaha wa mukuttho wa Kristu; nlelo ohiiwanana pooti okhumela mwaha wa ohiloka wa elapo ela. (aRom. 5:9; Yak. 2:23) Vakhanle wira eyo kheniiraneya, nto khisatthuneya miruku iye suupuxeriwe ni Muluku sa ovikaniha ‘ovilelana mukina ni mukhw’awe’. Nto vaniweryaneya sai wiiraana ni annihu? Nihaana wiimananiha ‘okhala òwìyeviha ni òmàla’. Ohiya vo, Paulo onnintumererya omananiha ‘okhapelela wiwanana omosaru ovahiwahu ni eroho yowarya [munepa wootteela] ni murettele onnithukumanya’. (Mmusome aÉfeso 4:1-3) Wiiwelela miruku iya onivekela otthukula murima ahu ni weemya weettihiwa ni munepa wa Muluku, ni wooniherya sowiima saya. Sowiima sa munepa wa Muluku, sinnikumiherya wataana, masi miteko sa erutthu sinikumiherya ohiiwanana.
8. Moota xeeni miteko sa erutthu sinikumiherya aya ovalaana?
8 Nkawehani moota ‘miteko sa erutthu’ sinikumiherya aya ohiiwanana. (Mmusome aGalasia 5:19-21.) Ole oneetta onamuttompe onnivalaana ni Yehova vamosa ni muloko, ohiya-vo, oraruwa onnaakumiherya ovalaana wootepa otakhala anamwane ni ole oraruweliwe. Opaka itthu soonanara onnimwiiriha mutthu ovalaana ni Muluku naale animphenta Muluku. Ole oneererya olupanya itthu, onnisuwela wira opuro onilupanyiwa ohaana okhala wooreera. Okhalana mweettelo woohiirya onooniherya ohivaha efaita malamulo a xariya a Muluku. Khuta miteko sa erutthu sinnaavalaanyiha atthu, vamosa ni Muluku. Mweettelo woohiloka onnivirikana vanceene ni mukhalelo wa Yehova.
9. Ninrowa otokosa sai wira nisuwele naamananihaka ‘okhapelela wiwanana wa’ munepa wa Muluku?
9 Tivonto khuta mmosa ohaana wiikohaka so: ‘Kiniimananiha sai ‘okhapelela wiwanana wa [munepa] onikumiherya murettele’? Wakhumelela ohiiwanana kinikhala sai? Kiireke kinaleela atthu anceene kiphavelaka wooneliwa othunku paahi? Kiireke kinaahiyerya axitokweene paahi wira ephuke mwaha ole mmureerelo aka, masi miyo khohipaka etthu wira kimalihe ohiiwanana wahu? Kiireke kinnisyaka olavulana akina koothereryaka wira kinoova wuupuwela itthu sikiirenle aya, woonasa wene khiyasyaka omwaattamela mutthu ole? Niireke mweettelo owo onnooniherya wira nimphavela wiiwelela yoolakela ya Yehova ya othukumanya-tho itthu sotheene mwa Kristu?
10, 11. (a) Xeeni varya aya vootepa otthuneya okhalana murettele ni annihu? (b) Etthu xeeni enrowa okumiherya murettele ni ohakalala wekeekhai?
10 Yesu aahimyale so: “Tivó mwarowaka ovelela yovah’anyu waltari weiwo mùpuwelá wira munn’inyu khakhanle sana ni nyuwo, muhiye yovah’anyu oholo w’altari, murowé toko mwatàne ni munn’inyu’uwo. Vano-nto muhalé murwaka ovelela yovah’anyu, mwakuveleke omuririha murima”. (Math. 5:23-25) Yakobo aahilepa so: “Ale anaphavelela murettele atthu othene, annàla murettele, annìmiha exariya”. (Yok. 3:17, 18) Tivonto khinniwerya okhala a xariya vahikhanle murettele.
11 Mwa ntakiheryo, vanihimmwa wira ilapo sikina sitonko owaniwa ekhotto, itakhwa sowiiraka 35 pursento mwaattelo aya, sanweryaneyaka olimmwa, sahaakhanle miina siniiva. Okathi mina siniphuleya aya, atthu annihiya olima opuro ole, mihakhu saya sinniiyiwa, nto ipooma khiyathoiwa soolya. Mwa enamuna emosaru eyo, wunnuwa wahu mmyaha sa omunepani, onnitthikela ottuli akhala wira nookhalana etthu enikumiherya ohiiwanana ni annihu. Waakuvela oliyala soovonya sa akina ni omananiha waathokorerya saana, ti etthu enikumiherya ohakalala wekeekhai.
12. Axitokweene anrowa onikhaliherya sai wira nikhale oowiiraana?
12 Ohiya-vo, alopwana avahiwa ahu mmulokoni, annikhaliherya vanceene wiiraana wa muloko. Alopwana awo avahiwa ahu anninikhaliherya ‘okhalana wamini omosaru’. (aÉf. 4:8, 13) Vaavo axitokweene anivara aya muteko wa Muluku ni hiyo, nto khiyanivaha miruku sinikhuma mBiibiliyani, awo anoonikhaliherya orowa vahoolo niwaraka omutthu wa niinano. (aÉf. 4:22-24) Okathi onikhaliheriwa anyu, munniweha wiimananiha Yehova onipaka awe wira mwaphwanye okumi elapo esya elamuleliwaka ni Mwanawe? Nyuwo axitokweene, niireke munnuupuwela eyo okathi munaakhaliherya anyu akina?—aGal. 6:1.
“MURERELANEKE MURIMA”
13. Exeeni enrowa wiiraneya akhala wira khanniiwelela miruku silempwale mwa aÉfeso 4:25-32?
13 AÉfeso 4:25-29, onnihimya mooluluwanya itthu sinitthuneya ahu osyaka. Ohela muhina wootha, onanariwa aahiiso onyoonyeriwa miteko, ni moolumo ootakhala. Nto nilavuleke moolumo oreera anilipiha. Akhala wira mutthu khoniiwelela miruku iya, owo pooti oriipiha murima munepa woowaarya wa Muluku, maana tonikumiherya wiiraana. (aÉf. 4:30) Weettela masu ala anittharelana aPaulo, tootthuneya maana annikumiherya murettele ni wiiraana. Paulo aalempe so: “Murihele ottaiwene wa nyuwo makhalelo othene òwawa, ònanariwa, òwali, òviruwa ni òruwana, vamosá ni sotakhala sa khula enamuna. Murerelaneke murima n’umorelana ikharari mukina ni mukhw’awe. Mulevelelaneke ntoko Muluku òlevelenlyaweni mwa Kristu”.—aÉf. 4:31, 32.
14. (a) Anniixuttiha exeeni moolumo oowi ‘murerelaneke murima’? (b) Etthu xeeni enrowa onikhaliherya okhala ooreera murima?
14 Moolumo oowi “murerelaneke murima” anooniherya wira okathi mukina hiyo khinnaareerela murima atthu akina, tivonto nihaana orukunuxa murima ahu. Tthiri ti vootthuneya omananiha ophavela mireerelo sa atthu akina ohiya sawihu paahi! (aFil. 2:4) Pooti wira etthu eniphavela ahu ohimya ti yootheiha wala enooniiriha wooniwa okhala amiruku saana, masi niireke mweettelo owo ti woophenta? Wuupuwela saana nihinatthi olavula onooniiriha ‘orera murima’.
WIIXUTTA OPHENTA NI OTTITTIMIHA VATTHOKONI
15. Paulo aahimya exeeni mwa aÉfeso 5:28 mmoota Kristu sinithokorerya awe muloko?
15 Mbiibiliyani wataana wa Kristu ni muloko onlikanyihiwa ni wataana wa mulopwana ni amwaarawe. Eyo ehaana omwiirihaka mulopwana oothela waaphenta ni waathokorerya amwaarawe, nave muthiyana ohaana owiiwelela aiyawe. (aÉf. 5:22-33) Paulo aaphavela ohimya exeeni vaavo alempe awe moolumo oowi: “Siso ole othenle ohana omphenta mwar’awe ntoko erutthu awe”? (aÉf. 5:28) Masu ari ottuli wa moolumo awo annooniherya etthu ene ariki: ‘sisale Kristu saphentale awe [muloko] khuleva ekumi awe mwaha wa [muloko] . . . arapihaka ni màsi òbatizo ni masu awe’. Tthiri weettela yoolakela ya Yehova, ya wiiraaniha-tho itthu sotheene mwa Kristu, ohaana omwiiriha mulopwana okhaliheryaka emusi awe wataana ni Muluku.
16. Itthu xeeni sooloka sinikhumelela akhala wira anamuyari annivara saana miritti saya vatthokoni?
16 Anamuyari ahaana wuupuwelaka wira aakhalana muteko ovahiwe aya ni Yehova. Etthu yooripiha murima osuwela wira olelo-va, atthu anceene ‘khaniphenta’. (2 Tim. 3:1, 3) Axitiithi anceene khanthokorerya miritti sivahiwa aya ni Muluku, nto khiyaahooxa anaaya. Masi Paulo ahaatumererya axitiithi eeKristau wira: ‘ahanyonyiheké anaya, masi atthukuleke miru saya, aweettihaka ni waalakaka n’ikano’ sa Yehova. (aÉf. 6:4) Opuro xeeni anamwane oniixutta aya ophenta ni waattittimiha atthu? Anamuyari yaale aniwiixuttiha saana anaaya itthu iyo, anneettiha saana miritti saya, moovarihana ni miteko sa Yehova. Nto akhala wira hiyo khannirumeela vatthokoni vahu moolumo oonanariwa, oowali ni ooveeha, ninniwiixuttiha aniihu itthu sootthuneya voohimya sa ophenta ni waattittimiha ahooleli. Eyo enoowiiriha orowa owerya okhala elapo esya ya Muluku.
17. Vanitthuneya opaka exeeni wira nimukhootte Diabo?
17 Nihaana osuwela wira Diabo yoowo ohononne murettele molumwenkuni, onoomananiha waakanyerya olipiherya wahu opaka yootthuna ya Muluku. Tthiri enniiraneya yoophavela ya Satana vaavo omwalana onincerereya aya, nave mulopwana ni muthiyana anikhala aya hoothe ehilepinhe othelana waya, ni atthu anceene aneemererya aya othelana alopwanaru wala athiyanaru. Hiyo niheettihiweke ni muupuwelo wa mulaponi wa mahiku ala. Masi neettihiweke ni Kristu. (aÉf. 4:17-21) Tivonto vanitumereriwa ahu wira ‘nisakiheke n’ikuru sa Muluku’, wira niwerye omukhootta Diabo ni malaikha awe.—Mmusome aÉfeso 6:10-13.
“MWETTEKE MOPHENTANI”
18. Etthu xeeni enilipiha wiiraana wahu wa eKristau?
18 Ophenta ti etthu enilipiha wiiraana wahu weeKristau. Akhala wira murima ahu onimphenta tthiri ‘Pwiya mmosa’ ni ‘Muluku mmosa’ ni waaphenta annihu, ninrowa ophavelaka ‘okhapelela wiwanana omosaru wa [munepa] ni murettele’ onnaataaniha. (aÉf. 4:3-6) Yesu aahivekela sa ophenta oriki: “Nkinalompela awixutti akaru yala pahi: kinalompela-tho ale antthuna okamini mwaha wolaleya wa yala, othene ekhale mmosaru ntoko nyuwo tithi murya anyu ni miyo ni ntoko miyo kirya aka ni nyuwo, wira ekhale mmosaru mwa hiyo, . . . miyo kihasuweliha nsina nanyu, nave kinotepa wasuweliha, wira ophenta onkiphenta anyu okhale mwa yawo, nave miyo-tho kikhale mwa yawo”.—Yohani 17:20, 21, 26.
19. Nto etthu xeeni eniphavela anyu wiimananiha opaka?
19 Akhala wira nniwana ekhotto ni murima ahu mwaha wa soovonya sahu, ophenta pooti oniirihaka ovekela ntoko siirale awe nasalimo: “mukhomalihe murim’aka, wira kitthareke otthuna wanyu’. (Esa. 86:11) Nto nrowe niilipihe omukhootta Diabo wira ohinivalaanyihe ni Tiithi ahu oophenta vamosa ni ale animurumeela. Mwiimananihe ‘otthara mwettelo wa Muluku ntoko anawe ophentiwa, mwetteke mophentani’, vatthokoni, okathi woolaleerya, ni mmulokoni.—aÉf. 5:1, 2.
[Elatarato epaaxina 29]
Onihiya yoovaha awe ohoolo wa altari, khiyarowa wataana ni munna awe.
[Elatarato epaaxina 31]
Anamuyari, nwiixuttiheke aniinyu waattittimiha akina