“Miyo ka Mutthu . . . Òwiyeviha”

1-3. Mmukhalelo xeeni Yesu aakenle awe muYerusalemu, nto nthowa xeeni waaniheryasa akina eriyari ya muttitthi ole vaatikiniheya aya?

ATTHU a oYerusalemu ari ooxenkereya. Mulopwana oottittimiheya onnoorwa oYerusalemu! Ota wa muttetthe ole wa oYerusalemu, atthu athukumanne mphironi. Awo amphavela omwaakhela mulopwana ola, nto akina anihimya wira owo ti yoole oleiheriwe okhala nipuro na Mwene Davidi ni ti Namalamulela oophwanelela a Isarayeli. Atthu akina aaruuha makukhu a korooro enamutthapela; akina ahaatalela mphironi ikuwo saya ni makukhu wira areerihe mwaarowa awe oviraka. (Matheyo 21:7, 8; Yohani 12:12, 13) Nto atthu anceene anniikoha moota mwene owo sinrowa awe okela mmuttettheni mme.

² Waaniheryasa, atthu akina anlipelela wira Yesu onkela orwa mmukhalelo wowiivuwiha vanceene. Tthiri awo annaasuwela alopwana oottittimiheya yaawo atonko okela muttetthe ole mowiivuwiha vanceene. Mwa ntakiheryo, mwaana a Davidi iitthaniwa Absalomi, aahiikeliha omwene; nto aahikhalana alopwana 50 yeettiha ikaaro ohoolo wawe. (2 Samuweli 15:1, 10) Mwene ooRoma, Júlio César, aahiivuwiha mootepana; ekwaha emosa, okathi aakela awe ekapitaali ya oRoma, owo aahihooliwa ni itthepo sowiiraka 40, itthepo sikina saari moono woolopwana, ikina moono woothiyana, sitthukweleliwe ene mithuko! Vano atthu oYerusalemu aninwehererya mulopwana ootepa ottittimiheya. Hata muttitthi ole waasuwela aahiiso wahaasuwela ele yaalipelela aya, ole aarwa aari Mesiya, eyo piiyo, mulopwana muulupale aatonko okhala valaponi. Masi, okathi Mwene ola a muhoolo aakela awe mmuttettheni mme, waaniheryasa atthu akina yaamutikiniheya.

³ Atthu awo khaniweha ekaaro, khanaaweha ale antthimakasa ohoolo wawe, ikhavalo, nnakhala itthepo. Moovirikana ni vo, Yesu onrwa onwenle ene buuru, mwaamunama onkuxa miritti.a Hata buuru anwenle awe khaawariheliwe ikuwo sa musurukhu munceene. Ohiya owariheliwa ikuwo sa musurukhu munceene, buuru ole aawariheliwe ikuwo sa musurukhu vakhaani, seiyo atthareli a Yesu yaatanle aya ottuli wa mwaamunama ole. Nthowa xeeni Yesu aathanlale awe okela muYerusalemu onwenle ene mwaabuuru paahi, eriki alopwana akina yaawo okhulupale aya wahamphwanya Yesu yaakela mmukhalelo wowiivuwiha?

4. Exeeni Biibiliya yaahimmye awe vahinatthi, voohimya sa moota Mwene ooMesiya saarowa awe okela muYerusalemu?

⁴ Yesu onaakhwaniherya eprofesia, yeeyo yaahimya wira: “Nyuwo atthu òYerusalemu, mòpeke elulu votteliwa murima. Mòneke: mwené anyu onnorwelani. Owo t’òphentiwa ni Muluku ni t’òweryexa. Yowo t’òwiyeviha: onnorwa anwenlene bùru mwamukhani”. (Zakariya 9:9) Eprofesia ela yaahooniherya wira ole Oowoottihiwa a Muluku, Mesiya, aarowa wiisuweliha ohoolo wa atthu ooYerusalemu, ntoko Mwene oothanliwa ni Muluku. Nave-tho, moota oniisuweliha awe, vamosa ni mwaamunama omuthanlale awe onwela, waarowa wooniherya mukhalelo mmosa wootepexa oreera yoowo onikhuma vamurimani vawe, eyo piiyo, wiiyeviha.

5. Nthowa xeeni wiiyeviha wa Yesu onitepa aya onikuxa murima, ni nthowa xeeni ory’aya vootthuneya wiixutta omutakiha Yesu mmwaha ola?

⁵ Wiiyeviha wa Yesu tonitepa onikuxa murima. Murima ahu onnikuxeya vanceene vaavo vanuupuwelela ahu mukhalelo owo wa Yesu. Ntoko sithokorenrya ahu mMuru 2, Yesu paahi tokhanle ‘ephiro, ekekhayí ni ekumí’. (Yohani 14:6) Mowooneya, khuuvo mutthu eriyari ya apinaatamu aatonko okhala elapo ya vathi onaattamela okhulupale wa Mwaana a Muluku. Nnaamwi vari siiso, nnakhala vakhaani Yesu khotonko wooniherya wiixinnuuha, mukhalelo yoowo apinaatamu anceene oottheka anooniherya aya. Wira nikhale atthareli a Kristu, hiyo nohaana okhootta mukhalelo woophavela wiixinnuuha. (Yakobo 4:6) Muupuweleke wira Yehova onninyokha wiixinnuuha. Tivonto, ti vootthuneya wiixutta moota woomutakiha Yesu mwa wooniherya wiiyeviha.

Soohimmwa Sinooniherya Wira Yesu Aari Oowiiyeviha Okhuma Khalai

6. Wiiyeviha exeeni, ni Yehova aasuwenle sai wira Mesiya aarowa okhala oowiiyeviha?

⁶ Wiiyeviha ori wiikhaliha ooyeveela, ohiya wiihelana aahiiso wiixinnuuha. Ola mukhalelo onikhuma vamurimani ni onoonihereya mmoota mutthu sinilavula awe, mweettelo awe ni moota sinaathokorerya awe atthu akina. Yehova aasuwenle sai wira Mesiya aarowa okhala oowiiyeviha? Owo aahisuwela wira Mwanawe aahooniherya ntakiheryo noolokexa na Yehova na wiiyeviha. (Yohani 10:15) Nave-tho, Yehova ohoona wiiyeviha wa Yesu orweela mwa miteko saavara awe. Moota xeeni?

7-9. (a) Mikhayeli oonihenrye sai wiiyeviha okathi aawana awe ni Satana? (b) MaKristau aniwerya sai omutakiha Mikhayeli mu wooniherya wiiyeviha?

⁷ Eliivuru ya Yuda, ennooniherya ntakiheryo nookuxa murima vanceene: “Hatá nlaikha nulupale Mikhayeli okathi wavanyihanaya ni Satana, ewanelaka murutthu wa Moise, khinatthunne omulamula Satana owo ni molumo òruwana: nto nahimuhimerya wira: ‘Muluku òhukhumuni!’” (Yuda 9) Mikhayeli nsina ninvahiwa Yesu, eyo piiyo, ohinatthi orwa valaponi ni nuumala otthikela wiirimu, mmuteko awe ntoko nlaikha nuulupale aahiiso muhooleli a malaikha yaawo ari anakhotto a wiirimu a Yehova.b (1 aTesalonika 4:16) Nto, nkawehani moota Mikhayeli saaphunka awe owana-wana wawe ni Satana.

⁸ Yoohimmwa ya murummwa Yuda khennileela ele Satana yaaphavela awe wiiriha murutthu wa Moise, masi hiyo pooti okupali wira Diabo aahikhalana mmuupuweleloni mwawe yoophavela yoohiloka. Waaniheryasa, Satana aaphavela otumererya wira murutthu wa Moise, mulopwana oororomeleya, orumeeliweke mu okokhorela woohiloka. Mikhayeli aahikhootta yoophavela yoohiloka ya Satana, nnaamwi vaari siiso, Mikhayeli owo aahooniherya wiihiiha wuulupale. Tthiri, Satana aaphwanelela wuulumeliwa, masi Mikhayeli, yoowo okathi aawana awe ni Satana nlelo ahaavahiwe “owerya wothene w’olamula”, aahoona wira ophukela iwe waahaana orwa wa Yehova Muluku paahi. (Yohani 5:22) Mwaha wookhala nlaikha nuulupale, Mikhayeli ookhalana owerya wuulupalexa. Nnaamwi vari siiso, mowiiyeviha owo aahimuhiyerya Yehova wira ophuke mwaha ole ohiya weererya wooniherya okhulupale ovahiwa awe. Nnaamwi aari oowiiyeviha, Yesu aahooniherya-tho wiisumaaliha, aahiiso weemererya ele yahaawerya awe.

⁹ Nookhala nthowa nimosa niirinhe wira Yuda uupuxeriwe olepa yowiiraneya ela. Moothananiha, maKristau makina a okathi ole wa Yuda khiyooniherya wiiyeviha. Awo yaari oowiihelana ni yaalavula ‘moveha itthu sahasuwelaya’. (Yuda 10) Tthiri ti vookhweya wa hiyo apinaatamu oottheka wooniherya wiixinnuuha! Nnoonela sai, akhala wira axitokweene a mmulokoni mwa eKristau annipaka yoothanla, masi hiyo nihisuwela oratteene ele ewiirinhe opaka yoothanla eyo? Akhala wira hiyo nnimwaapa aahiiso waanyohola atthu awo nihisuwenle itthu sotheene siiranen’ye seiyo siirinhe opakiwa soothanla iyo, niireke wira khahiyo ethoonyeryo ya ohiiyeviha? Ohiya vo, nrowe nimutakihe Mikhayeli, aahiiso Yesu, nisyakaka ophukela myaha seiyo Muluku ohinivanha awe owerya wa ophuka.

10, 11. (a) Etthu xeeni yahaareere wooneya voohimya sa ophavela waarina Mwaana a Muluku orwa valaponi wira aakhwaniherye ele yaarummwaly’awe? (b) Ninrowa owerya sai otakiha wiiyeviha wa Yesu?

¹⁰ Nave-tho, Mwaana a Muluku aahooniherya wiiyeviha eemereryaka orwa valaponi. Nkahaya muthokorerye ele yaahin’ye awe wiirimu. Owo aari nlaikha nuulupale. Nave-tho, owo aari “Nsu”, eyo piiyo, Namuhupi a Yehova. (Yohani 1:1-3) Yesu aakhala wiirimu, nipuro ‘norera ni novuwa’ na Yehova. (Yesaya 63:15) Hata vari siiso, Mwaana owo “ahirula oMuluk’uwo, ahìkhaliha epottha, aìlikanyihaka n’atthu”. (aFilipi 2:7) Nkahaya muupuwelele ele yaaheliwa muhina orummwa wa Yesu orwa valaponi! Okumi awe waahithaamihiwa oroihiwaka mmirimani mwa Maria, a nloko na aYuda, yoowo ahaatonko orupa ni mulopwana, khukhala mmirimani mwawe myeeri mithanu na mixexe, mpakha oyariwa ntoko mwaana. Yesu aahiyariwa ntoko siisaale anamwane akina, khuhuiwa ntthoko na kalapintero oohaawa ni khinnuwa okhuma onamwane awe mpakha okhala mmiravo. Nnaamwi aari oohittheka, okumi awe wotheene ntoko mmiravo aahivikaniha owiiwelela axitiithi awe oopinaatamu oottheka. (Luka 2:40, 51, 52) Tthiri nno wiiyeviha wuulupalexa!

¹¹ Niireke wira nnoowerya hiyo wooniherya wiiyeviha ntoko Yesu, nivaraka moosiveliwa miteko seiyo ikwaha sikina sihinooneliwa okhala etthu? Mwa ntakiheryo, muteko ahu wa olaleerya ihapari sooreera sa Omwene wa Muluku, pooti wooneyaka ohikhala etthu vaavo atthu vahincalela aya, vaniveeha aya, aahiiso vannilupattha aya. (Matheyo 28:19, 20) Nto, akhala wira nnoovilela mmuteko ahu, hiyo pooti okhaliherya woopola ikumi sa atthu. Pooti ntonko ene woopola okumi wa atthu akina aahiiso nihitonko woopola, hiyo ninrowa wiixutta ntakiheryo nuulupale na wooniherya wiiyeviha, ni ninrowa otthara mavalo a Pwiya ahu, Yesu Kristu.

Wiiyeviha wa Yesu Ntoko Pinaatamu

12-14. (a) Yesu oonihenrye sai wiiyeviha okathi atthu yanvuwiha aya? (b) Moota xeeni Yesu oonihenrya awe wiiyeviha okathi aathokorerya awe atthu akina? (c) Exeeni enooniherya wira wiiyeviha wa Yesu khahiyo waari woophavela wooniherya paahi?

¹² Okhuma wanipacerya mpakha wanikisa wa muteko wa Yesu valaponi, owo aari mutthu oowiiyeviha. Owo aahooniherya wiiyeviha orweela mwa onvuwiha ni onvaha nttittimiho notheene Tiithi awe. Ikwaha sikina atthu yaanimuttottopela Yesu mwaha wa masu awe yooniherya ankhili, miiriirya sawe sooniherya owerya, hata oreera wawe murima wooniherya mukhalelo awe. Ikwaha sinceene, Yesu kheemererya wira ovuwihiweke, masi aamuroihela Yehova ovuwa iwo.​—Marko 10:17, 18; Yohani 7:15, 16.

¹³ Yesu aahooniherya wiiyeviha mmoota waathokorerya awe atthu akina. Tthiri, owo aahooniherya oratteene ele yaarwenle awe valaponi, ohiya orumeeliwa, masi waarumeela atthu akina. (Matheyo 20:28) Yesu aahooniherya wiiyeviha wooloka, aathokoreryaka moophwanelela atthu akina. Okathi atthareli awe yaamunyonyinhe aya, owo khaapwapwenle; masi aahivikaniha waakhaliherya. (Matheyo 26:39-41) Vaavo muttitthi ole wa atthu wamooceelinhe aya ophwanya opuro woomaaleleya wira ophumurye, owo khaawoomonle; masi aahivikaniha wiimananiha owiixuttihaka “itthu sinjene”. (Marko 6:30-34) Okathi muthiyana mmosa oohikhala mwIsarayeli, aavikaninha awe onvekela Yesu wira onvonihe mwanawe mwaamuthiyana, wanipacerya Yesu aahooniherya wira khaaphavela opaka eyo. Nto, Yesu khaakhoottale moonanariwa; masi aahimulipiherya maama ole wira mwanawe anvona, mwaha wa waamini wawe, ntoko ninrowa ahu othokorerya mMuru 14.​—Matheyo 15:22-28.

¹⁴ Mwa inamuna sinceene, Yesu aahaakhwaniherya moolumo awe oowi: “Miyo ka mutthu òmàla ni òwiyeviha”. (Matheyo 11:29) Wiiyeviha wa Yesu waari wekeekhai, ohiya woophavela wooniherya paahi. Wiiyeviha iwo waakhuma vamurimani vawe, waari omutthu awe tthiri. Nto, ti mulattu aya Yesu aattittimihenrya awe vanceene owiixuttihaka atthareli awe wira akhale oowiiyeviha!

Owiixuttihaka Atthareli Awe Wira Akhale Oowiiyeviha

15, 16. Yesu aahiyaninhe sai mweettelo wa mamwene a mulaponi ni mweettelo waatthuneya okhalana atthareli awe?

¹⁵ Arummwa a Yesu yaanipisa wooniherya wiiyeviha. Ikwaha sinceene Yesu aaheererya owiixuttiha mukhalelo owo. Mwa ntakiheryo, amurumeelaka maama aya, Yakobo ni Yohani yaahinvekela Yesu wira akhalane opuro woottittimiheya Momweneni mwa Muluku. Mowiiyeviha, Yesu aakhunle so: “Okilathi mono aka wolopwana, walá mono aka wothiyana, inkihiyó miyo kiniwirelani: Atithi t’aniwirela ale athanlalyaya”. Nto, arummwa akina muloko yiiwakaru, “yaharonyiherya” axinna aya awo anli. (Matheyo 20:20-24) Yesu aaphunke sai mwaha ola?

¹⁶ Mooreerela murima owo aahaapwapwela otheene aya, oriki: “Mosuwela: mamwene a mulaponi-mu annaruma atthu ntoko t’awaya: makhulupale annahaxa atthu n’uwerya waya. Nto wa nyuwo vahìraneye siso: ohiya vo, ole omphavela okhala mulupale variyari vanyu, ohana warumela akhw’awe, n’ule omphavela okhala òpajerya variyari vanyu, aikhalihe murumeyi anyu”. (Matheyo 20:25-27) Arummwa ale yaaniweha wira ‘mamwene a mulaponi’ yaari oowiixinnuuha, ananrima ni oowiitthuna. Yesu aahooniherya wira atthareli awe yaahaana okhala oovirikana ni anamalamulela ale ootakhala ni oohaaxa. Awo yaahaana okhala oowiiyeviha. Niireke wira arummwa ale yaahiixutta etthu?

17-19. (a) Ohiyu Yesu ohinatthi wiiviwa, mwa enamuna xeeni ehinliyaleya owo aawiixuttinha awe arummwa voohimya sa wiiyeviha? (b) Etthu xeeni yuulupalexa voohimya sa wiiyeviha Yesu iixuttinha awe ntoko pinaatamu?

¹⁷ Mwaha ola khahiyo waari wookhweya wa atthareli ale. Ele khahiyo yaari ekwaha yoopacerya aahiiso yookiserya Yesu aawiixuttiha awe mwaha ole wa wiiyeviha. Wanipacerya, okathi yoole yaanyakulihana aya yaaworu aphavelasaka omusuwela tani aari muulupalexa, Yesu aahimwiitthana mwaana wira eemele variyari vaya, khwaahimeerya wira ale yaahaana okhala ntoko mwaana ole, mwaha woowi anamwane khaniixinnuuha, kharina nrima ni ophavela ovuwa ntoko siniira aya atthu oowunnuwela. (Matheyo 18:1-4) Hata vari siiso, ohiyu yoole ohinatthi wiiviwa, Yesu aahiweha wira nlelo arummwa awe yaaniixinnuuha. Nto, owo aahiwiixuttiha etthu ehinliyaleya. Yesu aahikuxa etuwalya khuvara muteko wahooneliwa okhala etthu, muteko yoowo waalimaleliwe opakiwa ni atthu yaarumeela vatthokoni. Yesu aahirapiha inawu sa arummwa awe otheene, omuhela muhina Yuda, yoowo aarowa onvariha!​—Yohani 13:1-11.

¹⁸ Yesu aahaakhaliherya wiiwexexa mwaha ola wa wiiyeviha, vaavo vaahimenrya awe oriki: “Miyo kihovahani nthonyeryo”. (Yohani 13:15) Niireke wira yowiixuttiha ela yaahivara mirima saya? Nkahaya muthokorerye ele enittharelana: muhoolo mwaya ohiyu yoole, awiixutti ale yaahinyakulihana aphavelaka-tho osuwela tani aari muulupalexa eriyari aya! (Luka 22:24-27) Mukwaha ola-tho, Yesu aahivikaniha waapixerya murima, khiwiixuttiha mowiiyeviha. Vano aahivikaniha owiixuttiha etthu yuulupalexa: ‘Owo aahiiyeviha khukhala oowiiwelela mpakha okhwa, aayo, okhwa vamwirini va nihaaxeryo’. (aFilipi 2:8, NM) Mowiivahererya Yesu aaheemererya okhwa moonyoholeya, khulamuliwa moohixariya ntoko mutakhali aahiiso mulipa onveeha Muluku. Tivonto, Mwaana a Muluku ohooniherya wiiyeviha wuulupalexa ovikana soopattuxiwa sotheene sa Yehova.

¹⁹ Waaniheryasa, ela yaari yowiixuttiha yookiserya ya wiiyeviha Yesu iixuttinha awe ori valaponi, yeeyo yaatthokiherya mukhalelo wa wiiyeviha yoowo wahaatthuneya oliyaliwa ni arummwa awe oororomeleya. Biibiliya onnileela wira atthu awo okathi munceene yaahooniherya wiiyeviha, hata mu iyaakha miloko sinceene, ni muhoolo mwaya. Nihimye exeeni wa hiyo?

Niireke Wira Nyuwo Munootthara Ntakiheryo Nivahiwe ni Yesu?

20. Ninrowa osuwela sai wira hiyo nri atthu oowiiyeviha?

²⁰ Paulo onnimulopola khuta mmosa a hiyo oriki: “Mukhalaneke mupuwelo mmosaru, yowo orinawe Yesu Kristu”. (aFilipi 2:5) Hiyo nohaana okhala oowiiyeviha ntoko Yesu. Ninrowa osuwela sai akhala wira hiyo nri atthu oowiiyeviha? Muthokorerye ela: Paulo onnuupuxerya wira ‘ehikhaleke etthu enìrahu niphavelaka oxinttana walá wittottopa: nto niyeviheke, khula mutthu omonelaka vatthu mukhw’awe vowivikana mmansawe’. (aFilipi 2:3) Vano, waakhula wa nikoho nno onlipa ni moota onaathokorerya ahu atthu akina. Hiyo nohaana waathokoreryaka atthu akina okhala aalupale, ootthuneya, onivikana hiyo. Niireke wira nyuwo munoovarihela muteko miruku iyo?

21, 22. (a) Nthowa xeeni axitokweene a mmulokoni anitthuneya aya okhala oowiiyeviha? (b) Ninrowa wooniherya sai wira noosareya wiiyeviha?

²¹ Sivinre ene iyaakha sinceene nuumala okhwa Yesu, nlelo murummwa Pedru aanuupuwelela voohimya sa otthuneya waya wiiyeviha. Pedru aahiwiixuttiha axitokweene a mmulokoni wira avareke miteko saya mowiiyeviha, ahiikhalihaka mapwiya a ipwittipwitthi sa Yehova. (1 Pedru 5:2, 3) Miritti sa mmulokoni sihimwiiriheke mutthu okhala oowiixinnuuha. Moovirikana ni vo, miritti iyo sinincererya otthuneya waya wooniherya wiiyeviha wekeekhai. (Luka 12:48) Tthiri, mukhalelo ola ti wootthuneya ohiya paahi wa axitokweene, masi-tho wa maKristau otheene.

²² Mwekeekhai, Pedru khonaliyale ohiyu yoole Yesu aarapinha awe inawu sawe, ni okathi yoole aamukhoottale awe! (Yohani 13:6-10) Pedru aahaalepela maKristau oriki: “Vano kinahimerya atthu othene wira: musareyeke wiyeviha, murumelanaka”. (1 Pedru 5:5) Moolumo oowi “musareyeke wiyeviha” anooniherya muteko wa ole onirumeela, yoowo aatthuneya wiilikanyiha wira ovare muteko ohinooneliwa okhala etthu. Moolumo awo ahaana onuupuxerya okathi yoole Yesu aakunxa awe etuwalya, khikokhora wira orapihe inawu saya. Akhala wira nnimutakiha Yesu, muteko xeeni onivahiwa ahu ni Muluku onrowa ahu othokorerya okhala wootepa oyeva woohiphwanela ovara hiyo? Wiiyeviha wahu ohaana wooniwaka ni atthu otheene, ntoko siisaale ekuwo eniwara ahu.

23, 24. (a) Nthowa xeeni nnitthuneya ahu wiimananihaka wira wiixinnuuha ohinihapuwele? (b) Muru onittharelana onrowa onikhaliherya olokiherya muupuwelo xeeni woohiloka voohimya sa wiiyeviha?

²³ Wiixinnuuha onlikana ni eveneno. Sookhumelela saya pooti okhala sootakhala. Wiixinnuuha pooti omwiiriha mutthu yoole aari ootthuneya, okhala oohifai wa Muluku. Moovirikana ni vo, wiiyeviha pooti omwiiriha ole ootepa oyeva okhala oofai wa Yehova. Akhala wira khuta nihiku nnimunnuuherya mukhalelo ola wooreera, niimananihaka otthara mavalo a Kristu mowiiyeviha, otthuveliwa wahu onrowa okhala wootepa oreera. Pedru aalempe so: “Tivó mwiyeviheke, mwivelelaka wa Muluku òweryexa, wira òvuwiheni okathi othanlalyawe”. (1 Pedru 5:6) Mwekeekhai Yehova onvuwiha Yesu mwaha wowiiyeviha moomalela. Moolikanasa, Muluku onrowa osiveliwa wootthuvelani mwaha wa wiiyeviha wanyu.

²⁴ Moothananiha, atthu akina anuupuwela wira wiiyeviha ethoonyeryo ya olosowa. Ntakiheryo na Yesu ninninikhaliherya woona wira eyo khahiyo ekeekhai, mwaha woowi Yesu yoowo aari oowiiyevihexa, aari-tho oohoova. Mwaha ola ninrowa othokorerya mmuru onittharelana.