YOOSOMA 37
Ele Biibiliya Onihimya Awe Voohimya sa Muteko ni Musurukhu
Niireke mootoko oxanka muupuwelaka muteko aahiiso musurukhu? Vannixankiha okhalana muteko wira niphwanyeke itthu sinnithowa ni omukokhorela Yehova ntoko oniphavela awe. Masi Biibiliya onninivaha malakiheryo anrowa onikhaliherya vanceene.
1. Biibiliya onihimya exeeni voohimya sa muteko?
Muluku oniphavela wira nihakalaleke ni muteko ninvara ahu. Biibiliya onihimya wira “etthu yorera emuhalenle mutthu, olya n’uwurya n’upuha ni sorera siphwanyalyawe” ni muteko awe. (Musuweli 2:24) Yehova onniluttuweliwa ovara muteko. Hiyo nihaana omutakiha Yehova nivaraka oratteene muteko ahu. Niira siiso, nnoomuhakalaliha Yehova ni nnoohakalalaka vanceene.
Muteko wookhalana efaita yinceene. Masi, nihikhala-khale neemereryaka muteko ahu okhala wa faita yinceene ovikana omukokhorela wahu Yehova. (Yohani 6:27) Yehova ooleiherya wira nahela nipuro noopacerya mookumini mwahu ele oniphavela awe, owo onoonivaha itthu sinnithowa.
2. Tuuvi ori moonelo wooloka voohimya sa musurukhu?
Biibiliya onihimya wira musurukhu onninikhapelela. (Musuweli 7:12) Nave onninlopola wira khahiyo paahi musurukhu tonniphwanyiha ohakalala. Tivonto Biibiliya onnitumererya awe wira nihiphenteke musurukhu, masi ‘nihakalaleke ni itthu nirina ahu’. (Mmusome aHeeberi 13:5.) Akhala wira nnoopaka eyo, khaninrowa onyoonyiheya nuupuwelaka wira khanrina musurukhu oniphiyerya. Nave khaninrowa omakelaka okopha musurukhu vahireerelaka. (Miruku 22:7) Nave-tho, khaninrowa omorela muraakho wa oweetta axooku a musurukhu aahiiso wootha wira niphwanye musurukhu moohixariya.
3. Ninrowa orumeela sai musurukhu wira naakhaliherye atthu akina?
Yehova ti Muluku oovaha. Nto ninnimutakiha okathi ninvaha ahu ni ninkhala ahu ‘oolikana ene wira naakaweleke atthu akina itthu nrina ahu’. (1 Timootheyo 6:18) Nyuwo pooti opaka eyo nvahaka musurukhu anyu wira mukhaliherye muloko ni waakhaliherya atthu akina otepexa wene anna ni arokora. Musuweleke wira etthu enimusivela Yehova khahiyo mwaattelo wa etthu ninvaha ahu, masi etthu enniiriha ovaha. Akhala wira ninnivaha ni murima wootheene, nnoomuhakalaliha Yehova ni nnoohakalalaka.—Musome Miteko 20:35.
MWIIXUTTE ITTHU SIKINA
Nwehe nthowa naya vari aya vooloka okhalana moonelo wooloka voohimya sa muteko ni ohakalala ni itthu nrina ahu.
4. Enamuna munivara anyu muteko pooti onvuwiha Yehova
Waataana wahu ni Yehova, ohaana ovarihana ni moota nnoonela ahu muteko. Nwehe EVIIDIYU, nuumala-vo mwaakhule makoho.
Eviidiyu niwenhe ahu, etthu xeeni yoosivenleni sa moota Jason oonela awe muteko ni moota aavara awe?
Etthu xeeni aapanke awe wira ohele muteko nipuro nooloka?
Mmusome aKolosi 3:23, 24, nuumala-vo mwaakhule nikoho ninttharelana:
Xeeni ori aya wa faita moota nnoonela ahu muteko?
Ti vooloka ovara muteko. Masi nihikhala-khale neemereryaka muteko okhala wa faita yinceene ovikana omukokhorela wahu Yehova.
5. Ohakalala ni itthu nrina ahu onniniphwanyiha mireerelo
Atthu anceene, okathi wootheene aniphavela wuncererya musurukhu aya. Masi Biibiliya onnitumererya opaka etthu ekina. Mmusome 1 Timootheyo 6:6-8, nuumala-vo mwaakhule nikoho ninttharelana:
Biibiliya onnitumererya opaka exeeni?
Hata nirina ene itthu vakhaani, hiyo nnoowerya ohakalala. Nwehe EVIIDIYU, nuumala-vo mwaakhule nikoho.
Hata arina ene musurukhu vakhaani, etthu xeeni enaahakalaliha atthu naawenhe ahu nviidiyuni?
Ankhi akhala wira nookhalana musurukhu munceene nnaaphavela wuncererya? Yesu aahilavula nlikanyiho nnooniherya woopiha waya wiimananiha wuncererya musurukhu ahu. Mmusome Luka 12:15-21, nuumala-vo mwaakhule nikoho ninttharelana:
Nlikanyiho na Yesu, niwiixuttinheni exeeni?—Nwehe eversiikulu 15.
Musome ni mulikanyihe Miruku 10:22 ni 1 Timootheyo 6:10. Nuumala-vo, mwaakhule makoho anittharelana:
Etthu xeeni eri ya faita yinceene, okhala mpatthani a Yehova wala okhalana musurukhu munceene? Mwaha wa xeeni?
Akhala wira mutthu oniphavela musurukhu paahi, mixankiho xeeni oniphwanya awe?
6. Yehova onoonivaha itthu sinnithowa
Oxanka mwaha wa muteko ni musurukhu pooti ohonona omwaamini wahu Yehova. Nwehe EVIIDIYU wira moone etthu nikhanle ahu oopaka akhala wira ninnixanka. Nuumala-vo, mwaakhule makoho.
Eviidiyu niwenhe ahu, mixankiho xeeni munna ole aarina awe?
Etthu xeeni aapanke awe wira oxintte mixankiho sawe?
Mmusome Matheyo 6:25-34, nuumala-vo mwaakhule nikoho ninttharelana:
Etthu xeeni Biibiliya onaaleiherya awe ale animuhela Yehova nipuro noopacerya mookumini mwaya?
ATTHU AKINA ANIHIMYA WIRA: “Kihaana ovara muteko wira kikhaliheryeke etthoko aka. Nto nkikhanle oorowela mithukumano isumana sotheene”.
Yoolepa xeeni enookupalihani wira ohela nipuro noopacerya omukokhorela Yehova yoothanla yooloka?
IPONTO SUULUPALE
Ti vooloka ovara muteko ni okhalana musurukhu, masi nihikhala-khale neemereryaka itthu iyo siniirihaka ohiya omurumeela Yehova.
Wuuluula
Etthu xeeni enrowa wookhaliheryani okhalana moonelo wooloka voohimya sa muteko?
Ohakalala ni itthu murina anyu, onrowa wookhaliheryani sai?
Munrowa wooniherya sai wira munnikupali yooleiherya ya Yehova yoowi onimwaakhapelela atthu awe?
NWEHE ITTHU SIKINA
Niireke Biibiliya onniixuttiha wira ti vootakhala okhalana musurukhu?
“Niireke Musurukhu Tonikumiherya Itthu Sootheene Sootakhala?” (Mwaha ori va jw.org)
Nwehe moota ovaha onimusivela aya Muluku.
Niireke oweetta axooku a musurukhu otthekula paahi?
“Moonelo wa Biibiliya—Axooku a Musurukhu” (Nvenye!, Março 2015)
Nwehe etthu yaamwiirinhe mulopwana mmosa ohiya wiiya ni oweetta axooku a musurukhu.
“Waanikisivela Weettiha Ikhavalo” (Owehaweha, 1 a Novembro, 2011)