Niireke Nyuwo ‘Munniphavela’ Okhalana Miritti Mmulokoni?

FERNANDOa aari mutthu oowuuliwa muru. Axitokweene anli yaahimwitthana wira alavulane wiiphiini. Nuumala muloko aya oxekuriwa ni mutokweene a esirkwitu, axitokweene yaahimutthokiherya ele yaatthuneya wira owo ophwanelele waakhela miritti mmulokoni. Waanivira okathi munceene, nto Fernando khiyapacerya wuupuwelaka wira khaarowa-tho okhala mutokweene a mmulokoni. Mukwaha ole weera sirkwitu oxekunrye ene niinaano muloko ole. Nto axitokweene ale yaamulenle exeeni?

Fernando aahanle owiriyanaka ele yaarowa aya ohimya axitokweene ale. Anna ale alavulaka moovarihana ni yoolepa ya 1 Timétheyo 3:1, yaahimuhimeerya wira axitokweene a mmulokoni mme yaahaakhela epaphelo yaahimya wira owo aahithanliwa wira okhale mutokweene. Fernando aahituthuwa ni khukoha oriki, “muriye sai”? Nuumala munna ole otthikela ohimya ele yaahimyale awe, Fernando aahipacerya otheya-theya. Nto nuumala olaleiwa mmulokoni wira owo aahikhala mutokweene, anamunceene yaahitteeliwa murima nave.

Niireke ophavela miritti mmulokoni etthu yootakhala? Nnaari khahiyo siiso. Moovarihana ni 1 Timétheyo 3:1, “akhalá omphavela muteko wowettiha muthukumano, muteko worera t’umphavelawe”. Anna anceene annittharihela malakiheryo ni annimananiha orowa vahoolo omunepani ni wira aphwanelele ovahiwa miritti mmulokoni. Eyo ennikumiherya mareeliho wa atthu a Muluku okhala wira annikhumelela imiya miloko sinceene sa axitokweene ni arummwa orumeela oophwanelela. Mwaha wa munnuwelo onikhumelela mmilokoni, annitthuneya anna anceene wira ahooleleke miloko iyo. Vano enamuna xeeni yooreerela akhanle aya ootthara anna awo? Niireke ale aniphavela okhala mutokweene ahaana okhalaka ooxankiheya ntoko Fernando siirale awe?

ANITAPHULELA EXEENI MASU OOWI “AKHALÁ OMPHAVELA MUTEKO”?

Efrase ya mBiibiliyani yeeyo eni “akhalá omphavela muteko” ti otaphuleliwa wa nuulumo na eGriki nenlo nintaphulela ophavela ni murima wotheene, wala wooniherya ophavela. Eyo pooti owiirihani nyuwo omuupuwela mutthu onituthumerya ophavelaka orukula muhokorokho woottokottha mmwirini. Nuulumo noowi akhalá omphavela muteko, khanitaphulela mutthu onituphela mwa nrima wira “okhale mutokweene”. Xeeni ohimmwaka siiso? Okhala wira ale aniphavela okhala mutokweene aniphavela “muteko worera”, ohiya ovuwa wala okhulupale.

Itthu sinceene sinivekeliwa wira mutthu okhale mutokweene silempwale va 1 Timótheyo 3:2-7 ni Tito 1:5-9. Voohimya sa malakiheryo awo, mutokweene mmosa opacenrye orumeela khalai yoowo oniireliwa Raymond onihimya so: “Miyo kinoona wira etthu yootthuneya ti makhalelo ahu. Osuwela olavula ni wiixuttiha itthu sooloka, masi iyo khasinivikana okhala mutthu owiisumaaliha, ohinihapaliwa, oohakanyerereya, oosuwela owaakhela aletto ni ooreera murima”.

Munna yoowo oniphavela okhala mutokweene a ekeekhai onnikhala mutthu owiisuumaaliha mwaha wa osyaka khula enamuna ya itthu soohiloka. Owo ookhalana makhalelo ooloka ntoko oohaakanyereya, ooreera murima, tivonto vaniroromeliwa awe ni anna wira onoowerya waahoolela ni waakhaliherya okathi wa mixankiho. Mwaha wookhala mutthu oosuwela owaakhela aletto owo onnaalipiha amiravo ni ale aniinaano mmulokoni. Owo onnaaphwanyiha nimaaliho ni onnaakhaliherya aretta ni ale owunnuwela ni onniphenta itthu sooloka. Owo onnikhalana makhalelo ala, wira aaphwanyiheke mureerelo atthu akina, khonipaka eyo wira wooniwe ophwanelela paahi.b

Nikhuuru na axitokweene ninnisiveliwa waalakiherya ni waalipiha, masi waakhwaniherya ele enivekeliwa mBiibiliyani onilipa ni atthu ale aniphavela okhala mutokweene. Mutokweene mmosa opacenrye orumeela khalai oniireliwa Henry onihimya so: “Vakhala wira nyuwo munaakhwaniherya ele Biibiliya enivekela awe, nvareke muteko moowiilipiherya wira mooniherye ophwanelela wanyu”. Olavulaka voohimya sa yoolepa ya Musuweli 9:10, owo onihimya so: “‘Khula etthu enirummwa anyu ovara, nvareke ni ikuru sotheene murina anyu’. Khula muteko onithanleliwa anyu wira nvare ni axitokweene, mwiimananihe ovara saana. Mwaakheleke moohakalala khula muteko onivahiwa anyu, hata murummwaka okwesa empa ya Omwene. Muhoolo mwaya wiimananiha wanyu ni okhoomala wanyu onimooneliwa efaita”. Vakhala wira nyuwo muniphavela okhala mutokweene, mukhale mutthu oosiveliwa ovara muteko ni oororomeleya wa khula muteko wa Muluku onivahiwa anyu ovara. Mukhaleke owiiyeviha ohiya okhalaka oowixinnuwiha ni anrima.​—Math. 23:8-12.

MUSYAKE MUUPUWELELO NI SOOWIIRA SOOHILOKA

Akina a yaale aniphavela okhalana miritti mmulokoni okathi mukina aneererya ohimya wira aakhalana yoolakela ya okhala mutokweene, wala omananiha waawooka axitokweene wira yaakhaliherye okhala mutokweene. Akina anninanariwa okathi anivahiwa aya miruku ni axitokweene. Atthu moota owo ahaana wiikoha so ‘Kiireke miyo kiniphavela ophwanya ovuwa waka paahi wala kiniphavela okhapelela ipwittipwitthi sa Yehova moowiiyeveiha’?

Ale aniphavela okhala mutokweene ahaana wuupuwelaka yoovekela ekina ya axitokweene yoowi ahaana ‘owixuttiha anna ni miteko saya sorera’. (1 Ped. 5:1-3) Mutthu oniphavela ovaha ntakiheryo nooloka mmulokoni onnisyaka muupuwelelo ni sowiira soohiloka. Owo onnikhala oopixa murima hata ohithanliwaka mowaakuveya. Okhala mutokweene khonipaka mwiiriirya wa omalamaliha makhalelo ootakhala a mutthu. (Moth. 12:3; Esa. 106:32, 33) Okathi mukina munna pooti ohoonela etthu yoohiloka erina awe, variki anna akina amoonanaka etthu yoohiloka. (1 aKor. 4:4) Tivonto, vakhala wira axitokweene annoovahani miruku sinikumihiwa mBiibiliyani, mmananihe wiiwelela moohinyoonyeriwa. Nuumala-vo nvarihele muteko ele enileeliwa anyu.

ANKHI VAKHALA WIRA VANNIVIRA OKATHI MUNCEENE MULIPELELAKA?

Anna anceene anniviriha okathi munceene alipelelaka othanliwa okhala mutokweene. Vakhala wira nyuwo muhaakhwaniherya sotheene sinivekeliwa wira “mukhale mutokweene”, nto sinavira iyaakha sinceene, muhithanliwaka, niireke vannitthuneya okhala ooxankiheya? Vakhala wira eyo ennookhumelelelani, nwehe masu ala anikhuma mBiibiliyani ani: “Otepa owehererya onniripiha murima, wakhela sininlelahu, olipiha ekumi”.​—Mir. 13:12.

Vaavo vaniwehererya ahu waakhela etthu yoonisivela nto vanakhala ntoko khivaniweryaneya, eyo enniriipiha murima. Eyo yaahitoko omukhumelela Abrahamu. Yehova aamuleihenrye wira aamunvaha mwaana, masi khiyavira iyaakha sinceene mwaarawe Sara ahimuyaraka mwaana. (Maph. 12:1-3, 7) Okathi waaluvanle awe Abrahamu aahixinliha oriki: “Apwiya Muluku aka [Yehova], munrowa okivaha exeni? Miyo kinimokhwa kihiyanre. . . . Apwiya, nyuwo khamukivahale mwana”. Masi Yehova aahimulipiherya wira yooleiherya ele yaamwiiraneya. Hata vaari siiso saahivira iyaakha 14 wira Muluku aakhwaniherye yooleiherya awe ele.​—Maph. 15:2-4; 16:16; 21:5.

Niireke okathi yoole Abrahamu aaviriha awe owehereryaka wiiraneya ele yaaleiheriwe awe, owo aahiriipiwa murima mpakha omuhiya omurumeela Yehova moohakalala? Nnaari. Owo aanikupali wira ele Yehova yaaleihenrye awe yaamwiiraneya. Owo aahivikaniha owehererya itthu sooloka saarowa okhumelela muhoolo. Murummwa Paulo aalempe so: “Abrahamu ahiwehererya ni nthiti, siso ahiphwanya sorera Muluku samuhimenryawe”. (aHéb. 6:15) Wuukiseryani waya, Muluku Oowerya onnaareeliha atthu ovikana ele eniwehererya aya. Exeeni ekhanle anyu oowiixutta mwaha wa ntakiheryo na Abrahamu?

Vakhala wira munniphavela okhala mutokweene, vano sinavira iyaakha sinceene muhithanliwe, nvikanihe omuroromela Yehova. Muhooloweleke miteko sa Yehova. Warren, yoowo waakhalihenrye anna anceene orowa vahoolo omunepani, onnihimya etthu eniiriha okathi mukina opisaka othanliwa mutthu oriki: “Makhalelo animwiiriha mutthu ophwanelela anikhumelela vakhani-vakhani. Munnuwelo woomunepani wa munna onooniwa vakhaani-vakhaani mwa mweettelo awe ni enamuna enikhapelela awe miteko sinivahiwa awe. Anamunceene anoona wira anrowa okhala atthu ookhumela saana mmulokoni yaakhalaru mutokweene wala ovahiwa miritti sikina. Muupuwelo owo ti woohiloka ni pooti ompahula mutthu, khiyaphavela okhala mutokweene mwaha wa nrima. Vakhala wira nyuwo munnimurumeela Yehova khula nipuro muryaanyu ni waakhula etthu enivara anyu, nto munnikhumela saana tthiri”.

Munna mmosa, aahiwehererya wira okhale mutokweene iyaakha sinivikana 10. Olavulaka voohimya sa yoolepa yoosuwelexiwa saana eniphwanyaneya va Ezekiyeli ekapiitulu 1, owo onnihimya ele yaaxuntte awe oriki: “Yehova toneettiha ekaaro awe ni otthokeya wawe mwa enamuna eniphavela awe. Etthu yootthuneya kahiyo okathi ahu masi okathi wa Yehova. Mwaha wa owehererya okhala mutokweene khahiyo wawaka, wala ele eniphavela aka okhala. Okhala wira ele eniphavela aka pooti ohikhala ele eniphavela awe Yehova”.

Vakhala wira nyuwo munniphavela ovara muteko wooloka wa mutokweene muhoolo, mwiiphwanelelihe mukhaliheryaka otteeliwa murima wa atthu a mmulokoni. Vaavo okathi onivira awe vakhaani-vakhaani, mwiimananihe okhala oohukhuwa. Raymond, yoole oromoliwe wanipacerya iwe onihimya so: “Nrima ninnihonona otteeliwa murima wa mutthu. Atthu yaale okathi wootheene anikhala ooxankiheya anniyelela ohakalala onikhumelela mwaha wa omurumeela Yehova”. Nvikanihe wiimiha muhokorokho wa munepa wa Muluku, vanceenexa opixa murima. Mwiimananihe olokiherya makhalelo anyu oomunepani mmusomaka Biibiliya. Mulipiherye muteko woolaleerya ihapari isya ni mwaasomiheke Biibiliya ale anooniherya osiveliwa. Muhoolele emusi anyu mmitekoni sa Muluku ni omulompa Muluku Vatthokoni. Muttottele mureerelo iparakha sa okhala vamosa ni anna ni arokora. Okathi oniwehererya anyu othanliwa, munrowa okhala oohakalala mweera siiso.

Wiimananiha okhalana miritti mmulokoni eparakha emosa ekumiheriwe ni Yehova, vano owo hata otthokeya wawe khaniphavela orumeela enamuna eyo wira yaakhulumuleke ale aniphavela miteko iyo. Muluku onnaakhaliherya ni waareeliha ale anivara muteko ni murima wotheene. Etthu enooniherya wira Yehova onnaareliha tthiri tiila, “Ojaliwa w’Apwiya onniraliha”.​—Mir. 10:22.

Hata nyuwo moonaka wira mwaakhwanihenrye khalai ele enivekeliwa wira mukhale mutokweene, muhooceye nvikaniheke orowa vahoolo omunepani. Okathi owo nvikaniheke wunnuherya makhalelo aniphaveliwa ni nvareke miteko sa mmulokoni, mwaakhaliheryeke amusi anyu orowa vahoolo omunepani, mweera siiso, nyuwo munimooniherya ophavela wanyu omurumeela Yehova moororomeleya. Eyo enimookhaliheryani otteeliwa murima ni khula muteko onivahiwa anyu.

[Inoota]

[Ekaaxa epaaxina 5]

Efaita Erina Aya Wiiwelela Miruku

Munna oniphavela ‘okhala mutokweene’ wala miritti sikina mootthokeyani mwa Yehova onnireerela ottottopeliwa. (1 Tim. 3:1) Okathi axitokweene annivaha aya miruku soowiiwanyeya ni sinooniherya oreera murima, annikhala ‘oohakalala ni murima aya wotheene’. Mutthu ole onikhaliheriwa mwa enamuna eyo, okhala wene ‘onnoona oreera murima’ wa anna awo. Nto owo onrowa waakhelela miruku iyo somunepani ni ovarihela muteko.​—Mir. 27:9.

Ikwaha sikina, mutthu pooti okhalana makhalelo aniwiiriha anna woovelelaka onvaha miruku sa mBiibiliyani. Philip onnuupuwela wira mwa iyaakha sinceene owo ahooniherya wira khaaphavela waakhelela iparakha sikina mmulokoni. Masi okathi muupuwelelo owo waaturukenye awe, owo ‘ahaaphavelasa ankhili’ ni khuvekela malakiheryo a axitokweene. Owo onihimya so: “Anna ale yaahikivaha miruku soovareleya muteko seiyo saakikhalihenrye”. Philip aahivarihela muteko miruku iyo. Vano owo onnirumeela ntoko mutokweene a mmulokoni.​—Mir. 18:15.