Atthu a Yehova “Ehiyeke Sotakhala”

“Atthu othene anromola nsina n’Apwiya ehiyeke sotakhala”.​—2 TIM. 2:19.

MWAAROWA WAAKHULA SAI?

Exeeni ekhanle ookumiherya ‘ovanyihana ohinitekeliwa etthu’ ni ninrowa okhootta sai?

Ninrowa “ohiya sai sotakhala” voohimya sa wataana woohiloka?

Ninrowa wooniherya sai wira noohiya “sotakhala” moomalela?

1. Etthu xeeni erina opuro muulupale mwa okokhorela wahu?

MOOTOKO woona nsina na Yehova nilempwale ene vaxirini va empa wala etthu eniphwanyaneya omuseu? Tthiri eyo yaahoosivelani ni yaahoovarani murima. Mwaha wookhala Anamoona a Yehova, nsina na Muluku nookhala ni opuro aya muulupale mwa okokhorela wahu! Olumwenku wotheene khanivo nikhuuru na atthu anisuweliwa ni nsina na muluku onivikana hiyo. Masi, hiyo ninnisuwela wira okuxa nsina nlo onitaphulela okhalana muritti muulupale.

2. Muritti xeeni orina ahu mwaha wookuxa nsina na Muluku?

² Orumeela nsina na Yehova paahi, khonihimya wira hiyo ninneemereriwa ni yena. Hiyo nihaana okhala moovarihana ni malamulo awe. Mwaha wa yeeyo, Biibiliya onninuupuxerya wira atthu a Yehova ahaana ‘okhotta itthu sotakhala’. (Esal. 34:15) Owehasa wene murummwa Paulo aattittimiherya miruku seiyo, vaavo aalempe awe so: “Atthu othene anromola nsina n’Apwiya ehiyeke sotakhala”. (Mmusome 2 Timótheyo 2:19.) Okhala wira hiyo na Anamoona awe, nto noosuwelexiwa okhala atthu animakela oromola nsina nawe. Masi ninrowa ohiya sai itthu sootakhala?

“MUKHOTTEKE” SOOTAKHALA

3, 4. Yoolepa xeeni enaaxankiha asomi animutokosa Biibiliya okhuma khalai ni mwaha wa xeeni?

³ Nrowe nithokorerye itthu Biibiliya sinilavula awe voohimya sa okathi Paulo olempe awe masu ari va 2 Timótheyo 2:19. Yoolepa ela, enihimya sa ikeekhai sa Muluku, ennooniherya-tho soohimmwa piili silempwale opuro yoowo. Yoopacerya eni: “Apwiya annasuwela atthu ari awaya”; vohaaniherya masu ala akumihiwe eliivuru ya Mothakoni 16:5. (Nwehe muru ovinre). Yoohimmwa ya nenli eni: “Atthu othene anromola nsina n’Apwiya ehiyeke sotakhala”; nto okhuma khalai moolumo ala annaaxankiha asomi animutokosa Biibiliya. Mwaha wa xeeni?

⁴ Masu Paulo orumeelale awe nipuro nla anikhala ntoko wira okuminhe mwa soolempwa sikina. Masi, vanooneya wira mwa Soolempwa sa eHeberi khiivo yoolepa erina masu anilikana ni moolumo Paulo aromonle awe nipuro nla. Nto, etthu xeeni murummwa Paulo yaaphavela awe ohimya ni masu oowi ‘Atthu othene anromola nsina na Yehova ehiyeke sotakhala?’ Moone wira masu Paulo aniromola awe ohinatthi ohimya masu ala akumihiwe eliivuru ya Mothakoni muru 16, yeeyo enilavula sa ohiiwelela wa Kore. Nto niireke yoohimmwa ele yanenli yaalavula-tho mwaha wa ohiiwelela wa Kore?

5-7. Etthu xeeni yiiraneyale mahiku a Moise, ekhanle ti etthu Paulo yuupuwela awe olepaka masu a 2 Timótheyo 2:19? (Nwehe elatarato yoopacerya.)

⁵ Biibiliya onihimya wira Datani ni Abirami, anaawe Eliyabi, yaahitakaheryana ni Kore, khukhala amahoolela wa atthu yamurukunuwenle Moise ni Aroni. (Moth. 16:1-5) Mowooneya, atthu awo yaahipacerya ohimuttittimiha Moise, nave yanikhootta okhulupale aavahiwe awe ni Muluku. Anammwareya ale yaakhala eriyari ya atthu a Muluku, nto yanwerya waapahula atthu akina oororomeleya. Vaavale nihiku naaphin’ye aya wira Yehova aavalaanye anamakokhorela awe oororomeleya ni anammwareya ale, owo aahivaha malakiheryo oowiiweya saana.

⁶ Yoolepa eyo enihimya so: “Apwiya yahimuhimerya Moisesi wira: ‘Mwarume othamasa atthu othene yattamenle owannyawe Koré ni Datani n’Abirami!’ Moise aahivenya arowaka okumana ni Datani ni Abirami, makhulupale a Isarayeli yahimutthara. Owo aahahimerya atthu otheene wira: ‘Muhuluwe ihema s’atthu awo òtakhala, muhikuxé etthu eri yawaya, wira muhikhwé ni nyuwo mwaha wa sotakhala saya sothene. Atthu othene yahihuluwa vapuwani va Koré ni va Datani n’Abirami’. (Moth. 16:23-27) Yehova aahiwiiva atthu otheene yammwarenle. Masi ale yaamukokhorela moororomeleya, niire so, yaale yaahulunwe eriyari ya atakhali ale, yahoopowa.

⁷ Yehova onniwerya woona ele eri vamurimani va mutthu! Owo onniwerya woona ororomeleya wa ale ari awawe. Hata vari siiso, ale ari oororomeleya ahaana wiivalaanya ni atakhali. Nto vannooneya wira, Paulo aaromola moolumo aniphwanyaneya eliivuru ya Mothakoni 16:5, 23-27; okathi aalempe awe so: ‘Atthu othene anromola nsina na Yehova ehiyeke sotakhala’. Nto wiiwexexa moota owo onnivarihana ni masu a Paulo ani “Apwiya annasuwela atthu aya”.​—2 Tim. 2:19.

“MUHIYEKE OVANYIHANA WOHILOKA OHINITEKELIWA ETTHU”

8. Xeeni oromola nsina na Yehova wala okhala mmulokoni paahi ohiniphiyerya aya?

⁸ Oromola wawe sowiiraneya iye sa okathi wa Moise, Paulo aaphavela omuupuxerya Timootheyo otthuneya waya opaka soothanla sooloka wira ovikanihe okhalana wataana wooloka ni Yehova. Okhala mmulokoni wa eKristau paahi khiwaaphiyerya, ntoko siisaale oromola nsina na Yehova wahaaphiyerya aya okathi wa Moise. Ale ari arumeyi oororomeleya ahaana “ohiya sotakhala” moomalela. Moolumo awo yaataphulela exeeni wa Timootheyo? Ni itthu xeeni sikhanle ahu oowiixutta mmasu awo owuupuxeriwa ni Muluku, aalempwale ni Paulo?

9. Moota xeeni “ovanyihana wohiloka ohinitekeliwa etthu” waakumihenrye aya ohiiwanana wa maKristau mmulokoni, eseekulu yoopacerya?

⁹ Nuulumo na Muluku nookhalana miruku soowiiweya saana voohimya sa itthu soohiloka soovirikana seiyo maKristau anitumereriwa aya ohiya wala ohuluwa. Mwa ntakiheryo, masu aniromoliwa wuupaceryani wa 2 Timótheyo 2:19, nimphwanya wira Paulo onimuleela Timootheyo wira ‘ohinyakulihane mwaha wa molumo’ ni wira “muhuluweke ovanyihana ohintekeliwa etthu”. (Mmusome 2 Timotheyo 2:14, 16, 23.) Atthu akina a mmulokoni yaanivuwiha sowiixuttiha sa anammwareya. Nave, vanikhala ntoko wira yaahikhala atthu akina yaalavula itthu saakumiherya ovaanyihana. Hata miyuupuwelo iyo sahaavanyihiwa mooluluwanya ni Biibiliya iyo sanwerya okumiherya ohiiwanana mmulokoni. Tthiri iyo saahikumiherya ovaanyihana mwaha wa moolumo, nto khukumiherya mixankiho mmyaha somunepani. Tivonto Paulo, aattittimihenrye awe otthuneya waya oheemya “ovanyihana wohiloka ohinitekeliwa etthu”.

10. Niireke sai naaphwanya anammwareya aniphavela ovaanyihana ni hiyo?

¹⁰ Olelo-va, khahiyo wira atthu a Yehova khuta okathi aniwana ni anammwareya mmulokoni. Masi, akhala wira ninniiwa itthu sihinkhuma mBiibiliyani, voohicikha etthu sa ole oniixuttiha, nihaana okhootta moomalela. Tthiri onrowa okhala othoiwa ankhili, akhala wira ninneemya ovaanyihana ni anammwareya, okhale mutthu ene, mwInternetini, wala ni enamuna ekina ya wuulumana anammwareya. Hata nuupuwelaka wira nimphavela omukhaliherya paahi mutthu owo, ovaanela wahu, onrowa ovaanyihaka yooruma ya Biibiliya emanle ahu othokorerya. Ntoko arumeyi a Yehova, nihaana waahuluwa moomalela, niire so, wakhoottela anammwareya.

11. Exeeni ekhanle ookumiherya ‘ovanyihana’ mmulokoni, ntakiheryo xeeni nooloka axitokweene anivaha aya?

¹¹ Yookhala-tho etthu ekina ekhanle oohonona murettele mmulokoni. Mwa ntakiheryo, okhalana moonelo woovirikana voohimya sa enamuna yootthekula, pooti okumiherya “ovanyihana wohiloka ohinitekeliwa etthu”. Ekeekhai wira akhumelela mutthu onitumererya otthekula onivirikanya sooruma sa Yehova, axitokweene maKristau, khakhanle ooweemya wira mweettelo owo ovikaniheke, yoovaka wira ahikumiherye ovaanyihana. (Esal. 11:5; aÉf. 5:3-5) Hata vari siiso, axitokweene annikhalana ephoole wira ahaakhanyererye akina otthara moonelo aya. Awosa moororomeleya annitthara miruku siri mBiibiliyani sivahiwe aya axitokweene a eKristau sini: “Mulyiheke orattene, ipwittipwitthi sihiyeriwanyu ni Muluku. Musukeke . . . Muhìkhaliheké mapwiya w’ale avahiwanyu wasuka, masi mwetteke vophwanela wira yotthareni”.​—1 Ped. 5:2, 3; mmusome 2 aKorinto 1:24.

12, 13. (a) Anamoona a Yehova anoonela sai othanla waya inamuna sa otthekula, nave yooruma xeeni eri mBiibiliyani enivarela aya muteko? (b) Moota xeeni miruku sithokoreriwe ettima 12 sinivareleya aya muteko mmyaha sinceene mweekumini mwahu?

¹² Voohimya sa inamuna sa otthekula, nikhuuru nahu khannitokosa ifilme, axooku a mukomputador, iliivuru, wala isipo soovirikana wira nilopoliweke mwa iye sinireerela ni sihinreerela. Mwaha wa xeeni? Biibiliya onnimutumererya khula mutthu wira olimaleleke “othanla sorera ni sotakhala”. (aHéb. 5:14) Nave Biibiliya onnivaha miruku soovareleya muteko seiyo khula muKristau onirowa awe otokosaka okathi onithanla awe enamuna ya otthekula. Ekumi ahu yotheene, yoolakela ahu okhaleke “ophavela osuwela itthu sinasivela Apwiya”. (aÉf. 5:10) Biibiliya oniixuttiha wira ale anihoolela etthoko aakhalana owerya wa othanla inamuna sa otthekula sinirowa aya weemyaka vatthokoni vaya.a​—1 aKor. 11:3; aÉf. 6:1-4.

¹³ Malakiheryo a Biibiliya amanle ahu othokorerya annivareleya muteko myaha sikina ohiya inamuna sa otthekula paahi. Itthu ntoko iwarelo ni moota woowiitthokiha, ekumi ni malyelyo, ni myaha sikina pooti okumiheryaka ovaanyihana. Tthiri akhala wira khiivo yoolakiherya ya Biibiliya sa mwaha owo, atthu a Yehova mwa miruku annisyaka onyakulihana mmyaha iyo, okhala wira ‘murumeyi a Apwiya ahiwaneké, masi ohana warerela murima atthu othene”.​—2 Tim. 2:24.

MUKHOOTTE OMPATTHANI WOOHILOKA!

14. Nlikanyiho xeeni Paulo aavarihenle awe muteko wira ottittimiherye otthuneya waya okhootta opatthani woohiloka?

¹⁴ Enamuna xeeni ekina ale ‘anromola nsina na Yehova’ anisyaka aya itthu soohiloka? Okhootta wataana ni atthu anipaka itthu soohiloka. Eyo ennooniherya nthowa naya Paulo, nuumala oromola nlikanyiho na “malitti apakiwe ni Muluku” moottharelana aahimyale awe nlikanyiho nikina. Owo aahilepa voohimya sa “vatthokoni” wira ‘khasinkhala pahi mihasa sa miri ni s’oloko: sinnikhala-tho mihasa sa ewero ni sa eparatha. Iya sorerexa [sottittimiheya] sinlyelyiwa mahiku a nira, sikinaku [soohittittimiheya] ti sa mahiku othene”. (2 Tim. 2:20, 21) Nuumala-vo, aahaalopola maKristau oriki ‘attharuwe’ wala avalaane ni mihasa soohittittimiheya.

15, 16. Etthu xeeni ekhanle ahu oowiixutta mwa nlikanyiho na “etthoko” yuulupale?

¹⁵ Nlikanyiho nla nintaphulela exeeni? Paulo onnilikanyiha muloko wa eKristau ni “etthoko” yuulupale; nto khuta mutthu mmulokoni onlikana ni “muhasa” wala ikaruma sa vatthokoni. Vanniweryaneya vatthokoni, itthu sinilyelyiwa oravihiwa oretta wootakhala wala onyaleliwa. Eyo yiiraneya mwaneene etthoko onnivalaanya iye siri sooloka wira ovareleke muteko okathi wowaapeya.

¹⁶ Vamosaru, atthu a Yehova olelo-va anniimananiha okhala ooloka, vaavo vanisyaka aya wataana ni atthu yaale ari mmulokoni, masi ahiniiwelela voolakela waya sooruma sa Yehova. (Mmusome 1 aKorinto 15:33.) Akhala wira nihaana waahuluwa atthu ahiniiwelela ari muhina mwa muloko, nto vannitepa otthuneya waya okhootta opatthana ni atthu ari ota wa muloko; maana anamunceene mwa yaawo toosiveliwa musurukhu, ‘òwisupuwela mmansaya pahi, ahiniwiwelela anamuyari aya, òhiroromeleya, anawive, òwali, òhittittimiha itthu sowarya, òwòtherya akhw’aya ni òphavela sopuha, òmuhiya Muluku’!​—2 Tim. 3:1-5.

YEHOVA ONNIREELIHA SOOTHANLA SAHU

17. Aisarayeli oororomeleya yoonihenrye sai wiiwelela waya okathi yaaleeliwe aya wira avalaane ni alipa-ootakhala?

¹⁷ Biibiliya onnihimya oratteene moota aIsarayeli ale yaapanke aya yoothanla yooloka vaavo vaaleeliwa aya wira athaame ‘wattamela owanny’awe Koré ni Datani n’Abirami’. Yoolepa enihimya so: “[Naananoru] atthu othene yahihuluwa vapuwani va Koré ni va Datani n’Abirami”. (Moth. 16:24, 27) Ole khahiyo waari okathi wowoovelela wala wunteelela. Yoolepa ele ennooniherya-tho moota atthu ale yiiwelenle aya eriki, ‘atthu othene yahihuluwa vapuwani va Koré, Datani ni Abirami. Ale yaari oororomeleya khiyaaphavela hata vakhaani opahuliwa. Wiiwelela waya waari woomalela ni wa murima wotheene. Yahooniherya ni murima aya wotheene wira yaari mpantta wa Yehova ni wakhootta atakhali. Yowiiraneya ela enniixuttiha exeeni?

18. Paulo uupuwela exeeni okathi aamulopola awe Timootheyo wira “muhitthareké [itthu] sohiloka s’omiravo”?

¹⁸ Wira nivikanihe okhala apatthani a Yehova, nihaana opaka soothanla sooloka mowaakuveya. Eyo ennooneya mmasu murummwa Paulo aarumeelale awe wira omulopole Timootheyo oriki “muhitthareké [itthu] sohiloka s’omiravo”. (2 Tim. 2:22) Okathi ole, Timootheyo aari mulopwana oowunnuwa owehasa wene aarina iyaakha sa 30. Hata vari siiso, itthu “sohiloka s’omiravo” khisinaavara amiravo paahi. Nto okathi wamurweela aya muupuwelo woohiloka, Timootheyo ahaana ohuluwa. Ohimya vowiiwanyeya, Timootheyo ahaana okhootta itthu “sotakhala”. Yesu aahilavula masu oolikana ni awo vaavo aahimyale awe so: “nitho nanyu notthekihakani, musyole, murihele ottaiwene”. (Math. 18:9) Olelo-va, maKristau anniiwelela miruku iya ni murima aya wotheene, okathi sinaaphwanya aya mixankiho siniwerya ohonona waamini waya, okathi owo annipaka yoothanla yooloka moohipisa.

19. Soothanla xeeni sinaakhaliherya anna akina ohuluwa itthu sikhanle oohonona mweettelo aya wooloka?

¹⁹ Atthu yaale yaarina muxankiho woowurya vanceene khalai ahinatthi okhala Namoona, aapaka yoothanla aya ya ohiya owurya khula etthu enihapala. Akina annisyaka enamuna ya otthekula nnaamwi ehikhanle yoohiloka, masi mwaha woosuwela wira enoowiriha otthikela mweettelo wa khalai woohisumaaliha. (Esal. 101:3) Mwa ntakiheryo, munna mmosa ohinatthi okhala Namoona, saanimusivela ifesta seiye siniiniwa muusika wa ekhapa. Masi nuumala wiixutta ekeekhai, owo oottharuwa wiina wene, hata ifesta sinipakiwa ni anna, owo onoova otthikela mweettelo awe wa khalai. Ekeekhai wira maKristau khanikhanyereriwa ohiya owurya, wiina ni itthu sikina sihikhanle sootakhala okhalawene. Hata vari siiso, nihaana osyaka khula etthu yaarowa ohonona mukhalelo ahu wooloka wa omunepani.

20. Nnaamwi vahikhweyaka okhootta “sotakhala” etthu xeeni ennilipiha ni onimaaliha?

²⁰ Eparakha ya okuxa nsina na Muluku enninireya muritti muulupale. Tivonto hiyo nihaana okhootta “sotakhala” ni ohuluwa itthu soohifai. (Esal. 34:15) Ekeekhai wira opaka eyo khonikhweya. Masi ti vootteeliha murima osuwela wira Yehova onirowa waaphentaka voohimala “ale ari awawe” ni ale anivarexexa malakiheryo awe axariya.​—2 Tim. 2:19; mmusome 2 Wahala a Mamwene 16:9a.

[Enoota]