Yehova Onnaasuwela Ale Ari Awawe

“Nto ole onimphenta Muluku, owo onnisuweliwa ni Muluku”.​—1 AKOR. 8:3.

MWAAROWA WAAKHULA SAI?

Etthu xeeni enniroromeliha wira yoolakela ya Yehova khenikhala-khala ehononiwaka?

Ikeekhai xeeni piili suulupale, sinittittimiherya itthu Yehova onivaha awe efaita ni sooruma sawe suulupale?

Moota xeeni omuroromela wahu Yehova onilipihiwa aya ni ele eniixutta ahu va 2 Timootheyo 2:19?

1. Muhimye yowiiraneya ya mBiibiliyani enooniherya muupuwelelo woohiloka waarina aya atthu akina a Muluku. (Nwehe elatarato yoopacerya.)

NIHIKU nimosa vaasisu, Aroni, Muulupale Aanamukuttho, aaheemela vamukhora va etabernaakulu okunxe ene erupani ni mooro. Yaahemela-tho vakhiviru vawe, Kore ni axilopwana 250 yaawo yaaphavela-tho onvaha erupani Yehova, akunxeene erupani aya ni mooro. (Moth. 16:16-18) Wanipacerya atthu awo otheene yaakhala ntoko arumeyi oororomeleya a Yehova. Masi, voovirikana ni Aroni, atthu ale akina yaari oowiikuxererya voohifayi, yaphavela okhala anamukuthto ahithanliwe ni Yehova. (Moth. 16:1-11) Awo yaniiwoka yuupuwelaka wira Muluku aarowa weemya okokhorela waya. Masi muupuwelo owo waaninveiha Yehova, yoowo oniwerya woona ele eri vamurimani va mutthu ni aawerya woona owiiwelela wa atthu ale.​—Yer. 17:10.

2. Etthu xeeni Moise aahimmye awe vahinatthi, nto niireke masu awe yahiiraneya?

² Nihalaka nihiku nimosa Moise aahihimya vahinatthi wira: ‘Melo vasisu, Yehova onimwasuweliha ale ari awawe’. (Moth. 16:5) Tthiri Yehova ahaasuwanyeiha anamakokhorela ekeekhai ni ale yaari owootha; okathi yoole mooro wa Yehova ‘wampanhe awe Kore ni atthu 250 yavaha erupani’. (Moth. 16:35; 26:10) Okathi omosaru, Yehova aahimoopola Aroni, khumusuwanyeiha wira aari namukuttho ni namakokhorela eekeekhai a Muluku.​—Mmusome 1 aKorinto 8:3.

3. (a) Muxankiho xeeni waakhumenle mahiku a murummwa Paulo? (b) Ntakiheryo xeeni Yehova ovanha awe khalai mmoota saaphunkele awe anammwareya?

³ Etthu yoolikana ni eyo yaahikhumelela mahiku a murummwa Paulo, sivinreene iyaakha 1.500. Atthu akina yaihimya okhala maKristau, yaanitthara sowiixuttiha sa ethiru; masi nlelo khiyeetta vamosa ni muloko. Mutthu ahaasuwela oweha, woonasawe aarowa woonaka wira anammwareya ale yaamulikana ni atthu akina a mmulokoni. Masi anammwareya ale yanwerya waapahula maKristau oororomeleya. Nto akhalaka ntoko miici siwanre erutthu ya epwittipwitthi yaahipacerya ‘ohonona wamini w’atthu anjene’. (2 Tim. 2:16-18) Masi, Yehova khahiyo mutthu ohinsuwela oweha, ohiya-vo, Paulo aanisuwela moota Muluku aaphukenle awe anammwareya ale a khalai, Kore ni atthu yaale yaamutthara. Nuupuwelaka mwaha ola, nrowe nithokorerye epantte emosa ya Biibiliya yoovila wira noone etthu ekhanle ahu owiixutta.

‘MIYO KA YEHOVA NKINIRUKUNUWA’

4. Exeeni Paulo aakupali awe, ni oonihenrye sai yookupali awe wa Timootheyo?

⁴ Paulo aanisuwela wira Yehova anwerya waasuwela ale yaamurumeela moowipaka ni mwa enamuna emosaru aamwaasuwela ale yaamurumeela ni ekeekhai. Paulo aahooniherya okupali wawe wuulupale, mwa enamuna yaathanlale awe masu oowuupuxeriwa, okathi aamulepela awe Timootheyo. Nuumala oromola makhalelo ootakhala yaakumihenrye aya anammwareya ale mmulokoni, Paulo aalempe so: ‘Nto malitti a muloko apakiwe ni Muluku anihala elimpene. Mmalittini-mmo motthittiwa molumo ala: “Apwiya annasuwela atthu ari awaya”. Ni wira: ‘Atthu othene anromola nsina n’Apwiya ehiyeke sotakhala’.​—2 Tim. 2:18, 19.

5, 6. Xeeni arya aya ookhalela masu a Paulo oowi “malitti apakiwe ni Muluku”, nto masu awo yaamukhalihenrye sai Timootheyo?

⁵ Tthiri masu Paulo aathanlale awe mu yoolepa ela tooreerela. Ela ekwaha yoopacerya eniromoliwa aya “malitti a muloko, apakiwe ni Muluku”. Biibiliya onnirumeela nuulumo noowi “malitti”, olavulaka mwa nthoonyeryo sa itthu soovirikana, ohela muhina muttetthe wa oYerusalemu yoowo aari muttetthe muulupale wIsarayeli a khalai. (Esal. 87:1, 2) Muteko wa Yesu mwa yoolakela ya Yehova onnilikanyihiwa-tho ni nluku ninlipiha enupa. (1 aKor. 3:11; 1 Ped. 2:6) Etthu xeeni Paulo uupuwela awe okathi aalempe awe sa “malitti apakiwe ni Muluku”?

⁶ Paulo aahilavula sa “malitti apakiwe ni Muluku”, okathi omosaru yoowo oniromola awe masu a Moise voohimya sa Kore ni ale yaamukhaliherya alempwale eliivuru ya Mothakoni 16:5. Woonasa wene, Paulo aaromola yowiiraneya ya mahiku a Moise, omananihaka omulipiha Timootheyo ni omuupuxerya wira Yehova ookhalana owerya wa omalamaliha miteko sa anammwareya. Yehova khaaphavela wira muloko waakanyeriwe ni anammwareya, ntoko saakhumelenle aya mmahiku a Kore. Paulo khaahimyale moomalela yootaphulela ya ‘malitti yaapakiwe ni Muluku’. Masi masu aaromonle awe, yaahimwiiriha Timootheyo ororomela ikuru sa Yehova.

7. Xeeni vanireerela ahu waaminiki wira Yehova onrowa opaka itthu mwa xariya ni moororomeleya?

⁷ Sooruma suulupale sa Yehova, khasinttikinyeya. Esalimo 33:11 enihimya so: “Otthuna wa Muluku onnìraneya mahiku othene, sinùpuwelawe ni nlema nawe sinnarwela atthu othene”. Soolepa sikina sinlavula sa olamulelo wa Yehova, ophenta wawe, exariya awe, ni ororomeleya wawe woohimala. (Okhum. 15:18; Esal. 106:1; 112:9; 117:2) Malakhiya 3:6 onihimya so: ‘Miyo ka Yehova, nkinirukunuwa’. Mwa enamuna emosaru, Yakobo 1:17, onihimya wira “Muluku khanthatuwa, nnákhala khanihiya warya, mana Owo khammala”.

ETHOONYERYO ENLIPIHA OMUROROMELA WAHU YEHOVA

8, 9. Etthu xeeni eniixutta ahu sa ethoonyeryo eromoliwe ni Paulo mwa nlikanyiho nawe?

⁸ Nlikanyiho na Paulo nilempwale va 2 Timootheyo 2:19 ninhimya mathipelo a enupa apakiwe ni ihapari, yaawo anikhala ntoko aheliwe ethoonyeryo. Khalai, yaari etthu yoolema mutthu olepa ethoonyeryo epantte epaceriwa aya otekiwa enupa, waaniheryasa wira atthu amusuweleke ole otenke wala mwaneene enupa eyo. Paulo aari mutthu oopacerya orumeela nlikanyiho nla okathi aamulepa awe Biibiliya.a Ethoonyeryo eyo ya Muluku enitaphulela itthu piili. Yoopacerya, “[Yehova] onnasuwela” ale ari awawe”; ya nenli, “Atthu othene anromola nsina na [Yehova] ehiyeke sotakhala”. Eyo enninuupuxerya ele enisoma ahu eliivuru ya Mothakoni 16:5. Musome.

⁹ Exeeni ekhanle ahu oowiixutta voohimya sa ethoonyeryo eromoliwe ni nlikanyiho na Paulo? Wa ale ari atthu a Muluku, malakiheryo ni sooruma sa Yehova sinlipa ni ikeekhai iya suulupale piili: (1) Yehova onnaaphenta ale ari oororomeleya wa yena, ni (2) Yehova onnaanyokha atakhali. Xeeni masu ala aryaaya ootthuneya voohimya sa anammwareya yaari mmulokoni?

10. Mmahiku a Paulo, moota xeeni sowiira sa anammwareya, saaxankiha aya ale yaari oororomeleya?

¹⁰ Timootheyo ni atthu akina oororomeleya, yaanixankiheya mwaha wa itthu saapaka aya anammwareya ale mmulokoni. MaKristau makina owehasa wene yaaniikoha nthowa naya anammwareya ale yeemereriwa aya okhala mmulokoni. Ale yaari oororomeleya, woonasa wene yaniikoha akhala wira Yehova anwerya tthiri waahiyaniha ale yaamurumeela moororomeleya, ni ale yoothererya omurumeela masi aryeene anammwareya.​—Mit. 20:29, 30.

11, 12. Epaphelo ya Paulo yaalipinhe sai nroromelo na Timootheyo?

¹¹ Moohaaniherya epaphelo ya Paulo yaahilipiha nroromelo na Timootheyo, vaavo aamuupuxenrye awe ele yaakhumelenle okathi Aroni aavuwihiwa awe, nto Kore ni anammwareya akhwa awe khuramusiwa, okhoottiwa ni opwetexiwa. Tthiri Paulo aaphavela ohimya wira, nnaamwi mmulokoni mme yaari-vo maKristau owoothererya, Yehova aarowa owooniherya ale yaari awawe, ntoko siirale awe okathi wa Moise.

¹² Yehova khonaturukeye; ni toororomeleya. Owo onnaanyokha atakhali, nto waphiya okathi awe, onimwaapwetexa ale ahimphavela ottharuwa. Okhala wira Timootheyo aari mmosa mwa ale “yaromola nsina na Yehova”, owo ahuupuxeriwa wira aahaana othanya sowiira sa maKristau ale oowothererya.b

OKOKHORELA WEKEEKHAI KHAHIYO WA MAHALA

13. Etthu xeeni enniiriha ororomela?

¹³ Masu a Paulo anoowerya onilipiha momunepani. Etthu enitthuneya ahu opacerya osuwela tiila: Yehova onnoona saana ororomeleya wahu wa yena. Yehova khahiyo onooweha paahi voohipaka etthu. Masi oniphavela mureerelo aya ale ari awawe. Biibiliya onihimya so: “Apwiya anniweha ilapo sothene wira yakhaliherye ale anaroromela ni murim’aya wothene”. (2 Wah. 16:9) Ti maana aya, hiyo nihaana ororomela tthiri wira khula etthu enipaka ahu “ni murima worera” khahiyo etthu ya mahala.​—1 Tim. 1:5; 1 aKor. 15:58.

14. Enamuna xeeni ya okokhorela eninyokha awe Yehova?

¹⁴ Ti vooloka osuwela wira Yehova khonaahiya akhalaka okathi munceene, ale anoothererya omurumeela. Okhala wira maitho awe ‘annona elapo yothene’ owo onoowerya owoona ale ‘ahinimurumela ni murima wottheene’. Eliivuru ya Miruku 3:32 enihimya so: “Apwiya anniphweliwa n’atakhali”, eyo piiyo, ale anoothererya okhala atthu oororomeleya, masi apakaka itthu sotakhala wiiphiini. Nnaamwi mutthu onoothererya aweryaka waavitherya itampi sawe apinaatamu, Yehova yoowo ori oowerya sotheene ni a xariya onihimya wira ole “onivitha sonanara sawe, khankelela oholo”.​—Mir. 28:13; mmusome 1 Timootheyo 5:24; aHéberi 4:13.

15. Etthu xeeni enitthuneya ahu osyaka nto mwaha wa xeeni?

¹⁵ Anamunceenexa mwa arumeyi a Yehova atthu animurumeela ni murima wotheene. Tivonto khahiyo etthu enimakela okhumelela mmulokoni mutthu onoothererya omurumeela Yehova. Masi, akhala wira yahiiraneya okathi wa Moise, nave muhoolo mwaya khwiiraneya mmulokoni wa maKristau oopacerya, nto olelo-va pooti okhumelelaka-tho. (2 Tim. 3:1, 5) Nto niireke eyo ehaana oniirihaka ohoverya ororomeleya wa anna akina mmulokoni, khiyawoona ntoko alipa-owoothererya anna yaale aniimananiha omurumeela Yehova moororomeleya? Nnaari! Yaarowa okhala etthu yootthekeya waahoverya annihu ni arokora a mmulokoni. (Mmusome aRoma 14:10-12; 1 aKorinto 13:7.) Etthu ekina enooniherya otakhala waya ohaaroromela anna akina, mwaha woowi eyo enoowerya ohonona wataana wahu ni Muluku.

16. (a) Exeeni khula mmosa a hiyo onitthuneya awe opaka? (b) Etthu xeeni eniixutta ahu ekaaxa eni “Mukoheke murim’anyu, mòneke mwari ni wamini”?

¹⁶ Khula muKristau ohaana ovarerya “mwettelo awe”. (aGal. 6:4) Mwaha wookhala atthu oottheka, okathi munceene nniweha itthu soovonyeya paahi ohiya woonaka itthu sooloka. (aHéb. 3:12, 13) Ti maana aya vanireerela ahu otokosa etthu enniiriha omurumeela Yehova. Nto vannireerela wiikohaka so: ‘Kiireke miyo kinimurumela Yehova mwaha wa omphenta ni osuwela wira owo mukhulupale tthiri? Wala kinimurumeela paahi mwaha wa mareeliho a weerutthuni anirowaka waakhela mParayiisu?’ (Wis. 4:11) Tthiri hiyo nnoophwanya mureerelo vaavo vanitokosa ahu mweettelo ahu ni omala-maliha khula etthu yoohiloka eniphwanya ahu vamurimani.

OROROMELEYA WEIWO ONIKUMIHERYA OHAKALALA

17, 18. Xeeni vanitthuneya ahu omurumeela Yehova mwa ekeekhai, ni murima wotheene?

¹⁷ Vaavo vaniimananiha ahu omurumeela Yehova mwa ekeekhai ni murima wotheene, ninniphwanya mireerelo sinceene. Nasalimo mmosa aahimyale so: “Òreriwa t’ale Apwiya ahiniwonanaya yottheka, murohoni mwaya muhikhanle-mo wotha”. (Esal. 32:2) Aayo, ale anikumiha vamurimani vaya itthu sowootha, anikhala oohakalala, ni anniiriha okumi weetta ephiro eniphwanyiha ohakalala woomalela wa muhoolo.

¹⁸ Okathi waphiya, Yehova onrowa owooniherya atthu otheene yaale anipaka itthu soohiloka, wala arina mirima miili; okathi owo, onimooniherya ‘ovirikana okhanle wa anaxariya ni atakhali; ale animurumeela Muluku, ni ale ahinimurumeela’. (Mal. 3:18. Tradução do Novo Mundo.) Okathi mmosaru, tivoohakalaliha osuwela wira ‘Yehova onnasuka atthu òrera murima, onnìwa olompa waya’.​—1 Ped. 3:12.

[Inoota]

[Ekaaxa epaaxina 11]

“Mukoheke Murim’anyu, Mòneke Mwari ni Wamini . . . ”

NINROWA otokosa sai itthu siri vamurimani vahu? Biibiliya onnilopola so: “Mukoheke murim’anyu, mòneke mwari ni wamini; mwilamuleke mmansinyu”. (2 aKor. 13:5) Mweettelo ahu onitthuneya otokosiwaka saana khula okathi wira noone akhala wira okokhorela wahu ti wooloka. Nrowe nithokorerye makoho anirowa ahu orumeelaka wira niitokose:

▪ Niireke ilavulelo saka okathi onaattottopelaka ni waaxukhurela atthu akina sinnooniherya wira kinilavula ni murima wotheene?​—Esal. 12:3, 4; 1 Ped. 1:22.

▪ Kinnooniherya owaakhela saana atthu ni waavaha itthu moohiikhupanyiha?​—Math. 6:2-4.

▪ Kiireke kinnaakhapelela atthu a vatthokoni vaka mwa niphento ni nttittimiho, kiryeene owaani wala vari atthu akina?​—aKol. 3:18-21.

▪ Kiireke mweettelo aka onnivarihana ni malakiheryo a Biibiliya ni kinniluttuweliwa owiixuttiha akina?​—aRom. 2:21-23.

Akhala wira ninniphwanya etthu yoohiloka vamurimani vahu, vaamureera ophela ehinatthi opahula mweettelo ahu wotheene. Nto, nimutakihaka murummwa Paulo, hiyo nihaana weemela ohoolo wa Muluku khiyahimya so “mosuwela wira nkitonko olavula masu òwepesa; walá nkiphavenle ophwanya musurukhu”.​—1 aTes. 2:5.