‘Omwene Anyu Orwe’ Nto Liini?

‘Siso-tho, mònakaru sikhumelelaka itthu iya sothene, musuwele sana wira Mwana a Mutthu ori vakhiviru, vamukhora’.​—MATH. 24:33.

MUNROWA WAAKHULA SAI?

Moota xeeni sowiiraneya sa mulaponi okhuma mwaakha wa 1914, sinaakhwaniherya aya iprofesia sa Biibiliya?

Xeeni otakhala onitepa aya wuncerereya?

Exeeni enrowa anyu omananihaka opaka mwaha woosuwela wira wanikisa onnaattamela?

1, 2. (a) Exeeni eniwerya omwiiriha mutthu ohoona etthu enooneya? (b) Etthu xeeni enisuwela ahu voohimya sa Omwene wa Muluku?

WOONASA WENE munnisuwela wira atthu yoonale etthu yiireyaka, annuupuwela itthu soonale aya mwa inamuna soovirikana. Vamosaru, mutthu pooti ohiwerya wuupuwela khula etthu yaahimmwale ni meediku nuumala woleela wira wookhalana oretta wuulupale. Aahiiso, akina annoona ovila ophwanya ixaavi saya wala ookulu aya, nnaamwi itthu iyo sihaarakamenle. Ntoko sinihimya aya yootokosa emosa epakiwe, itthu iyo sinniireya mwaha wa enamuna emosa ya ohoona onikhumelela vaavo vanimananiha ahu opaka itthu sinceene okathi omosaru. Vanihimmwa wira ottoopare ahu khoniwerya ovaha ephoole saana itthu sinceene okathi omosaru.

² Atthu anceene olelo va, aakhalana “evaasi” wala khanoona voohimya sa yootaphulela ya itthu siniireya mulaponi. Awo pooti weemya ariki tthiri olumwenku wooturukeya nuuvira mwaakha wa 1914, masi khanoona ele enitaphulela aya itthu iyo siniireya. Ntoko alipa-oomusoma Biibiliya, noosuwela wira mwa enamuna emosa Omwene wa Muluku ohoorwa mwaakha wa 1914, vaavo Yesu aakhalihiwa awe Mwene wiirimu. Masi ninnisuwela wira sihaavo itthu sinceene siniheliwa mpuwa waakhuliwa wa nikoho noowi: ‘Omwene anyu orwe, otthuna wanyu wireye ntoko wirimu siso vathí-va’. (Math. 6:10) Tthiri eyo enihela muhina omala wa mukhalelo ola wootakhala. Nto nuumala wiireya eyo, otthuna wa Muluku tonrowa aya wiireya valaponi ntoko siniireya aya wiirimu.

3. Mureerelo xeeni oniphwanya ahu mwaha woosoma Nuulumo na Muluku?

³ Mwaha woomakela osomaka Nulumo na Muluku, nnooweryaka woona iprofesia siniireya vano. Tthiri eyo enniniiriha okhala oovirikana ni anamunceene! Awo ari oovareya ni itthu sa okumi aya ni soophavela saya, tivonto khanoona wira Kristu onnilamulela okhuma 1914, ni wira moohipisa onoruuha maphukelo a Muluku. Vano, mwiikoheke so: Akhala wira mooviriha iyaakha sinci mmurumeelaka Muluku, niireke khamuliyanle ni munnikupaleela wira itthu siniireya sinooniherya otepa waya waattamela wanikisa wa olumwenku ola? Akhala wira eNamoona mukenle niinaano, itthu xeeni sinitepaanyu ovaha efaita? Voohicala etthu sa ele enrowa ahu waakhula, nrowe nuuluule mathowa mararu ootthuneya, niire so, etthu ene enniiriha okupaliki wira Mwene oowoottihiwa a Muluku, moohipisa onrowa opaka etthu ekina wira otthuna wa Muluku wiiraneye moomalela valaponi.

ANNIKHUMELELA ALIPA-OWEETTIHA EKHAVALO

4, 5. (a) Yesu Kristu onipaka exeeni okhuma 1914? (Nwehe elatarato yoopacerya.) (b) Anithoonyerya exeeni alipa-ooweettiha ekhavo araru, nto itthu xeeni sinikhumelela?

⁴ Mwaakha wa 1914, Yesu Kristu, yoowo oneettiha ekhavalo yootteela ya nthoonyeryo, aahivahiwa emwene wiirimu. Moohipisa Owo onrowa ovikaniha oxintta mukhalelo wootakhala wa Satana. (Musome Wisupulula 6:​1, 2.) Iprofesia sihimmwale ni ekapiitulu 6 ya Wisupulula, sinnooniherya nthowa naya itthu ntoko: ikhotto, othowa soolya, iretta ni itthu sikina sinikumiherya okhwa, saarowa aya otepaka valaponi nuumala Omwene wa Muluku opacerya olamulela. Itthu iyo sinnooniheriwa mwa nthoonyeryo ni alipa-oweettiha ikhavalo araru animutthara Yesu Kristu.​—Wis. 6:3-8.

⁵ Ntoko saahimmwale aya, murettele ‘womala valaponi’, nnaamwi ilapo sinceene silaiheryaka wiiraana wira sikumiherye murettele. Ekhotto Yoopacerya ya Olumwenku, yaari mapacereryo paahi a ikhotto sinceene sinikumiha murettele valaponi. Nnaamwi itthu ntoko mihakhu ni siensia sitepaka orowa vahoolo okhuma 1914, othowa wa soolya onnivikaniha okhala muxankiho valaponi. Ohiya-vo, ti pani onikhootta wira okhumelela wa ikwerere, ihasara sa ephattu, ni ‘itthu sikina siniiva’ sinnivikaniha owiiva atthu imilyau sinceene khula mwaakha? Otepa waya woopiha, omakela waya okhumelela, ohiya-vo, waatta waya atthu anikhwa; onnivikana itthu sotheene saakhumelenle apinaatamu khalai. Niireke munnisuwela ele enitaphulela aya itthu iyo?

6. Ti pani yaasuwela saana wiiraneya wa eprofesia ya Biibiliya, nto nuumala-vo yaapanke exeeni?

⁶ Ekhotto Yoopacerya ya Olumwenku ni ekwerere ya gripe espanhola, yahaakanyerya muupuwelelo wa atthu anceene. Masi, maKristau owoottihiwa yaanilipelela saana wira 1914, waarowa okhala Emalelo ya Okathi wa Amalapo, wala ‘omala okathi wathanliwe w’amalapo’. (Luka 21:​24) Ekeekhai wira khiyaasuwela saana etthu yaarowa wiiraneya. Masi, awosa yaanisuwela wira 1914, waarowa okhala mwaakha wa oturukeya itthu, voohimya sa olamulelo wa Muluku. Amalakaru wiiwexexa saana wiiraneya wa iprofesia sa Biibiliya, mohoova yaanilaleya wira Muluku oopacerya olamulela. Wiimananiha waya olaleya Omwene waahikumiherya olupatthiwa wootakhala. Mwaha wa olupatthiwa iwo okhumelelaka ilapo sinceene, eyo yahaakhwaniherya-tho eprofesia. Muhoolo mwaya, anyokhani a Omwene, ‘yanipaka malamulo wira akumiherye mixankiho’. Yaahikumiherya-tho masooso, yaamanaka, waatthukela, waahopha, owoopela ni waahita annihu.​—Esal. 94:20; Wis. 12:15.

7. Xeeni anamunceene ahinsuwela aya ele enitaphulela aya itthu siniiraneya mulaponi?

⁷ Xeeni anamunceene ahineemya aya wira Omwene wa Muluku onnilamulela wiirimu, hata yoonaka wiiraneya wa itthu sinooniherya eyo. Xeeni vahinoona aya wira itthu siniiraneya mulaponi sinnaakhwaniherya iprofesia sa Biibiliya, ntoko sisaale arumeyi a Muluku sinimakela aya ohimya okhuma khalai? Niireke okhala wira anamunceene aniwehexexa itthu siniwerya aya woona ni maitho aya? (2 aKor. 5:7) Niireke ovaha waya efaita itthu sinipakiwa ni apinaatamu, onniwiiriha ohoona ele Muluku enipaka awe? (Math. 24:37-39) Niireke akina anaakanyeriwa ni onyakula wa itthu sinilaleiwa ni Satana? (2 aKor. 4:4) Vanitthuneya waamini ni okhalana maitho omunepani wira mutthu owerye osuwela itthu siniireya mapuro ahinooneya. Tthiri hiyo ninnixukhurela okhala wira maitho ahu annoona itthu siniiraneya vano!

ITTHU SOOTAKHALA SINOOVIRA SITEPAKA

8-10. (a) Yoolepa ya 2 Timótheyo 3:1-5 enaakhwanela sai? (b) Xeeni vanihimya ahu wira otakhala wa itthu onoovira otepaka?

⁸ Nthowa na nenli ninniiriha osuwela wira moohipisa Omwene wa Muluku onrowa olamulelaka valaponi tinla: Otakhala wa makhalelo aapinaatamu onoovira otepaka. Mwa iyaakha sinaattamela 100 sivinre sinnooneya itthu saahimmwale va 2 Timótheyo 3:1-5. Khula etthu ehimmwale ni yoolepa eyo wiireya waya onootepa omwareela mulaponi. Niireke munnoona wira itthu iyo wiiraneya waya onootepa wuncerereya? Nrowe nithokorerye sowiiraneya sikina sinrowa onikhaliherya wiiwexexa saana.​—Mmusome 2 Timótheyo 3:1, 13.

⁹ Nkahaya muupuwele itthu sooniwa okhala sowuuliha muru iyaakah sa 1940 wala 1950, ni itthu siniireya olelo va olumwenku wotheene, mmyaha sa otthekula, axooku ni mawarelo. Owali wootepexa ni mweettelo wohisumaaliha ohuulaana khula opuro. Khula mutthu oniphavela wooniherya moota otempe awe otakhala, ni ohuuleliwa wawe muru itthu soohiirya. Iprograma sa televisau sooniwa okhala soohiloka iyaakha sa 1950, vano sinihimmwa wira ti sooreerela wa imusi. Anamunceene anneemya wira atthu anirupihana alopwanaru wala athiyanaru, annirumeela iprograma sa otthekula ni mawarelo wira yinnuuheryeke mweettelo aya wa atthu otheene. Nto hiyo ninnixukhurela mwaha woosuwela ele Muluku enihimya awe!​—Mmusome Yuda 14, 15.

¹⁰ Aahiiso, muKristau pooti wuupuwela-tho ele yooniwa okhala mweettelo woohileeleya wa amiravo a iyaakha sa 1950, voovirikana ni ele enooneya olelo-va. Khalai anamuyari khivaasivela owoona anaaya ampahaka sigarro, owurya soohapaliha, wala wiina woohikhalela. Masi olelo-va, atthu aalimalela itthu soothikila muthana. Mwa ntakiheryo: Mwaana mmosa a iyaakha 15 onisoma, aahiwoopela ni kapwitthi anaxikola akhwaawe musaala, khuwiiva anli, nto 13 khuvulala. Ekrupu emosa ya amiravo ooyeveela yaahapaliwe mwaha wa mirette, yahimwiiva vootakhalexa mwaamwali aarina iyaakha 9, khummana tiithi awe ni munnawe a erukulu ekina. Amiravo a elapo emosa ya wAsia anihimmwa wira tanikumiherya ikrime sinceene siren’ye iyaakha muloko sivinre ninaano. Nto niireke vannireerela okhootta wira vano itthu sootakhala sinoovira sitepaka?

11. Xeeni atthu anceene ahinikupali aya wira otakhala wa itthu onootepa?

¹¹ Tthiri murummwa Pedru aahihimya vahinatthi wira: ‘Mahiku òkiserya, anokhumelela atthu òhàmini anrowa wettela makhalelo aya òtakhala. Awo animotheyani yiraka: ‘Owo khahimyale wira onimorwa? Vano-nto, ori vai? Axitith’ihu ahòkhwa, masi itthu sothene siri ntoko saryaya okhuma opattuxiwakaru olumwenku!’’. (2 Ped. 3:3, 4) Masi exeeni eniwiiriha atthu opakaka itthu sootakhala? Vanikhala ntoko wira mutthu onimakela woona etthu, mwaha woolimalela khonicalela etthu eyo. Akhala wira mutthu onimusuwela ahu mootutuxerya onnipaka etthu yoohiloka khivanrowa onisivela, masi akhala wira atthu anceene annipaka itthu soohiloka vakhaani-vakhaani mwa okathi munceene hiyo pooti ohicalela etthu eyo. Masi, ohononeya wa makhalelo ooreera onnikumiherya mweettelo oowoopiha.

12, 13. (a) Xeeni ohimmwaka wira itthu siniiraneya khasinnihakalaliha? (b) Okathi ola wa ‘mixankiho’ etthu xeeni enrowa onikhaliherya okhala oohitteettheya?

¹² Murummwa Paulo aahinilopola ni masu ala: ‘okathi wokiserya’ makhalelo yaarowa okhala ‘òxankiha’. (2 Tim. 3:1) Masi eyo khentaphulela wira khiivo ekhanle ahu oopaka, ni wira mixankiho sinnikhumelela khasinniwereya. Nto nikhaliheriwaka ni Yehova, munepa awe wootteela, vamosa ni muloko wa eKristau, hiyo nnoowerya okhumela saana wa khuta etthu yoothananiha enikhumelela ohoolo wahu. Aayo, nnoowerya olipa mowaaminini. Maana ‘owerya nno wulupalexa onrwa wa Muluku, khuhiyó wawihu’.​—2 aKor. 4:7-10.

¹³ Muhiliyale wira Paulo ohimyaka sa eprofesia ya mahiku ookiserya onipacerya ni moolumo ani: “musuwelexe wira”. Moolumo ala anooniherya wira ele enrowa ohimmwa enimwiiraneya tthiri. Nihihoveryeke wira makhalelo aapinaatamu anrowa ovikanihaka okhala ootakhala mpakha Yehova opwetexa. Itthu siiranen’ye khalai sinooniherya wira, okathi mweettelo wooloka onaakanyereya aya, makhalelo ooloka a atthu wala elapo, annihononeya mpakha opahuwa. Moota itthu sinananre aya vano, khasitonko wiireya siisa okhalawene. Atthu pooti ohicalela ele enitaphulela aya itthu iyo sotheene, masi itthu siniiraneya okhuma 1914, sohaana onooniheryaka hiyo wira nihaana okupaleela wira moohipisa Omwene wa Muluku onrowa opwetexa olumwenku ola.

NLOKO NLA KHANNIMALA

14-16. tthu xeeni ya neeraru ennikupaliha wira Omwene wa Muluku onimoorwa niinano?

¹⁴ Yookhala-tho etthu ya neeraru enniiriha okupaleela omala wa olumwenku ola. Itthu siiranen’ye wa arumeyi a Muluku, sinooniherya wira wanikisa onnaattamela. Mwa ntakiheryo, ohinatthi Omwene wa Muluku okhalihiwa wiirimu, yaahikhala ekrupu emosa ya alipa-oowoottihiwa oororomeleya, yaamurumeela Muluku. Nto yaapanke exeeni nuumala woona wira ele yaalipelela wiiraneya 1914 khiyiranen’ye? Anamunceene mwa arumeyi ale, yaahivikaniha okhala oororomeleya ni omurumeela saana Yehova nnaamwi yaakumananne soweeha ni olupatthiwa. Nuuvira iyaakha sinceene, anamunceene, wala otheene yaale yaasuwenle otthuneya waya mwaakha wa 1914, yaahivikaniha okhala oororomeleya mpakha omaliha muteko aya valaponi.

¹⁵ Mwa eprofesia yeele Yesu yaahimmya awe itthu khamosa-kamosa sa ethoonyeryo ya omala wa makhalelo ala, owo aahimmye so: ‘Nloko nla khannimala mpakha itthu iyo sotheene wiiraneya’. (Mmusome Matheyo 24:33-35, NM.) Hiyo ninkupali wira moolumo a Yesu oowi: ‘nloko nla’ anihimya ikrupu piili sa maKristau oowoottihiwa. Ekrupu yoopacerya ti ele ya okathi wa 1914, ekrupu ele yahoona ethoonyeryo ya okhala-vo wa Kristu mwaakha yoole. Ale yiirela mpantta ekrupu ele khahiyo yaakhumelenle mwaakha wa 1914 paahi, masi yaahithanliwa ni munepa ntoko aana a Muluku ohinatthi ophiya mwaakha ole wala mwaakha yoole wa 1914.​—aRom. 8:14-17.

¹⁶ Nto ekrupu ya nenli ya ‘nloko nla’, enaahela muhina maKristau oowoottihiwa yaakhumelenle nuuvira okathi ole, masi khukhala akumi okathi yoole maKristau makina a ekrupu yoopacerya wiira aya nlelo aryeene akumi valaponi. Khahiyo onihimmwa khuta mutthu aari mukumi okathi ole wa ekrupu yoopacerya, masi anihimmwa maKristau yaathanliwe ni munepa wootteela, okathi yoole wiira aya nlelo maKristau a ekrupu yoopacerya arye ene akumi valaponi. Tivonto, khahiyo wira khula mutthu onoottihiwa olelo-va, oniirela mpantta wa ‘nloko nla’ naahimmwale ni Yesu. Olelo-va, maKristau oothanliwa a ekrupu ya nenli ahuuluvala. Tthiri, moolumo a Yesu va Matheyo 24:34, anniniiriha okupali wira woonasa wene maKristau makina mwa ale anihimmwa okhala ‘nloko nla’, khanimala ahikhumelenle maxakha maalupale. Eyo ehaana wuncererya okupali wahu wira ohanle okathi vakhaani wira Omwene wa Muluku opwetexe mukhalelo ola wa itthu sootakhala ni okumiherya elapo esya ya xariya.​—2 Ped. 3:13.

MOOHIPISA KRISTU ONROWA OMALELIHA OXINTTA WAWE

17. Nuumala othokorerya sowiiraneya tthaaru suulupale etthu xeeni ekhanle ahu ookupaleelaka?

¹⁷ Nto etthu xeeni ekhanle ahu oohimya mwa sowiiraneya iya suulupale tthaaru sithokorenrya ahu? Yesu aahihimya wira khinaarowa osuwela; tthiri khannisuwela, nihiku wala okathi ene. (Math. 24:​36; 25:​13) Masi, ntoko saahimmya awe Paulo, vanniweryaneya woona ithoonyeryo sa okathi onikhala ahu. (Mmusome aRoma 13:​11.) Tthiri hiyo ninkhala okathi wookiserya. Nathokorerya saana iprofesia sa Biibiliya ni ele Yehova Muluku ni Yesu Kristu enipaka aya, khanikhanle oohiwerya woona ithoonyeryo sihinkhootteya wira tthiri ninkhala waattamela wanikisa wa makhalelo ala a itthu.

18. Exeeni enrowa owiiranela ale anikhootta weemya Omwene wa Muluku?

¹⁸ Ale anikhootta weemya wira Yesu Kristu oovahiwa okhulupale, yoowo ori Mulipa-ooweettiha ekhavalo yootteela, hata ahiphavelaka, moohipisa ahaana waakhulela wira aavonya. Tthiri khanrowa otthyawa ophukeliwa onirwa. Okathi owo atthu anceene anrowa wunlaka mwaha wa woova, ahimyaka so: ‘T’ani onwerya ohala?’ (Wis. 6:​15-17) Nto ekapitulu enittharelana ya Wisupulula ennaakhula nikoho nlo. MaKristau oowoottihiwa ni ale anilipelela okhalaka valaponi, tanrowa tthiri, ‘ohala’ nihiku nlo, mwaha woweemereriwa ni Muluku. Nuumala-vo, ‘muttitthi mulupalexa’ wa ipwittipwitthi sikina onrowa woopowa okathi wa maxakha maalupale.​—Wis. 7:9, 13-15.

19. Ntoko mutthu onikupali wira wanikisa wa mukhalelo ola onnaattamela, etthu xeeni vano enilipelela anyu?

¹⁹ Akhala wira vano ninrowa ovaha ephoole wiiraneya wa iprofesia sa Biibiliya saahimmwale, muupuwelo ahu khonrowa waakanyereya ni onyakula wa itthu sinikumiheriwa ni olumwenku wa Satana; ohiya-vo maitho ahu anoowerya woona wira itthu siniiraneya vano sookhalana ni yootaphulela aya. Moohipisa Kristu onrowa omaliherya opwetexa wawe makhalelo ala ahininvuwiha Muluku, okathi onrowa awe owaniha ekhotto yookiserya mwa xariya. (Wis. 19:11, 19-21) Nkahaya muupuwele moota sinrowa ahu ohakalala nuumala itthu iyo wiiraneya!​—Wis. 20:1-3, 6; 21:3, 4.