Mukhapelele Yoohiyeriwa Anyu Mpakaka Soothanla Sooloka
“Muthanyeke sotakhala, mwireke sorera ni nthiti”.—AROM. 12:9.
MWAAROWA WAAKHULA SAI?
Nkatthokiheryani: exeeni ekhanle yoohiyeriwa ahu yomunepani?
Yoolopola xeeni eniixutta ahu voohimya sa sowiira sa Esawú?
Ninrowa okhapelela sai yoohiyeriwa ahu?
1, 2. (a) Moota xeeni nyuwo mpanke anyu yoothanla ya omurumeela Muluku? (b) Makoho xeeni anireerela wiikoha voohimya sa yoohiyeriwa ahu yomunepani?
ATTHU oowiiraka imilyau sinceene aapaka yoothanla ya miruku ya omurumeelaka Yehova Muluku ni omutthara Yesu Kristu. (Math. 16:24; 1 Ped. 2:21) Hiyo khaninthweeliha okumi ahu wa wiivahererya wa Muluku. Yoothanla ahu yookhalana mathipelo maalupale mwaha wa osuwela soolempwa vanceene, ni osoma Nuulumo na Muluku. Mwaha wa yeeyo, nihiixutta itthu sinci sinilipiha nroromelo voohimya sa yoohiyeriwa ahu yeeyo Yehova onaavaha awe ale ‘animusuwela owo, ni omusuwela Yesu Kristu yowo omurummyawe’.—Yoh. 17:3; aRom. 12:2.
2 Wira nivikaniheke okhala maKristau oolipa, nihaana opakaka soothanla sinimuhakalaliha Tiithi ahu a wiirimu. Yoosoma ela enrowa othokorerya makoho ala a faita: Yoohiyeriwa xeeni erina ahu? Nooneleke sai yoohiyeriwa eyo? Ninrowa okupali sai wira noophwanya yoohiyeriwa ahu eyo? Exeeni enrowa onikhaliherya opaka soothanla mwa miruku?
EXEENI EKHANLE YOOHIYERIWA AHU?
3. Yoolaiherya xeeni aniwehererya aya (a) anna oowoottihiwa ni (b) “ipwittipwitthi sikina”?
3 MaKristau vakhaani aakhalana nlipelelo na ‘wakhela yohiyeriwa ehimpweteya’, eparakha ya olamulela ni Kristu wiirimu. (1 Ped. 1:3, 4) Wira yaakhele yoohiyeriwa ela maKristau ala ahaana ‘oyariwa vasya’. (Yoh. 3:1-3) Nto yoohiyeriwa xeeni arina aya imilyau sinceene sa “ipwittipwitthi sikina” sa Yesu siniirela mpantta ni anna oowoottihiwa anivara muteko wa olaleya ihapari sooreera sa Omwene wa Muluku? (Yoh. 10:16) Ipwittipwitthi sikina sinrowa waakhela yoohiyeriwa yahaarina aya anamattheka Adamu ni Eva, eyo piiyo, ekumi yoohimala mparayiisu valaponi ohinrowa okhala okhwa, aahiiso wunla. (Wis. 21:1-4) Nto Yesu aahiwerya omulaiherya mutakhali ole aakhwiiye nuuwo ariki: “Tthiri kinnoolela olelo-va: weyo onrowa okhala ni miyo oParayiisu”.—Luka 23:43, Tradução do Novo Mundo.
4. Mareeliho xeeni nenla-va, arina ahu?
4 Hata nenla-va, ninnihakalala mwaha wa inamuna sikina sa yoohiyeriwa ahu. Mwaha wa waamini mukuttho “onopola [wa] Yesu Kristu”, nookhalana murettele wekeekhai ni wataana ni Muluku. (aRom. 3:23-25) Hiyo ninnisuwela saana soolaiheriwa sa efaita siri muNuulumoni na Muluku. Ohiya-vo, wiirela mpantta emusi ya anna olumwenku wotheene, eri eparakha yuulupale enihakalaliha. Nave-tho, nookhalana mareeliho ni eparakha mwaha wa okhala Anamoona a Yehova. Moohaaniherya hiyo ninnivaha efaita yoohiyeriwa ahu!
5. Exeeni Satana onipaka awe wira aahapuxe atthu a Muluku, nto nikhaliheryo xeeni nirina ahu wira nixintte miraakho sawe?
5 Wira nikhapelele yoohiyeriwa ahu yooreera, nto, nihaana okhalana ephoole ni miraakho sa Satana. Okhuma khalai, Satana onneererya owiiriha atthu a Muluku opaka soothanla sinihonona yoohiyeriwa aya. (Moth. 25:1-3, 9) Mwaha wa osuwela wira Satana orina okathi vakhaani, onniimananiha wira anihapuxe. (Mmusome Wisupulula 12:12, 17.) Wira niwerye ‘omòmola Satana ni olavilavi awe’, nihaana ovikaniha ovaha efaita vanceene yoohiyeriwa ahu. (aÉf. 6:11) Nto, ntakiheryo noolopola na mwaana oopaceriwa a Isakhi, Esawú, ninniniixuttiha etthu enireerela othokorerya.
MUHIKHALE NTOKO ESAWÚ
6, 7. Esawú aari aani, nave yoohiyeriwa xeeni aalipelela awe?
6 Iyaakha sivinre sowiiraka 4.000, Esawú ni munnawe aayaraniwe awe maphapo, Yakobe, yaari anamwane a Isakhi ni Rebeka. Vaavo anamwane awo yannuwa aya, yaahipacerya ovirikana makhalelo a muupuwelo aya, soothanla ni miteko saya. “Esawú ahìkhaliha muxai mulupale, anettetta mmathalani: vano Yakobe ari omàla, akhala muhemani”. (Maph. 25:27) Nuulumo na eKrego noowi ‘omáleleya’, ntoko sinihimya awe namataphulela a Biibiliya Robert Alter, “nintaphulela ororomeleya, aahiiso ohikhalana nthowa”.
7 Okathi Esawú ni Yakobe aarina awe iyaakha 15, taata aya, Abrahamu aahikhwa, masi anatiri a Yehova wa Abrahamu khiyaakhwiiye. Muhoolo mwaya, Yehova aahimuleela-tho yoolaiherya ela Isakhi attittimiheryaka wira maloko otheene anrowa oreeliheyaka mmensaya orweela mwa osuulu wa Abrahamu. (Musome Maphattuwelo 26:3-5.) Yoolepa ya Maphattuwelo 3:15, yookhalana yoolaiherya enimulavula Mesiya wala “osùlu” woororomeleya yoowo waarowa okhumelela wa Abrahamu. Okhala wira aari mwaana oopacerya a Isakhi, nto Esawú aahikhalana edireito ya yoolaiherya ele. Tthiri Esawú aahikhalana eparakha yuulupale! Niireke owo aanivaha efaita?
8, 9. (a) Yoothanla xeeni Esawú apanke awe voohimya sa eyuulupale awe? (b) Nuuvira okathi, exeeni yaamwiiranenle Esawú voohimya sa yoothanla awe, nto oonenle sai?
8 Okathi omosa Esawú aakhuma awe omatta, owo aahinweha Yakobe “àpeyaka muhusi”. Nto Esawú aahimwiirela Yakobe wira: “Miyo nkirere okhulumuwa. Mukivahe etthu eyo yoxerya kilyé”. Yakobe ahaakhula wira: “Mukitumiherye olelo va eyulupal’inyu”! Yoothanla xeeni Esawú aapanke awe? Moohiloka owo ahaakhula wira: “Onikiphwanyiha-ni opajerya oyariwa”? Nto Esawú aahithanla okuxa muhasa ori muhusi aturukaka ni edireito ya opacerya oyariwa! Wira Yakobe akupaleele ovahiwa wawe okhulupale, owo aahilipiherya ariki: “Mulaphé nanano vava”! Moohoovelela, Esawú aahihiya okhulupale awe. Nuuvira-vo, “Yakobe ahinvaha yolya ni muhusi wa epwiri. Numalá ahilya ahivenya arowaka ekwah’awe. Ti siso Esaú vathanyalyawe eyulupale awe”.—Maph. 25:29-34.
9 Nuuvira okathi, vaavo Isakhi aasuwenle wira owo aarowa okhwa, Rebeka, aahipaka mareheryo wira Yakobe aakhele okhulupale waahiiwe ni Esawú. Okathi Esawú aawenhe awe wira aahipaka yoothanla yoololo aahaxonttela apapawe ariki: “Tithi, mukirerihe-tho miyo! . . . Tiithi khamukihiyenrye marerihelo makina?” Okathi Isakhi aapacenrye awe ohimya wira khivaaweryaneya-tho oturuka marerihelo anvanhe awe Yakobe, Esawú “ahikelela okhuwela ni wunla”.—Maph. 27:30-38.
10. Yehova aamoonela sai Esawú ni Yakobe, ni nthowa xeeni?
10 Mikhalelo siromoliwe mBiibiliyani sa Esawú, sinihimya exeeni? Owo aahooniherya wira osiveliha erutthu awe ti yaari etthu aatepa awe ocalela ovikana waakhela mareeliho a muhoolo a yoohiyeriwa awe. Esawú khaavaha efaita eyuulupale awe nave-tho khamphenta Muluku. Ohiya-vo, Esawú khaathokorerya wira sowiira sawe saamuhooxa osuulu awe. Moovirikana, Yakobe aanivaha efaita vanceene yoohiyeriwa awe. Mwa ntakiheryo Yakobe aahiiwelela miruku sa anamuyari awe moota woomuthanla mwaarawe. (Maph. 27:46–28:3) Wira Yakobe apake yoothanla ele yaatthuneya opixa murima ni wiileva, nto owo aahikhala muhavinre a Mesiya. Muluku aamoonela sai Esawú ni Yakobe? Orweela mwa profeta Malakhiya Yehova aahilavula wira: “Miyo kahimphenta Yakobe, vano kahínana ni Esawú”.—Mal. 1:2, 3.
11. (a) Xeeni ntakiheryo na Esawú ninvariheliwa aya muteko wa hiyo maKristau? (b) Xeeni Paulo onilikanyiha awe sowiira sa Esawú ni opaka onamuttompe?
11 Niireke ele Biibiliya onilavula awe voohimya sa Esawú etthu enireerela othokoreriwa ni maKristau olelo-va? Tthiri vannireerela othokorerya. Murummwa Paulo ahaalopola maKristau akhwaawe wira ekhalaneke ephoole ariki: “ahikhalé mutthu [namuttompe] walá òhittittimiha itthu sa Muluku, ntoko sìrale awe Esaú okathi akakhannyawe eyulupale awe y’opajeriwa oyariwa ni muhasa mmosá wa yolya”. (aHéb. 12:16) Yoolopola eyo nlelo ennivariheleya muteko wa maKristau. Nihaana wiilipiha ovaha efaita itthu sowaarya wira nihihapuxiwe ni soophavela sa erutthu siniiriha oyeleela yoohiyeriwa ya omunepani. Moota xeeni Paulo onilikanyiha awe miteko sa Esawú ni onamuttompe? Mwaha wa osiveliwa ni itthu sa werutthuni ntoko Esawú, pooti omwiiriha mutthu ohivaha efaita itthu sa Muluku wira asivelihe erutthu awe ntoko opaka onamuttompe wala oraruwa.
MULOKIHERYE MURIMA ANYU NIINANO-VA
12. (a) Moota xeeni Satana onnikumiherya awe miraakho? (b) Nvahe matakiheryo a mBiibiliyani anirowa onikhaliherya moota woopaka soothanla okathi wa mixankiho.
12 Hiyo arumeyi a Yehova, khanimphavela waavya opuro oryaaya soweeha seiyo saarowa oniiriha orupihana woohiloka. Ohiya-vo, hiyo ninninvekela Yehova Muluku wira ehikhale etthu enrowa oniiriha omutthekela. (Math. 6:13) Masi, Satana khula okathi oniphavela ohonona omunepani wahu vaavo nniilipiha ahu okhala oororomeleya mulaponi-mu moohiloka. (aÉf. 6:12) Okhala wira Satana tori muluku a olumwenku ola wootakhala, nto onnisuwela moota woowaahapuxa atthu ni soophavela saya ntoko apinaatamu oohimalela. (1 aKor. 10:8, 13) Mwa ntakiheryo, nkahaya muupuwele enamuna emosa yaarowa anyu okhweeheriwa opaka yoophavela ya erutthu ntoko onamuttompe. Yoothanla xeeni mwaarowa anyu opaka? Niireke mwaarowa omutakiha Esawú aalavunle so: ‘Mwakuveke! Mukivahe!’ Wala munrowa okhootta yooweeha eyo wala otthyawa ntoko siirale awe mwaana a Yakobe, Yosefe okathi eehereriwa awe ni amwaara a Potifari?—Musome Maphattuwelo 39:10-12.
13. (a) Moota xeeni olelo-va, anamunceene animutakiha aya Yosefe, nto akina animutakiha sai Esau? (b) Exeeni enniixuttiha aya matakiheryo a yaale animutakiha Esawú?
13 Axinnihu ni axirokora ahu anceene sihaaphwanya soweeha saawiirinhe opaka yoothanla enlikana ni Esawú, wala Yosefe. Anamuncene yaahipaka itthu mwa miruku ehakalaliha murima wa Yehova. (Mir. 27:11) Nto, okathi annihu akina aneehereriwa aya, annithanla mweettelo wa Esawú, vaavo anihonona aya yoohiyeriwa aya yomunepani. Tthiri nummuru ninceene na myaha siniphukiwa mmulokoni ni okumihiwa wa atthu khula mwaakha, mwaha wa orupihana woohiloka. Nto ti vootthuneya otthokiha murima ahu vano, vahinatthi onikhumelela etthu yaarowa weehererya ororomeleya wahu! (Esal. 78: 8) Hiyo pooti otthara mavalo manli anrowa onikhaliherya oxintta soweeha wira niweryeke opaka soothanla sooloka.
MUTTHOKELELEKE NI MWIILIPIHEKE
14. Makoho xeeni anireerela othokorerya anrowa onikhaliherya ovara sooreera ni onyokha sootakhala?
14 Nivalo noopacerya ori wuupuwelela mixankiho sinikhumelela mwaha wa sowiira sahu. Ovaha wahu efaita yoohiyeriwa ya omunepani, onlipa ni munnuwelo wa ophenta orina ahu ni Yehova yoowo ori Mulipa-Oovaha iparakha iyo somunepani. Tthiri akhala wira ninnimphenta mutthu hiyo ninnisyaka opaka etthu enimunyoonyiha. Tivonto nniimananiha ahu wataana saana nuuwo. Okhala wira ti siiso, vanooloka akhala wira ninniviriha okathi nuupuwelelaka mixankiho sinikhumelela ovara miteko sa erutthu soohiloka. Niikoheke so: ‘Soowira saka sinrowa wiiriha exeeni wataana waka ni Yehova? Miteko soohiloka sinrowa ohonona sai etthoko aka? Anna ni arokora a mmulokoni anrowa woonela sai miteko saka mmulokoni? Niireke wira kinrowa waakhumuliha akina?’ (aFil. 1:10) Nave-tho niikoheke so: ‘Niireke vanniloka ohakalaliha erutthu aka okathi vakhaani niturukaka ni mixankiho sinikumiherya aya?’ Kiireke kiniphavela okhala ntoko Esawú, nto khiyanla ni oxanka nuumala osuwela etthu yoohiloka epanke aka? (aHéb. 12:17) Wuupuwelela makoho ala, anoonikhaliherya ‘onyokha sotakhala’ ni ‘okhalela nthiti sorera’. (aRom. 12:9) Vanceenexa omphenta Yehova onrowa oniirihaka okhalela nthiti yoohiyeriwa ahu.—Esal. 73:28.
15. Exeeni enrowa olipiha wiimananiha wahu oxintta soohonona sa omunepani?
15 Eponto ya nenli ori olipiherya wiisaakiha wahu. Yehova oopaka marehereryo manceene wa hiyo wira onikhaliherye mixankiho sa mulaponi siniwerya ohonona omunepani wahu. Soovaha sawe sinihela muhina omusoma Biibiliya, orowela mithukumano, olaleerya ni opaka mavekelo. (1 aKor. 15:58) Khula okathi ninvekeleke Yehova ni ovara miteko sa eKristau, seiyo sinrowa onlipihaka wira nixintte soweeha. (Mmusome 1 Timótheyo 6:12, 19.) Nihaana osuwela wira naphavela oxintta soweeha, nihaana wiilipiha. (aGal. 6:7) Eyo ti etthu enitumereriwa ni eliivuru ya Miruku ekapitulu 2.
‘MWAVYEKE OSUWELA NI ANKHILI’
16, 17. Ninrowa owerya sai osuwelaka opaka soothanla sooloka?
16 Miruku ekapiitulu 2, ennintumererya ophavela miruku ni ankhili. Soovaha iyo sinniniiriha oweryaka othanla ele eri yooloka wala yoohiloka, okhalana moonelo wooloka wala woohiloka. Masi wira nikhumele saana, onivekela wiilipiha ophavela wira sooloka. Asuwelaka etthu eyo ya ekeekhai, Biibiliya onihimya so: “Mwanaka, mwakhelele molumo aka: musuke orattene ikano saka. Nwiriyaneke orattene molumo a ankhili: murim’anyu ophaveleke miruku saya. Mphaveleke osuwela: mwahavyeke ankhili. Mphaveleke miruku ntoko eparatha: mwahavyeke ankhili ntoko muhakhu wovithiwa. Mwira siso, munosuwela omuttittimiha Muluku: munimwixutta omusuwela [Yehova]. Tthirí [owo] t’ onivaha ankhili: molumo [awe] t’anixuttiha osuwela ni wikasopa”.—Mir. 2:1-6.
17 Nto vannooneya wira naphavela okhumela saana okathi wa opaka soothanla, vanitthuneya okhalana osuwela oromoliwe ni yoolepa ya Miruku. Nnoowerya oxintta soweeha akhala wira nnimweemererya masu a Yehova okhala vamurimani vahu, nave akhala wira nnoovekelaka khula okathi malakiheryo a Muluku, ni akhala wira nnoovikaniha ophavela osuwela wa Muluku ntoko mihakhu sittukuttheriwe vathi.
18. Exeeni eniphavela anyu nenla-va ovikaniha opaka, nto mwaha wa xeeni?
18 Yehova onnaavaha osuwela, wiiwexexa, osuwela otokosa itthu, ni ankhili wa yaale aniilipiha waavya soovahiwa iya sa efaita. Akhala wira ninniilipiha ophavela ni orumeela itthu iya niwenhe ahu, ninrowa wataana saana ni Mulipa-Oovaha Yehova. Nto wataana wahu ni Yehova Muluku, onoonikhapelelaka okathi oneehereriwa ahu. Wataana saana ni Yehova ni omoova wahu wookhalela, onooniiriha osyaka opaka soottheka. (Esal. 25:14; Yak. 4:8) Nto, wataana wahu ni Yehova ni ovarihela wahu miruku sooloka sinnivaha awe, oniiriheke ovikaniha opaka soothanla sooloka sinrowa ohakalaliha murima wa Yehova ni okhapelela yoohiyeriwa ahu.
[Elatarato epaaxina 26]
[Elatarato epaaxina 28]
Muhikhalakhale muhiyereryaka yoohiyeriwa anyu yomunepani
[Elatarato epaaxina 30]
Ninnilipiherya wiikasoopa orweela mwa ophavela miruku sa Yehova