Niroromeleyeke Mwa Itthu Sotheene

Khula mutthu oniphavela okhalana apatthani oororomeleya. Nave, Yehova oniphavela wira apatthani awe aroromeleyeke. Khivanikhweya ororomeleya nikhalaka olumwenku ola atthu anceene ahinroromeleya aya. Masi xeeni vari aya vooloka ororomeleya mwa itthu sootheene?

1. Etthu xeeni yuulupale enniiriha ororomeleya?

Okathi ninroromeleya ahu, ninnimooniherya Yehova wira ninnimphenta ni ninnimuttittimiha. Nkahaya muupuwele ela: Yehova onnisuwela itthu sootheene nnuupuwela ahu ni nimpaka ahu. (aHeeberi 4:13) Nave Yehova onniweha okathi ninthanla ahu okhala atthu oororomeleya ni onnihakalala vanceene. Nuulumo nawe ninhimya so: “Tthiri Apwiya [Yehova] anniphweliwa n’atakhali: annipatthana n’atthu òloka”.—Miruku 3:32.

2. Ninrowa owerya sai oororomeleya khula nihiku?

Yehova oniphavela wira ‘nilavuleke ekekhai mukina ni mukhw’ihu’. (Zakariya 8:16, 17) Moolumo ala antaphulela exeeni? Anitaphulela wira okathi wootheene nihootheke aahiiso olavula itthu sinkhala ntoko wira ti sa ekeekhai okathi ninlavula ahu ni amusi ahu, ale ninvara ahu muteko, anna ni arokora ni makhulupale a kuvernu. Mutthu oororomeleya khoniiya, nnakhala waawoka atthu akina ophavelaka mureerelo awe. (Musome Miruku 24:28 ni aEefeso 4:28.) Nave mutthu oororomeleya onniliva mipoosito sootheene. (aRoma 13:5-7) Nto nihaana “okhala oororomeleya mwa itthu sotheene”.—aHeeberi 13:18.

3. Xeeni vari aya vooloka ororomeleya?

Okathi ninsuweliwa ahu okhala atthu oororomeleya, ninniroromeliwa ni atthu akina. Nave ninnaakhaliherya atthu otheene a mmulokoni okhala oororomeleya ni woona wira anniphentiwa ntoko emusi emosa paahi. Ohiya-vo nnookhalana murima wooloka. Nave ororomeleya onninikhaliherya ‘oreeriha mwiixuttiho wa Moopoli ihu, Muluku’ ni waakhaliherya atthu akina omusuwela ni omukokhorela Yehova.—Tito 2:10.

MWIIXUTE ITTHU SIKINA

4. Ororomeleya onnimusivela Yehova

Musome Esalimo 44:22 ni Malakhiya 3:16, nuumala-vo mwaakhule makoho anittharelana:

• Niireke munoona wira vanniweryaneya onwoka Yehova?

• Yehova onoonela sai okathi ninlavula ahu ekeekhai hata vavilaka opaka eyo?

5. Muroromeleyeke okathi wootheene

EVIIDIYU: Exeeni Enniphwanyiha Otteeliwa Murima?—Murima Wooloka (2:32)

Mmusome aHeeberi 13:18, nuumala-vo nwehe moota nikhanle ahu oororomeleya . . .

• vatthokoni vahu.

• omutekoni wala oxikola.

• itthu sikina.

6. Ororomeleya onniniphwanyiha mireerelo

Okathi mukina pooti woonaka wira ororomeleya onniniphwanyiha mixankiho. Masi musuweleke wira ororomeleya etthu yootepexa oloka ninreerela ahu opaka. Musome Esalimo 34:13-17, nuumala-vo mwaakhule nikoho ninttharelana:

• Ororomeleya onrowa wiiriha sai okumi anyu okhala wooloka?

1. Alopwana oothela ni athiyana ootheliwa oororomeleya annilipiha ekasamento aya

2. Anamuteko oororomeleya anniroromeliwa ni mapatarau aya

3. Atthu oororomeleya annittittimihiwa ni makhulupale a kuvernu

IPONTO SUULUPALE

Yehova oniphavela wira apatthani awe, aroromeleyeke mwa itthu sootheene anihimya aya ni anipaka aya.

Wuuluula

• Mwa enamuna xeeni nikhanle ahu oororomeleya?

• Xeeni vahinreerela aya onwoka Yehova?

• Xeeni nyuwo muniphavela anyu ororomeleya okathi wootheene?

NWEHE ITTHU SIKINA

Anamuyari anrowa owiixuttiha sai anaaya okhala oororomeleya?

Muroromeleyeke (1:44)

Xeeni vari aya vooloka opaka ele ninleiherya ahu?

Opaka Ele Nileihenrye Ahu Onniniphwanyiha Mareeliho (9:09)

Nwehe nthowa naya vari aya vooloka oliva mpoosito hata orumeeliwaka mwa enamuna yoohiloka.

“Niireke Pooti Oliva Mpoosito?” (Owehaweha, 1 a Setembro, 2011)

Etthu xeeni yaamwiirinhe mulopwana oohiroromeleya opaka marukunuxo mookumini mwawe?

“Kihiixutta wira Yehova Toomoriwa ikharari ni Toolevelela” (Owehaweha, 1 a Maio, 2015)