Muthokoreryaneke ni Mulipihaneke
‘[Muthokoreryaneke] mukina ni mukhwawe wira, nakuviheryaneke ophenta nuvara miteko sorera’.—AHÉB. 10:24.
MWAAROWA WAAKHULA SAI?
Ontaphulela exeeni “othokoreryana” mukina ni mukhwaawe?
Ninrowa ‘wakuviheryana [sai] ophenta ni miteko sorera’?
Ninrowa olipihanaka sai mukina ni mukhwaawe?
1, 2. Exeeni yaakhalihenrye Anamoona a Yehova 230 woopowa ekwaha ele ya orowa wiiviwa wanikisa wa Ekhotto ya Nenli ya Olumwenku?
VAAVO olamulelo wa Nazista waaphiya aya wookiseryani wa Ekhotto ya Nenli ya Olumwenku, aanipakiwa palano ootakhala wira amalamalihiwe otheene yaale yaathukumanyiwe mapuro yaatthukweliwa atthu. Anamutthukiwa awo yaari oSachsenhausen yaahaana oroihiwa oporto wira otheene yavoloihiwe mpakitini nto yapwinihiwe mphareya ekhwe. Eyo yaari epalano yaapakiwe muhoolo mwaya yaasuweliwe okhala ekwaha yoorowa wiiviwa.
2 Anamutthukiwa owiiraka 33.000 yaakhuma ekhatteya ya oSachsenhausen, yaahikhanyereriwa weetta ikiloomo 250 erowaka oLübeck, eporto eri esidade ya wAlemanya. Ekrupo eyo, yaahikhala Anamoona a Yehova yeetta hoothe oophiyeryaka 230 yaakhuma ilapo 6. Atthu otheene yaahitteettheya mwaha wa etala ni iretta. Axinnihu yaawenrye sai woopowa ekwaha ele yooxankiha? Munna mmosa onihimya so: “Okathi wotheene naanilipihana wira nivikaniheke weetta”. Mwaha wa ‘owerya wulupale’ onrwa wa Muluku, waahaakhaliherya ophentanaka ni okhaliheryana wira yoopowe ekwaha ele!—2 aKor. 4:7.
3. Xeeni nintthuneya ahu olipihanaka?
3 Olelo-va khahiyo niri ekwaha ya orowa wiiviwa, masi sinniniphwanya mixankiho sinceene. Nuumala otikitheriwa Omwene wa Muluku eyaakha ya 1914, Satana aahoomoliwa wiirimu akhala waattamela valaponi, nto ‘onanariwa vancene okhala wira òsuwela wira orina okathi vakhani pahi’. (Wis. 12:7-9, 12) Vaavo onaattamela awe Harmagedoni, Satana onnirumeela soweeha ni soolupattha sinitteettheiha omunepani wahu. Sookhala-tho soothananiha sa khula nihiku sinincererya mixankiho iyo. (Yobi 14:1; Mus. 2:23) Ikwaha sinceene, wuncerereya wa mixankiho pooti onitteettheiha mmuupuweloni mwahu ni omunepani wahu, nto nihinawerya ovilela soothananiha sinniphwanya. Muthokorerye ntakiheryo na munna mmosa yoowo mwa iyaakha sinceene aakhalihenrye atthu wunnuwa momunepani. Okathi uuluvala awe, owo ni amwaarawe yaahiwereiwa vanceene, khupacerya okhumuwa. Ntoko munna owo, otheene ahu nintthuneya ‘ikuru sulupale’ sinrwa wa Yehova wira nilipihaneke mukina ni mukhwaawe.
4. Wira niwerye waalipiha akina, nihaana wiiwelela saana masu xeeni a murummwa Paulo?
4 Wira niweryeke waalipiha akina, nihaana wiiwelela yoolipiherya ya murummwa Paulo aalepenle awe maKristau aHeeberi. Owo aalavunle wira: ‘Núpuxeryaneke mukina ni mukhwawe, wira nakuviheryaneke ophenta n’uvara miteko sorera. Nihijompeleké orowa omuthukumanoni, nihatthariheké ale ahinrowatho. Ohiya vo, nlipiheryaneke, votepa-tho vavo vanònanyu wira nihiku n’Ápwiya nri vakhiviru’. (aHéb 10:24, 25) Ninrowa ovarihela sai muteko masu ala ootthuneya?
‘[NITHOKORERYANEKE] MUKINA NI MUKHWAWE’
5. Nuulumo noowi ‘[othokoreryana]’ nintaphulelani, nto opaka eyo onitthuneya exeeni?
5 Nuulumo noowi ‘[othokoreryana]’, nintaphulela “othokorerya itthu sinaathowa akhwiihu, wala owuupuwelaka”. Niireke waarowa otaphulela waathokorerya axinna vaakhanle wira ovaanela wahu ni anna Osalau wa Omwene onikhala wootepa waakuveya, hata ninvaanela itthu soohisuwanyeya? Tthiri nnaari. Ti vonto, hiyo nikhalaneke ephoole moota onilavula ahu itthu sahu, nto nisyakaka olavula itthu sa axineene. (1 aTes. 4:11; 1 Tim. 5:13) Akhala wira nimphavela waalipiha axinnahu, nihaana osuwela saana itthu sinaathowa, mikhalelo saya sooreera ni okumi aya, omunepani waya, ikuru saya ni otteettheya waya. Anna awo, enikupaliki wira hiyo apatthani aya, nave niwooniheryeke wira ninnaaphenta. Eyo enihela muhina oviriha okathi naawo, ohiya paahi okathi wa mixankiho, masi-tho okathi mukina.—aRom. 12:13.
6. Exeeni enrowa waakhaliherya axitokweene waathokorerya ale anitthuneya okhaliheriwa?
6 Axitokweene a mmulokoni annitumereriwa ‘olyiha ipwittipwitthi sinyereriwe aya ni Muluku’, mmukhalelo woophenta ni oluttuweliwa. (1 Ped. 5:1-3) Nto anrowa ovara sai muteko ola wa okukhula saana ehisuwenle ipwittipwitthi sene? (Musome Miruku 27:23.) Akhala wira axitokweene anniivahererya okhala hoothe ni axinnaya, vano anna awo anrowa woonaka okhweya waavekela nikhaliheryo. Anna ni arokora anrowa woonaka okhweya olavula miyuupuwelo saya miyoonelo saya; nto eyo ennaakhweiherya axitokweene waathokorerya wira yaakhaliheryeke.
7. Nooneleke sai ‘molumo òlolo wala òwali’, anilavuliwa ni ale anixankiheya?
7 Okathi aalavula awe ni muloko wa oTesalonika, Paulo aahihimya wira: ‘Mwakhaliheryeke ale òlosowa [ottettheya]’. (Mmusome 1 aTesalonika 5:14.) ‘Ale aripiwe murima’, ti yaale atteetthen’ye mwaha wa sooxankiha. Miruku 24:10 onihimya so: ‘Mojeyá movelavelani, ikuru sanyu ti sivukunwe’. Mutthu oxankihen’ye vanceene, owo pooti opacerya olavulaka ‘molumo òlolo ni òwali’. (Yobi 6:2, 3) Akhala wira ‘ninnaathokorerya’ ale ootteettheya, nihaana wuupuwela wira ele enilavula aya, pooti ohikhala yeeyo eri vamurimani vaya. Raquel yoowo amamawe yaaxankihen’ye vanceene, aahiixutta etthu mmensawe. Raquel onihimya so: “Ikwaha sinceene amaama yaanilavula etthu yootepa ohiloka. Masi ikwaha sinceene kaaniimananiha wuupuwela wira Amaama yaari tthiri oophenta, ni oovaha. Kihiixutta wira atthu axankale, okathi mukina annilavula itthu awo yahaaphavela aya olavula. Etthu yootepa otakhala ori ottikiherya yoonanara mutthu wiireliwe awe wala emulavulenle awe”. Miruku 19:11 onihimya so: ‘Namiruku t’ule onsuwela okhotta oviruwa [onanariwa]: ovuwa wawe wavilela [ale] aninveha’.
8. Vanceenexa ti pani onitthuneya ahu ‘omooniherya’ ophenta wahu, nave nthowa xeeni?
8 Ninrowa ‘omuthokorerya’ sai, mutthu oxankihen’ye mwaha wa wuuliwa muru, masi nlelo mixankiho sinikhumelela mwaha wa itampi sa khalai, nnaamwi mutthu owo iimananinhe ene ottharuwa? Paulo aalepelaka anna oKorinto, voohimya sa natampi aatharunwe, owo aalavunle so: ‘Étthu yorera omulevela n’umuhakalaliha murima, wira ahitepé oripiwa murima, arimele. Tivó kinovekelakani wira mmoniherye yowo omphenta wanyu’. (2 aKor. 2:7, 8) Moovarihana ni disionaario mmosa, nuulumo noowi: “mmoniherye”, nintaphulela “omweemererya, onvaha efaita, ni opaka nivarihano nookhalela”. Nihuupuweleke wira munnihu onoosuwela wira ninnimphenta hiyo nihoonihenrye. Owo ohaana oweha ophenta iwo orweela mwa mweettelo ni miteko sahu.
‘NAKUVIHERYANEKE OPHENTA NI OVARA MITEKO SORERA’
9. Entaphulelani ‘wakuviheryana ophenta ni miteko sorera’?
9 Paulo aahilepa ariki: ‘Nùpuxeryaneke mukina ni mukhwawe, wira nakuviheryaneke ophenta n’uvara miteko sorera’. Vanitthuneya waalipiheryaka anna akwiihu wira yooniheryeke ophenta ni miteko sooloka. Okathi mooro onipacerya aya ottipha, hiyo ninnihela ikhuni wira opatteke. (2 Tim. 1:6) Enamuna emosaru, hiyo pooti waalipiherya anna omphenta Muluku ni atthu akhwaaya. Waattottopela saana akina onniwiiriha waatumererya ovara miteko sooloka.
10, 11. (a) Tani a hiyo aniphavela ottottopeliwa? (b) Muhimye ntakiheyo nnooniherya wira mutthu ottottopeliwa onnimwiiriha ohiya mweettelo woohiloka.
10 Otheene ahu ninniphavela ottottopeliwa hata nixankiheyaka wala nnaari. Mutokweene mmosa oolepa ariki: “Apaapa khiyaatonko okileela wira koovara etthu yooloka. Nto miyo kihinnuwela ni muupuwelo wa ohiivaha efaita. . . . Nnaamwi vano kirineene iyaakha 50, masi nlelo vannikisivela ottottopeliwa ni apatthani aka wira kinnivara muteko saana ntoko mutokweene. . . . Eyo yookiixuttiha wira ti va faita waalipiha ni waattottopela akina, nto miyo kinniira yeeyo”. Ottottopela onniwiiriha atthu otheene ohela muhina mapioneero, axitokweene ni ale akhumunwe okhala oohakalala.—aRom. 12:10.
11 Vaavo ‘ale anettihiwa ni [munepa] animukhaliherya aya’ moophenta mutthu onihapuwa, ni omuttottopela itthu siniphwanelela, eyo pooti omwiiriha namattheka owo orukunuwa wira avareke miteko sooreera. (aGal. 6:1) Ela yahiiraneya ni murokora oniihaniwa Miriam. Owo aahilepa ariki: “Kaahixankiheya vanceene okathi axipatthani aka yaahin’ye aya muloko, nave okathi owo, apaapa yaawereiwa (hemoragia cerebral) ephome waakanyereya ni ottoopare. Kaahixankiheya vanceene. Wira kivilele mixankiho, kaahipacerya waapaka apatthani a mulaponi”. Eyo yaanimwiiriha woonaka wira khaaphwanela ophentiwa ni Yehova, nto aahipacerya wuupuwela ohiya ekeekhai. Okathi mutokweene mmosa aamuupuxenrye awe murokora ole miteko soororomeleya aavanre awe khalai, owo aahinla mwaha wa wuupuwela okathi owo. Owo aheemya wira axitokweene amukhaliherye osuwela wira Yehova aanimphenta. Nto aahitthikela omphenta Muluku. Murokora owo, aahihiya opatthana ni atthu a mulaponi anavikaniha omurumeela Yehova.
12. Niireke ennikhaliherya owuulihiha muru akina, wala waapwapwela, ni waavaha nthowa niphavelaka wira yiilipiheke?
12 Omuulihiha muru mutthu, mwaha wa omulikanyihaka ni akina, wala omphukelaka ni moonelo ahu wootepana, wala omwiiriha owo wiivahaka nthowa mwaha wa ohiwerya wawe ovara miteko sikina, pooti omwiiriha waakuvela ophavela wiimananiha ovara miteko iyo somunepani, masi owo khanrowa opisa ni miteko iyo. Masi, omuttottopela munnihu, ni omwiiriha omphentaka Yehova, eyo pooti omukhaliherya okathi wotheene.—Mmusome aFilipi 2:1-4.
“NLIPIHERYANEKE” MUKINA NI MUKHWAAWE
13. Waalipiha akina onihela muhina exeeni? (Moone efootu eri wanipacerya wa yoosoma ela)
13 Nihaana ‘olipihanaka’ mukina ni mukhwaawe vatepa vanaattamela aya wanikisa. Waalipiha akina, onihela muhina waatumererya ovikaniha mmuteko wa Muluku. Olipiheryana miteko sooreera, pooti olikanyihiwa ni ohela ikhuni wira mutthu atetheerye mooro ohanle ottipha; nave waalipiha akina onlikana ni omuhela diisele vaikho wira ikhuni iyo sipatteke saana. Waalipiha akina onitaphulela waavaha ikuru ale atteetthen’ye. Okathi onaalipiha ahu atthu awo, nihaana olavulaka mwa enamuna yoophenta ni yoottittimiha. (Mir. 12:18) Nto, nihaana ‘wakuvela owiriyana, masi nipiseke olavula’. (Yak. 1:19) Akhala wira ninniwiriyana mooreerela murima, ninrowa osuwela muxankiho wa muKristau mukhwiihu owo wira niwerye olavula etthu enrowa omukhaliherya oxintta muxankiho owo.
14. Aakhaliheriwe sai munna mmosa aakhumunwe?
14 Moone moota mutokweene oosareya othunku, aawenrye awe omukhaliherya munna aahin’ye olaleerya iyaakha sinceene. Vaavo mutokweene anwiriyana awe saana munna owo, nto aaniweha wira nlelo aanimphenta Yehova. Owo aaniimananiha osoma hoothe khula mwaha wa erevista Owehaweha ni orwa mithukumano khula okathi. Masi, sowiira sa anna akina mmulokoni ti saamwiiriha otthikela ottuli ni oxankiheya vanceene. Mutokweene ole aahinwiriyana vanceene, moohimpwapwela, nto khooniherya wira aanimphenta munna ole ni etthoko awe yotheene. Vakhaani-vakhaani, munna ole aahiweha wira aahihiya itthu sa khalai simooceelihaka omurumeela Muluku amphenta awe. Mutokweene ole aahimulattula orowa hoothe muteko woolaleerya. Akhaliheriwaka ni mutokweene ole, munna ole aahitthikela muteko awe, vano aphwanela-tho orumeela ntoko mutokweene a mmulokoni.
15. Exeeni Yehova onniixuttiha awe voohimya sa waalipiha ale anixankiheya?
15 Mutthu okhulumunwe, khahiyo onkhala oowaakuveya waakhela nikhaliheryo onivahiwa awe. Nto nihaana ovikanihaka omukhaliherya. Paulo aahilavula wira: “Mwaavareleleke ale ootteettheya, mwaavileleke atthu otheene”. (1 aTes. 5:14, An American Translation.) Ohiya waakuva waahiya atthu ootteettheya, nivikaniheke ‘waavarelela’ eyo piiyo, ovikaniha waakhaliherya. Khalai Yehova ahooniherya opixa murima ni arumeyi awe yaawo ikwaha sikina yaakhala onyoonyiheya. Mwa ntakiheryo, Muluku aahimmorela ikharari Eliya khuthokorerya saana muupuwelo wa Eliya. Yehova aahinvaha itthu saamuthowa profeta wira avare saana muteko awe. (1 Mam. 19:1-18) Nave, okhala wira Davidi aahiittaruxa neekeekhai, Yehova aahimulevelela. (Esal. 51:9, 19) Muluku aahimukhaliherya mulipa-oolepa Esalimo 73, yoowo aahanle vakhaani omuhiya omurumeela Yehova. (Esal. 73:13, 16, 17) Yehova onninimorela ikharari, vanceenexa okathi onixanka ahu ni ovelavela. (Okhum. 34:6) Ikharari sawe, ‘onnùlula nihiku ti nihiku’ nave khasinimala. (Wikh. 3:22, 23) Yehova oniphavela wira nimutakiheke, naathokoreryaka ni ikharari ni ophenta ale anixankiheya.
MULIPIHANEKE WIRA NVIKANIHE OKHALA MPHIRONI MWA OKUMI
16, 17. Vaavo onaattamela aya wanikisa wa olumwenku ola, exeeni enitthuneya ahu opaka nave nthowa xeeni?
16 Atthu yaale 33.000 yatthukinwe ekumihiwaka oSachsenhausen, ikonto sinceene yaahikhwa. Masi Anamoona a Yehova otheene oowiiraka 230 yaakhumme opuro ole yaahoopowa. Olipihana ni okhaliheryana mukina ni mukhwaawe waahiwiiriha woopowa ekwaha ele ya orowa okhwa.
17 Olelo-va niri ‘ephiro enkeliha mwekumini’. (Math. 7:14) Moohipisa, anamakokhorela otheene a Yehova anrowa weettaka mowaataana erowaka elapo esya ya exariya. (2 Ped. 3:13) Nto, nivikaniheke okhaliheryana mukina ni mukhwaawe neettelaka ephiro ela ya ekumi yoohimala.
[Elatarato epaaxina 18]
[Elatarato epaaxina 20]
Muroweke olaleerya ni maKristau akhwiinyu
[Elatarato epaaxina 20]
Nwiiriheke akina okhala oophenta ni ovara miteko sooreera
[Elatarato epaaxina 21]
Mwiireleke mpantta opatthana ori wooloka
[Elatarato epaaxina 22]
Munwiriyaneke moopixa murima mutthu onitthuneya olipihiwa (Moone ittima 14, 15)