Munitthuneya “Ovilela”

NUUMALA Anitaa obatiziwa khukhala Namoona a Yehova, aiyawe yaahipacerya omuhasula vanceene. Anita onihimya so: “Aiyaka yaanikikhoottiherya orowa omuthukumanoni ni yaanikikhoottiherya hata oromola nsina na Muluku. Oromola paahi nsina na Muluku iyaka aanisareya owali”.

Waaxuttiha anaawe voohimya sa Yehova yaari etthu ekina yaamuxankiha Anita. “Miyo kaanikhoottiheriwa omukokhorela Yehova vatthokoni vaka. Miyo nkaawerya waaxuttiha anaaka mootaphuwa, nnakhala nkaawerya waarowana omuthukumanoni”.

Ntoko sinooniherya aya yowiiraneya ya Anita olupatthiwa ni atthu a emusi ahu etthu yuulupale eneehererya waamini wa Kristau. Etthu ekina yoolikana ni eyo ti eretta ehinivona, okhweliwa mwaana wala ole aathelanne awe aahiiso mmusi onimuhiya Yehova. Vano exeeni enrowa omukhaliherya Kristau ovikaniha omuroromela Yehova?

Okathi onikhumelela aya mixankiho iyo, munrowa opaka exeeni? Murummwa Paulo aalavunle so: Munitthuneya “ovilela”. (aHéb. 10:36) Nto exeeni enrowa wookhaliheryani ovilela?

MUNVEKELE MMUROROMELAKA YEHOVA

Enamuna yuulupale enniphwanyiha ikuru siniweryana ahu ovilela mixankiho ti onvekela Muluku nimuroromelaka. Muthokorerye ntakiheryo nla. Yaahikhumelela ehasara emusi awe Ana Segunda-feira makaaripi. Iyawe aakhalana awe mwa iyaakha 30 aahikhwa mootutuxerya. Ana onihimya so: “Owo khaatthinke omutekoni, okathi ole aarina iyaakha 52 paahi”.

Exeeni yaamukhalihenrye Ana? Owo aahitthikela ovara miteko sawe, nto eyo yaahimukhaliherya okhala wira muteko aavara awe waatthuneya ovaha ephoole yinceene, masi eyo khiyaamalinhe muxankiho awe. Owo onihimya so: “Kaanimutthukulela murima aka Yehova ni kaaninvekela wira okikhaliherye oxintta muxankiho aka ole wa opweteiwa aiyaka”. Niireke Yehova aahaakhula mavekelo awo? Owo onnaamini wira aayo. Nto onihimya so: “Murettele yoole onivahiwa ahu ni Muluku paahi waahikikhaliherya osuka ekumi aka. Miyo kinnaamini moohihoverya wira Yehova onimwaaruuha aiyaka okathi wa ohihimuxiwa atthu”.​—aFil. 4:6, 7.

Ole oniiwa mavekelo ohaaleiherya arumeyi awe wira onimwaavaha khula etthu enaathowa yavikaniharu omwiiwelela. (Esal. 65:3) Nyuwo khamuneemya wira yooleiherya ela ennilipiha waamini? Niireke khenookhaliheryani woona nthowa naya vanitthuneya anyu ovilela?

MITHUKUMANO SA EKRISTAU SINNINIPHWANYIHA OLIPA

Okhuma khalai Yehova onnaakhapelela atthu awe orumeelaka muloko wa eKristau. Mwa ntakiheryo, okathi yoole muloko wa oTesalonika waalupatthiwa awe vanceene, Paulo aahaatumererya maKristau ale wira: “Mulipihaneke murima, mukhaliheryaneke, ntoko sinìranyu vano”. (1 aTes. 2:14; 5:11) Okathi yaakhalela aya nthiti othukumana ni ophentana akhaliheryanaka mukina ni mukhwaawe, maKristau oTesalonika yaahiwerya oxintta soweeha iye. Ntakiheryo naya na ovilela ninniniphwanyiha mureerelo olelo ni ninninooniherya etthu ekhanle oonikhaliherya.

Wataana ni opatthani ni anna a mmulokoni, onoowerya onikhaliherya ‘olipiheryana wamini wahu’. (aRom. 14:19) Eyo ti yootthuneyexa okathi wa mixankiho. Paulo mwaneene saahimukhumelela mixankiho sinceene, masi Yehova aahimukhaliherya ovilela. Okathi mukina, Muluku aanimulipiha Paulo aarumeelaka annawe a mmulokoni. Mwa ntakiheryo, okathi yoole Paulo aaroihenle awe makhomaso anna oovirikana a muloko wa oKolosi, owo aalavunle so aahimyaka yaawo: “Awo àkihakalaliha vanjene”. (aKol. 4:10, 11) Tthiri omphenta waya Paulo waahiwiiriha omulipiha ni omukhaliherya okathi wa mixankiho. Waaniheryasa nyuwo pooti waakhelaka nikhaliheryo noolikana ni nlo na anna a mmulokoni mwanyu.

NIKHALIHERYO NA AXITOKWEENE

Muluku ookumiherya nikhaliheryo nikina mmulokoni wa eKristau, eyo piiyo, axitokweene. Anna awo oolipa omunepani anilikana ni “ntthyawelo okathi onòpaya epheyo yorirya, okathi onrupaya epula ya mwanamukhaya; anolikana ni màsi anvira nipuro nowuma, ni muttutthi worirya nihiku novihexa”. (Yes. 32:2) Tthiri awo anoowerya wookurunuxani murima! Niireke nyuwo mootoko ottottela mureerelo marehereryo awo? Nikhaliheryo ni olipiha wa axitokweene pooti wookhaliheryani ovilela mixankiho sanyu.

Ekeekhai wira axitokweene khanipaka miiriirya. Awo apinaatamu oohimalela, ni awo “atthu, ntoko [yoohi]”. (Mit. 14:15) Hata vari siiso, onivekelela waya onoowerya onikhaliherya vanceene. (Yak. 5:14, 15) Munna mmosa yoowo mwa iyaakha sinceene oniwanana eretta enihonona mitika sa mutthu onihimya so: “Niphento na anna, oreera waya murima ni omakelaka okixukhurya onnikikhaliherya ovilela”. Niireke nyuwo mwanwerya ottottela mureerelo mareheryo oophenta a Yehova, eyo piiyo, Axitokweene?

MUKHALELEKE NTHITI MITEKO SA YEHOVA

Sookhala itthu sikina sinitthuneya ahu opaka wira nivilele. Emosa ti okhalela nthiti miteko sa Muluku. Muthokorerye ntakiheryo na John, a iyaakha 39, ophwanyaniwe muthinto woothowa wa kanser. Owo onihimya so: “Miyo koona wira kaanwokiwa okhala wira kaari mmiravo nlelo”. Okathi ole mwanawe John aarina iyaakha tthaaru paahi. John onihimya so: “Eyo yaataphulela wira amwaaraka yaarowa omukhapelaka mwanihu ole ni miyo, ni okikhaliherya orowa oxipitali khula okathi”. Enamuna yaarumeela awe John wira oloole eretta ele yaanimukhulumula ni yaanimweettiha murima. Nto mixankiho khisaamalenle vaavo. Apapawe John yaahikhalana oretta wahaavona ni yaatthuneya okhapeleliwa ni amusi.

Nto John ni emusi awe yaarowa opaka exeeni mwaha wa muxankiho ole? Owo onihimya so: “Nnaamwi kaarina muxankiho wa okhulumuwa, kaahiimananiha wira emusi ahu ekhaleleke nthiti miteko sa Muluku. Hiyo naanirowa mithukumano sotheene sa mmulokoni, ni naanirowa olaleerya khula esumana, ni naaniwerya omulompa Muluku vatthokoni, hata okathi onitepaka owereiwa”. Tthiri John ohoona wira etthu emukhalihenrye ovilela muxankiho awe ti okhalela nthiti miteko sa Muluku. Niireke owo onnaavaha miruku atthu arina mixankiho soolikana ni ole orina awe? Owo onihimya so: “Nuumala wiiwa ihapari soohiloka, murantteliheke muupuwelelo owo ni nikhaliheryo ni niphento na Yehova. Nto Yehova onrowa woolipihani ntoko sikikhalihenrye awe”.

Moohaniherya, nikhaliheryo na Yehova nnoowerya onilipiha wira nivilele mixankiho sirina ahu ni iye sinrowa okhumelela muhoolo. Nto nrowe ninvekeleke Yehova nimuroromelaka, okhalana ompatthani wooloka ni anna a mmulokoni mwahu, ottottela mureerelo nikhaliheryo na axitokweene, ni okhalela nthiti miteko sa Yehova. Niira siiso ninrowa opaka itthu moovarihana ni masu a Paulo yaawo ani: Munitthuneya “ovilela”.

[Enoota]