YOOSOMA 59
Nvileleke Olupatthiwa Moolipa Murima
Vanapisaka, makristau ootheene eekeekhai anoolupatthiwa. Nto niireke vannireerela oxanka ni woova?
1. Xeeni otheene ahu ninlipelela ahu olupatthiwa?
Biibiliya onihimya wira: “Otheene ale aniphavela omurumeela Muluku ntoko awiixutti a Kristu Yesu, nave anrowa olupatthiwaka”. (2 Timootheyo 3:12) Yesu aanilupatthiwa mwaha woowi khiirela mpantta olumwenku wa Satana. Hiyo nave, khanniirela mpantta olumwenku ola wootakhala. Mwaha waivaavo, hiyo khanintikinihiwa okathi ikuvernu ni itiini sowootha sa olumwenku ola sinnilupattha aya.—Yohani 15:18, 19.
2. Ninrowa wiilokiherya sai wira nivilele olupatthiwa?
Nihaana olipiha niinaano-va omuroromela wahu Yehova. Nto khula nihiku muhaana ovekela ni omusoma Biibiliya. Nave muroweleke mithukumano sootheene. Opaka itthu iyo, sinimoovahani ikuru wira nwerye ovilela olupatthiwa hata mulupatthiwaka ni atthu a etthoko anyu. Murummwa Paulo aamakela olupatthiwa, nto owo aahimmye so: “Yehova tonikikhaliherya. Miyo nkinrowa woova etthu”.—aHeeberi 13:6.
Etthu ekina enrowa onikhaliherya wuncererya olipa wahu murima, ori olaleerya khula nihiku. Maana olaleerya onnincererya omuroromela wahu Yehova ni onninikhaliherya ohiwoova atthu. (Miruku 29:25) Akhala wira ninniwerya olaleerya moolipa murima niinaano-va, nnimwiilokiherya wira nihihiye olaleerya hata kuvernu onikhoottiheryaka.—1 aTesaloonika 2:2.
3. Okathi ninlupatthiwa ahu, ovilela onrowa onikhaliherya sai?
Khuuvo mutthu onimusivela olupatthiwa. Masi okathi ninvilela ahu olupatthiwa, waamini wahu onnilipa. Nave ninnitepa omwaattamela Yehova mwaha woowi onninivaha ikuru wira niwerye ovilela mixankiho nuupuwela ahu wira khinaarowa owerya. (Mmusome Yakobo 1:2-4.) Yehova khivanimusivela aaniwehaka nihaawaka. Hata vari siiso, owo onnihakalala okathi onniweha awe nivilelaka. Biibiliya onihimya wira: “Mwaavilelaka ohaawa mwaha woopaka itthu sooreera, eyo etthu enimusivela Muluku”. (1 Pedru 2:20) Ale anrowa ovilela mpakha wanikisa, Yehova onimwaatthuvela aavahaka okumi woohimala.—Matheyo 24:13.
MWIIXUTTE ITTHU SIKINA
Nwehe wira vanniweryaneya ororomeleya wa Yehova hata nilupatthiwaka. Nave moone mareeliho nimphwanya ahu mwaha wa ovilela okathi ninlupatthiwa ahu.
4. Nyuwo munoowerya oxintta olupatthiwa ni amusi
Yesu aanisuwela wira okathi mukina amusi ahu khiyaarowa weemereryaka yoothanla ahu ya omurumeela Yehova. Mmusome Matheyo 10:34-36, nuumala-vo mwaakhule nikoho ninttharelana:
Etthu xeeni amusi akina akhanle aya oohimya aahiiso opaka akhala wira ookhala mutthu a mweemusini mwaya othanlale omurumeela Yehova?
Wira moone ntakiheryo nimosa, nwehe EVIIDIYU, nuumala-vo mwaakhule nikoho.
Munrowa opaka exeeni akhala wira mmusi aahiiso mpatthani anyu onnookhoottiheryani omurumeela Yehova?
Musome Esalimo 27:10 ni Marko 10:29, 30. Nuumala osoma khula yoolepa, mwaakhule nikoho ninttharelana:
Yooleiherya ela, enrowa wookhaliheryani sai okathi munlupatthiwa anyu ni amusi ni apatthani?
5. Hata mulupatthiwaka muhihiye omurumeela Yehova
Nihaana olipa murima okathi atthu akina annikhoottiha aya omurumeela Yehova. Nwehe EVIIDIYU, nuumala-vo mwaakhule nikoho.
Matakiheryo niwenhe ahu nviidiyuni, alipinhe sai waamini wanyu?
Musome Miteko 5:27-29 ni aHeeberi 10:24, 25. Nuumala osoma khula yoolepa, mwaakhule nikoho ninttharelana:
Xeeni vari aya vooloka, ohihiya omurumeela Yehova hata muteko ahu woolaleerya okhoottihiwaka ni kuvernu?
6. Yehova onimookhaliheryani wira nwerye ovilela
Anamoona a Yehova a iyaakha soovirikana, ilapo ni makhalelo oovirikana, khanihiya omurumeela Yehova moororomeleya hata alupatthiwaka. Wira moone etthu yaakhalihenrye anna ni arokora awo, nwehe EVIIDIYU. Nuumala-vo, mwaakhule nikoho.
Eviidiyu niwenhe ahu, etthu xeeni yaakhalihenrye anna ni arokora ale ovilela?
Mmusome aRoma 8:35, 37-39 ni aFilipi 4:13. Nuumala osoma khula yoolepa, mwaakhule nikoho ninttharelana:
Yoolepa ela, enookupalihani sai wira vanniweryaneya ovilela khula muxankiho?
Mmusome Matheyo 5:10-12, nuumala-vo mwaakhule nikoho ninttharelana:
Xeeni vanireerela aya ohakalala hata mulupatthiwaka?
Imilyau sinceene sa Anamoona a Yehova, anniwerya ovilela okathi anlupatthiwa aya. Ni nyuwo-tho munoowerya!
ATTHU AKINA ANIHIMYA WIRA: “Miyo nkinrowa owerya ovilela olupatthiwa”.
Yoolepa xeeni yaarowa omukhaliherya mutthu owo olipa murima?
IPONTO SUULUPALE
Yehova onnivaha efaita yinceene wiimananiha wahu omurumeela, hata nilupatthiwaka! Nikhaliheriwaka ni Yehova, nnoowerya ovilela.
Wuuluula
Xeeni makristau ootheene eekeekhai anlipelela aya olupatthiwa?
Nipakeke exeeni niinaano-va wira niwerye ovilela olupatthiwa muhoolo?
Exeeni enookupalihani wira munoowerya ohihiya omurumeela Yehova hata mulupatthiwaka?
NWEHE ITTHU SIKINA
Nwehe moota Yehova aamukhalihenrye awe munna mmosa owerya ovilela okathi aatthukweliwe awe mukhatteya mwaha wa ororomeleya wawe.
Nwehe moota anamathelana amosa yaawenrye aya omurumeela Yehova moororomeleya mwa iyaakha sinceene hata yaalupatthiwa..
Nwehe etthu enrowa wookhaliheryani ovilela olupatthiwa moolipa murima.
“Mwiilokiherye Niinaano-va Mwaha wa Olupatthiwa Muhoolo” (Owehaweha, Julyo 2019)
Nwehe etthu enniiriha oxanka okathi ninlupatthiwa ahu ni amusi ahu ni moone moota wookhalana murettele ni ohihiya omurumeela Yehova akhala wira eyo enoowiiraneelani.
“Ekeekhai Kheniruuha ‘Murettele, Eniruuha Ohìwanana’” (Owehaweha, Outubro 2017)