MWAHA WOOPACERYA | XEENI ATTHU OOLOKA SINAAKHUMELELA AYA ITTHU SOOTAKHALA?

Xeeni Atthu Ooloka Sinaakhumelela Aya Itthu Sootakhala?

Okhala wira Yehova Mulukua ti Mpattuxa a itthu ni toowerya sotheene, anamunceene anuupuwela wira owo tonikumiherya itthu sotheene siniireya mulaponi, ohela muhina itthu sootakhala. Masi, moone ele Biibiliya oniixuttiha awe voohimya sa Muluku eekeekhai:

• “Apwiya [Yehova] t’àxariya mwa itthu sothene sinìraya”.​—Esalimo 145:17.

• “iphiro sawe sothene ti sa xariya. Muluku ahu t’òroromeleya: owo khannòtotha. Owo t’àxariya ni t’owòkololowa”.​—Otumererya 32:4.

• “Tthiri [Yehova] Muluku t’òkhupanyerya ni t’òsareya othunku”.​—Yakobo 5:11.

Muluku khahiyo tonikumiherya itthu sootakhala. Nto, niireke onniwiiriha atthu opaka itthu sootakhala? Nnaari. Biibiliya onihimya so: “Mwehereriwaka, muhihimyé wira: ‘Muluku t’onkehererya’”. Mwaha woowi “Muluku khanwerya wehereriwa ni sotakhala: yowo mwanene khanimutthekiha mutthu”. (Yakobo 1:13) Muluku khonimweehererya mutthu wira opake itthu sootakhala. Tthiri, Muluku khonikumiherya itthu sootakhala, ni khoniwiiriha atthu opaka itthu iyo. Nto ti pani, wala exeeni enikumiherya itthu iyo sootakhala?

OKHALA OPURO WOOHILOKA MWA OKATHI WOOHILOKA

Ohimyaka nthowa nimosa apinaatamu anihaawa aya, Biibiliya oni: ‘Okathi ni itthu sootutuxerya sinnaakhumelela atthu otheene’. (Musuweli 9:11, Tradução do Novo Mundo) Ihasara wala itthu sootakhala, pooti omukhumelela mutthu mootutuxerya mwaha wookhala opuro ni okathi siniireya aya itthu iyo. Mwa iyaakha sowiiraka 2.000 sivinre, Yesu aahilavula sa ehasara yaaphwannye atthu 18 yaawo yaakhwiiye okathi empa yoorakama yaamorenle aya. (Luka 13:1-5) Atthu awo khiyaakhwiiye mwaha wa soottheka saya; masi waari mwaha wookhala opuro ole okathi empa ele yaamonre aya. Mwa iyaakha vakhaani sivinre, etetere yootakhala yoonyaanya elapo ya Haiti, Janero 2010. Eguvernu ya elapo ele ehimmye wira atthu anivikana 300.000 ahookhwa. Atthu awo yaahaaphwanya ehasara eyo voohicikha mukhalelo aya. Nave, iretta pooti waaphwanya atthu otheene khula okathi.

Woonasa wene akina pooti wiikohaka so: ‘Niireke Muluku khaawerya okhoottiherya ihasara iyo wira sihiiraneye? Niireke khoniwerya waakhapelela atthu ooloka wira sihaaphwanye ihasara iyo?’ Wira Muluku opake eyo, owo aahaana osuwela itthu iyo sihinatthi okhumelela. Nnaamwi Muluku osuwelaka itthu sinrowa wiireya muhoolo, nikoho nintthuneya ahu othokorerya tinla: ‘Niireke Muluku onnihela mukano owerya wawe osuwela itthu sa muhoolo?’​—Yesaya 42:9.

Biibiliya oni: “Muluku ahu ori wirimu: owo onnira sothene sintthunawe”. (Esalimo 115:3) Yehova onnipaka ele onoona awe okhala yootthuneya, ohiya khula etthu eniwerya awe opaka. Eyo-tho ennivarihana ni ele enithanla awe osuwela vahinatthi. Mwa ntakiheryo, okathi otakhala waasaren’ye aya oSodoma ni oGomora, Muluku aahimuleela Abrahamu iiraka: “Kinrowa weiwo, kawònexexe yàri òtakhala ntoko sìwalyaka. Yahikhale òtakhala siso, kinosuwela mmansaka”. (Maphattuwelo 18:20, 21) Mwa okathi owo, Yehova aahithanla ohisuwela itthu sotheene voohimya sa otakhala wa ipooma iye. Moolikanasa, Yehova onoowerya othanla ohisuwela vahinatthi itthu sotheene. (Maphattuwelo 22:12) Eyo khentaphulela wira owo toohimalela wala tootteettheya. Okhala wira “miteko sawe ti soloka”, Muluku onnirumeela saana owerya wawe woosuwela vahinatthi itthu sa muhoolo ni soolakela sawe. Owo khonaakhanyererya atthu wira atthare iphiro sawe.b (Otumererya 32:4) Nto exeeni nniixutta ahu? Nniixutta wira Muluku onnirumeela saana osuwela wawe itthu vahinatthi, othanlaka ele enreerela opaka.

NIIREKE APINAATAMU TANIKUMIHERYA ITTHU SOOTAKHALA?

Apinaatamu-tho annikumiherya itthu sootakhala. Nwehe ele Biibiliya onihimya awe sa ele enimwiiriha mutthu opaka itthu iyo. Biibiliya oni: “Khula mutthu onnehereriwa ni wunlela wawe sotakhala, weiwo onimototha, onamukuxa. Vano, wunlela iwo sotakhala wavahiwa ikuru, onnikumiherya etampi: etampi yeyo, yinnuwaka vomalela, enniphwanyiha okhwa”. (Yakobo 1:14, 15) Vaavo atthu aniphavela aya opaka itthu sootakhala, awo anihaawa mwaha wa sookhumelela saya. (aRoma 7:21-23) Okhuma khalai, atthu annipaka ikrime ni khiyakumiherya ohaawa vanci. Nto, atthu ootakhala anniwiiriha akina okhala oonanara murima. Tivonto otakhala onivikaniha aya.​—Miruku 1:10-16.

Niireke Muluku onniwaakiherya ni waakhoottiherya atthu opaka itthu sootakhala? Muthokorerye moota mutthu sipattuxiwe awe. Biibiliya onihimya wira Muluku ompattuxa mutthu ailikanyihaka mmansawe, eyo piiyo, mikhalelo soolikana ni Muluku. Tthiri, apinaatamu anniwerya wooniherya mikhalelo sa Muluku. (Maphattuwelo 1:26) Apinaatamu aavahiwa mukhalelo woothanla mootaphuwa. Nto awo anoowerya othanla omphenta Muluku ni omwiiwelela. (Otumererya 30:19, 20) Vaakhanle wira Muluku onnaakhanyererya atthu omwiiwelela, tthiri yoovaha ya othanla mootaphuwa khiyaarowa okhalana efaita. Mwaha aya? Mwaha woowi apinaatamu yaarowa olikanaka ni maakina, yaawo anivara ele apakeliwe aya paahi! Nto eyo yanvarihana ni yowiixuttiha yoowi, Muluku aahilepa vahinatthi, itthu sotheene nimpaka ahu ni sinniiraneela. Tthiri ninnihakalala mwaha woowi Muluku onninivaha efaita oneemereryaka othanla mmansihu mweettelo ahu! Masi, eyo khentaphulela wira ohaawa onikumiheriwa ni soovonya ni soothanla soohiloka sa apinaatamu khonrowa omala.

NIIREKE ATTHU ANIHAAWA MWAHA WA ITTHU YAAPANKE AYA ‘OLUMWENKU MUKINA’?

Akhala wira munoomukoha mutthu a etiini Hindu wala Budista nikoho nri vakaapani va erevista ela, moohaaniherya onrowa waakhula so: “Itthu sootakhala sinnaakhumelela atthu ooloka mwaha wa nlamulo na Carma, eyo piiyo, oliverya soottheka yaapanke aya ‘olumwenku mukina’”.c

Voohimya sa mwiixuttiho owo wa Carma, ti vooloka woona ele Biibiliya oniixuttiha awe sa okhwa. Ojardim ya wEedeni weiwo apinaatamu okhumme aya, Mpattuxa aahimuleela mulopwana oopacerya Adamu iiraka: “Munowerya olya mihokorokho sothene siri mmatta-mu: muhilyé pahi mihokorokho sa mwirí onsuweliha oreriwa n’utakhaliwa. Mwalyá vale mihokorokho iya, tthiri munimokhwa”. (Maphattuwelo 2:16, 17) Aakhanle wira Adamu aahimwiiwelela Muluku, owo aarowa okhalaka mahiku otheene. Okhwa okhumenle ntoko ehukhumu yoohiiwelela malamulo a Muluku. Nto okathi anamwane yaayariwa aya, “okhwa [waahaamwareela] atthu othene”. (aRoma 5:12) Tthiri, “ale anvarela muteko etampi anniliviwa n’ukhwa”. (aRoma 6:23) Nave-tho Biibiliya ontthokiherya so: “Ole okhwiye ohàkiheriwa etampi”. (aRoma 6:7) Nto, atthu khaniliverya soottheka saya nuumala okhwa.

Olelo-va, atthu imilyau sene anihimya wira apinaatamu annihaawa mwaha wa soottheka yaapanke aya ‘olumwenku mukina’. Ole onikupali muupuwelo owo onneemererya ohaawa wawe ni ohaawa wa akina moohixankiheya. Masi muupuwelo owo onivarihana ni yookupali yoowi itthu sootakhala khasinrowa omala. Okhala wira atthu awo anikupali wira mutthu onniyariwa vasya nuumala okhwa, anihimya wira enamuna emosa paahi yoowi mutthu ohiphwanyiwe-tho ni itthu sootakhala, ori ‘ohiyariwa-tho vasya’. Miyuupuwelo iyo khasinivarihana ni ele Biibiliya onihimya awe.d

NTHOWA NUULUPALE

Tthiri, nthowa nuulupale ninkumiherya otakhala, khahiyo mutthu. Satana Diabo, yoowo khalai aari nlaikha noororomeleya, ‘khonakhale n’ikekhai’. Nto owo ooruuha etampi mulaponi. (Yohani 8:44) Owo taawiirinhe Adamu ni Eva ohimwiiwelela Muluku. (Maphattuwelo 3:1-5) Yesu Kristu aahimuhimya Satana okhala “mutakhali” ni “mulupale òlumwenk’ula”. (Matheyo 6:13; Yohani 14:30) Atthu anci annimutthara Satana vaavo anikhootta aya iphiro sooloka sa Yehova. (1 Yohani 2:15, 16) Biibiliya oni: “Elapo yothene enniweriwa ni mutakhali”​—1 Yohani 5:19. Ahaavo malaikha makina akunxe mweettelo wootakhala ni khupatthanaka ni Satana. Biibiliya onnooniherya wira Satana ni axetwani awe ‘anniwototha atthu othene’ akumiheryaka ohaawa valaponi. (Wisupulula 12:9, 12) Tthiri, Satana Diabo tokhanle namakumiherya muulupale a otakhala mulaponi.

Tthiri, Muluku khahiyo tonikumiherya itthu sootakhala. Nave, owo khoniphavela wira atthu ahaaweke. Nto, owo ooleiherya omaliha otakhala wotheene, ntoko sinooniherya aya mwaha onittharelana.

[Inoota]

[Eponto yuulupale epaaxina 5]

Apinaatamu annipaka ikrime ni khiyakumiherya ohaawa vanceene