Mweemye Wira Yehova Olipihe ni Okhapelele Ekasamento Anyu
“Yahari Apwiya anisuka muttetthe, atthu yamulipelela mahala”.—ESAL. 127:1b.
MUNOOWERYA WAAKHULA?
Xeeni vanitthuneya ahu okhapelela murima ahu?
Xeeni vanitthuneya ahu ovikaniha omwaattamela Muluku?
Olavulihana wa enamuna xeeni onilipiha ekasamento?
1, 2. (a) Etthu xeeni yaawiirinhe aIsarayeli 24.000 oyeleela mareeliho aya? (b) Xeeni yowiiraneya ela ya khalai erya aya yookhalela olelo-va?
MOOHIPISA nuumala nloko na aIsarayeli okela Elapo Yooleiheriwa aya, alopwana anceene “yahipajerya oraruwana n’athiyana òMowabi”. Eyo yaahiwiiriha atthu 24.000, wiiviwa ni Yehova. Nkuupuwelani ela: aIsarayeli ale yaahanle vakhaani waakhela yoolaiherya yaawehererya aya okhuma khalai, masi yaahipweteiwa mareeliho ale otheene okhala wira yaheemya opaka etampi ele.—Moth. 25:1-5, 9.
2 Sowiiraneya iye soohiloka ‘sahilempwa wira sinlopole hiyo, okhala wira omala wa mahiku wonattamela’. (1 aKor. 10:6-11) Mahiku ala a ‘okathi wokiserya’, atthu a Muluku ari muxerexere mwa elapo esya. (2 Tim. 3:1; 2 Ped. 3:13) Vooriipiha-vo murima arumeyi akina a Yehova khanicalela mwaha ola. Nto akina aahomphwa ni muraakho wa ekhapa nto aahepha mihokhorokho soowaawa sa mweettelo wohiixuumaaliha. Vannoopihasa atthu awo oyeleela mareeliho oohimala aniwehererya ahu.
3. Xeeni anamathelana anitthuneya aya olakiheriwa ni waakiheriwa ni Yehova? (Nwehe elatarato yoopacerya.)
3 Okhala wira olelo-va mweettelo wa orupihana woohiloka woomwaareela mulaponi, mulopwana ni muthiyana athelanne anitthuneya olakiheriwa ni waakiheriwa ni Yehova wira wiimananiha waya okhapelela ekasamento aya ohikhale wa mahala. (Musome Esalimo 127:1.) Hiyo ninrowa othokorerya moota anamathelana anirowa aya olipiha ekasamento aya akhapelelaka murima aya, moota womwaattamela Muluku, owara omutthu wa naanano, olavulihana saana, ni ovahanana itthu sa moothelanani.
MUKHAPELELE MURIMA ANYU
4. Etthu xeeni ewiirinhe maKristau makina opaka etampi ya orupihana woohiloka?
4 Vaniweryaneya sai muKristau weemya mweettelo wa orupihana woohiloka? Ehasara eyo enipacerya ni maitho. Yesu aahimyale so: “Ole oninweha muthiyana anwereihaka murima, òraruwana muthiyan’owo ni murima”. (Math. 5:27, 28; 2 Ped. 2:14) Mwaha wa oweha epornografia, osoma iliivuru sa ekhapa, oweha itthu soohiirya sa orupihana mwInternetini; makristau manceene aapaka yoottheka ya orupihana woohiloka. Akina mwaha wa otthekula waya okhanle oweha ifilme siniwooniherya atthu anrupihana, iprograma sa televisau wala isipo sa ekhapa. Akina taale anirowa opuro aniiniwa ohiyu, onikhala atthu anirula ikuwo okathi oniina aya, wala orowa mapuro anipakiwa massagem animwiiriha mutthu osiveliwa itthu sa ekhapa.
5. Xeeni vanitthuneya ahu okhapelela murima ahu?
5 Akina aamoroxiwa ni etampi ela mwaha wa opacerya osiveliwa ni mutthu mukina omuhiya ole othelanne aya. Olumwenku ola ohinikhoottihiwa aya itthu sa ekhapa, ti vookhweya murima ahu wowoototha, opacerya osiveliwaka mutthu mukina omuhiya ole othelanne ahu. (Mmusome Yeremiya 17:9, 10.) Yesu aahimyale so: “Vekekhai, mmurimani mwa mutthu sinnikhuma sowupuwela sonanara, wiva, oraruwa, onamuttompe”.—Math. 15:19.
6, 7. (a) Moota xeeni murima ahu woowoototha okhanle awe oniroiha ephiro ya etampi? (b) Vaniweryaneya sai osyaka ehasara eyo?
6 Muupuwelo woohiloka omalakaru ohela mitathaari vamurimani va mutthu, atthu anli anoonana oreera pooti opacerya olavula itthu sihinireerela mutthu olavula ni ole ohithelanne awe. Voohipisa, atthu awo annipacerya omakela okumana, khuyahimya wira khampakale palano erimwiiraneya paahi. Vaavo anrowa aya otepaka osivelana, vanrowa otepaka ovila okhootta etampi. Nto okathi anitepa aya okela ephiro yootthekiha, vanikhala voovila weemela, hata asuwelaka wira ele enipaka aya etampi yuulupale.—Mir. 7:21, 22.
7 Makhalelo ooloka oomunepani annihononeya vaavo atthu awo aneemya aya murima woohiloka, nto khiyapacerya ovarelana matata, ovahana ibejo, okeliha matata mukuwoni, ni soowiira sikina sinimwiiriha mutthu ophavela orupihana, seiyo siniiriwa ni atthu athelanne paahi. Nto wanikisa waya ‘mutthu onnehereriwa ni wunlela wawe sotakhala, weiwo onimototha, onamukuxa [ntoko muraakho]. Vano, wunlela iwo sotakhala wavahiwa ikuru onnikumiherya etampi’, eyo piiyo, orupihana woohiloka. (Yak. 1:14, 15) Tthiri eyo ehasara! Nto ehasara eyo yotheene yanwerya osyakiwa vaakhanle wira atthu awo, yaheemya malakiheryo a Yehova a ottittimiha ni olipiha ekasamento aya. Masi, moota xeeni?
NVIKANIHEKE OMWAATTAMELA MULUKU
8. Moota xeeni ompatthani ni Yehova oryaaya nikhaliheryo wira makhalelo ahu ooloka ahihononeye?
8 Musome Esalimo 97:10. Ompatthani ni Yehova etthu ekhanle oomukhapelela mutthu omunepani. Vaavo vanisoma ahu makhalelo ooloka a Muluku ni omananiha omutakiha ntoko anamwane oophentiwa, ninrowa otepaka okhootta “itthu s’òseje ni sonanara sikina”. (aÉf. 5:1-4) Osuwela wira “Muluku onimwaphuka anamuttompe n’ anamararuwa” onimwaakhaliherya anamathelana wiimananiha ottittimiha ekasamento aya wira ehipweteye.—aHéb. 13:4.
9. (a) Yosefe aawenrye sai okhootta orupihana woohiloka? (b) Ntakiheryo na Yosefe ninniixuttiha exeeni?
9 Arumeyi akina oororomeleya a Yehova aapahula makhalelo aya ooloka mwaha woowi wuumalani wa muteko anniviriha okathi munceene ni atthu ahikhanle Anamoona. Hata okathi onivariwa muteko pooti okhumelela soweeha. Mmiravo mmosa ooreera iireliwa Yosefe aahipacerya woona wira mwaara a patarau awe aaniphavela orupa ni yena. Khula nihiku owo aanimananiha onveka. Nihiku nimosa muthiyana ole ‘ahivara mukhumi wa Yosefe, ìraka: ‘Nrowé murupe ni miyo!’’ Masi Yesefe aahiimananiha nto khutthyawa. Exeeni yaamukhalihenrye Yosefe ohipaka etampi ele? Waari mwaha wa yoolakela awe ya ohipahula ompatthani awe ni Muluku, nto eyo yaahimusyakiha ottheka. Mwaha wa ororomeleya wawe, owo ahoomoliwa omutekoni, khuriheliwa mukhatteya voohixariya, masi Yehova aahimureeliha. (Maph. 39:1-12; 41:38-43) Okhale omutekoni wala vatthokoni, khula muKristau ohaana osyaka yooweeha ya orupihana ohikhanle ni mutthu yoole othelanne awe.
NWAREKE OMUTTHU WA NAANANO
10. Omutthu wa naanano onrowa onikhaliherya sai okhala oolipa omunepani?
10 Okhala wira omutthu wa naanano ‘opattuxiwe alikanyihiwaka ni Muluku, okhalihiwe naxariya, orerihiwe murima n’ikekhai’, nto ti wootthuneya wira alokiheriwe makhalelo a vatthokoni. (aÉf. 4:24) Ale aniwara omutthu wa naanano “annipwetexa” makhalelo aya a “enamuttompe, oraruwa, osiveliwa n’itthu sonanara n’uphavela seiyo, wunlela muhakhu”. (Mmusome aKolosi 3:5, 6.) Nuulumo noowi “opwetexa” nnooniherya wira hiyo nihaana opaka khula etthu wira niwanane makhalelo oohiloka a erutthu ahu. Hiyo nihaana osyaka khula etthu ekhanle ooniiriha ophavela orupihana ni mutthu othelanne ahu. (Yobi 31:1) Vaavo vaniphavela ahu ovahererya ikumi sahu wira nivareke otthuna wa Muluku nihaana ‘osuwela sintthuna awe Muluku, nithanlaka etthu ekhanle yorera’.—aRom. 12:2, 9.
11. Moota xeeni omutthu wa naanano onilipiha aya ekasamento?
11 Omutthu wa naanano ‘onolikana ni Muluku yowo ori mpattuxa’, niire so, Yehova. (aKol. 3:10) Tthiri annikhumelela mareeliho maalupale vaavo muthiyana ni mulopwana anilipiha aya makhalelo aya oomunepani akuxaka “murima w’othunku, murima worera, wowiyeviha, womàla ni wovilela!” (aKol. 3:12) Awo tthiri annikhala oowiiraana vatthokoni vaavo vaneemererya aya ‘murettele wa Kristu wira wettihe mirima saya’. (aKol. 3:15) Tthiri ti voohakalaliha anamathelana ‘orerelana murima’ mukina ni mukhwaawe! Eyo ennaatumererya ‘ottittimihanaka mukina ni mukhw’awe’.—aRom. 12:10.
12. Makhalelo xeeni nyuwo anoona anyu oreerela wira ekasamento ekhale yoohakalala?
12 Vaavo vaakohiwe awe wira makhalelo xeeni anilipiha ekasamento, Sid aahimyale: “Niphento ti nikhanle etthu yuulupalexa enireerela wunnuuheriwa. Nave nihoona-tho wira wiiyeviha etthu yootthuneya”. Amwaarawe, Soja anneemererya wira: “Oreera murima ti makhalelo ooloka. Ni hiyo ninneererya okhala oowiihiiha, hata vavilaka opaka eyo okathi mukina”.
NVIKANIHEKE OLAVULIHANA VOOKHALELA
13. Exeeni enikhaliha etthoko yowiitthyaaleya, ni nthowa xeeni?
13 Khuuvo onivaanyiha wira olavulihana woophenta ti etthu eniiriha etthoko ohakalala. Tthiri ti vooripiha murima woona wira aakhala anamathelana aniwerya waalavuliha mooreerela atthu ahinaasuwela aya ni inama sinihuwa aya, masi ahinawerya omulavuliha saana ole othelanne aya! Vaavo anamathelana anilavulihana aya arumeelaka makhalelo “òwawa, ònanariwa, òwali, òviruwa ni òruwana”, annihonona makhalelo ooloka oomunepani a ekasamento aya. (aÉf. 4:31) Ohiya opahulaka ekasamento mwaha woomakelaka waakhulana wala opwapwa, anamathelana ahaana olipiha wataana waya ni masu anooniherya oreera murima, omorelana ikharari ni opixeryana murima.—aÉf. 4:32.
14. Itthu xeeni atthu a miruku anitthunya aya osyaka opaka?
14 Biibiliya onnihimya wira wookhala “okathi w’omàla”. (Mus. 3:7) Eyo kheniphavela ohimya wira nihiyeke olavula, okhala wira eyo enoohonona olavulihana wooloka vatthokoni. Muthiyana mmosa ootheliwa a wAlemanha onihimya so: “Othanla ohilavulihana pooti omuriipiha murima ole othelanne awe”. Masi owo onnihimya-tho so: “Nnaamwi vahikhweyaka mutthu okhala oomaaleleya onanariwe ene, khivaniloka opacerya opwapwa ni ohimya sotheene sinuupuwela awe. Mwiira siiso, nyuwo pooti ohimya wala opaka etthu enrowa omooniha owereya ole othelanne anyu yeeyo enrowa wunnuwiha muxankiho owo”. Mulopwana ni amwaarawe khanitthuneya ophuka milattu saya apwapwelanaka wala ohilavulihana mukina ni mukhwaawe. Ohiya-vo awo anoolipiha ekasamento aya vakhala wira khaneemererya ohiiwanana waya omakelaka okhumelela wala okumiheryaka waakhulaniwa.
15. Moota xeeni olavulihana oratteene onilipiha aya ekasamento?
15 Ekasamento ennilipa vaavo mulopwana ni amwaarawe aniviriha aya okathi avaanelaka ni khula mmosa ohimyaka eri vamurimani vawe. Enamuna enirumeela ahu wira nihimye teri etthu ti yootepa otthuneya ovikana ele enihimya ahu.Ti maana aya, vanitthuneya ahu wiimananiha olavula oratteene hata okathi wa mixankiho, murumeeleke nsu nooreerela ni osuwela othanla masu anihimya anyu. Mwiira siiso munoomukhweiherya ole othelanne anyu woowiriyanani moopixa murima. (Mmusome aKolosi 4:6.) Mulopwana ni amwaarawe anoowerya olipiha ekasamento aya akhala wira olavulihana waya onihela muhina ‘molumo òrera, anihaliherya ni omphwanyiha murerelo’ ole othelanne awe.—aÉf. 4:29.
NVAHANANEKE SOOREERA SA MOOTHELANI
16, 17. Xeeni varyaaya vootthuneya anamathelana ottitthimihana ni ohikhoottana?
16 Anamathelana pooti olipiha ekasamento aya vaavo khula mutthu oniphavela awe mureerelo wa ole othelanne awe, ohelaka nipuro noopacerya sootthuna sa ole othelanne awe. (aFil. 2:3, 4) Mulopwana ni muthiyana athelanne ahaana osuwelaka wira ole othelanne aya onnitthuneya okhapeleliwa muupuwelelo awe ni ohakalaliha sootthuneya sawe sa othelana.—Mmusome 1 aKorinto 7:3, 4.
17 Ti vooriipiha murima osuwela wira aakhala atthu ahiniphavela wooniherya niphento naya wala anikhoottana, alopwana akina anoona wira omukhalela nlema muthiyana onoowiiriha okhala alolo. Biibiliya onihimya so: “Nyuwo, alopwana, mukhaleke ni nlema n’amwar’inyu, musuwelaka wira makhalelo àthiyana t’òttéttheya ovikana awinyu”. (1 Ped. 3:7) Mulopwana ohaana osuwela wira itthu sinivahananiwa moothelanani khahiyo orupihana paahi. Muthiyana onnitteeliwa murima akhala wira okathi onikumanela awe ni aiyawe, awo annimooniherya niphento ni nttittimiho. Akhala wira atthu oowanli annooniherya ophentana, animwaakhwaniherya sotthuna sa mmuupuweleloni ni werutthuni sa mukina ni mukhwaawe.
18. Moota xeeni mulopwana ni muthiyana akhanle aya oolipiha etthoko aya?
18 Tivonto vahikhanle aya etthu enimweemererya mutthu omuhiya ole othelanne awe, wala ohimphenta mpakha omwiiriha owo orowaka omwaavya mutthu mukina ota wira omuhakalalihe. (Mir. 5:18; Mus. 9:9) Ti maana aya, Biibiliya onaatumererya awe anamathelana wira: “Muhikhottaneké, vahikhanleru wira murimwìwanana siso mahiku vakhani”. Mwaha wa exeeni? “Wira Satana ahiwehereryeni mwaha w’ohilipa wanyu”. (1 aKor. 7:5) Tthiri ti vooriipiha murima wa anamathelana yaale animyeemya Satana orumeela ‘ohilipa waya’ wira araruwelane! Masi vaavo khula mutthu ‘ohiniphavela awe murerelo awe pahi, masi onaphavela oreriwa wa mukina’ ni omananiha ovahanana itthu sa moothelani mwaha wa niphento, ohiya mwaha wa okhanyereriwa, ekasamento eyo ennilipa vanceene.—1 aKor. 10:24.
NVIKANIHE OKHAPELELA EKASAMENTO ANYU
19. Exeeni enireerela ahu opaka vano, ni nthowa xeeni?
19 Hiyo nri vakhiviru wira nivolowe elapo esya ya xariya. Tivo vanihimmwa aya wira weemererya yootthuna ya erutthu enoonikumiherya ehasara ntoko aIsarayeli ale 24.000, yaakhwiiye elapo ya aMowabi. Nuumala othokorerya yowiiraneya ele yoowuuliha muru, Nuulumo na Muluku ninlopola so: “Siso, ole onòna wira orimwemela, aìpasope wira ahimoré”. (1 aKor. 10:12) Tthiri ti vootthuneya olipiha ikasamento sahu ni okhala oororomeleya wa Tiithi ahu a wiirimu ni ole othelanne ahu. (Math. 19:5, 6) Olelo-va ovikana khalai, hiyo nihaana ‘ophavela wira Muluku oniphwanye ni murima worera ni wohittheka ni wa murettele’.—2 Ped. 3:13, 14.