Ale animphenta Yehova, ‘Khivo Etthu Enakwattuliha’
“Ale amphenta ikano sanyu àkhalana murettele mulupale, khivo etthu enakwattuliha”.—Esal. 119:165.
MWAAROWA WAAKHULA SAI?
Moota xeeni maKristau anitthimaka aya muxookuni, nto anrowa waakhelani?
Maluku xeeni akhanle ommoroxa muKristau?
Moota xeeni wa ale aniphenta ikano sa Yehova ehikhanle aya etthu enaamoroxa?
1. Moota xeeni ntakiheryo nihimmwale na mulipa ootthimaka, ninnitumererya aya ohitthikela ottuli?
OKHUMA omiravo awe, Mary Decker aahivuwa mwaha wookhala mwali ootepexa otthimaka molumwenkuni. Atthu yuupuwela wira taarowa oganyari emedalya ya ewero, otthimaka wookiserya wa imeeturu 3.000 sa Olimpika, elimwe ya 1984. Masi khaawenrye otupha eliinya yookiserya. Owo aahikwattula nnawu na mukhwaawe aatthimaka, nto khumora. Ahoona owereya ananla nto anateexiwa akumihiwaka muliinyani. Masi, eyo khiyaamwiirinhe Mary ohiya otthimaka. 1985, ehimanle eyaakha emosa, aahitthikela omwiira xooku a otthimaka ikiloomo 2000, khukhala muthiyana a niinano ootepexa otthimaka molumwenkuni waavikana akina.
2. Enamuna xeeni maKristau antthimaka aya, nto yoolakela ahu tiivi?
2 Ntoko maKristau, hiyo nnootthimaka, otthimaka wa nthoonyeryo. Yoolakela ahu okhaleke ophavela otthimaka wira niganyari. Otthimaka wahu khahiyo wowuupa wira naakuve ophiya. Khahiyo otthimaka paahi voohikhalana palano. Masi, onlikana ni otthimaka mukwaha woorakama onivekela olipiherya wira mutthu owerye oganyari. Paulo aahilavula sa otthimaka wa nthoonyeryo vaavo aalepela awe maKristau a oKorinto, esidadi yeeyo atthu yaasuwela aya saana axooku awo ootthimaka. Aalempe so: ‘Nyuwo khamunsuwela wira, atthu yatthimakelaka etthu emosa, ephavelaka oxinttana, annitthimaka othene, masi mmosá pahai t’ontthuveliwa? Tivó mutthimakeke wira mphwanyé mutthuvelo owo’.—1 aKor. 9:24.
3. Alipa ootthimaka otheene anrowa owerya sai waakhela okumi woohimala?
3 Biibiliya onninleela ovikaniha otthimaka iwo wa nthoonyeryo. (Mmusome 1 aKorinto 9:25-27.) Yootthuvela aya, ori okumi woohimala wiirimu, wa ale ari maKristau owoottihiwa; wa anamunceene anitthimaka, anrowa waakhela okumi woohimala valaponi. Moovirikana ni axooku anceene, otheene aniirela mpantta otthimaka nno wa nthoonyeryo, yavilela mpakha wanikisa animwaakhela etthu. (Math. 24:13) Alipa ootthimaka awo, ankela oyeleela paahi akhala wira aahiya otthimaka wala ohitthara malakiheryo a otthimaka mpakha wanikisa wa mukano. Ohiya vo, otthimaka nno ori enamuna emosa paahi eniphwanyiha okumi woohimala.
4. Exeeni enixankiha otthimaka wahu wira naphwanye okumi woohimala?
4 Ophiya wanikisa wa mukano khivanikhweya. Vanitthuneya wiikasoopa ni okhalana yoolakela. Mutthu mmosa paahi otonko ophiya wanikisa wa eliinya yaatthara awe moohitthikela ottuli wala omora ti Yesu Kristu. Masi murumeyi a Yesu iihaniwa Yakobo aahaalepela maKristau akhwaawe wira: ‘tthiri othene ahu ninnittheka nínamuna sinjene’. (Yak. 3:2) Ekeekhai! Maana ninniwanana soovonya sahu; wala sa atthu akina. Tivonto ikwaha sikina ninnikhumuwa, khiyaxanka ni ohoona oreerela ovikaniha otthimaka. Hata nimoraka, nihaana omananiha ovenya ni ovikaniha otthimaka. Akina omora waya ti wuulupale, nto enatthuneya okhaliheriwa wira etthikele otthimaka mpakha wanikisa. Tthiri vanniweryaneya, hiyo okwattuliwa wala omora, ekwaha emosa aahiiso ikwaha sinceene.—1 Mam. 8:46.
AKHALA WIRA MOOMORA, MUHIHIYE OTTHIMAKA
5, 6. (a) Moota xeeni ehikhanle aya enimukhumula muKristau, nto etthu xeeni enimukhaliherya “ovenya”? (b) Xeeni akina ahinvenya aya nuumala omora?
5 Waaniheryasa mootoko orumeela moolumo oowi “okwattuliwa” ni “omora” mphavelaka ohimya myaha sa omunepani. Moolumo awo a Biibiliya pooti otaphulela yeeyo, masi khahiyo okathi wotheene anitaphulela etthu emosaru. Mwa ntakiheryo nkahaya moone masu a Miruku 24:16 ani: ‘Tthiri naxariya amorá imara thanu na pili, onnivenya; vano mutakhali, aphwanya vale ehasara, onopweteya’.
6 Yehova khoneemya wira ale animuroromela ekwattuliwe wala omora, nihimye so, okumanana mixankiho aahiiso okhumuwa mookokhorelani mwaya, mpakha wooceya. Ninnikupali wira Yehova onoonikhaliherya ‘ovenya’ wira nivikaniheke ovara ele eniwerya ahu wira ninvuwihe. Tthiri masu ala toolipiha wa ale otheene animphenta Yehova ni murima wotheene! Mutakhali attheka khaniphavela ovenya. Awosa, khaniphavela okhaliheriwa ni munepa wa Muluku, vamosa ni atthu awe, awo annikhootta okathi onikhaliheriwa aya. Moovirikana ni ale aniphenta malamulo a Yehova, awo kharina etthu enrowa waakhumuliha okathi wotheene mookumini mwaya.—Musome Esalimo 119:165.
7, 8. Mutthu ‘omonre’ onkela omoreliwa sai ikharari ni Muluku?
7 Mwaha woohilipa-lipa, akina aatoko omora khupaka etampi yaamukhaani, emosa wala ikwaha sinceene. Masi nlelo awo anaxariya wa Yehova, akhala wira ‘anovenya’, eyo piiyo, ottharuwa ni omananiha okhalana mweettelo woororomeleya. Hiyo pooti oweha eyo mmoota Muluku aakhapelenle awe aIsarayeli akhalai. (Yes. 41:9, 10) Miruku 24:16 oromoliwe wanipacerya, khonnitumererya ovikaniha owehexexa soohiloka, niire so, soovonya sahu, masi onnitumererya owehaka itthu sooloka, ophavela wahu ovinya nikhaliheriwaka ni Muluku ahu a kharari. (Mmusome Yesaya 55:7.) Yehova Muluku ni Yesu Kristu, yooniheryaka oniroromela waya, awo anninlipiha moophenta wira nihaana ‘ovenyaka’.—Esal. 86:5; Yoh. 5:19.
8 Mwa ntakiheryo, mulipa onimwiira xooku a otthimaka, hata amoraka mowaakuveya owo onnivenya ni wiilipiha wira aphiye oponta. Nto otthimaka wahu wira naphwanye okumi ohinimala, khaninsuwela ‘nihiku’ ni okathi onimala aya otthimaka iwo. (Math. 24:36) Masi nailipiherya wira nihimore, nnoowerya ovikaniha otthimaka ni ohikhuma mphironi munitthimakiwa, ni omaliha saana otthimaka wahu. Nto ninrowa osyaka sai omora?
ENAMUNA YA OMORA ENOOCEELIHA OROWA VAHOOLO
9. Itthu xeeni siniwerya ommoroxa mutthu, ninrowa ahu othokorerya?
9 Nrowe nithokorerye itthu 5 siniwerya ommoroxa mutthu: otteettheya wahu, soophavela sa erutthu, wiireliwa itthu soohixariya ni axinnihu, soohaaxa wala olupatthiwa, ni ohimalela wa atthu akina. Muhiliyale ela, akhala wira noomora, nuupuweleke wira Yehova toopixa murima. Owo khanaakuvela onoona okhala atthu oohirororomeleya.
10, 11. Davidi aawanana muxankiho xeeni wa otteettheya?
10 Otteettheya wahu pooti olikanyihiwa ni mutthu oniwehexexa maluku yaataleliwe mukherekhere wa mphironi munitthimakiwa. Oweha itthu saamukhumelenle Mwene Davidi ni murummwa Pedru, nnoowerya woona sotteettheya iyo piili: ohikhalana wiihiiha, ni omoova pinaatamu.
11 Mwene Davidi, aahitteettheya nto khuhikhala oowiihiiha ntoko yoowiira awe ele yoohiloka ni Bathixeba. Nave okathi aaruwaniwe awe ni Nabali, ahanle vakhaani wooniherya okhummwa murima. Aayo, wiihiiha wawe waahitteettheya, masi Davidi khoceen’ye ophavela omuhakalaliha Yehova. Okhaliheriwaka ni atthu akina, aahiwerya otthikela wataana ni Yehova.—1 Sam. 25:5-13, 32, 33; 2 Sam. 12:1-13.
12. Pedru aavikaninhe sai otthimaka nnaamwi aamora?
12 Pedru ahooniherya omoova pinaatamu, nto ikwaha sikina khiyamora mwa enamuna yoohiloka; masi owo aahivikaniha ororomeleya wa Yesu ni wa Yehova. Mwa ntakiheryo, aahimukhootta Pwiya awe ohoolo wa atthu ikwaha tthaaru. (Luka 22:54-62) Muhoolo mwaya, Pedru aahivonya khuhikhalana moonelo weeKristau, khupacerya ohaacalela maKristau yahaakhanle aYuda; nto mwaha woohinnuuhiwa ohinawoona oloka ntoko maKristau aYuda yainuuhiwe. Masi, murummwa Paulo aahithokorerya mwaha ole mwa enamuna yookhalela, tthiri aanisuwela wira mmulokoni khokhanle opuro woothanlana. Mwiirelo wa Pedru, khiwaalonke. Mweettelo ole wa Pedru ohinatthi waakhumuliha anna, nto olavulaka moohivitha etthu Paulo aahipaka etthu khumukhaliherya Pedru ohoolo wa atthu. (aGal. 2:11-14) Niireke Pedru ahooniherya wixinnuha mpakha ohiya otthimaka wawe wira ophwanye ekumi. Nnaari. Owo aahithokorerya saana miruku sa Paulo, khuvarela muteko ni khuvikaniha otthimaka.
13. Moota xeeni otteettheya wa werutthuni oniwerya aya onimoroxa?
13 Ikwaha sikina otteettheya wa mutthu, onikhala myaha sa ekumi awe. Tthiri mwaha owo pooti okhumelela ntoko etthu enniiriha omora. Owo onniwerya ohonona otthimaka wahu womunepani, aahiiso oniiriha otteettheya ni otemwa. Mwa ntakiheryo, murokora mmosa oJapão aahiwereiwa etthu yowiiraka iyaakha 17 nuumala obatiziwa. Aahixankiheya vanci mpakha otteettheya omunepani. Nuuvira okathi aahihiya ovara miteko sa Muluku. Axitokweene anli yaahimuxukurya. Nuumala olipihiwa ni masu oophenta, owo aahitthikela orowa omithukumanoni. Owo onihimya so: “Miyo kaahimoroxa maithori mwaha wowaakheliwa saana ni anna”. Murokorihu ola vano ootthikela otthimaka ephiro yeKristau.
14, 15. Etthu xeeni yuulupale enitthuneya opaka okathi oniphavela ahu etthu yoohiloka? Muvahe ntakiheryo.
14 Soophavela sa erutthu sihaamoroxa anceene. Okathi oneehereriwa ahu ni itthu iyo, nihaana opaka etthu wira ehikhale etthu yoonanara mmuupuweloni, mweettelo ni omunepani wahu. Muupuweleke ntakiheryo na Yesu na ‘okumiha’ niitho nahu, wala ntata nahu naanitthekihaka. Niireke eyo khenihela muhina miyuupuwelelo soohiloka ni sowiira sinniiriha omora omunepani wahu?—Mmusome Matheyo 5:29, 30.
15 Munna mmosa oyariwe etthoko ya eKristau oolepa wira etthu ehinliyala awe waari wiimananiha wawe owanana ni yoophavela awe ya orupihana alopwanaru. Owo onihimya so: “khuta okathi kaakhala oonyoonyiheya. Nave koona wira khiivo yaakireerela”. Okathi wa iyaakha 20, aahikhala pioneero ookilaatheya ni murummwa a mmulokoni. Nuumala-vo, aahimora vaalupale, khulakiwa ni Biibiliya, nto khweemya nikhaliheryo na axitokweene. Mavekelo, omusoma Biibiliya, ni ophavela waakhaliherya akina, waahimwiiriha ovinya ni otthikela otthimaka wawe woomunepani. Nuuvira iyaakha owo aahimyale so: “Ikwaha sikina onnikirweela muupuwelo ole, masi nkinihiyererya wira okimoroxe. Kihiixutta wira Yehova khanimuhiya mutthu eehereriwaka ni etthu ohiniwerya awe oxintta. Nto kinnikupali wira Muluku onuupuwela wira kinoowerya oxintta”. Munna owo onnimaliherya oriki: “Mixankiho sotheene siniwanana aka, sinrowa omala-malihiwa elapo esya. Eyo teniphavela aka! Nenna-va kinoovikanihaka owana ni soottehatteha iyo”. Owo oniphavela ovikaniha otthimaka ottharaka ephiro yeeKristau.
16, 17. (a) Exeeni yamukhalihenrye munna mmosa yoowo oonale wira aahiireliwa etthu yoohixariya? (b) Wira nihikhumuwe nihaana wuupuwela exeeni?
16 Wiireliwa itthu soohixariya ni annihu pooti okhala nluku ninnimoroxa. Munna mmosa oFrança, aari mutokweene khalai, aakupali wira aahiireliwa etthu yoohixariya, nto khunanariwa vanceene. Khuhiya orowa mmithukumanoni ni ahinalaleerya. Axitokwene anli yaahimuxekurya, nto moophenta ni moohimukwasa masu, yaahiwiriyana saana ele yaahimya awe. Awo yaahimutumererya onvahererya Yehova muxankiho ole, ni omooniherya wira etthu yootepexa otthuneya ori omuhakalaliha Muluku. Ahaakhelela saana malakiheryo ale, nto moohipisa aahitthikela otthimaka, khutthikela wataana ni muloko.
17 MaKristau otheene ahaana omuupuwelaka ole othanliwe okhala Muru wa muloko, Yesu Kristu, ohiya waaweha atthu paahi oohimalela. Yesu yoowo ‘maitho awe anilikana ni malumi a moro’, onniweha saana itthu sotheene siniiraneya onivikana hiyo. (Wis. 1:13-16) Mwa ntakiheryo, owo onnisuwela wira ele enoona ahu okhala etthu yoohixariya, pooti okhala moonelo ahu woovonyeya wala ohiiwa wahu saana mwaha owo. Yesu onrowa othokorerya myaha sa mmulokoni mwa enamuna yooreerela ni okathi woophaveleya. Nto niheemye wira sowiira sa maKristau akhwiihu sinimoroxe.
18. Ninrowa owerya sai oxintta soweeha wala mixankiho?
18 Atthu akina annikhumuwa ni itthu ntoko soohaaxa wala olupatthiwa, ni ohimalela wa atthu akina a mmulokoni. Avahaka ntakiheryo na mulipa onaala mmiso, Yesu aahimyale wira ‘ohawa ni olupatthiwa’ mwaha wa ehapari yooreera, atthu akina yaarowa okhumuwa. Khuta etthu enikumiherya olupatthiwa iwo, ekhale amusi, anamwaattamanani ahu, wala amahoolela aguvernu, pooti omuttettheiha mutthu ohirina ‘mitathari’, ohilipale omunepani. (Math. 13:21) Masi, akhala wira nnoovikaniha olipiha murima ahu, ipyo sa omwene sinoonikhaliherya olipiha mitathaari sa nroromelo nahu. Soophwanyani mixankiho muhaana ovekela ni wuupuwelela itthu soottottopeleya. (Mmusome aFilipi 4:6-9.) Nikhaliheriwaka ni ikuru sa Yehova nnoovikaniha oxintta mixankiho iyo, nto niheemye itthu sooxankiha okhala nluku ninrowa onimoroxa.
19. Ninrowa okhoottela sai oveehiwa, okhala nluku ninrowa onimoroxa?
19 Ti voothananiha wira mwa iyaakha sinci, akina aheemya wira soovonya sa atthu akina saakumihe mphironi munitthimaka aya. Okhalana moonelo woovirikana mmyaha sa yowuupuxerya ya murima, onnaakhumuliha akina. (1 aKor. 8:12, 13) Akhala wira nooveehiwa, niireke ninrowa woonaka okhala etthu yootepexa wunnuwa? Biibiliya onnaatumererya maKristau ohaaphukela atthu akina, okhala oolevelela, ni ohithipelela idireito saya paahi. (Luka 6:37) Okathi onikhalana anyu muxankiho owo, mwiikoheke so: ‘Kinaaphukela akina mwaha wa ele eniphavelaka paahi? Okhala wira axinnaka toohimalela, kinimweemya tthiri wira ohimalela wa mutthu mukina okikumihe mphironi munitthimaka aka wira kiphwanye okumi?’ Omphenta Yehova onoonikhaliherya ovikaniha oheemererya etthu wala mutthu wira anooceelihe ophiya wanikisa wa otthimaka wahu.
MUTTHIMAKEKE NI OVILELA, MUSYAKE OMORA
20, 21. Etthu xeeni elakenle anyu opaka okathi onitthimaka anyu ephiro enivaha okumi?
20 Muhiilipiha wira mutthimake mpakha ‘omaliha’? (2 Tim. 4:7, 8) Nto okhalana yoosoma ti vootthuneya. Mmurumeeleke Biibiliya ni iliivuru sahu wira mpakeke sootokosa, wuupuwelela ele enisoma anyu wira musuwele itthu siniwerya woomoroxani. Mutepeke oveka munepa wootteela wira mukhalane ikuru sinci somunepani. Muhiliyale wira khuuvo mutthu onitthimaka ephiro ya okumi oniyeleela mwaha woowi ootoko omora. Owo onoowerya ovinya ni otthikela otthimaka. Owo pooti orumeela nluku nenle naarowa ommoroxa, okhala etthu enimulipiha, nto khiyasuwela moota woweettiherya khuta muxankiho.
21 Biibiliya onihimya wira otthimaka mphironi mwa okumi, ori muteko onitthuneya ahu ovara, ohiya oweha paahi. Khonlikana ni onwela karera orimo atthu anrowa oganyari. Khuta mutthu ohaana otthimaka wira ophwanye ekumi. Vaavo vanipaka ahu eyo, ‘murettele mulupale’ onikhuma wa Yehova, onrowa onikhaliherya ntoko ettheku enniroiha ohoolo. (Esal. 119:165) Nto, niroromeleke mareeliho a Yehova, a vano ni a muhoolo, anrowa ovahiwa otheene anivikaniha otthimaka ephiro ya okumi.—Yak. 1:12.
[Elatarato epaaxina 3]
[Elatarato epaaxina 4]
Akhala wira nyuwo moomora, mweemererye okhaliheriwa ni ovenya!
[Elatarato epaaxina 7]
Muheemererye etthu ewooceelihakani otthimaka mphironi ya okumi!