Niireke Mookhalana Wataana Wooloka ni Yehova?

“Mmwattameleke Muluku, Muluku onowattamelani”.​—YAK. 4:8.

MWAAROWA WAAKHULA SAI?

Nikhalaneke yoophavela xeeni okathi onisoma ahu Nuulumo na Muluku?

Exeeni enookupalihani wira khula okathi Yehova onipaka itthu mwa exariya?

Xeeni vanitthuneya anyu ohimya itthu mooluluwanya okathi onivekela anyu?

1. Xeeni vanitthuneya ahu olipiha vanceene wataana wahu ni Yehova?

NIIREKE nyuwo mwa Namoona a Yehova oobatiziwa? Nto mookhalana etthu yootepexa otthuneya, eyo piiyo, wataana wanyu ni Muluku. Masi, wataana iwo onnimananiha opwetexiwa ohiya paahi ni Satana, masi ni erutthu ahu yoohimalela. Muxankiho ola onnaaphwanya maKristau otheene. Ti maana aya, wataana wahu ni Yehova ohaana okhala woolipexa ohinipwetexiwa.

2. (a) Wataana ni Muluku exeeni? (Nwehe enoota.) (b) Ninrowa olipiha sai wataana wahu ni Yehova?

² Wataana wanyu ni Yehova ori sai? Niireke nyuwo munitthuneya olipiha wataana iwo? Yakobo 4:8 onnilakiherya so: “Mmwattameleke Muluku, Muluku onowattamelani”. Moone wira khula mutthu ookhalana mpantta awe.a Okathi onrowa ahu weettaka wira nimwaattamele Muluku, nave owo onrowa weettaka orwaaka varyaahu. Opaka eyo, moohihiyererya enrowa olipiha wataana wahu ni Yehova. Nto eyo enimwiiriha wataana wahu iwo okhala wa ekeekhai. Hiyo nnookhalana waamini omosaru waarina awe Yesu okathi waahimmye awe so: “Òkhala okirumme ni t’èkekhai. . . Miyo kinnimusuwela”. (Yoh. 7:28, 29) Mwa enamuna yooluluwanya, mavalo xeeni anitthuneya ahu opaka wira nimwaattamele Yehova?

3. Exeeni eniiriha oweryaneyaka olavulana Yehova?

³ Olavula ni Yehova khula nihiku tekhanle enamuna yootthuneya wira nimwaattamele. Nto munrowa omulavuliha sai Muluku? Nyuwo munilavulana sai mpatthani anyu onikhala ottaiwene? Woonasa wene, nyuwo munnilepelana ipaphelo ni olavulihana mmurumeelaka telefoni ikwaha sinci. Nyuwo munnilavula ni Yehova murumeelaka mavekelo anipaka anyu ikwaha sinceene. (Musome Esalimo 142:3.) Nave nyuwo munnimweemererya Yehova woolavulihani, okathi yoole onisoma anyu Nuulumo nawe noolempwa ni wuupuwelela ele enisoma anyu khula nihiku. (Mmusome Yesaya 30:20, 21.) Vano nrowe nithokorerye moota omulavuliha ni onwiriyana Yehova okhanle aya oolipiha wataana wahu ni wiiriha wataana iwo okhala wa ekeekhai.

YEHOVA ONNOOLAVULIHANI OKATHI ONIMUSOMA ANYU BIIBILIYA

4, 5. Moota xeeni Yehova onoolavulihaaweni orumeelaka Nuulumo nawe noolempwa? Nvahe ntakiheryo.

⁴ Moohaaniherya, nyuwo munneemya wira mBiibiliyani wookhala muhupi wa Muluku onaaroihela awe atthu otheene. Niireke Biibiliya onnihimya moota nyuwo munrowa anyu omwaattamela Yehova? Aayo. Moota xeeni? Vaavo vanimusoma anyu Biibiliya khula nihiku, muthokoreryeke moota munoonela anyu ele enihimmwa ni mmananiheke woona moota enivareleya aya muteko mweekumini mwanyu, mwiira siiso munoomweemererya Yehova olavula ni nyuwo orumeelaka Nuulumo nawe. Eyo enoowiirihani okhalana wataana wooloka ni Muluku.​—aHéb. 4:12; Yak. 1:23-25.

⁵ Mwa ntakiheryo, musome ni muupuwelele masu a Yesu ani: “Muhìthukumanyeryé mihakhu vathí-va”. Vakhala wira munnihela nipuro noopacerya miteko sa Muluku, nto munimoona moota Yehova onoottottopelaaweni. Mwa enamuna ekina, vakhala wira munitthuneya okhweiherya okumi anyu wira nweryeke omurumeela oratteene Muluku, Yehova ohoolopolani wira munnitthuneya olokiherya makhalelo anyu wira nwerye omwaattamela yena.​—Math. 6:19, 20.

6, 7. (a) Moota xeeni omusoma Biibiliya onrowa aya olipiha omphenta wahu Yehova ni oniphenta wawe? (b) Nikhalaneke yoolakela xeeni okathi onimusoma ahu Biibiliya?

⁶ Omusoma Biibiliya onninikhaliherya vanceene ohiya woona paahi itthu sinireerela olokiherya mweekumini mwahu. Eyo enninnuuherya osiveliwa iphiro sa Yehova soophenta ni oniiriha omphenta vanceene ovikana khalai. Nto vaavo omphenta wahu Muluku oninnuwa aya, oniphenta wawe onnicerereya ni wataana wahu ni yena oonnilipa.​—Mmusome 1 aKorinto 8:3.

⁷ Voophavela omwaattamela Yehova, ti vootthuneya osoma nuulumo nawe ni yoolakela yooloka. Yohani 17:3 onihimya so: ‘Ekumi ehinimala t’ila, wosuwelani nyuwo, mukhanle Muluku mmosá èkekhai, ni omusuwela Yesu Kristu, yowo omurummyanyu’. Nto yoolakela ahu ehikhaleke ophavela osuwela paahi, masi nihaana ophavela ‘omusuwela’ oratteene Yehova ntoko Muluku mukumi.​—Mmusome Okhuma 33:13; Esal. 25:4.

8. (a) Muxankiho xeeni onikhumelela okathi onithokorerya ahu enamuna Yehova aamukhapelenle awe Mwene Azariya, ntoko sinooniherya aya yoolepa ya 2 Mamwene 15:1-5? (b) Moota xeeni omusuwela wahu saana Yehova onimaliha aya muxankiho owo?

⁸ Vakhala wira ninnimusuwela oratteene Yehova, hiyo khannirowa oxankiheya ni khula yoohimmwa eri mBiibiliyani enniiriha wiikohaka wira xeeni ohalaka opaka ela. Mwa ntakiheryo, munoonela sai enamuna Yehova aamuthokorenrye awe Mwene Azariya a oYuda? (2 Mam. 15:1-5) Moone wira, nnaamwi ‘atthu othene yahelela mukuttho amuluku a èthiru, yapaheryaka erupani mmapuroni mottukhuwa’, Azariya “ahìra sorera va maithoni v’Apwiya”. Hata vari siiso Yehova ‘ahinveleliha Azariya eretta yulupale, owo ahikhala namakuttula mpakha okhwa’. Nthowa xeeni? Nipuro nle khannihimya nthowa nene. Niireke eyo enniniiriha opacerya wuupuwela wira Yehova aahimuhukhumu Azariya vahimulattu? Khannirowa opaka eyo vakhala wira hiyo ninnisuwela oratteene iphiro sa Yehova. Eyo enihela muhina osuwela wira khula okathi Yehova “onnahukhumu [atthu awe] ni exariya”. (Yer. 30:11) Okhalana osuwela moota owo onninikhaliherya woona wira hata nihisuwelaka mathowa amwiirinhe Yehova opaka itthu mwa enamuna aamwiirinhe awe Azariya, hiyo nihaana ororomela wira oopaka itthu mwa exariya.

9. Soohimmwa xeeni siri mBiibiliyani sinooniherya etthu yaamwiirinhe Yehova omuruuhela makuttula Azariya?

⁹ Oreera waya, sookhala soohimmwa sikina siri mBiibiliyani sinivarihana ni mwaha ola. Mwene Azariya nsina nawe nikina ti  Oziya. (2 Mam. 15:7, 32) Yoohimmwa ekina enilikana ni eyo eri va 2 Wahala 26:3-5, 16-21, yeeyo enihimya wira nnaamwi Oziya aapanke itthu sooloka vamaithoni va Yehova, ohoolo waya “murim’awe wahisareya wisona, khumpwetexa”. Mwaha wa wiikuxererya, owo aahivara muteko waari wa alipa a mukuttho, waheemereriwe awe ovara. Anamukuttho 81 yaahimananiha omulakiherya. Nto Oziya oonenle sai? Owo aahooniherya wira aari mutthu oowiixinnuwiha. Oziya “ahinanariwa vanjene” ni anamukuttho ale. Tivonto Yehova aamuruuhenle awe makuttula!

10. Xeeni vahinitthuneya ahu otthokiheriwa khula etthu enipaka awe Yehova, ni ninrowa wunnuuherya sai ororomela wahu iphiro sawe sa exariya?

¹⁰ Nkahaya nithokorerye ela. Muupuwele vaakhanle wira soohimmwa iye kamosa-kamosa khisaakhanle mBiibiliyani, ntoko siniiraneya aya ni sowiiraneya sikina! Niireke eyo yanwiirihani ohoverya wira Muluku onnipaka itthu mwa exariya? Niireke mwanwerya wuupuwela wira Biibiliya ookhalana soohimmwa siniphiyerya sinnikupaliha wira Yehova onnipaka itthu mwa exariya, ni wira owo paahi toniwerya ohimya ele eri yooloka ni yoohiloka? (Otum. 32:4) Vakhala wira ninnimusuwela Yehova ntoko Mutthu, omphenta ni omuxukhurela wahu onrowa wunnuwa mpakha ohitthuneyaka otthokiheriwa khula etthu enipaka awe. Musuweleke wira omuxukhurela iwo onrowa wunnuwaka moovarihana ni wiimananiha onipaka anyu wira musome ni wuupuwelela Nuulumo na Muluku noolempwa. (Esal. 77:13, 14) Eyo enrowa wunnuuherya wataana wanyu ni Yehova, yiirihaka wataana iwo okhala wa ekeekhai.

OKATHI ONIPAKA ANYU NIVEKELO NYUWO MUNNIMULAVULIHA YEHOVA

11-13. Munisuwela sai wira Yehova tthiri onniwiriyana mavekelo? (Nwehe elatarato yoopacerya.)

¹¹ Naavekelaka ninnimwaattamela Yehova. Hiyo ninninvuwiha, omuxukhurela, ni onvekela malakiheryo. (Esal. 32:8) Masi wira wataana wanyu ni Yehova okhale wa ekeekhai, nyuwo muhaana okupali wira owo oniiwa mavekelo anyu.

¹² Atthu akina anikupali wira nivekelo enamuna emosa ya okumiha mixankiho mmuruni paahi. Awo anihimya wira vakhala wira munnuupuwela wira mavekelo anyu annaakhuliwa, eyo eniiraneya mwaha woowi moolavula etthu munuupuwela anyu ni moosuwela muxankiho murina anyu nto moophwanya moota woophuka muxankiho owo. Hata atthu awo ahimyaka siiso, nyuwo munrowa osuwela sai wira mavekelo anipaka anyu ni murima wotheene anniwiriyaniwa tthiri ni Yehova?

¹³ Muthokorerye ela: Yesu ohinatthi orwa valaponi, aahoona moota Yehova aakhula awe mavekelo a apinaatamu yaari arumeyi awe. Nto okathi aaryaawe valaponi, Yesu aahirumeela mavekelo ntoko enamuna ya olavulihana ni Tiithi awe a wiirimu. Niireke owo aamwiira siiso, mpakha oviriha ohiyu ntero ovekelaka osuwelaka wira Yehova khoniwiriyana mavekelo tthiri? (Luka 6:12; 22:40-46) Niireke owo anwiixuttiha atthareli awe ovekela osuwelaka wira mavekelo khanivara etthu ekina ohikhanle ovukula oxanka paahi? Nto vannooneya wira Yesu aanisuwela wira mavekelo tthiri enamuna ya olavula ni Yehova. Okathi mmosa Yesu aahimuhimeerya Tiithi awe wira: ‘Kosuwela tthiri wira mahiku othene munnikìwa’. Hiyo nave nihaana waamini wira Yehova ‘onniniiwa mavekelo ahu’.—Yoh 11:41, 42; Esal. 65:3.

14, 15. (a) Mureerelo xeeni oniphwanya ahu naapakaka mavekelo ooluluwanya? (b) Moota xeeni mavekelo yaamukhalihenrye aya murokora mmosa okhalana wataana wooloka ni Yehova?

¹⁴ Okathi onipaka anyu mavekelo ooluluwanya, nto nyuwo munniwehererya woona moota Yehova onrowa awe waakhula mavekelo, hata ekhalaka enamuna yoovila woonexexa. Woona wira mavekelo anyu annaakhuliwa onoowiirihani omoonaka Yehova okhala a ekeekhai. Ohiya-vo, nto khula okathi onihimya anyu miyuupuwelelo sa vamurimani vanyu, munrowa otepa omwaattamela Yehova.

¹⁵ Muthokorerye yowiiraneya ya Katiya.b Nnaamwi aarowa muteko woolaleerya ikwaha sinceene, owo khiwaamusivela ovara muteko owo. Onitthokiherya so: “Miyo khiwaakisivela muteko woolaleerya. Tthiri waanikinyoonya ovara muteko ole. Okathi waareformanri aka omutekoni, mutokweene mmosa aahikihimeerya wira aanaamini wira kaamukela muteko wa opioneero; aahikivaha epaphelo enivekela muteko wa epioneero. Kaahemererya okela epioneero, masi kaahipacerya opaka mavekelo ooluluwanya wira Yehova okikhaliherye osiveliwa muteko woolaleerya”. Niireke Yehova aahaakhula mavekelo awe? Owo onihimya so: “Vano kooviriha iyaakha tthaaru kivaraka muteko wa opioneero. Mwaha wooviriha okathi munceene kilaleeryaka ni kiixuttihiwaka ni arokora akina, koolokiherya inamuna saka sa olaleerya. Olelo-va ohiya wira onnikisivela muteko woolaleerya, masi kinihimya wira kinniphenta muteko owo. Etthu yooreera okhala wira wataana waka ni Yehova wootepa oloka ovikana khalai”. Tthiri mavekelo a Katiya yaahimukhaliherya okhalana wataana wooloka ni Yehova.

NIPAKEKE MPANTTA AHU

16, 17. (a) Exeeni ekhanle ahu oopaka wira wataana wahu ni Yehova okhale wooloka ni woolipa? (b) Muxankiho xeeni wa vameekhaaya onrowa ahu othokorerya muru onittharelana?

¹⁶ Okhalana wataana wooloka ni Yehova etthu enitthuneya ahu okhalela nthiti ekumi ahu yotheene. Hiyo nihaana opaka mavalo anrowa onaattameliha Muluku wira owo nave opake etthu emosaru. Nipake sotheene siniwerya ahu wira nilavulane Muluku ahu nimurumeelaka Biibiliya ni mavekelo. Eyo enrowa winnuwiha wataana wahu ni Yehova ni enrowa onikhaliherya oxintta mixankiho.

¹⁷ Pooti okhumelelaka muxankiho muulupale, vanceenexa vakhala wira yookhala etthu ennixankiha ehinimala hata nipakaka mavekelo mooluttuweliwa. Okathi owo, omuroromela wahu Yehova pooti ovukuwa. Hiyo pooti opacerya wiikohaka wira niireke Yehova onoohiwe mavekelo aka wala wataana wahu oroomala? Ninrowa owerya sai oxintta mixankiho iyo niroromelaka wira wataana wahu ni Muluku ti wekeekhai? Muru onittharelana ninrowa othokorerya mwaha owo.

[Inoota]