Muhitthikele Ottuli Okhalana Nlipelelo!
Nyuwo muri namoona a Yehova mwa iyaakha sinceene, yoowo aarowa osiveliwa omoona ole othelanne awe eemyaka omurumeela Yehova?
Aahiiso niireke nyuwo mooxankiheya mwaha woowi ole onimusomiha anyu Biibiliya yoole aakhala ntoko amurowa vahoolo, masi vano khuhiya weettela ekeekhai?
Sowiiraneya vakhaani seiyo sinikhuma oGra-Bretanha, sinimookhaliheryani ohitthikela ottuli ni okhalana nlipelelo. Nyuwo munrowa-tho oweha etthu yoowira enitakiheriwa ni ‘ovonyerya mukatthe mmasini, wira naakhaliherye yaale yaheemerenrye ekeekhai mowaakuveya’.—Mus. 11:1, Biblya Exirima.
OVILELA,—TI ETTHU YUULUPALE
Etthu yuulupale enikhaliherya ori ovilela. Nyuwo muhaana olipiherya saana ekeekhai ni onvarexexa Yehova. (Otum. 10:20) Eyo ti etthu Georgina aapanke awe. Okathi aapacenrye awe omusoma Biibiliya ni Anamona a Yehova eyaakha ya 1970, aiyawe aniihaniwa Kyriacos, yaahinanariwa. Owo aheererya waahiiha omusoma Biibiliya, nave anaakhoottiherya Anamoona ophiya owannyawe, ni aanirihela ota khula iliivuru sa Anamoona a Yehova aaphwanya awe.
Okathi Georgina aapacenrye awe orowa omuthukumanoni, Kyriacos nto aahitepa onanariwa. Nihiku nimosa aahirowa Osalau wa Omwene khiyapacerya onyakuliha. Nuumala anna osuwela wira Kyriacos aanisuwela olavula saana eGrego ovikana Enkelexi, murokora mmosa, aahimwiihana munna a muloko mukina aalavula eGrego wira amukhaliherye. Kyriacos aaheemererya ovaanela khiyooniherya mikhalelo sooloka, nto nuuvira myeeri aheemererya omusoma Biibiliya hoothe. Masi nuuvira okathi, Kyriacos aahihiya omusoma Biibiliya.
Etthu yoovikana iyaakha tthaaru, Georgina aanivikaniha olupatthiwa. Kyriacos aahilavula wira owo aarowa omuhiya akhala wira Georgina onoobatiziwa. Nihiku aabatiziwe awe, nto Georgina aahinvekela vanceene Yehova wira Kyriacos ahimuhiye. Okathi Anamoona yaaphin’ye aya omukuxa Georgina emuroihaka omuthukumanoni wa asembeleya, Kyriacos aahaaleela wira: “Atthu ehooleke. Hiyo nnimwaattharaka ottuli ni ekaaro ahu”. Nto Kyriacos aahiweha epantta yoopacerya ya voosiisu mpakha waaweha amwaarawe ebatiziwaka!
Nuuvira-vo, olupattha wa Kyriacos, waanimalamala, mpakha orukunuxa vanceene mukhalelo awe. Etthu yowiiraka iyaakha 40, nuumala orowa muthukumano woopacerya, wa Anamoona, Georgina aahinweha iyawe abatiziwaka. Exeeni yaamukhalihenrye Kyriacos? Owo onihimya so: “Kaahisiveliwa vanceene ni Georgina, okhala wira aahilipiherya ekeekhai”. Nto Georgina onihimya so: “Nnaamwi aiyaka yaakilupattha, Miyo, nkaaphavela ohiya omukokhorela Muluku. Okathi wotheene, kaaninvekela Yehova nto nkaatthikela ottuli okhalana nlipelelo”.
EFAITA ERINA AYA OMUTTHU MUSYA
Etthu ekina eniwerya omukhaliherya ole othelanne anyu ori wunnuuherya mikhalelo seKristau. Murummwa Pedru aahaalipiherya athiyana maKristau ariki: ‘Vano nyuwo athiyana, nwìweleleke aiyanyu siso, yakhala wira aiy’anyu khanamini masu a Muluku, ephwanyihiweke wamini ni mwettelo anyu worera. Nyuwo khamumphavela olavula’. (1 Pedru 3:1) Murokora Cristina oheettela miruku iya masi saahivira iyaakha sinceene wira awerye omuxintta iyawe. Okathi owo aaxuntte awe onamoona etthu yowiiraka iyaakha 20, aiyawe aniihaniwa John khiyaaphavela moolumo a Muluku. John khaaphavela wiirela mpantta etiini masi owo aaniwerya oweha moota waamini wa Cristina waamukhaliherya aya. “Kaaniweha wira mwaha wa waamini waya wanaahakalaliha”. Owo onnilavula-tho so: “aCristina yaahinnuuherya mukhalelo wooreera ni woororomeleya, nto eyo yaahikikhaliherya ophuka mixankiho sinceene saakhumelela”.
Cristina khaakhanyererya aiyawe orowa etiini awe; owo onnikupali wira: “Amwaaraka aCristina yaahisuwela wira vareerela okihiya mekhaka masi moopixa murima yaahikihiya siiso kinaweha mweettelo aya paahi wira kiixutte ni murettele mmensaka”. Okathi Cristina aaweha awe irevista Owehaweha wala Despertai!, khiphwanya myaha sinimusivela John, ntoko myaha sa siensia ni sa ephattu, owo aaninvaha iyawe alavulaka wira, “kinoona wira enimoosivelani osoma erevista ela”!
Nuuvira okathi, John aahireformari nto anavara muteko wa olokiherya ijardim. Uupuwelaka vanceene voohimya sa makoho maalupale a okumi, aahipacerya wiikoha so: ‘Niireke hiyo nikhalenle valaponi-va moohilakelela aahiiso nipattuxiwe ni yoolakela?’ Nihiku nimosa, munna mmosa yoowo John avaanelanawe aahimukoha wira, “Munoonela sai okhalana yoosoma ya Biibiliya?” John aahilavula wira “Nto eyo entaphulela wira koopacerya omukupali Muluku; masi kaaheemererya yoosoma eyo”.
Tthiri yaari efaita yuulupale Cristina ohitthikela ottuli okhalana nlipelelo! Nuumala owo ovekela khuvira iyaakha 20 John aaheemererya ekeekhai abatiziwa. Vano awo animurumeela hoothe Yehova mooluttuweliwa. John oolepa ariki: “Vanceenexa Itthu piili soowerya okixintta. Oreera waya murima ni opatthaneya waya anamoona”. Nto, nyuwo othelana ni mutthu ori namoona a Yehova, momphwanya mutthu oororomeleya, oophwanelela ni oniivahererya. Tthiri Cristina aahivarihela muteko masu a 1 Pedru 3:1, nto akhumela saana!
MMISO ONNIIMIHA MIHOKOROKHO NUUVIRA IYAAKHA
Ankhi ale yaamusoma Biibiliya, nto mwaha wa itthu sikina khuhiya omusoma? Mwene Salomoni oolepa wira: ‘Tivó mwàleke vasisu, mwàle-tho makaripi, mana khamunsuwela iphyó sothene satthunaka omèla sana, nnákhala khamunsuwela ephyó xeni yorera’ waala. (Mus. 11:6) Ikwaha sikina mmiso wekeekhai onnipisa omela. Hata vari siiso, mutthu owo pooti muhoolo mwaya oweha efaita aya wataana ni Muluku. (Yak. 4:8) Vanihikuni nyuwo pooti otikiniheya ni ohakalala.
Nkahaya muthokorerye yowiiraneya ya Alice okhumme wIndia arowaka wInglaterra. 1974 owo aahipacerya omusoma Biibiliya. Owo onlavula eHindi masi aaphavela wiixutta saana Enkelexi. Yoosoma ele yaanivira iyaakha sinceene vano Alice aahipacerya oweha mithukumano vakhaani vakhaani muloko waalavuliwa enkelexi. Owo aanisuwela wira aixutta awe yaari ekeekhai masi khwaavaha efaita. Nto owo aaniphenta vanceene musurukhu nave vaanimusivela orowa mmafestani. Wanikisa waya Alice aahimuhiya omusoma Biibiliya.
Saattamelaka iyaakha 30 Stella aamusomiha Biibiliya Alice aahaakhela ewarakha awe. Epaphelo eyo yaahimya wira: “Kinnikupali wira munoohakalala osuwela wira yoole aamusomiha anyu Biibiliya okhuma 1974, oobatiziwa okongresuni ovinre niinano. Nyuwo mookikhaliherya vanceene. Nyuwo muhaala mmiso wekeekhai wa miyaano, nnaamwi miyo kahiilokihenrye wira kiivahererye wa Muluku, masi inuku iyo sa mmiso sa ekeekhai kaahiixaathi mmupuweloni mwaka ni vamurimani”.
Nto exeeni yaakhumelenle? Alice onnitthokiherya wira aahithanana vanceene nuumala okhwa iyawe 1997. Owo aahinvekela Muluku. Nuuvira minutu muloko, anamoona anli anilavula nttaava Punjabim yaahiphiya owannyawe khuhiya etratato eni: Mano Nlipelelo Xeni Nikhanle wa Ale Anaphenta Ahu Akhwiye? Alice aahoona wira nivekelo nawe nihaakhuliwa nto anaphavela orowa wataana ni Anamoona a Yehova. Masi aarowa waaphwanya woowi? Owo aahiphwanya epaphelo khalai yeeyo aavahiwe awe ni Stella; nto epaphelo eyo yaanihimya opuro oniphwanyaneya aya muloko onilavuliwa ePunjabi. Alice aahirowa oSalau ya Omwene, nto aakheliwa moophenta ni anna ni arokora anilavula ePunjabi. Alice onihimya so: “Ophentiwa iwe waahivikaniha okhala ni miyo, nave waahikikhaliherya ovilela oriipiwa murima”.
Owo aahivikaniha orowa omuthukumanoni moohicompela, otthikela omusoma Biibiliya, ni wiixuttaka olavula ni osoma ePunjabi oratteene. Alice aahibatiziwa 2003. Nto epaphelo aamulepenle awe Stella enimaliherya so: “Kihooxukhurelani vanceene, mwaha wa waala mmiso etthu yowiiraka iyaakha 29, ni okivaha ntakiheryo nooloka otthara”.
Exeeni nyuwo muniixutta anyu mwa sowiiraneya iya? Pooti oviraka okathi, masi akhala wira mutthu owo oovoliwa omunepani, ni onnisuwela mukhalelo awe, ni wiiyeviha, Yehova onimwiiriha ekeekhai wunnuwa vamurimani va mutthu owo. Muupuwele masu a Yesu mwa ntakiheryo ale a ‘ephyó enimela, enannuwa, mwanene ole ahisuwelaka munnuwelo aya. Etthaya enene ennìmiha mihokorokho: wopajeryani onikhala mutathi, vasulu vaya khíyarwa makala makithi; numalá, khíyasarya iphyó mmakalani’. (Marko 4:27, 28) Wunnuwa iwo onirowa vakhaani-vakhaani ni oniiraneya ‘mmensaya’. Anamalaleerya otheene a Omwene khanisuwela moota itthu siniiraneya aya. Nto nvikaniheke waala mmiso vanceene. Nave munrowa ohepha vanceene.
Nave, muhiliyale efaita erina aya mavekelo. Georgina ni Cristina yaahivikaniha onvekela Yehova. Akhala wira ‘ninnilipiherya olompa’ ni nihitthikelaka ottuli okhalana nlipelelo, hata eviraka mahiku manceene nyuwo pooti ophwanya-tho mukatthe anyu mwanle anyu vasulu va maasi.—aRom. 12:12; Mus. 11:1.
[Ilatarato siri epaaxina 30]
[Ilatarato siri epaaxina 30]
[Ilatarato siri epaaxina 30]
[Ilatarato siri epaaxina 30]
Etthu yowiiraka iyaakha 40, nuumala orowa muthukumano woopacerya, wa Anamoona, Georgina aahinweha iyawe abatiziwaka.
[Ilatarato siri epaaxina 30]
Epaphelo Stella aakhenle awe aavahiwe awe ni Alice enihimya so: “Kookupali tthiri wira munoosiveliwa osuwela wira mutthu mwaamusomiha anyu Biibiliya okhuma 1974 obatiziwe niinano okongresuni a edistrito”.
[Eponto yuulupale ya epaaxina 32]
“Kihooxukhurelani vanceene mwaha wa waala mmiso etthu yowiiraka iyaakha 29 mookivaha ntakiheryo nooloka otthara”.—Alice