MWAHA WOOPACERYA: NIIREKE MUHAANA WOOVAKA OMALA WA OLUMWENKU?

Omala wa Olumwenku—Nihiku Nowoopiha, Nooxankiha ni Nowooceya

Tuuvi ori moonelo anyu voohimya sa 21 a Dezembro 2012 kalendario aathu oMaya, nihiku nenlo anamunceene yaahimya aya wira olumwenku waarowa oturukeya? Nattharihela ele yuupuwela anyu, pooti wira vano moohakalala, aahiiso onyoonyiheya, wala munoona wira mwaha owo khorina efaita wa nyuwo. Niireke waari woothiwa ntoko sinimakela aya wiiraneya?

Sai voohimya sa ‘omala wa olumwenku’ onilavuliwa mBiibiliyani? (Matheyo 24:3) Akina annoova yuupuwelaka wira elapo ela enoopahiwa. Akina amphavela woona paahi ele enrowa wiiraneya omala wa olumwenku. Akina aatemwa omakelaka wiiwa wira olumwenku ohanle omala. Masi niireke omala wa olumwenku ehantisi paahi? Wala etthu enkela wiiraneya?

Nyuwo pooti otikiniheya ni ele Biibiliya onihimya awe sa omala wa olumwenku. Biibiliya khahiyo onolipiherya paahi wira tthiri nilipeleleke wanikisa, masi onnooniherya-tho onyoonyiheya onikhumela wa ale anoona opisa. Ninnoolattulani wira moone moota Biibiliya onaakhula awe makoho animakela opakiwa voohimya sa omala wa olumwenku.

Niireke elapo ela enrowa opahiwa?

BIIBILIYA ONAAKHULA SO: ‘Muluku olipiha elapo vamathipeloni vaya, wira ehittikinyeyè mpakha vohimala-tho’.​—ESALIMO 104:5.

Elapo,khenrowa ohononiwa, hata ni mooro wala ni itthu sikina. Ohiya-vo, Biibiliya oniixuttiha wira etthaya, wala elapo ela opuro wa apinaatamu ohinrowa omala. Esalimo 37:29 enihimya so: ‘Anaxariya animwakhela elapo yohiyeriw’aya: anrowa okhalaka-mo mahiku othene’.​—Esalimo 115:16; Yesaya 45:18.

Nuumala opattuxa elapo, Muluku aahilavula wira etthaya yaari ‘yorera sana’, mpakha va Muluku onnivikaniha woona oreera. (Maphattuwelo 1:31) Ohiya ophavela ohonona elapo, owo onnilaiherya ‘wapwetexa ale anihonona elapo’, wira aakiherye mwa okathi wotheene.​—Wisupulula 11:18.

Nyuwaano pooti wuupuwelaka wira 2 Pedru 3:7 onihimya wira elapo enoopahiwa. Eveersu eyo ya Biibiliya enihimya so: ‘erimu ya vano n’ilapo ya vano ennisukiwa ni molumo a Muluku wira epahiwe ni moro’. Niireke eyo enitaphulela wira elapo enoopahiwa? Ikwaha sinceene Biibiliya onnirumeela nuulumo noowi ‘erimu’, ‘elapo’ ni ‘moro’, ntoko ntakiheryo. Mwa ntakiheryo: vaavo Maphattuwelo 11:1 vanihimya awe wira: ‘Elapo yotheene yaarina elavulelo emosa ni molumo mamosaru’, nuulumo noowi ‘elapo’ nintaphulela apinaatamu othene.

Masu a 2 Pedru 2:7, oowi: erimu, etthaya ni mooro, itthu iyo sinilavuliwa ntoko nthoonyeryo. Eversu 5 ni 6 sinihimya olikanasa waya ni Mutaseke mahiku a Nowe. Mahiku ale elapo ya khalai yaahipwetexiwa, masi etthaya ela khenapweteye. Masi, Mutaaseke ole aapwetenxe atthu ootakhala, anihimmwa okhala ntoko ‘elapo’. Nave-tho ohaavo muthinto wa ‘erimu’ yaapwetexiwe; nto anihimmwa atthu yaalamulela valaponi. (Maphattuwelo 6:11) Mwa enamuna emosaru eyo, 2 Pedru 3:7 aahihimya vahinatthi sa opwetexiwa moomalela ntoko opwetexa wa mooro wa atthu ootakhala ni iguvernu saya.

Exeeni enkela wiiraneya wanikisa wa olumwenku?

BIIBILIYA ONAAKHULA SO: ‘Elapo enovira vamosá ni sowinlela saya, [masi] yowo onèra otthuna wa Muluku onokhala wa mahiku othene’.​—1 YOHANI 2:17, Biblya Exirima.

‘Elapo’ elavuliwe-va, khahiyo enihimmwa etthaya, masi atthu ahineettela yootthuna ya Muluku. Ntoko siisaale mulipa onimooperari muretta orina kanseri wira oopole okumi awe, nave Muluku onkela ‘wapwetexa’ atakhali wira atthu ooloka epuheke saana okumi valaponi. (Esalimo 37:9) Mwa enamuna eyo, ‘omala wa elapo’ ti etthu yooloka.

Moonelo owo wooloka wa ‘omala wa elapo’, onnooneya saana ni moolumo arumeeliwe mwa aBiibiliya akina, yaawo anitaphulela nuulumo nlo so: “omala wa makhalelo a itthu” wala “wanikisa wa mahiku”. (Matheyo 24:3; New International Version.) Okhala wira apinaatamu ni etthaya yaahoopowa okathi wa khalai, niireke khahiyo vooreerela wuupuwela wira makhalelo masya anokhumela-tho? Biibiliya onnaakhula ariki aayo, okhala wira ikwaha sinceene onnilavula sa omala wa makhalelo ala.​—Luka 18:30.

Yesu aahilavula sa okathi owo oriki: ‘okathi elapo enrowa aya oreriwa’. Okathi owo, Muluku onkela waalokiherya apinaatamu wira atthikele saalakenle awe wuupaceryani. (Matheyo 19:28, Bibliya Solempwa sa Muluku) Nto okathi owo ninrowa woona itthu iya soohakalaliha:

◼ Parayiisu ni murettele valaponi ni oruwerya wa atthu otheene.​—Yesaya 35:1; Mikeya 4:4.

◼ Muteko woohakalaliha ni oniphwanyiha etthu.​—Yesaya 65:21-23.

◼ Iretta sotheene sinoomala-mala.​—Yesaya 33:24.

◼ Khuuvo onkela wuuluvala, otheene anootthikela omiravo.​—Yobi 33:25.

◼ Atthu akhwiye anoohihimuxiwa.​—Yohani 5:28, 29.

Akhala wira ninneettela ‘otthuna wa Muluku’, khiyapaka ele ennivekela awe, nto khannitthuneya woovaka omala wa olumwenku. Ohiya-vo, nihaana owehereryaka nihoovaka etthu.

Niireke tthiri omala wa olumwenku onnaattamela?

BIIBILIYA ONAAKHULA SO: “Siso-tho, monakaru iya sìraneyaka, musuweleke wira omwene wa Muluku oháttamela”.​—LUKA 21:31.

Prusoore Richard Kyle, muliivuruni mwawe The Last Days Are Here Again (Mahiku Ookiserya Annaattamela-tho), onihimya so: “mirukunuxo siniiraneya mootutuxerya ni ohiiwananeya wa apinaatamu onniiriha osuwanyeiha omala wa olumwenku”. Eyo ti etthu eniiraneya vaavo vanivila aya otthokiherya etthu eniiriha okhumelela itthu sootakhala.

Masi maprofeta a mBiibiliyani yaale yaahimyale sa omala wa olumwenku, khahiyo yaaphavela otthokiherya ele yaarowa okhumelela mwaya wa itthu sootakhala siiraneya mahiku ale. Masi, awosa yarimuupuxeriwa ni Muluku, wira ehimye makhalelo yaarowa wooniherya wira omala wa olumwenku ohaattamela. Nkathokoreryani iprofesia sikina, nto nyuwo aneene moone akhala wira sinniiraneya mahiku ahu ala.

◼ Ikhotto, etala, itetere, ni ikwerere siniiva.​—Matheyo 24:7; Luka 21:11.

◼ Wuncerereya wa ikrime wala otakhala.​—Matheyo 24:12.

◼ Ohononiwa wa elapo ni apinaatamu.​—Wisupulula 11:18.

◼ Atthu yaarowa wiisupuwelelaka mmansaya paahi, ophenta musurukhu, osiveliwa itthu, ohiya omphenta Muluku.​—2 Timótheyo 3:2, 4.

◼ Ohikhalihana saana vatthokoni.​—2 Timótheyo 3:2, 3.

◼ Anamunceene khancalela itthu sinooniherya wira olumwenku ohanle omala.​—Matheyo 24:37-39.

◼ Olaleiwa ilapo sotheene ihapari sooreera sa Omwene wa Muluku.​—Matheyo 24:14.

Yesu aahimyale wira noonakaru ‘itthu iya sothene’, nisuwele wira omala wa olumwenku ori vakhiviru. (Matheyo 24:33) Anamoona a Yehova annikupali vanceene wira itthu iya siniiraneya ithoonyeryo sa wanikisa; nto annilaleya waamini waya ilapo sowiiraka 236.

Okhala wira wanikisa khophiyale ntoko akina saalipelela aya, nto niireke wanikisa khonirwa-tho?

BIIBILIYA ONAAKHULA SO: ‘Vano atthu yahimya wira: ‘Nokhalana murettele n’ikumi!’, vavo t’unìraya warwele opweteya nananoru, ntoko ohawa wa muthiyana ohanle oyara, vano awo khanwerya otthyawa’.​—1 ATESALONIKA 5:3.

Biibiliya onilikanyiha opwetexiwa wa olumwenku, ni okathi maama oniyara onipacerya awe oxanka, nto khihiyawerya osyaka owereya onimurweela mootutuxa. Okathi onaattamela wanikisa, onilikana-tho ni maama orupanle, okhala wira maama owo onniweha wuncerereya wa ithoonyeryo sinooniherya waattamela nihiku na oyara. Meediku awe, oriki waaniherya pooti ohimya nihiku nene nooyara; masi pooti nihiku nle niviraka, maama owo onnivikaniha ohihoverya okupaliki wira onoomuyara mwaana moohipisa. Moolikanasa, mwaha woohiphiya wanikisa ntoko akina saalipelela aya, khontaphulela wira eyo enninteiha nihiku nlo nihimmwale okhala ‘nihiku nokiserya’.​—2 Timótheyo 3:1.

Nto nyuwo pooti okohaka so: ‘akhala wira nihaattamela wanikisa, xeeni akina ahinikupali aya?’ Biibiliya onnooniherya wira okathi onaattamela aya wanikisa, anamunceene yaarowa ohikupaliki ithoonyeryo sa omala wa olumwenku. Ohiya okupaleela paahi wira mahiku ala ookiserya olumwenku woovirikana, awo yaarowa onyoholaka ni ohikupali eriki: ‘Owo khahimmye wira onimorwa? Vano-nto, ori vayi? Axitith’ihu ahòkhwa, nto itthu sothene siri ntoko saryaya okhuma opattuxiwakaru olumwenku!’ (2 Pedru 3:3, 4) Nihimye so, ithoonyeryo sa mahiku ookiserya sinnooneya tthiri, masi anamunceene khaniphavela okupali.​—Matheyo 24:38, 39.

Muru ola, woothokorerya ithoonyeryo vakhaani siri mBiibiliyani, sinooniherya wira wanikisa ori vakhiviru.a Munniphavela osuwela itthu sikina? Mwaphavela vale, nwaavye Anamoona a Yehova wira yoovaheeni yoosoma ya Biibiliya. Yoosoma eyo pooti wiiriwa vatthokoni vanyu, opuro okina wala orumeeliwaka telefoni. Waavya okathi paahi ti etthu enitthuneya anyu opaka, nto mireerelo sinrowa okhala sinceene.

[Enoota]

[Ekaaxa epaaxina 8]

NIIREKE ANAMOONA A YEHOVA YAATOKO OHIMYA NIHIKU NOOHIKHALELA NA OMALA OLUMWENKU?

Ntoko siiren’ya aya ni awiixutti a Yesu eseekulo yoopacerya, Anamoona a Yehova, aatoko olipelela nihiku noohikhalela, yuupuwelaka wira wanikisa wamoorwa okathi yoole, tthiri okathi mukina naanitepa ophavela woona wiiraneya wa iprofesia nto khiyaakuva ohimya itthu vonvikana Muluku. (Luka 19:11; Miteko 1:6; 2 aTesalonika 2:1, 2) Ninnikupali masu yaalavuliwe ni A. H. Macmillan, yoowo orumenle ntoko Namoona a Yehova iyaakha sinci, owo aahimmye so: “Kihiixutta wira nihaana weemya soovonya sahu ni ovikaniha otokosa Masu a Muluku wira nisuwele ekeekhai”.

Nto xeeni vanivikaniha ahu ohimyaka wira wanikisa onnaattamela? Mwaha wa woona okhala ekeekhai masu a Yesu oowi: ‘Mwipasope, nwehereryeke’. Ohipaka eyo waarowa oniiriha ophwanyiwa ‘nirupaka’, nto Yesu khonrowa onoona ophwanela ekumi. (Marku 13:33, 36) Mwaha wa xeeni?

Moone ntakiheryo nla: Mutthu mmosa pooti woona mwiixi opuro ori itthu sowaakuva ovya, nto khiyakhuwela wira okhaliheriwe uupuwelaka wira ehaavo enivya, masi nuumala ovarerya khuphwanya wira khiivo epantte mooro. Owehaweha moota owo pooti omoopola nihiku nikina.

Moolikanasa, hiyo naahikhalana tthiri muupuwelo wohireerela voohimya sa wanikisa. Masi eyo ehiiraneya mwaha woowi etthu enivaha ahu efaita ori omwiiwelela Yesu ni woopola ikumi, ohiya woova olavuliwa moohiloka. Yooruma ya Yesu ya ‘ovaha onamona’, enintumererya waalopola akina wira wanikisa ori vakhiviru.​—Miteko 10:42.

Ninnikupali wira etthu eri yootepa otthuneya khahiyo osuwela nihiku wanikisa oniphiya aya, masi okupaleela wira wanikisa onimoorwa ni ovikaniha wiiwelelaka teri etthu yootthuneya. Ninnivarexexa saana masu a profeta Habakukhi 2:3, ani: ‘Okathi aya nlelo khuphìn’ye, masi onimwiiraneya tthiri. Wapisá ohikhumelenle, mulipeleleke, okhala wira onokhumelela tthiri, khivaninteya’.

[Elatarato epaaxina 4]

[Elatarato epaaxina 6]

[Elatarato epaaxina 8]