MWAHA WA VAKAAPANI | NIIREKE WANIKISA ONNAATTAMELA?

Nuulumo Noowi ‘Wanikisa’ Nintaphulelani?

Okathi muniiwa anyu masu oowi: “Wanikisa onnaattamela!”, munuupuwela exeeni? Niireke munuupuwela orwa wa Yesu wira aakuxe atthu ooreera murima wira aaroihe wiirimu, aahiiso munuupuwela okhwa wa khula mutthu? Wuupuwela mwaha ntoko owo pooti owiiriha atthu akina okhala ooxankiheya; masi akina pooti okhala oohoverya wala oohicalela.

Biibiliya onihimya so: ‘Wanikisa onoophiya’. (Matheyo 24:14, Tradução do Novo Mundo) Mwaha owo onnihimmwa-tho okhala “nihiku nulupale na Muluku” ni ‘Harmagedoni’. (Wisupulula 16:14, 16) Itiini sinceene sinniixuttiha itthu soovirikana, soohikhalela ni sowoopiha mmwaha ola. Masi, Biibiliya onnihimya ekeekhai. Owo onninikhaliherya osuwela saana wira wanikisa onnaattamela, ni onniniixuttiha moota wowoopowa! Wanipacerya nrowe noone sowiixuttiha sikina sa ethiru; nuumala-vo, niwehe ele Biibiliya oniixuttiha voohimya sa nuulumo noowi ‘wanikisa’.

WANIKISA ONTAPHULELANI?

1. WANIKISA KHONTAPHULELA OPAHIWA ELAPO NI MOORO.

Biibiliya onihimya wira Muluku oolipiha “elapo vamathipeloni vaya wira ehittikinyeyé mpakha vohimala-tho”. (Esalimo104:5) Yoolepa ela ni sikina, sinnooniherya wira Muluku khonrowa opwetexa elapo wala weemererya wira epwetexiwe.​—Musuweli 1:4; Yesaya 45:18.

2. WANIKISA ONOOPHIYA MOOVARIHANA NI OKATHI OTHANLIWE NI MULUKU.

Biibiliya onnooniherya wira wanikisa onoophiya moovarihana ni okathi othanliwe ni Muluku. Ninsoma so: “Vano khavo onsuwela vanrwaya nihiku nlo walá okathi uwo: nnákhala malaikha a wirimu, nnákhala Mwana: Atithi pahi t’asuwenle. Mwipasope, nwehereryeke, mana khamunsuwela nihiku nene”. (Marko 13:32, 33) Tthiri, Muluku oothanla okathi “vanrwaya nihiku nlo”.

3. WANIKISA KHONROWA OKUMIHERIWA NI ATTHU WALA ETTHU EKINA YOWOOPIHA ENIKHUMA OSULU.

Exeeni enrowa okhumelela wanikisa? Wisupulula 19:11 oni: “Kahona erimu ehuleiyene: khukhumelela ekhavalo yottela. Nakhavalo ene onìhaniwa Òroromeleya ni Mulipa-èkekhai”. Eversu 19 eni: “Numalá, kahona enama yowopiha ni mamwene a mulaponi n’anakhotto aya, ethukumannene wira ewaneke ni nakhaval’owo n’anakhotto awe”. (Wisupulula 19:11-21) Ekeekhai wira masu manceene a iversu iya ta nthoonyeryo. Masi, moohaaniherya Muluku onimwaaruma anakhotto awe a wiirimu wira yaapwetexe anyokhani awe.

WANIKISA WA XEENI?

1. WANIKISA WA IGUVERNU SA APINAATAMU.

Biibiliya onihimya so: “Mahiku òmwene owo, Muluku a wirimu onokumiherya omwene ohinrowa omala, nnákhala oweriwa n’umwene mukina. Omwene owo onohonona n’upwetexa omwene wothene wa mulaponi, numalá onrowa okhalaka wa mahiku othene”. (Daniyeli 2:44) Sintoko noonale ahu eponto 3, “mamwene a mulaponi n’anakhotto aya” anrowa othukumana “wira ewaneke ni nakhaval’owo n’anakhotto awe”; masi awo anoopwetexiwa.​—Wisupulula 19:19.

2. WANIKISA WA IKHOTTO, OTAKHALA NI OHIXARIYA.

‘Muluku onoomaliha ekhotto mulaponi mothene’. (Esalimo 46:10) “Mutthu òloka onophwanya elapo y’okhala: mutthu àxariya onokhala mulaponi-memmo. Vano atthu òtakhala murima anopwetexiwa: alipa-òttheka anopheliwa mulaponi-mu”. (Miruku 2:21, 22) “Mone: Itthu sothene miyo kokhaliha isyá!”​—Wisupulula 21:4, 5.

3. WANIKISA WA ITIINI SIHINIKUPALIWA NI MULUKU NI ATTHU.

“Maprofeta annilaleya ni nsina na mulipa-òwotha, anamukuttho anniwakhuleliha. . . . Nto antthuna wira sai, naphiyá nihiku naya?” (Yeremiya 5:31) “Naphiyá nihiku nlo, atthu anjene anokìrela: ‘Apwiya! Apwiya! Khino hiyo khinlaleiye ni nsina nanyu? Khino ni nsina nanyu nenlo khinomonle malakha òtakhala? Khino ni nsina nanyu nenlo-tho khinìnre sotikiniha sinjene?’ Vano miyo kinowakhula wira: ‘Miyo nkinosuwelani! Mukhumase va, nyuwo munìra sotakhala!’”​—Matheyo 7:21-23.

4. WANIKISA WA ATTHU ANISIVIELIWA NI ANIKHALIHERYA ITTHU SOOTAKHALA.

Yesu Kristu aahimmye so: “Mulattu w’ohukhummwa t’ula: warya ohòrwa mulaponi, vano atthu yahikhotta warya, khíyatthara epiphi, okhala wira miteko saya sari sonanara”. (Yohani 3:19) Biibiliya onniromola opwetexiwa wa olumwenku wa khalai okathi wa Nowe, mulipa oowaamini oriki: “Siso-tho elapo ya khalai yahipwetexiwa ekhuneliwaka ni màsi a mutaseke. Masi-tho, erimu ya vano n’ilapo ya vano ennisukiwa ni molumo a Muluku, wira epahiwe ni moro: ennisukeriwa nihiku ninrowa aya ophukiwa n’upwetexiwa atthu òtakhala murima”.​—2 Pedru 3:5-7.

Moone wira “nihiku ninrowa aya ophukiwa n’upwetexiwa atthu òtakhala murima” ninlikanyihiwa ni opwetexiwa wa “olumwenku” okathi wa Nowe. Olumwenku xeeni waapwetexiwe? Eplaneta ahu khiyaapwetexiwe, masi “atthu òtakhala murima”, wala awanani a Muluku. Okathi ninrwa aya nihiku noophukela na Muluku, ale athanlale okhala awanani a Muluku, moolikanasa ni okathi wa Nowe, anoopwetexiwa. Nto apatthani a Muluku animoopoliwa ntoko yiiranen’ye aya ni Nowe ni emusi awe.​—Matheyo 24:37-42.

Tthiri elapo enrowa oreera nuumala Muluku omaliha otakhala wotheene! Moohaaniherya, ihapari sa Biibiliya voohimya sa wanikisa, ti soohakalaliha ohiya sootakhala. Nyuwo pooti wiikoha so: ‘Kiireke Biibiliya onninleela silini wanikisa onirwa aya? Kiireke onnaattamela? Kinrowa woopowa sai?

[Ekaaxa epaaxina 5]

NUUVIRA WANIKISA

Okumi onrowa okhala sai nuuvira wanikisa wa itthu sootakhala? Soolepa sinci sinnihimya wira okathi owo onrowa okhala woohakalaliha. Mwa ntakiheryo, Wisupulula 21:4, 5 oni: “‘[Muluku] onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira’. Vano, Muluku akilanthe vehijeni ahira: ‘Mone: Itthu sothene miyo kokhaliha isyá!’” Tthiri wanikisa khonitaphulela omala wa okumi anyu. Muluku oniphavela wira noopowe, ni onninleela etthu yoopaka.