Moone Enamuna Xeeni ya Mutthu Muniphavela Anyu Okhala

‘Mwettelo anyu okhaleke wowi sai? Okhaleke wowarya ni womwiwelela Muluku’!​—2 PED. 3:11.

MWAAROWA WAAKHULA SAI?

Nihaana okhala atthu a enamuna xeeni wira neemereriwe ni Muluku?

Satana onaawoka sai atthu?

Exeeni nyuwo muniwerya anyu opaka wira mwaataane ni Yehova?

1, 2. Nihaana okhalana mweettelo xeeni wira naataane ni Muluku?

HIYO, ninniphavela osuwela moota atthu akina annoonela aya. Okhala wira hiyo maKristau, nto khahiyo ti vootepexa ophavela osuwela moota Muluku onnoonela awe? Okhala wira owo ti Mukhulupale a olumwenku wotheene ni ti ‘maphattuwelo èkumi’.​—Esal. 36:10.

² Atumereryaka voohimya sa ‘mwettelo’ onireerela ahu okhalana mmoonelo wa Yehova, murummwa Pedru onnintumererya mweettelo ahu ‘okhalaka wowarya ni womwiwelela Muluku’. (Mmusome 2 Pedru 3:11.) Wira nikhale oweemereriwa ni Muluku ‘mwettelo ahu’ okhaleke woowaarya ni wooloka, mmuupuweloni mwahu ni omunepani wahu. Ohiya-vo nihaana ovaraka miteko ‘sowarya’ nimoovaka Muluku ni omwiiwelela vanceene. Ophavela wataana ni Muluku khahiyo onihela muhina mweettelo ahu paahi, masi-tho murima ahu wotheene. Okhala wira Yehova ‘tonitokosa mirima’, owo onnisuwela akhala wira mweettelo ahu onninvuwiha ni onvarela muteko owo paahi.​—1 Wah. 29:17.

3. Voohimya sa wataana ni Muluku, makoho xeeni anireerela othokorerya?

³ Satana Diabo, khaniphavela oniweha niphentiwaka ni Muluku. Tthiri Satana onnimananiha opaka khuta etthu eniwerya awe wira hiyo nihiye wataana wahu ni Yehova. Satana khanoovelela orumeela wootha ni onihuluxa omukokhorela Muluku. (Yoh. 8:44; 2 aKor. 11:13-15) Nto ti va miruku wiikohaka so: ‘Satana onaawoka sai atthu? Kipakeke exeeni wira kikhapelele wataana waka ni Yehova?’

SATANA ONAAWOKA SAI ATTHU?

4. Wira ahonone wataana wahu ni Muluku, exeeni Satana onipaka awe nave nthowa xeeni?

⁴ Murummwa Yakobo aalempe so: ‘Khula mutthu onnehereriwa ni wunlela wawe sotakhala, weiwo onimototha, onamukuxa. Vano, wunlela iwo sotakhala wavahiwa ikuru, onnikumiherya etampi; etampi yeyo, yinnuwaka vomalela, enniphwanyiha okhwa’. (Yak. 1:14, 15) Wira ahonone wataana wahu ni Muluku, Satana onirumeela soophavela sa murima ahu.

5, 6. (a) Exeeni Satana onirumeela awe wira anihophe? (b) Itthu xeeni Satana onirumeela awe wira ahonone soophavela sa murima ahu, nto opacenrye silini orumeela mukhalelo owo?

⁵ Itthu xeeni Satana onirumeela awe wira ahonone murima ahu? Biibiliya onihimya wira ‘elapo yothene enniweriwa [olamuleliwa] ni mutakhali’. (1 Yoh. 5:19) Ikapwitthi sa Satana sinihela muhina ‘itthu iye sothene sotakhala ‘sa mulaponi. (Mmusome 1 Yoh. 2:15, 16.) Ovikana iyaakha ikonto sinceene, Diabo onniimananiha ohonona mukhalelo onnirukurerya. Okhala wira ninkhala olumwenku ola, nihaana okhalana ephoole ni miraakho sawe sowiipitha.​—Yoh. 17:15.

⁶ Satana onnirumeela inamuna sinceene wira ananariheke soophavela sa murima ahu. Murummwa Yohani oolavula itthu tthaaru Satana onirumeela awe. (1) ‘ophavela itthu sonanara [serutthu]’, (2) ‘ophavela okhalana sothene sinònahu’, ni (3) ‘wisona mwaha wa mihakhu sirinahu’. Satana aahirumeela mikhalelo iyo wira amweehererye Yesu. Okhala wira owo opacenrye khalai orumeela miraakho iyo, nto Satana olelo-va onnitepa osuwela moota woweehererya apinaatamu arumeelaka soophavela saya. Nto ohinatthi muxankiho owo wunnuwa hiyo pooti ophavela enamuna ya wiikasoopa mmwaha ola; nrowe noone moota Diabo aarumenle awe soophavela sa murima mookhumela saana wira anwoke Eva, masi owo khaawenrye onwoka Mwaana a Muluku.

‘OPHAVELA ITTHU SONANARA [SERUTTHU]’

7. Satana aarumenle sai ‘ophavela itthu’ sa erutthu wira anwoke Eva?

⁷ Apinaatamu aakhalana yoophavela yuulupale yeeyo erutthu enivekela aya, eyo piiyo, yoolya. Mpattuxa aahipaka etthaya wira yiimeke soolya sinceene. Masi Satana pooti orumeelaka ophavela wahu wootepana eyoolya wira nihiye opaka yootthuna ya Muluku. Moone moota aapanke awe eyo ni Eva. (Musome Maphattuwelo 3:1-6.) Satana aahimuleela Eva wira owo pooti olya efruta ya ‘mwiri wa mmatta’ waasuweliha yooreera ni yoonanara; ni wira khiyaarowa okhwa, masi nihiku yaarowa aya olya muhokorokho ole, yaarowa olikanaka ni Muluku. (Maph. 2:9) Nto Satana aahimya wira Eva anoowerya okhalanaka okumi ehimwiiwelelaka Muluku. Tthiri nno waari wootha wuulupale! Okhala wira Satana ole aahipweha masu awe mmuruni mwa Eva, nto owo anwerya othanla itthu piili: Eva anwerya okhootta masu ale, wala ovikaniha wuupuwelelaka, ni okhalana yoophavela ya olya ifruta sa mwiri ole. Nnaamwi mujardim mme Eva yaarina miri sinceene saarina mihokorokho, wala ifruta, masi Eva aahithanla omwiiwelela Satana voohimya sa orowa olya mwiri waari eriyari ya ejardim; nto ‘ahirukula muhokorokho mmosá khulya’. Vano Satana aahimwiiriha Eva ophavela etthu yeele Mpattuxa aakhoottiha awe.

8. Satana aamananiha sai wira amweehererye Yesu orumela ‘yoophavela’ ya erutthu, nto xeeni yooweeha eyo yahaavanre aya muteko?

⁸ Satana aahirumeela enamuna yeela wira amweehererye Yesu mutakhwani. Nuumala Yesu otthukwa, [ohilya etthu] mahiku 40 ni ohiyu 40, Satana aahimweehererya Yesu ni yoolya. Satana aahimuleela ariki: ‘Mwàri mwana a Muluku, murume nluku nla othatuwa ephau’. (Luka 4:1-3) Nto saahikhala soothanla piili Yesu aarowa awe opaka: Owo anwerya orumeela ikuru sawe wira apake mwiiriirya wa otatuxa yoolya ya werutthuni, wala okhootta opaka eyo. Yesu aanisuwela wira khivaaloka orumeela ikuru sa Muluku mwa nrima. Nnaamwi owo aavoliwe, owo khaavaha efaita itthu sa werutthuni, masi wataana ni Yehova ti yaari yoopacerya mookumini mwawe. Yesu aahaakhula ariki: ‘Volempwa wira: ‘Khahiyó ephawu-ru pahi eninvaha ekumi mutthu, [masi khula nuulumo ninkhuma wa Yehova]’’.​—Luka 4:4.

‘OPHAVELA SOTHEENE [MUTTHU] SINONA AWE’

9. Nuulumo noowi ‘ophavela okhalana sothene sinònahu’, nintaphulelani, nto Satana aanwonke sai Eva?

⁹ Yohani oolavula sa ‘ophavela okhalana sothene sinònahu’ okhala muraakho. Masu ala anooniherya wira mutthu pooti opaceryaka ophavela etthu mwaha wa oweha paahi. Nto Satana aahimuleela Eva ariki: ‘Maitho anyu anòtthukuwa’. Vaavo Eva aatepa awe oweha, nto mwiri ole waakhoottihiwa waanitepa omusivela. Eva ‘ahiweha wira mihokorokho sa mwirí ule sanirerela olya’.

10. Moota xeeni Satana aarumenle awe ‘sophavela’ sa maitho wira amweehererye Yesu, nto owo aakhunle sai?

¹⁰ Nto exeeni Satana aamooninhe awe Yesu? Owo ‘ahimoniherya okathi omosaru omwene wothene wa mulaponi, khumuhimerya wira: Kinimovahani nyuwo’. (Luka 4:5, 6) Yesu khaarowa oweha ni maitho awe imwene sotheene saari ottaiwene, masi Satana uupuwela wira awerya omooniha mwa mutikiniho ovuwa wa imwene iyo, eyo yaarowa okuxa murima wa Yesu wira aphaveleke. Moohuuliwa muru, Satana aahimuruma Yesu ariki: ‘mwakikokhorela: sothene sinokhala sawinyu’. (Luka 4:7) Nto Yesu khaaphavela opaka enimuhakalaliha Satana. Nto aahimwaakhula mowaakuveya ariki: ‘Volempwa wira: ‘Mmukokhorele [Yehova] Muluku anyu: Mmuttittimiheke yowo pahi’’.​—Luka 4:8.

‘WISONA MWAHA WA MIHAKHU SIRINAHU’

11. Moota xeeni Eva aahapuxiwe awe ni Satana?

¹¹ Yohani alavulaka itthu sa mulaponi, owo aahihimya sa ‘wisona mwaha wa mihakhu [mutthu] sirinawe’. Ekeekhai wira Adamu ni Eva ehinatthi okhala atthu akina valaponi, awo khiyaisona wala wiittottopa ni ‘mihakhu sarina aya’. Masi awo yahooniherya wiixunnuuha. Okathi Eva eehereriwa awe, nto Satana aahilavula wira Muluku aamukhoottiherya etthu yoolokexa Eva. Diabo aahilavula wira nihiku owo aakela awe olya ‘muhokorokho wa mwirí’ waasuweliha yooreera ni yoonanara, aarowa ‘okhala ntoko Muluku asuwelaka oreriwa nutakhaliwa’. (Maph. 2:17; 3:5) Satana aahimulela Eva wira owo aarowa weettelaka murima awe voohimwiiwelela Yehova. Nto, wiixunnuuha waahimwiiriha Eva wiiwelela wootha wa Satana. Nto aahikuxa efruta yaakhoottihiwe, akupaliki wira khaarowa okhwa. Tthiri owo aahiwokeya!

12. Enamuna xeeni ekina Satana eerenrye awe omweehererya Yesu, nto Yesu aakhunle sai?

¹² Moovirikana ni Eva, tthiri Yesu oovaha ntakiheryo na wiiyeviha! Satana aahimweererya enamuna ekina, masi Yesu, aahikhootta nave khuupuwenle opaka etthu yootikiniha yaarowa omweehererya Muluku. Opaka eyo waarowa okhala wiixinnuuha! Ohiya opaka eyo, Yesu aahimwaakhula Satana wira: ‘Volempwa wira: ‘[Muhimweehererye Yehova] Muluku anyu’’.​—Mmusome Luka 4:9-12.

NINROWA OKHAPELELA SAI WATAANA WAHU NI YEHOVA?

13, 14. Mutthokiherye moota olelo-va Satana onaawoka awe Atthu.

¹³ Olelo-va, Satana onnirumeela miraakho simosaru saarumenle awe okathi wa Eva ni Yesu. Orweela mwa ‘ophavela itthu’ sa erutthu, Diabo onnirumeela elapo wira atthu yeetteke onamararuwa, ohapaliwa ni olyaaxa. Satana owo onnirumeela epornografia vanceenexa munternetini, wira aakuxeke atthu murima orweela mwa ‘sophavela sa’ maitho. Nave, onnirumeela osiveliwa muhakhu, okhulupale, ni ovuwa onikumiheriwa ni wiixinnuuha wa yaale ‘anisona mwaha wa mihakhu sirinaya’!

¹⁴ ‘Itthu sa mulaponi’, sinilikana ni mulipa onitotha ihopa. Owo onniwoka ihopa wira sikele muntthavini wala mweelemani. Satana onaarumeela atthu yaale khula nihiku anikhala wira tooloka, wira ewiiriheke atthu otthekela malamulo a Muluku. Miraakho iyo sineehererya mowiipitha, siri soophavela sinihonona murima ahu. Itthu iyo, pooti oniirihaka wuupuwela wira ophavela itthu sinnisivela paahi, teri etthu yootepa otthuneya ovikana opaka yootthuna ya Muluku. Niireke miraakho iyo pooti onihopha hiyo?

15. Ninrowa omutakiha sai Yesu wira nisyake soweeha sa Satana?

¹⁵ Nnaamwi Eva aahapuxiwe ni soweeha sa Satana, masi Yesu aahixintta saana. Khula okathi aakhula ni Soolempwa ariki: ‘Volempwa’. Akhala wira naatthu ansiveliwa omusoma Biibiliya oratteene, ninrowa okhala oolikaneene ni osuwela iveersu sa Soolempwa sinrowa onikhaliherya wuupuwelelaka okathi sinniphwanya aya sooweeha. (Esal. 1:1, 2) Wuupuwelela matakiheryo a atthu oororomeleya aromoliwe mBiibiliyani yaapaka yootthuna ya Muluku moororomeleya, enoonikhaliherya waatakiha. (aRom. 15:4) Omoova mwa nttittimiho Yehova, ni ophenta ele eniphenta awe, ni onyokha ele eninyokha awe, eyo enoonikhapelela.​—Esal. 97:10.

16, 17. Moota xeeni ‘osuwela wahu’ onnikhaliherya aya oweha enamuna ya omutthu ahu?

¹⁶ Murummwa Paulo onnintumererya orumeela ‘osuwela wahu’ wira nikhale enamuna ya mutthu uupiwe ni muupuwelo wa Muluku, ohiya wa elapo. (aRom. 12:1, 2) Alavulaka otthuneya waya wiikasoopa saana wira muupuwelo ahu ohihapuxiwe, Paulo oolavula wira: ‘Kinnatthukwa ankhili othene àtthu , wira emwiweleleke Kristu’. (2 aKor. 10:5) Miyuupuwelelo sahu, sookhalana ikuru sa enamuna ya omutthu ahu, nto nihaana ‘[othokorerya]’ itthu sinilipiha.—aFil. 4:8.

¹⁷ Khaninrowa okhalana mweettelo wooloka akhala wira nnuupuwelela soophavela soohiloka. Nihaana omphenta Yehova ni ‘murima worera’. (1 Tim. 1:5) Okhala wira murima ololo, hiyo pooti ohisuwela moota ‘sophavela sa’ elapo sinihonona aya murima ahu. (Yer. 17:9) Nto, ti vooloka ‘otokosa’ orweela mwa omusoma Biibiliya wira noone akhala wira nlelo nri munroromeloni.​—2 aKor. 13:5.

18, 19. Xeeni vanitthuneya ahu ovikaniha okhalana mikhalelo sinimuhakalaliha Yehova?

¹⁸ Enamuna ekina ennikhaliherya osyaka ‘sophavela sa’ elapo, ori wuupuwelela masu alempwe ni murummwa Yohani ani: ‘Vano, makhalelo ala anomala vamosá ni itthu simphavelexaya nto ole onettela otthuna wa Muluku onokhala mahiku othene’. (1 Yoh. 2:17) Olumwenku wa Satana onikhala wira ti wooloka ni khonimala. Masi, muhoolo onoomala. Khiivo etthu olumwenku wa Satana enivaha aya enipisa. Wuupuwela eyo enooniiriha osyaka ohapuxiwa ni miraakho sa Diabo.

¹⁹ Murummwa Pedru onnintumererya okhala atthu aneemereriwa ni Muluku vaavo ‘ninwehererya ahu nihiku na [Yehova], naakuvihaka orwa waya. Nihiku nenlo, erimu enrowa ovya n’utothowa: itthu sa vathi sinrowa ototoxiwa ni moro’. (2 Ped. 3:12) Moohipisa, nihiku nlo ninrowa ophiya, nto Yehova onrowa opwetexa olumwenku wa Satana. Masi nlelo nihinatthi ophiya nihiku nlo, Satana onrowa ovikaniha orumeela ‘itthu sa’ elapo wira aneehererye, ntoko siirale awe ni Eva ni Yesu. Nisyake omutakiha Eva yoowo aaphavenle weettela soophavela sa murima awe. Akhala wira nnimweettela soophavela sahu, ontaphulela omweemererya Satana okhala muluku ahu. Nihaana omutakiha Yesu wira nisyakeke soohapuxa sa Satana, nnaamwi avikanihaka owiiriha atthu waavara murima itthu iyo. Vano, khula mmosa a hiyo avikaniheke okhalana mikhalelo sinimuhakalaliha Yehova.

[Elatarato epaaxina 23]

[Elatarato epaaxina 24]

‘Sophavela sa’ erutthu saahikuxa murima wa Eva mpakha ottheka (Moone ettima 7)

[Elatarato epaaxina 25]

Yesus kheemerenrye etthu wira emuhapuxe ephiro yooloka (Moone ettima 8)

[Ilatarato siri epaaxina 26]

Soolepa xeeni sinrowa anyu wuupuwela okathi onikhumelela aya soweeha ntoko iya? (Moone ittima 13, 14)