Yehova—Ti Nipuro Nahu Noomaka

‘[Yehova] Nyuwo mwà ntthyawelo nahu mahiku othene okhuma khalayi’.—ESAL. 90:1.

MWAAROWA WAAKHULA SAI?

Yehova oonihenrye sai okhala ‘opuro womaka’ wa arumeyi a khalai?

Onniixuttiha exeeni mweettelo woororomeleya wa Abrahamu?

Ninkela wooniherya sai wira Yehova opuro ahu woomaka-vo woororomeleya?

1, 2. Arumeyi a Muluku anoonela sai mukhalelo wa elapo ela, nto empa xeeni erina aya?

NIIREKE NYUWO, muri ootaphuwa elapo ela eriihu? Akhala wira khamunisiveliwa ni elapo ela, nyuwo mwa mpatthani ahu! Okhuma khalai, otheene animphenta Yehova anikhala ntoko anamurwa, mahiku ala ootakhala ariihu. Mwa ntakiheryo, okathi yathaama aya erowaka opuro mukina elapo ya oKanani, arumeyi a Muluku oororomeleya ‘yanisuwela sana wira anamurwa’.—aHéb. 11:13.

² Moolikanasa, atthareli a Kristu oowoottihiwa yaawo ari ‘elapo aya eri wirimu’, annisuwela wira awo ‘anamurwa’ mulaponi-mu moohiloka. (aFil. 3:20; 1 Ped. 2:11) ‘Ipwittipwitthi sikina’ sa Kristu, nave ‘khahiyo sa elapo yeela’ siisaale Yesu ohiirenle awe mpantta olumwenku. (Yoh. 10:16; 17:16) Masi eyo khentaphulela wira atthu a Muluku khanikhalana “empa”. Tthiri, ninnisiveliwa okhupaareliwa wuulupalexa wa empa yoophenta erina ahu, yeeyo enooneya ni maitho a nroromelo. Moise aahilepa wira: ‘[Yehova] Nyuwo mwà ntthyawelo nahu mahiku othene okhuma khalayi’.a (Esal. 90:1) Moota xeeni Yehova oonihenrye awe okhala ‘ntthyawelo’ wa arumeyi awe oororomeleya a khalai? Moota xeeni oryaawe ‘ntthyawelo’ noororomeleya wa atthu anikuxa nsina nawe? Nto moota xeeni Yehova onrowa awe okhala ntthyawelo nimosa wa hiyo muhoolo?

YEHOVA AARI “EMPA YOOROROMELEYA” WA ARUMEYI A KHALAI

3. Moovarihana ni Esalimo 90:1, exeeni ekhanle mwaha muulupale, etthu ene enihimmwa, vamosa ni itthu sinilikanasa?

³ Ntoko siniireya aya ni masu manci mBiibiliyani, Esaalimo 90:1, yookhalana mwaha muulupale, etthu ene enihimmwa, vamosa ni itthu sinilikanasa. Mwaha ene muulupale onilavuliwa-va ti Yehova. Etthu ene enihimmwa ti opuro wa omaka wala okhala. Yehova onnilavuliwa alikanyihiwaka ni opuro owo. Mwa ntakiheryo, Yehova onniwaakiherya atthu awe. Eyo ennivarihana ni mukhalelo awe muulupale wa ophenta. (1 Yoh. 4:8) Nave-tho owo Muluku a murettele, oniwiiriha arumeyi awe oororomeleya ‘okhalaka òwitthyala’. (Esal. 4:9) Nrowe nithokorerye mwa ntakiheryo moota Yehova aakhapelenle awe amuhavinre alopwana oororomeleya nipaceryaka ni Abrahamu.

4, 5. Muluku oonihenrye sai ‘okhala nipuro noomaka’ na Abrahamu?

⁴ Hiyo pooti wuupuwela moota Abrahamu, yoowo iihaniwe-tho okhala Abramu, oonenle awe masu a Yehova oowi: ‘Mukhume mulaponi mwanyu, mwahiye amusi anyu ni etthoko y’atith’inyu, muthamele elapo enrowaka wothonyeryani’. Akhala wira Abrahamu aahixankiheya, oxankiheya waahimalihiwa ni masu ala a Yehova anittharelana: ‘Miyo kinimokhalihani nloko nulupale; kinimorerihani, kinimwinnuwiha nsina nanyu . . . Miyo kinimwareriha ale anrowa worerihani; kinimwatakhaliha ale anrowa wotakhalihani’.—Maph. 12:1-3.

⁵ Ni masu ala Yehova aahilavula wira aarowa omwaakiheryaka Abrahamu ni osuulu awe wotheene. (Maph. 26:1-6) Yehova aahimwaakhwaniherya natiri awe. Mwa ntakiheryo, aahimukhoottiherya Farawo a wEgito ni Mwene Abimeleki a elapo ya oGerari omwaakha Abrahamu mwaarawe, Sara. Yehova aahimukhapelela-tho Isakhi ni Rebeka mwa enamuna emosaru. (Maph. 12:14-20; 20:1-14; 26:6-11) Ninsoma so: ‘Vano [Yehova] Muluku khamutthunihenrye mutthu wapuherya; mwaha wa yawo ahahukhumu mamwene, iraka: ‘Muhahaxeké atthu ala àthanlalyaka; muhiwireleké sotakhala maprofet’aka’’.—Esal. 105:14, 15.

6. Exeeni Isakhi aamulenle awe Yakobe opaka, nto oonenle sai?

⁶ Maprofeta awo aahela muhina Yakobe musulu awe Abrahamu. Vaavo waaphin’ye aya okathi wa Yakobe othela, nto apapawe yiihaniwa Isakhi yaahimuleela wira: ‘Muhimuthelé muthiyana òKanàni. Nvenyé, murowé elapo y’o Mesopotamia [Pada Ara], owannyawe Betuweli, atithi aya ame anyu. Mwamuthanle weiwo muthiyana mmosá a ana a Labano, murokor’aya ame anyu’. (Maph. 28:1, 2) Moohixankiha, Yakobe aahimwiiwelela Isakhi. Yakobe aahikhuma opuro ole woovareleleya wa emusi awe, yaakhala oKanani, wira arowe mekhawe ekwaha ya ikiloomo imiya sinceene epantta ya oHarani. (Maph. 28:10) Waaniheryasa aniikoha wira: ‘Kinrowa omaliha mahiku makavi? Niireke ataata anrowa okaakhela ni okivaha muthiyana onimoova Muluku?’ Akhala wira Yakobe aari ooxankiheya, oxanka iwo waahimala okathi aaphiyale awe muttetthe wa oLuzi etthu yowiiraka ikiloomo 100 okhuma oBérixeba. Exeeni yiiranen’ye oLuzi.

7. Orumeelaka oloha, Muluku aamulipinhe sai Yakobe?

⁷ Aryeene elapo ya oLuzi, Yehova aahimuleela Yakobe moolohani wira: ‘Musuwelexe; miyo kinokhala ni nyuwo, kinimokhapelelani nipuro ti nipuro ninrowanyu, kinimotthikiheryani elapo ela. Nkinohiyani, kinomaliherya sothene sohimenryakani’. (Maph. 28:15) Tthiri masu ale yaahimulipiha vanceene Yakobe! Munniweha ophavela wuulupale ni okuxeya murima wa Yakobe wira awehe moota Muluku aarowa awe waakhwaniherya masu Awe? Akhala wira nyuwo waaniheryasa mookhuma owaani wira murowe okhaliherya elapo ekina, nyuwo pooti osuwela moota Yakobe oonela awe. Masi moohihova, nyuwo mooweha moota Yehova onookhapelelaaweni.

8, 9. Enamuna xeeni Yehova aaryaawe ‘opuro wokhala’ woororomeleya wa Yakobe, nto nniixutta exeeni?

⁸ Okathi Yakobe aaphiyale awe oHarani, atatawe, yiihaniwa Labano, yaahimwaakhelela saana, nuuvira okathi, yaahinvaha mwanaya iihaniwa Liya ni Rakheli wira ekhale asaarawe. Muhoolo mwaya, Labano aaheererya onwokerya esisapo aaliviwa awe Yakobe; mpakha oturuka esisapo ele ikwaha muloko! (Maph. 31:41, 42) Masi, Yakobe aanivilela mukhalelo ole woohixariya, aroromelaka wira Yehova aarowa omukhapelelaka, nto Yehova aanimukhapelela tthiri! Nto, nuuvira okathi Muluku aahimuleela wira Yakobe aahaana otthikela oKanani, nto muhavinre ole ‘Yakobe, ahitepa othajiri votikiniha; ahikhalana makoto manjene a inama, ipottha solopwana n’ipottha sothiyana n’ikamelo n’aburu’. (Maph. 30:43) Axukhurelaka ni murima wotheene, aahipaka nivekelo ariki: ‘Miyo nkiniphwanela othunku anyu wothene ni ororomeleya wanyu wothene mukìrenlyanyu miyo murumeyi anyu. Khalayi kahilapuwa muró Yordani ula ni ttotto aka pahi, vano kokhalana mittitthi iya mili’.—Maph. 32:11.

⁹ Tthiri, ahooniherya masu a nivekelo na Moise okhala ekeekhai anireerela wuupuwelela ani: ‘[Yehova] nyuwo mwà ntthyawelo nahu mahiku othene okhuma khalayi’. (Esal. 90:1) Masu awo annivareleya muteko olelo-va, wa Yehova, okhala wira owo ‘[khonivirikana], nnákhala khanihiya warya, mana owo khanimala’, owo onnivikaniha waakhapelela moophenta arumeyi awe. (Yak. 1:17) Moone nthowa naya.

YEHOVA—ORI ‘OPURO AHU WOMAKA’ OLELO-VA

10. Nthowa xeeni ninkupali ahu wira Yehova onoovikanaiha okhala opuro woomaka wa arumeyi awe?

¹⁰ Nkuupuwelani ela: Vano nyuwo muri otribunaali, muniirela onamoona etthu yoonale anyu voohimya sa nikhuuru nimosa ninvara ikrime olumwenku wotheene. Muhooleli a nikhuuru nlo, ti mutthu ootepexa olavilavi, oowerya, nawoothe ni nawiive ootepexa otakhala. Mwaarowa woonela sai okathi wookhumela ota wa etribunaali wuumalani wa nihiku nle? Khimwarowa woova? Tthiri mwamoovaka! Tivonto vaamureerela oveka okhapeleliwa. Eyo enilikana ni mukhalelo wa arumeyi a Yehova, yaawo moolipa murima animwiirela onamoona Yehova, ni olavula ehoovaka etthu wira Satana mutakhali! (Mmusome Wisupulula 12:17.) Masi niireke Satana onniwerya waahiiha arumeyi a Muluku muteko aya? Nnaari! Tthiri, ninnivikaniha wiilipiha omunepani wahu; tivonto ninlavula ahu wira: Yehova ti ‘opuro ahu womaka’, vanceenexa mahiku ala ookiserya. (Mmusome Yesaya 54:14, 17.) Nto pooti ohimya-tho wira, Khivanrowa oweryaneya Yehova okhala opuro ahu woomaka akhala wira ninneemererya soowoka sa Satana.

11. Nniixutta exeeni wa arumeyi yaale a khalai?

¹¹ Nkahaya-tho niixutte etthu ekina wa arumeyi a khalai. Nnaamwi yaakhala elapo ya oKanani, atthu awo khiyiirela mpantta mweettelo wa atthu a elapo eyo, okhala wira yaaninyokha otakhala waya ni mweettelo woohiloka. (Maph. 27:46) Awo yaari atthu yaatthara sooruma suulupale ohiya otthara elista erina khuta etthu enikhoottihiwa wala ele ehinikhoottihiwa. Ele yaasuwela aya sa Yehova ni mikhalelo sawe, saahiphiyerya omwiiwelela. Mwaha woowi Yehova aari ntthyawelo naya, awo khiyaaphavela wataana ni elapo. Ohiya-vo, awo yaakhala ottaiwene ni elapo. Tthiri awo aanivaha ntakiheryo nooloka! Niireke nyuwo munnaatakiha arumeyi awo, moota onaathanla anyu atthu ootthekulana ni wataana? Ti vooriipiha murima, oweha wira muhina mwa muloko wa eKristau, akina annisiveliwa pooti vakhaani wataana ni elapo ya Satana. Akhala wira mookhalana muupuwelo owo, pooti okhala vakhaani, munvekele Yehova. Muhaana ohiliyala wira elapo ela ti ya Satana. Eyo enooniherya okhalana moonelo awe woohiloka, wala ophavela wiisiveliha hiyo paahi.—2 aKor. 4:4; aÉf. 2:1, 2.

12. (a) Yehova onaalyiha sai momunepani atthu a etthoko awe? (b) Munoonela sai soovaha iya sa Yehova?

¹² Wira nisyake miraakho sa Satana, nihaana ottottelaka mureerelo saana soovaha somunepani sa Yehova sinaavaha awe atthu awe animwaamini ni animpaka okhala opuro aya woomaka. Soovaha iyo sinihela muhina mithukumano sa eKristau, omulompa Muluku vatthokoni, ‘sovaha sa atthu’, eyo piiyo, axitokweene athanliwe ni Muluku wira enikhaliheryeke ni onilipiha okathi wa mixankiho sahu. (aÉf. 4:8-12) Munna George Gangas, yoowo aari munna iirela mpantta Nikhuuru Noolamulela, aahilepa wira: “Okathi onikhala aka ni [arumeyi a Muluku]’, kinikhala oohakalala, ntoko mparayiisu yomunepani”. Nyuwo munoona siiso?

13. Yoolepa ya aHéberi 11:13 enniixuttiha exeeni?

¹³ Enamuna ekina eniixutta ahu ya arumeyi ala a khalai, ori ophavela waya okhala oovirikana eriyari ya atthu a mulaponi. Ntoko niwenhe ahu ettima 1, awo yaahilaleya ‘n’usuwela wira yari aletto mulaponi’. (aHéb. 11:13) Niireke moolakelela ovirikana ni atthu a elapo? Ekeekhai wira opaka eyo khivankhweya. Masi Muluku ni maKristau akhwiinyu animookhaliheryani okhumela saana. Muhiliyale wira khahiyo muri mekhinyu. Otheene yaale animurumeela Yehova anniwana ekhotto! (aÉf. 6:12) Masi ekhotto eyo nnooxintta namuroromela Yehova ni ompaka okhala opuro ahu woomaka.

14. Esidade xeeni arumeyi a Yehova yaawehererya aya?

¹⁴ Etthu ekina yootthuneya tiila: Mmutakiheke Abrahamu nvarexexaka yootthuveliwa anyu ya muhoolo. (2 aKor. 4:18) Murummwa Paulo aahilepa wira Abrahamu ‘aniwehererya muttetthe otekiwe mmathipeloni wupuweliwe ni otekiwe ni Muluku’. (aHéb. 11:10) ‘Muttetthe’ owo onithoonyerya Omwene wa oMesiya. Tthiri Abrahamu aahaana oweherererya esidade wala ‘muttetthe’ owo. Wa enamuna ekina hiyo khanniwehererya. Maana vano onilamulela wiirimu. Etthu yuulupale osuwela wira Yesu ohanle opacerya olamulela olumwenku wotheene. Niireke nyuwo munnikupali Omwene owo? Moota munirumeela anyu okumi anyu munnooniherya wira munneettela Omwene owo, muthanlaka itthu sinireerela opaceriha mulaponi-mu?—Mmusome 2 Pedru 3:11, 12.

‘OPURO AHU WOMAKA’ VAAVO NNAATTAMELA AHU WANIKISA

15. Exeeni enkela waakhumelela ale aniroromela olumwenku ola?

¹⁵ Vaavo vanaattamela aya wanikisa wa olumwenku wa Satana, moohihova ‘ohawa’ onimuncerereya. (Math. 24:7, 8) Itthu sinrowa otepa otakhala okathi wa maxakha maalupale. Waaniheryasa malokiheryo a mulaponi anrowa waakanyererya nto apinaatamu anrowa woovaka. (Hab. 3:16, 17) Anooxanka vanceenexa akhaleke wira amphavela waavya opuro wootthyawela ‘mmakhukuni n’iriyari sa myala sa myako’. (Wis. 6:15-17) Nto hata makhuku awo a ekeekhai, wala ele enilikana ni myaako sa ipoliitika ni mitthenkeso sa anakoso khisinrowa owaakiha.

16. Nooneleke sai muloko wa eKristau ni nthowa xeeni?

¹⁶ Arumeyi a Yehova anoovikaniha okhapeleliwa ni Yehova. Ntoko profeta Habakuki, awo anrowa otteeliwa murima ‘ni Pwiya [Yehova]’. Awo anrowa ‘otthapa mwaha wa Muluku [aya] oniwópola’. (Hab. 3:18) Moota xeeni Yehova onrowa awe okhala ‘opuro w’omaka’ okathi ole wooxankiha? Nihaana owehererya wira noone. Masi niroromeleke etthu ela: Ntoko anaIsarayeli yaakhumme aya wEgito, nave ‘muttitthi mulupale’ onoovikaniha okhalana mulokiheryo, onrowa waavahaka soolopola ni malakiheryo a Muluku. (Wis. 7:9; musome Okhuma 13:18.) Malakiheryo awo a Muluku, waaniheryasa ankela olaleiwaka mmulokoni. Tthiri, mmiloko sowiiraka ikonto sinceene olumwenku wotheene sinilikanyihiwa ni ‘mpa’ munimukhapelela mutthu sintoko saalavuliwe aya ni Yesaya 26:20. (Mmusome.) Munnivaha efaita mithukumano sa mmulokoni? Munnitthara saana malakiheryo Yehova onoovahaaweni arumeelaka muloko?—aHéb. 13:17.

17. Moota xeeni Yehova oryaawe ‘opuro womaka’ wa arumeyi awe oororomeleya akhwiiye?

¹⁷ Pooti arumeyi oororomeleya yaale anrowa okhwa ahinatthi maxakha maalupale, annivikaniha okhapeleliwa ‘opuro woomaka’ wa Yehova. Moota xeeni? Khalai, ahinatthi muhavinre Moise okhwa, Yehova aahimuleela wira: ‘Miyo ka Muluku . . . Àbrahamu ni a Isakhi ni a Yakobe’. (Okhum. 3:6) Nuumala Yesu olavula masu ala, owo aahincererya ariki: ‘Muluku khahiyó àtthu òkhwa; t’àtthu akumi’. (Luka 20:38) Mmoonelo wa Yehova, arumeyi awe otheene oororomeleya akhwiiye, awo ari ntoko atthu akumi; nlipelelo naya na ohihimuwa ti neekeekhai.—Mus. 7:1.

18. Mwa elapo esya Yehova onrowa okhala sai ‘opuro womaka’ mmukhalelo wa vameekha aya?

¹⁸ Mwa elapo esya ya muhoolo, Yehova onookhala-tho opuro woomaka wa atthu awe mwa enamuna ekina. Wisupulula 21:3 onihimya so: ‘Emp’ela, empa ya Muluku variyari v’atthu. Muluku onokhala ni yawo’. Wanipacerya Yehova onrowa okhala ni atthu awe valaponi alamuleliwaka ni Yesu Kristu. Wanikisa wa iyaakha ekonto emosa, Yesu onimwaattikiherya aTithi awe Omwene, nuumala waakhwaniherya oratteene yootthuna ya Muluku valaponi. (1 aKor. 15:28) Nuuvira-vo, khivanrowa-tho otthuneyaka mukuttho wa Yesu; Yehova onrowa okhalaka ni atthu awe. Tthiri ala mareeliho maalupale aniwehererya ahu! Masi vano, nrowe niilipihe waatakiha arumeyi oororomeleya a khalai nimpakaka Yehova okhala ‘opuro ahu womaka-vo’.

[Enoota]

[Elatarato epaaxina 19]

[Elatarato epaaxina 20]

‘Nkinohiyani’

[Elatarato epaaxina 22]

Malaikha a Muluku anniwaakiha arumeyi awe.