Munniwerya Opaka Itthu Sikina Wira Mwaalopole Atthu?

Wanipacerya wa iyaakha sa 1900, efilme emosa yahaiwanyeya masu yiitthaniwa A Trip Down Market Street (Ekwaha Yaapakiwe Khukhala Ephiro) yaahaasivela atthu mwaha wa wooniherya moota saakhala aya atthu oSao Francisco, wEstados Unidos wAmerika mahiku ale. Alipa-oopaka efilme ele, yaahipaka maakina a efilme yaavara muteko ni matata khuhela vamukhoyini weettiha maakina awo khupweha mustaraatani yaavira atthu anci. Efilme eyo yaahela muhina ikhavalo saatexa ikarosa, ikaaro sa okathi yoole, alipa oothuma, amiravo evaraka miteko saya khula nihiku.

Etthu eniiriha efilme ele okhala yooriipiha murima olelo-va, okhala wira yaafilmariwe mweeri wa Abril 1906, ehinatthi wiiraneya etetere ni mooro yaawiivale atthu ikonto sinceene ni onyaanya ipantte sinceene sa muttetthe ole, nihiku na 18 mweeri yoole. Woonasa wene mwaha wa ehasara ele, atthu akina yaafilmariwe yaarowa okhwa ahivinre mahiku manceene. Scott Miles yoowo aari mmosa mwa yaale yaapanke efilme eyo onihimya so: “Miyo kiira kiwoonaleene niinano atthu ale yaakhwiiye, awo khiyaasuwela etthu yaarowa owiiraneela. Khuuvo aakhanle opaka etthu voohikhala owoonela othunku paahi”.

Etthu emosaru eyo enniiraneya mahiku ahu ala. Hiyo-tho khanikhanle oopaka etthu woohikhala owoonela othunku paahi anamwaattamanani ahu. Atthu awo annivikaniha okhala oowaatteliwa miteko saya sa khula nihiku, khanisuwela ehasara enirwa moohipisa, eyo piiyo, opwetexiwa wa makhalelo ala oohiloka ni vamosa ni mweettelo aya. Masi moovirikana ni etetere ele ehinlaiha, olelo-va hiyo nookhalana okathi vakhaani wowaalopola atthu voohimya sa nihiku noophukela na Yehoava. Ekeekhai wira khula esumana munnirowa olaleerya khula empa, masi mookhala oowiilipiha wira mwaalopole akina?

YESU KHAATEMWA OLALEERYA

Ntakiheryo na Yesu ti nuulupale okhala wira owo khaatemwa olaleerya. Aanimulaleerya khula mutthu aakumana awe, okhale mulipa-ooliviha mpoosito aakumana awe mphironi, wala muthiyana aakumanne awe veehimeni okathi woophumurya othana eriyari. (Luka 19:1-5; Yoh. 4:5-10, 21-24) Hata okathi yoole Yesu aaphavela awe ophumurya, moohinlaseya owo aanaahiya apalano awe khiyarowa owiixuttiha atthu akina. Owoonela wawe othunku atthu akina waanimwiiriha ophavelaka opaka itthu sikina wira awiixuttihe. (Mar. 6:30-34) Olelo-va, anamalaleerya anitakiha sai oluttuweliwa wa Yesu?

AWO ANNITTOTTELA MUREERELO KHULA OKATHI

Melika onikhala epreedio ehineemereriwa atthu akina ovolowa. Atthu anceene anikhala epreedio eyo, alipa-oosoma anikhuma ilapo sikina, awo aanimurumeela telefoni selulaare mammaro aya ni masina aya khakhanle valistani ya telefoni vamukhora wa epreedio. Nto owo onnoona okhala eparakha ya vameekha aya, waalaleerya okathi atthu awo onivolowa aya vamukhora wala owela elevador. Owo onihimya so: “Nto miyo opuro ole kipanke okhala muttetthe aka woolaleerya”. Melika onnikuxa iliivuru sa mattaava manceene, nto anamunceene anneemererya itratato ni irevista. Nave onnatthoonyerya-tho epaaxina ahu ya Web saite, jw.org. Nto owo oopaceriha soosoma sinceene sa Biibiliya.

Sonia onniimananiha-tho omulaleerya khula mutthu. Owo onivara oklinika wa dotore, nto owo onimananiha omulaleerya khula namuteko onivarana awe hoothe. Wanipacerya owo oniweha itthu sinimuthowa khula mutthu. Nuumala-vo, owo onnirumeela okathi woolya othana wira opacerihe ovaanela myaha somunepani. Mwaha waivaavo, Sonia oowerya opaceriha soosoma piili sa Biibiliya. Vano Sonia onimpaka palano wira okathi woomumula alaleeryeke vamukhora va hospitali atthu yaale aniwehererya wiitthaniwa.

MUTTOTTELE MUREERELO OKATHI ANYU

Mutthu mmosa ooponwe etetere ele ya 1906, owo aahiitthana etetere eyo okhala: “ehasara yuulupale yahaatonko okhumelela esidadi ele”. Masi, ihasara sotheene siniiraneya vano ti sootepa oyeva nalikanyiha ni nihiku na wunla ikuhu nenlo nnaarweela otheene yaale ‘akhontte omusuwela Muluku’. (2 aTes. 1:8) Yehova oniphavela wira atthu erukunuxe muupuwelo ni murima aya wira yeemererye ihapari sa olopoliwa seiyo sinilaleiwa ni Anamoona awe.​—2 Ped. 3:9; Wis. 14:6, 7.

Nyuwo mookhalana eparakha ya ohula maitho a atthu wira esuweleke wira ala mahiku ooxankiha, ni waakhaliherya osyaka mikhalelo sa nrima, ni omphavela Yehova. (Sof. 2:2, 3) Niireke nyuwo munnittottela mureerelo waalaleerya apatthani anyu aneettana ayu oxikola omutekoni anamwaattamanani ni atthu yaale khula nihiku munikumanana anyu nvaraka miteko sanyu? Niireke nyuwo munrowa wiilipiha vano wira mwaalopole akina?

[Elatarato epaaxina 31]

Okhala wira atthu khiyaasuwela, etetere ele ya 1906 vamosa ni mooro waakhumelenle waahinyaanya ipantte sinceene sa oSão Francisco.

[Masu a elatarato]

U.S. National Archives photo

[Elatarato epaaxina 32]

[Eponto yuulupale ya epaaxina 32]

Nyuwo munnittottela mureerelo olaleerya khula okathi onikumana anyu ni atthu wala nvaraka miteko sanyu sa khula nihiku?