‘Yoly’ Aka Miyo Wettela Otthuna Wawe Muluku’

Etthu xeeni enoophwanyihani ohakalala wuulupale? Niireke wiiwanana wa apinaatamu ntoko ekasamento yohakalaliha, emusi yooloka, wala okhalana apatthani oororomeleya? Woonasa wene vannoosivelani othukumana ni ale anaaphenta anyu nto khiyalya hoothe. Nto akhala wira nyuwo mwa murumeyi a Yehova, niireke munnoona okhala eparakha yuulupale opaka otthuna wa Muluku, osoma Nuulumo nawe, ni olaleya ihapari sooreera?

Mwa nsipo niipale awe anvuwihaka Mpattuxa, Mwene Davidi a Isarayeli a khalai, aahimyale so: “Muluku aka! Wira otthuna wanyu t’unkisivela. Kinnettela ikano sanyu ni murim’aka wothene”. (Esal. 40:9) Hata samphwanya mixankiho sinceene mweekumini mwawe, Davidi aanisiveliwa tthiri wira yootthuna ya Muluku. Ekeekhai wira Davidi khahiyo aari mekhawe aasiveliwa onvuwiha Yehova ni omurumeela ntoko Muluku ekeekhai.

Ooniheryaka wira masu a Esalimo 40:9 yaahiiraneya wa Mesiya, wala Kristu, Paulo aalempe so: ‘Tthiri Kristu, arwaka mulaponi-mu, ahimuhimerya Muluku Tithi awe wira: ‘Nyuwo khamutthunne mukuttho walá sovaha, nto mokipakela erutthu. Nyuwo khunosivelani oheleliwa mukuttho wa inama sopahiwa, walá mikuttho s’olevelela itampi. Vano miyo kòhimya wira: Muluku aka, miyo kiri va. Kirwenle wira otthuna wanyu, sisale silempwaya sa miyo mulivuruni mwa ikano’’.​—aHéb. 10:5-7.

Okathi aari awe valaponi, Yesu vaanimusivela oweha itthu soopattuxiwa, ovaanela ni apatthani, vamosa ni olya hoothe. (Math. 6:26-29; Yoh. 2:1, 2; 12:1, 2) Masi, etthu yuulupale yaamusivela Yesu waari opaka otthuna wa Tiithi awe a wiirimu. Tthiri Yesu aahihimya so: “Yoly’aka miyo, wettela otthuna wawe ole okirumme, ni omaleliha miteko sawe”. (Yoh. 4:34; 6:38) Yiixuttaka wa Pwiya Yesu, atthareli a Yesu yaahiixutta esiiri wala etthu enikumiherya ohakalala. Aryeene ootteeliwa murima, yanaleela akina ihapari sa Omwene.​—Luka 10:1, 8, 9, 17.

‘MUROWE MWAPAKE AWIXUTTI’

Yesu aahaaruma atthareli awe wira: “Vano, murowé, mwawixuttiheke atthu a maloko othene, mwabatizaka ni nsina n’Atithi ni na Mwana ni na [munepa wotteela]. Mwawixuttiheke wettela sothene sòrumalyakani. Vano miyo kinokhala ni nyuwo mahiku othene, mpakha [makhalelo a itthu] omala”. (Math. 28:19, 20) Ovara muteko owo onihela muhina olavulana atthu khula nipuro aryaaya, opaka mikwaha sotthikela ni waaxekurya ale anooniherya osiveliwa ekeekhai ni owiiriha yoosoma ya Biibiliya ale aneemererya. Ovara muteko owo onnikumiherya ohakalala wuulupale.

Voohicikha etthu sa moota atthu sinoonela aya ihapari sa Omwene, etthu enrowa onikhaliherya ovikaniha ohakalala wahu ori ohiliyala etthu enniiriha olaleerya. Nto exeeni enniiriha hiyo ovikaniha olaleerya hata atthu akina aheemyaka? Mwaha woowi hiyo noosuwela wira ovara muteko woolaleerya ni waapaka awiixutti yowooniherya yoowi ninnimphenta Muluku ni apinaatamu akhwiihu. Ohaaleela atthu onoowerya opwetexa ekumi ahu ni ekumi ya atthu akina. (Ezek. 3:17-21; 1 Tim. 4:16) Vano nrowe nthokorerye itthu vakhaani saakhalihenrye anna anceene ovikaniha olaleerya hata saaphwanyaka mixankiho sinceene, wala hata alaleeryaka mittetthe soovila.

OLALEERYA KHULA OKATHI

Ovarihela muteko makoho ooloka okathi onilaleerya ahu ikwaha sinceene onnikumiherya mireerelo. Nihiku nimosa vaasiisu, Amalia aahimoona mulopwana mmosa mujardim osomaka ejornal. Nto aahimwaattamela khumukoha akhala wira etthu yaasoma awe yaari ihapari sooreera. Nuumala waakhula ariki nnaari, Amalia aalavunle so: “Vano miyo kiniruuha ihapari sooreera voohimya sa Omwene wa Muluku”. Eyo yaahimusivela mulopwana ole mpakha waakhulela yoosoma ya Biibiliya. Tthiri, Amalia aahipaceriha soosoma sa Biibiliya tthaaru nipuro nle orumeelaka enamuna emosa ya olaleerya.

Janice, oopaka-tho opuro onivara awe muteko okhala muttetthe awe woolaleerya. Nihiku nimosa guarda ni anamuteko akina onivarana awe muteko yoonihenrye aya osiveliwa mwaha mmosa waakhumenle mwa erevista Owehaweha, Janice ahaalaiherya wira amwaaruuhelaka irevista khula mweeri. Aahipaka etthu emosaru ni mutthu mukina aavarana awe muteko aavariwe murima ni myaha sa irevista Owehaweha ni Despertai! Eyo yaahiwiiriha anamuteko anceene oveka irevista. Janice onihimya so: “Tthiri awo mareeliho anikhuma wa Yehova!” Muhoolo mwaya owo aanakawela irevista atthu 11 omutekoni wawe.

MUKHALANE MOONELO WOOLOKA

Mutokweene mmosa ooweetteetta ahaatumererya anamalaleerya wira vaavo vanilaleerya ahu empa ni empa, nihimaliheke ovaanela wahu nihimyaka paahi wira kinimoorwa nihiku nikina kooxekuryeni. Masi nihaana omukoha mutthu owo so: “Mwaaniphavela wira kirwe kiwooniheryeni moota siniiriwa aya soosoma sa Biibiliya?” wala, “Nihiku xeeni wala ewoora xeeni enoona anyu oreerela wira kirwe nitthikele ovaanela wahu?” Mutokweene owo onihimya wira erumeeliwaka enamuna eyo ya olaleerya, anna ni arokora a muloko mmosa yaahiwerya opaceriha soosoma 44 esumana emosa paahi.

Opaka mikwaha sootthikela oxekurya ahivinre mahiku manceene onnikumiherya mireerelo sinceene. Nthowa xeeni? Okhala wira vaavo vanaaxekurya ahu atthu anisiveliwa ekeekhai ni waakhaliherya omwiiwexexa Biibiliya ninnooniherya wira ninnaaphenta atthu awo. Okathi aakohiwe awe muthiyana mmosa etthu yaamwiirinhe weemererya omusoma Biibiliya ni Anamoona a Yehova, owo aakhunle so: “Mwaha woowi yaahikithokorerya ni okiphenta saana”.

Okathi vakhaani nuumala orowa Exikola ya Muteko wa oPioneero, Madai aaniiriha soosoma 15 ni ahaavahererya anamalaleerya akina soosoma 5. Atthu anceene anaasomiha awe Biibiliya annirowa omuthukumanoni khula esumana. Exeeni emukhalihenrye Madai opaceriha soosoma sinceene? Exikola yaahimwiixuttiha owo wira aahaana otthikela waaxukurya atthu mpakha waaphwanya ale yoonihenrye otthunexexa ekeekhai. Namoona a Yehova mukina yoowo aakhalihenrye atthu anceene wiixutta ekeekhai, onihimya so: “Kihiixutta wira opixa murima ni opaka mikwaha sootthikela, ti etthu enaakhaliherya atthu anceene omusuwela Yehova”.

Opaka mikwaha sa oxukurya ni wiiriha soosoma sa Biibiliya onivekela wiimananiha ni nthiti. Masi mireerelo sinikhumela sinnivikana mixankiho sotheene mutthu onikumana awe. Akhala wira ninnimananiha ovara muteko woolaleerya Omwene, nnoowerya owiiriha akina ‘osuwela ekekhai’, wira yoopowe. (1 Tim. 2:3, 4) Nto hiyo nnoophwanya ohakalala wuulupale woohilikana ni etthu ekina.

[Eponto yuulupale epaaxina 4]

Ophenta onniniiriha ovikaniha waalaleerya atthu hata akina avaanyihaka

[Eponto yuulupale epaaxina 5]

Opaka mikwaha sootthikela moohipisa onooniherya wira ninniphavela tthiri waakhaliherya ale anooniherya osiveliwa ekeekhai

[Eponto yuulupale epaaxina 5]

Muhaana omukoha mwaneene etthoko so, “Munniphavela wira kirwe owooniheryani moota siniiriwa aya yoosoma ya Biibiliya?”