MWAHA WOOPACERYA | MUNOOWERYA OKHALA MPATTHANI A MULUKU

Niireke Nyuwo Munoona Wira Moomwaattamela Muluku?

“Opatthana ni Muluku onnikiiriha okhala oolipa murima. Onilikanasa ni okhaliheriwa ni Muluku okathi wotheene”.​—CHRISTOPHER, MMIRAVO A OGANA.

“Muluku onnoowehani okathi onihaawa anyu, onnoophentani ni woothokoreryani okathi wotheene”.​—HANNAH, A IYAAKHA 13, ALASCA, E.U.A.

“Ti voohakalaliha osuwela wira miyo koomwaattamela Muluku. Eyo ennikilipiha!”​—GINA, MUTHIYANA OJAMAICA A IYAAKHA SOWIIRAKA 40.

Christopher, Hannah, ni Gina khahiyo yaala paahi anuupuwela wira aamwaattamela Muluku. Atthu anceene anuupuwela siiso. Ankhi nyuwo? Niireke munoona wira moomwaattamela Muluku? Wala muniphavela omwaattamela saana? Waaniheryasa munniikoha so: ‘Vanniweryaneya pinaatamu okhala mpatthani a Muluku Oowerya-sotheene? Akhala wira ti siiso, moota xeeni?’

VANNIWERYANEYA OKHALA MPATTHANI A MULUKU

Moovarihana ni Biibiliya, vanniweryaneya okhala mpatthani a Muluku. Biibiliya onihimya wira Muluku aahimuhimya muhavinre Abrahamu okhala “mpatthani aka”. (Yesaya 41:8) Moone nlattulo noophenta niri va Yakobo 4:8, nni: “Mmwattameleke Muluku: Muluku onowattamelani”. Eversu ela ennooniherya wira vanniweryaneya okhala mpatthani a Muluku. Masi, moota xeeni, okhala wira Muluku khonooneya?

Wira naakhule nikoho nlo, moone moota opatthani onipacerya aya. Ikwaha sinceene, onipacerya vaavo ninsuwela ahu nsina na mukhwiihu. Nto, vaavo ninvaanela ahu ni oleelana ele enuupuwela ahu, ompatthani onninnuwa. Nave vaavo vanimananiha ahu wiirelana itthu sooloka, opatthani ahu onnilipa. Etthu emosaru ennitthuneya wira mutthu opatthane ni Muluku. Nrowe noone moota woopaka eyo.

MWAHA WOOPACERYA | MUNOOWERYA OKHALA MPATTHANI A MULUKU

Niireke Muhaana Orumeela Nsina na Muluku?

Niireke mookhalana mpatthani ohinsuwela anyu nsina nawe? Woonasa wene naari. Irina, muthiyana oBulgaria, ohimmye so: “Khivaniweryaneya okhala mpatthani a Muluku muhisuwelaka nsina nawe”. Masi, ntoko noonale ahu, ti voohakalaliha osuwela wira Muluku oniphavela wira mmwaattameleke. Omurumeelaka Biibiliya, owo onnooleelani nsina nawe oriki: “Miyo kà Yahvéh [Yehova], nla ti nsina naka”.​—Yesaya 42:8, Biblya Exirima.

Niireke Yehova onnivaha efaita orumeela nsina nawe? Muupuwele ela: Nsina na Muluku, nenlo ninlempwa ni ileetera xexe sa eHeeberi ninsuweliwa okhala Tetragrama, ninnikhumela ikwaha sowiiraka 7.000 mwa Soolempwa soopacerya sa eHeeberi. Khanikhanle nsina nikina ninromoliwa vanci mBiibiliyani. Eyo enooniherya wira Yehova oniphavela wira nisuweleke ni nirumeeleke nsina nawe.a

Masi okhala wira Muluku toowaarya ni oowerya-sotheene, akina anuupuwela wira khivanireerela orumeela nsina nawe. Tthiri, khivanireerela orumeela nsina na Muluku voohikhalela, ntoko sisaale vahinireerela aya orumeela nsina na mpatthani ahu voohikhalela. Masi, Yehova oniphavela wira ale animphenta ettittimiheke nsina nawe ni yaasuweliheke akina. (Esalimo 69:31, 32; 96:2, 8) Yesu aahiwiixuttiha atthareli awe ovekela so: “Tith’ihu, muri wirimu! Nsina nanyu nivuwihiwe”. Hiyo ninnivuwiha nsina nlo vaavo ninlaleya ahu. Opaka eyo onninaattameliha Muluku.​—Matheyo 6:9.

Biibiliya onihimya wira Muluku onnaacalela ale ‘animova ni anttittimiha nsina nawe’. (Malakhiya 3:16, BE) Yehova onnileiherya waakhaliherya ale anromola nsina nawe oriki: “Awo yakìhana, miyo kinowiwelela: kinokhala n’awo mohawani mwaya wira kiwakihe”. (Esalimo 91:14, 15) Tthiri, naaphavelaka okhala mpatthani a Muluku, nihaana osuwela ni orumeelaka nsina nawe.

[Enoota]

[Eponto yuulupale epaaxina 4]

Omurumeelaka Biibiliya, owo onnoohimeeryani nsina nawe oriki: “Miyo kà Yahvéh [Yehova], nla ti nsina naka”.​—Yesaya 42:8, BE

MWAHA WOOPACERYA | MUNOOWERYA OKHALA MPATTHANI A MULUKU

Niireke Nyuwo Munnivaanela ni Muluku?

Apatthani annivaanela okathi wotheene akhala wira makhalelo aya anniweemererya, pooti okhala ni telefone, e-mail, eviidiyu, wala epaphelo. Nto, wira nikhale apatthani a Muluku nihaana ovaanelaka ni yena. Moota xeeni?

Nnoowerya olavula ni Yehova orweela wa nivekelo. Masi, ovekela onnivirikana ni moota ninvaanela ahu ni mukhwiihu. Nisuweleke wira okathi ninvekela ahu, ninlavula ni Mpattuxa, yoowo ori a vasuluxa olumwenku wotheene. Eyo ehaana oniirihaka onvekela mwa nttittimiho nuulupale. Wira Muluku aakhule mavekelo ahu, nihaana ovaha ephoole itthu sikina sootthuneya. Moone itthu iya 3:

Yoopacerya, ninvekeleke Yehova Muluku paahi, ohiya Yesu, masanto, wala ilatarato. (Okhuma 20:4, 5) Biibiliya oni: “Okathi wothene, nweliherye mavekelo anyu wa Muluku mmulompaka, munvaraka metto, mmuxukhuruku-tho”. (aFilipi 4:6) Ya nenli, nirumeeleke nsina na Mwaana a Muluku, Yesu Kristu. Yesu aahimmye so: “Khavo onwerya orowa w’Atithi, ahivinre mwa miyo”. (Yohani 14:6) Ya neeraru, nivekeleke moovarihana ni yootthuna ya Muluku. Biibiliya oni: “Muluku onninìwa nanvekelaka etthu, nanvekelakaru sintthara otthuna wawe”.a​—1 Yohani 5:14.

Ompatthani khonlipa akhala wira mutthu mmosa paahi tonilavula. Nto wira Muluku okhale mpatthani ahu, nihaana weemya wira owo olavuleke ni hiyo. Masi Muluku onilavula sai ni hiyo?

Olelo-va, Yehova Muluku “onnilavula” ni hiyo omurumeelaka Biibiliya. (2 Timótheyo 3:16, 17) Moota xeeni? Mulikanyihe wira muhaakhela epaphelo ya mpatthani anyu. Nuumala osoma, munnaaleela akina wira: “Mpatthani aka iirale wira mukumi!” Nyuwo khammwiiwale olavulaka, masi mwaakhenle epaphelo awe. Moolikanasa, vaavo munimusoma anyu Biibiliya, munnimwiiwa Yehova olavulaka. Gina, oromoliwe mmwaha woopacerya, onihimya so: “Kinoona wira kaaphavelaka okhala mpatthani a Muluku, kihaana osomaka ‘epaphelo’ awe. Omusoma Biibiliya khula nihiku onnikaattameliha Muluku”. Niireke nyuwo munneemya wira Yehova olavuleke ni nyuwo khula nihiku? Tthiri, omusoma Biibiliya onimookhaliheryani omwaattamela Muluku.

[Enoota]

MWAHA WOOPACERYA | MUNOOWERYA OKHALA MPATTHANI A MULUKU

Niireke Munnipaka Ele Muluku Enoovekelaweni?

“Muhixanke, mukileele paahi ele eniphavela anyu, nto miyo kinimookhaliheryani”. Woonasa wene, khimwaarowa olavula masu awo wa mutthu ohinimusuwela anyu. Masi, mwaamulavula ohoolo wa mpatthani anyu. Okhala wene, apatthani eekeekhai annipaka ele anivekeliwa aya ni mukhwaaya.

Biibiliya onihimya wira Yehova onnipaka itthu mmureerelo wa arumeyi awe. Mwa ntakiheryo, Mwene Davidi yoowo aarina wataana wekeekhai ni Muluku, aahimmye so: “Apwiya, Muluku aka! Sotikiniha ni mirirya sinìrenlyanyu ti sulupale. . . . Kaphavela olaleya n’uvuwiha sothene seiyo: masi sinnikàttela, kihinawerya walikela”. (Esalimo 40:6) Ohiya-vo, Yehova onnaakhaliherya ale ahinimusuwela, ‘aavahaka solya, ni waasariha otteliwa murima’.​—Miteko 14:17.

Okhala wira Yehova onnimusivela opaka itthu sinaahakalaliha akina, nto ti vookhalela wira ale aniphavela okhala apatthani awe apakeke itthu ‘sinitteeliha murima awe’. (Miruku 27:11) Nto exeeni mukhanle anyu oopaka? Biibiliya onaakhula so: “Muhiliyalé owirela sorera akhw’inyu, mwakawelaka sirinanyu, mana mikuttho iyo ti sinimusivela Muluku”. (aHéberi 13:16) Masi niireke nnoomuhakalaliha Yehova niwiirelaka sooreera atthu ni waakawela sirina ahu paahi?

Biibiliya onaakhula so: “Khavo mutthu onwerya omusiveliha Muluku, ahaminiki”. (aHéberi 11:6) Tthiri, Abrahamu ‘aahikhalihiwa mpatthani a Muluku’ nuumala “òmwamini Muluku”. (Yakobo 2:23) Nave, Yesu Kristu aahittittimiherya wira nihaana ‘omwaamini Muluku’ wira naakhele mareeliho a Muluku. (Yohani 14:1) Nto munrowa okhalana sai waamini? Musomeke Nuulumo na Muluku, Biibiliya, voohihiyererya. Opaka eyo onimoophwanyihani ‘osuwela vomalela otthuna wawe’ ni wiixutta waasiveliha “Apwiya mwa itthu sothene”. Nave, mwancererya omusuwela wanyu saana Yehova ni weettela ele muniixutta anyu voohimya sa malamulo awe, waamini wanyu onimunnuwa nto Muluku onoowaattamelani.​—aKolosi 1:9, 10.

MWAHA WOOPACERYA | MUNOOWERYA OKHALA MPATTHANI A MULUKU

Khiivo Etthu Yootepa Oreera Ovikana Omwaattamela Muluku

Mpakeke exeeni wira mukhale mpatthani a Muluku? Noothokorerya itthu iya sinittharelana mukhanle anyu oopaka wira mmwaattamele Muluku:

1. Osuwela ni orumeela nsina na Muluku, Yehova.

2. Ovaanela ni Muluku voohihiyererya orweela wa nivekelo, ni omusoma Biibiliya.

3. Opaka ele enimusivela Yehova.

Murumeelaka itthu iya, niireke munniwerya ohimya wira munnipaka ele enitthuneya wira mukhale mpatthani a Muluku? Wala ehaavo enireerela olokiherya? Ekeekhai wira muhaana wiimananiha, masi muupuwelele mireerelo saya.

Jennifer a wEstados Unidos onihimya so: “Wiimananiha wira mutthu okhale mpatthani a Muluku, onniphwanyiha mareeliho manceene, ntoko: Omuroromela Yena, osuwela mikhalelo sawe, ni omphenta. Tthiri, khiivo etthu yootepa oreera ovikana omwaattamela Muluku!”

Akhala wira munniphavela opatthana ni Muluku, hiyo nnoosiveliwa wookhaliheryani. Nnoopaka mareheryo wira nimusome Biibiliya ni nyuwo. Khamunrowa oliva etthu. Nave, pooti orwa Empa ya Omwene nimpaka ahu mithukumano sahu, weiwo munrowa anyu waaphwanya atthu ari apatthani a Muluku.a Mwiira siiso, munookhala ntoko nasaalimo yoowo aalavunle so: “Nto wa miyo, ti [vooreera] okhala vakhiviru va Muluku”.​—Esalimo 73:28, BE.

[Enoota]