MYAHA SA ARKIVO AHU

“Okathi Wootthuneyexa”

MWAAKHA wa 1870 ekrupu emosa oPittsburgh (Allegheny), oPennsylvania, EUA, yaahipacerya otokosa soolempwa. Ahooleliwaka ni Charles Taze Russell, awo yaahitokosa mukuttho wa Kristu nto voohipisa yaahoona wira mukuttho waahikhalana opuro muulupale mwa yoolakela ya Yehova. Tthiri murima wahaatteela vaavo yaixuntte aya wira mukuttho onnihula ephiro wira noopowe, waahela muhina atthu yaale nlelo ahinatthi wiiwa Nuulumo na Muluku voohimya sa Yesu! Mootteeliwa murima, awo yaahipacerya wuupuwelela okhwa wa Yesu khula mwaakha.​—1 aKor. 11:23-26.

Munna Russell aahipacerya okumiherya erevista Zion’s Watch Tower, yeeyo yaatthokiherya yowiixuttiha yoowi yowoopola ti enamuna yuulupale Muluku onooniherya awe oniphenta wawe. Erevista The Watch Tower yaanihimya okathi wa Wuupuwelela Okhwa wa Kristu okhala “okathi wootthuneyexa” ni yaahatumererya atthu otheene yaasoma wira yaahaana wuupuwelela oPittsburgh wala khula nipuro yaarowa aya woona oreerela. “Hata mapuro yaale ari atthu anli wala araru arina waamini nno” wala pooti okhala mmosa paahi “murima awe onoowerya okhala vamosa ni Apwiya”.

Khula mwaakha, atthu yaamutepa wuncerereya oPittsburgh yaarweela owiriyana Niira na Wuupuwelela. Epaphelo ya nlattulo yaahimya so: “Munrowa waakheliwa ni atthu ooreera murima”. Mwekeekhai Alipa-oomusoma Biibiliya ale mooreera murima yaaniwaakhela mmaitthokoni mwaya annaya ni axirokoraya a omunepani. Mwaakha wa 1886, waahipakiwa “Muthukumano wa Atthu Otheene” wa mahiku manceene okathi wa Niira na Wuupuwelela. Erevista Watch Tower, yaahimya so “Murwe, mutteeliwaka murima ni omphenta Pwiya, annawe ni ikeekhai sawe”.

Mwa iyaakha sinceene, Alipa-Oomusoma Biibiliya oPittsburgh yaaniwaakhela mmaitthokoni mwaya atthu ale yaamini yowoopola anarwa okathi wa Niira na Wuupuwelela. Okathi Alipa-Oomusoma Biibiliya yancerereya aya, nto saanikhumelela-tho igrupu siiriwa aya Niira na Wuupuwelela. Ray Bopp a muloko wa oChicago onnuupuwela ele yaakhumelenle mwaakha wa 1910, ohimyaka wira saahivira iwoora sinceene wira atthu otheene avahiwe eviinyu ni ephaawu okhala wira anamunceene yaanoolya ithoonyeryo iye.

Ithoonyeryo xeeni saarumeeliwa? Nnaamwi yaasuwela wira Yesu aarumeelale eviinyu okathi wa Yoolya ya Ohiyu y’Apwiya, wookhala okathi erevista Watch Tower yaatumererya aya wira erumeeliweke esuumu ya uva oottokottha wala uva oowuuma oowapeiwa, eyo yiireliwa wira ehaaphwanyihe etampi “ale ari otteettheya mweerutthuni mwaya”. Masi, yaanikhala eviinyu mwaha wa atthu ale “yoona wira yaahaana orumeeliwa eviinyu-tu”. Alipa-Oomusoma Biibiliya muhoolo mwaya yaahoona wira eviinyu yoohitakaaheriwa etthu yaari ethoonyeryo yooreerela ya ephome ya Yesu.

Wuupuwelela moota wiiranenye aya okhwa wa Yesu waahaakhaliherya anna ni arokora wiixutta itthu sinceene. Miloko sikina, atthu yaanikhala ooripiwa murima vanceene, ni wanikisa wa muthukumano ole khuuvo aawerya ohimya etthu. Mwaakha wa 1934, yookhala eliivuru yaakumiheriwe,yiitthaniwa Yehova, yaahimmye wira okathi wa Niira khahiyo okathi wa “oriipiwa murima” mwaha wa wiiviwa wa Yesu, masi ohaana okhala okathi “woohakalala” okhala wira owo onnilamulela ntoko Mwene okhuma 1914.

Mwaakha wa 1935, waahikumiheriwa murukunuxo muulupale yoowo waakumihenrye makhalelo masya a moota naarowa aya opakiwaka Niira na Wuupuwelela okhala wira yaahipacerya wiiwexexa yootaphulela ya “muttitthi mulupale” oniromoliwa ni Wisupulula 7:9. Ohinatthi ophiya okathi ole, arumeyi a Yehova yaaniwoona atthu a muttitthi muulupale okhala maKristau oowoottihiwa yahaaphwanelela orowa wiirimu mwaha woohikhalela nthiti miteko sa Muluku. Nto okathi ole, atthu awo yahaakontareya yaahihimmwa okhala anamakokhorela oororomeleya yaawo yaawehererya okhala mParayiisu valaponi. Nuumala wiiwanyeihiwa nno wa naanano ni wiivarerya mmansawe, Russell Poggensee aahoona wira, “Nlipelelo naarina awe na orowa wiirimu khinaakumiheriwe ni munepa wootteela wa Yehova”. Munna Poggensee ni anna akina anceene moororomeleya yaahihiya olya ithoonyeryo okathi wa Niira na Wuupuwelela.

“Okathi owo wootthuneyexa” yanipakiwa ekampaanya ya vameekhaaya yeeyo yaavaha eparakha atthu otheene wooniherya oxukhurela waya yowoopola. Mwaakha wa 1932 Bulletin mmosa aahaatumererya maKristau otheene wira ahikhale “alipa owaarya a okathi wa Niira na Wuupuwelela”, yaawo yaalya ithoonyeryo iyo paahi, masi yahaana okhala “anamuteko” yaalaleya muhupi wa ekeekhai. Mwaakha wa 1934, Bulletin aahilaleya otthuneya wa “mapioneero ookhaliherya” oriki: “Vanooweryaneya okhalana mapioneero 1.000 okathi wa Niira na Wuupuwelela”? Olavulaka sa alipa oowoottihiwa Informante aahimmye so: “Ohakalala waya onrowa okhala woomalela vakhala wira anoovara muteko woolaleya Omwene”. Muhoolo mwaya ohakalala iwo waamwaphwanya ale arina nlipelelo na okhala valaponi.a

Wa atthu a Yehova otheene nihiku na Niira na Wuupuwelela ti nootepexa otthuneya khula mwaakha. Awo annuupuwelela nihiku nlo hata okathi wa mixankiho. Mwaakha wa 1930, Pearl English ni muhimaawe, Ora, yaaheetta ikhiloomu 80 wira yawiriyane muthukumano wa Niira na Wuupuwelela. Okathi waaryaawe mukhatteya oChina, misionaario Harold King aahilepa ipowema ni isipo voohimya sa Niira na Wuupuwelela ni aahipaka ithoonyeryo sa niira ni uuva ooriipa oowuuma ni musoro. Okhuma mpantta Onikhuma Nsuwa wEuropa ovira wAmerica Central mpakha wAfrika, maKristau oolipa murima aawerya oxintta ikhotto wala malamulo yaakhoottiherya wuupuwelela okhwa wa Yesu. Nto moohicikha etthu sa mapuro aryaahu wala makhalelo arina ahu, hiyo ninnithukumana wira ninvuwihe Yehova Muluku ni Yesu Kristu okathi owo wootthuneyexa wa Niira na Wuupuwelela na khula mwaakha.

[Enoota]