MWAHA WA VAKAAPANI | NIIREKE OVEKELA ONNIKHALIHERYA?

Xeeni Atthu Anivekela Aya?

Samuel,a ooKenya ohimmye so: “Omweetta jooku oneemexeriwa musurukhu waari okumi aka. Miyo kaanivekela wira kiphwanyeke musurukhu munceene. Masi eyo khiyiiraneya”.

Teresa, ooFilipina ohimmye so: “Oxikola naahaana wiixutta ni ohela mmuruni mavekelo naaxuttihiwa ahu”.

Magdalene, ooGana onihimya so: “Kinnivekela okathi wa mixankiho. Nave-tho kinnivekela wira Muluku okilevelele itampi saka ni okhala muKristau ooloka”.

Masu alavuliwe ni Samuel, Teresa, ni Magdalene, anooniherya wira atthu annivekela mwa mathowa oovirikana; akina a atthu ala annivekela mwa mathowa ookhalela. Mavekelo makina anikhuma vamurimani; masi makina anisukiwa mmuruni paahi. Masi, pooti atthu evekelaka okathi anipaka aya iporova oxikola, wala ovekela wira egrupu aya enimmana boola ekhumele saana, ophwanya malakiheryo a Muluku anikhaliherya emusi, aahiiso mathowa makina, imilyau sinceene sa atthu annoona wira ti vootthuneya ovekela. Tthiri sootokosa sinooniherya wira hata atthu ahirina etiini annivekela.

Niireke nyuwo munnivekela? Akhala wira ti siiso, ti pani muninvekela anyu? Hata nyuwo mmakelaka ovekela wala nnaari, pooti wiikoha so: ‘Niireke ovekela onnikhaliherya? Ohaavo oniwiriyana?’ Mulipa oolepa mmosa, aahimyale wira ovekela onlikana ni “enamuna emosa ya murette . . . ntoko olavula ni ehopa eri mmaasini”. Mameediku makina aakhalana moonelo mmosaru; awo anihimya wira ovekela ti enamuna ekina ya “olooliwa ohirumeelaka murette wa oxipitali”. Munoonela sai, niireke atthu anivekela ntoko yoolimalela paahi, aahiiso aniphavela mureerelo ntoko murette?

Masi, Biibiliya onihimya wira mavekelo tootthuneya ovikana murette. Nave onnooniherya wira ohaavo onwiriyana mavekelo anipakiwa mwa enamuna yooloka ni mathowa ooreerela. Niireke eyo ekeekhai? Nrowe niwehe.

[Enoota]

MWAHA WA VAKAAPANI | NIIREKE OVEKELA ONNIKHALIHERYA?

Niireke Ohaavo Oniwiriyana Naavekelaka?

Atthu akina anuupuwela wira ovekela ori ohonona okathi paahi, maana khuuvo onaawiriyana. Akina annimananiha ovekela, masi anoona wira khanaakhuliwa. Mulopwana mmosa ohinikupali wira Muluku ookhala, aahooniherya muupuwelo awe voohimya sa Muluku, nto aahivekela so: “Xontte mukooniherye etthu enayevaru”. Masi owo aahimmye wira Muluku aavikaninhe okhala “oomaala ene tu”.

Biibiliya onninlipiherya wira Muluku ookhala ni onniwiriyana mavekelo ahu. Biibiliya onniromola masu a atthu a khalai oriki: “Mwakhuwelelaru wa Muluku, owo onimomorelani ikharari: ìwakaru ikuttho sanyu, onowakhulani”. (Yesaya 30:19) Eveersu ekina enihimya so: ‘Olompa w’anaxariya onnimusivela Muluku’.​—Miruku 15:8.

Biibiliya onnilavula-tho matakiheryo a atthu yaawo mavekelo aya yaawiriyaniwa. AHéberi 5:7 onihimya wira Yesu ‘ahinvekela yole awerya omwakiherya okhwa ni ahakhuliwa’. Matakiheryo makina aniphwanyaneya va Daniyeil 9:21 ni 2 Wahala 7:1.

Nto, xeeni atthu akina anuupuwela aya wira mavekelo aya khanaakhuliwa? Wira niwiriyaniweke, ninvekeleke Yehovaa Muluku, yoowo ori mwaneene Biibiliya, ohiya amuluku akina wala amuhavinre ahu. Owo oniphavela wira nivekeleke “sintthara otthuna wawe”, eyo piiyo, itthu sinimusivela. Muluku onninlipiherya wira naavekelaka siiso, owo ‘onooniwiriyana’. (1 Yohani 5:14) Nto wira mavekelo ahu ewiriyaniweke, nihaana omusuwela Muluku eekeekhai ni opaka yootthuna awe.

Atthu anceene anikupali wira ovekela khahiyo paahi etthu enivariwa ni anatiini; masi Muluku onniwiriyana ni waakhula mavekelo otheene. Isaac, ooKenya, oni: “Kaahivekela wira kiwerye omwiiwexexa Biibiliya. Moohipisa, aahirwa mutthu wira okikhaliherye. Hilda, ooFilipina, aaniphavela ohiya ompaha soona. Aahiimananiha masi khaawerya, nto iyawe aahoona wira aahaana ovekela nikhaliheryo na Muluku. Nuumala ovekela, muthiyana owo aahimyale so: “Kaahitikinihiwa moota Muluku aakikhalihenrye awe. Nto kaahipacerya ohisiveliwa ni ompaha soona. Nto vano koomuhiya-tu”.

Masi, niireke Muluku onniphavela wookhaliheryani wira nvilele mixankiho sanyu?

[Enoota]

[Eponto yuulupale epaaxina 4]

Yesu aahinvekela Tiithi awe ni ‘ahakhuliwa’.​—aHéberi 5:7

MWAHA WA VAKAAPANI | NIIREKE OVEKELA ONNIKHALIHERYA?

Xeeni Muluku Onnilattula Awe Wira Ninvekeleke?

Muluku oniphavela wira nikhale apatthani awe.

Apatthani annivaanela mukina ni mukhwaawe wira alipihe opatthani aya. Vamosaru, Muluku oniphavela wira hiyo nivaaneleke ni yena wira nikhale apatthani awe. Owo onihimya so: “Nyuwo munokhuwelela wa miyo, mukiphavelaka: munokilompa, vano miyo kinimowiriyanani”. (Yeremiya 29:12) Olavula ni Muluku, onoowiirihani omwaattamela yena, nave owo “onowattamelani”. (Yakobo 4:8) Biibiliya onninlipiherya wira: “Apwiya anniwattamela othene ale anavekela”. (Esalimo 145:18) Vaavo ninvekela ahu wa Muluku ikwaha sinceene, wataana wahu ni yena onnilipa.

Muluku oniphavela wookhaliheryani.

Yesu aahimmye so: “T’ani a nyuwo, onìra mwan’awe anvekelaka ephau, khíyanvaha nluku? Walá anvekelaka ehopa, ananvaha enowa? Munamwi muri nyuwo . . . munasuwela wavaha sorera an’inyu, Atith’inyu ari wirimu anotepa wavaha sorera ale anavekela”. (Matheyo 7:9-11) Tthiri, Muluku onnoolattulani wira munvekeleke okhala wira “owo onnokhapelelani” ni oniphavela wookhaliheryani. (1 Pedru 5:7) Nave-tho, onnintumererya wira ninvekeleke okathi wa mixankiho. Biibiliya oni: “Muhukhuwé mwaha w’etthu p’itthu. Vano, okathi wothene, nweliherye mavekelo anyu wa Muluku mmulompaka, munvaraka metto, mmuxukhuruku-tho”.​—aFilipi 4:6.

Apinaatamu annitthuneya omusuwela Muluku.

Asuweli voohimya sa makhalelo a apinaatamu, awenhe wira atthu ikonto imiya sene annitthuneya ovekela. Atthu awo anihela muhina ale ahinikupali wira Muluku ookhala wala animuhoverya.a Awo annikupali wira apinaatamu annitthuneya wataana ni Muluku. Yesu aahimmye so: “Khahiyó n’iphau-ru pahi mutthu t’onkhalawe mukumi: nto ni khula nulumo ninkhuma mwano mwa Muluku”. (Matheyo 4:4) Enamuna mmosa ya wataana ni Muluku ori olavula ni yena.

Akhala wira nnonvekela Muluku, niireke nnoophwanya mureerelo?

[Enoota]

[Eponto yuulupale epaaxina 5]

“Apwiya anniwattamela othene ale anavekela”.​—Esalimo 145:18

[Ekaaxa epaaxina 5]

Exeeni Enihela Muhina Ovekela?

Biibiliya onooniherya wira ovekela onihela muhina itthu sinceene sa okumi ahu, ntoko:

Ohimya Itampi: “Vano kihohimeryani etampi aka: nkovithenryeni sottheka saka”.​—Esalimo 32:5.

Oxukhuru: “Etthu yorera wattottopela Apwiya.”​—Esalimo 92:2.

Ottottopela: “Kinimwattottopela Apwiya okathi p’ukathi”.​—Esalimo 34:2.

Ovekela Malakiheryo: “Mukèttiherye ephiro ya ikano sanyu: onkisivela wetta mphironi memmo”.​—Esalimo 119:35.

Oveka ikuru: “Mukiwehe miyo, mukimorele ikharari: mukilipihe, mukòpole”.​—Esalimo 86:16.

MWAHA WA VAKAAPANI | NIIREKE OVEKELA ONNIKHALIHERYA?

OVEKELA: Niireke Onnikhaliherya?

Muhinatthi opacerya opaka etthu, waaniheryasa munniikoha so: “Mureerelo xeeni kinrowa aka ophwanya?” Nto niireke ti vootakhala okoha etthu emosaru voohimya sa ovekela? Nnaari. Okhala wene hiyo nimphavela itthu sinceene sooreera. Hata Yobi, mulopwana ooreera murima aahikoha wira: “Vaakhanle wira koomwiihana, kiireke aamukaakhula?”​—Yobi 9:16, Tradução do Novo Mundo.

Myaha sivinre nihoona wira ovekela, onihela muhina itthu sinceene ohiya paahi etthu enipakiwa ni anaatiini wala enamuna ya murette. Tthiri Muluku eekeekhai onniwiriyana mavekelo. Nanvekela mwa enamuna yooloka ni oveka itthu sooreera, owo onooniwiriyana. Muluku onninlattula wira nimwaattamele. (Yakobo 4:8) Nto mireerelo xeeni ninrowa ahu ophwanya? Nrowe niwehe.

Murettele.

Okathi wa mixankiho, niireke munnikhumuwa muhinoona yoopaka? Biibiliya onintumererya wira okathi owo ‘nilompeke vohihiyererya’ ni ‘niweliheryeke mavekelo ahu wa Muluku’. (1 aTesalonika 5:17; aFilipi 4:6) Biibiliya onninlipiherya wira nanvekela vale Muluku, “murettele wa Muluku, onvikana osuwela wa mutthu, onosuka mirima [sahu] n’iroho [sahu], mwa Yesu Kristu”. (aFilipi 4:7) Nnoowerya okhalana murettele ni omaaleleya, akhala wira nnoomuleela Tiithi ahu a wiirimu mixankiho sahu. Esalimo 55:23, enihimya so: “Mwareye Apwiya muritti anyu: awo t’aniwemexani: awo khanamuhiye naxariya akwattuliwaka”.

Atthu anci aaphwanya murettele owo. Muthiyana mmosa ooKorea do Sul, Hee Ran, oni: “Nnaamwi kirina ene mixankiho suulupale, okathi kinivekela aka voohimya sa mixankiho iyo, vanikhala ntoko ekumihiwe etthu yoolemela vamuru vaka, ni kinnikhalana ikuru soovilela”. Cecilia, ooFilipina oni: “Ntoko maama, kinnixanka mwaha wa anaaka; nave-tho kinnaakhapelela amaama yaawo ahinwerya okisuwela mwaha wa oretta aya. Masi ovekela, onnikikhaliherya ohixanka mootepana. Kinnisuwela wira Yehova onookikhaliherya”.

Ohakalala ni ophwanya ikuru okathi wa mixankiho.

Niireke munikumana itthu sootepa oxankiha, waaniheryasa itthu sowoopiha wala ehasara? Onvekela “Muluku [yoowo] onnihakalaliha inamuna sothene” onoonikhaliherya. Biibiliya onihimya wira Muluku “onninihakalaliha mohawani mwahu mothene”. (2 aKorinto 1:3, 4) Mwa ntakiheryo, nihiku nimosa, okathi Yesu aariipiwe awe murima vanceene, ‘aahikokhora, analompa’. Nto exeeni yaakhumelenle? “Nlaikha na wirimu nahimukhumelela wira nimulipihe murima”. (Luka 22:41, 43) Murumeyi mukina aari Nehemiya. Owo aahihaaxiwa ni atakhali yaamananiha waahiiha atthu a Muluku oteka etemplo. Nehemiya aavekenle so: “Mulipihe matata aka”. Itthu saakhumelenle muhoolo sahooniherya wira tthiri Muluku aahimukhaliherya ohoova ni okhumela saana. (Nehemiya 6:9-16, NM) Reginald ooGana, onihimya so: “Vaavo kinivekela aka, vanceenexa okathi wa mixankiho, vanikhala ntoko wira kinimuleela mutthu okhanle ookikhaliherya, yoowo onikilipiherya wira kihooveke etthu”. Tthiri Muluku pooti onikhaliherya okathi oninvekela ahu.

Ankhili a Muluku.

Soothanla sikina sinipaka ahu pooti onihela muhina hiyo wala ale anaaphenta ahu. Ninrowa opaka sai soothanla sa miruku? Biibiliya oni: “Akhalá mwa nyuwo ohirina ankhili, [wira ovilele mixankiho] anvekele Muluku: onovahiwa, okhala wira Muluku onnavaha atthu othene ni murimène, ahùlumelaka”. (Yakobo 1:5) Navekela miruku, Muluku pooti orumeela munepa awe wootteela wira onikhaliherye opaka soothanla sooloka. Tthiri nihaana oveka munepa wa Muluku okhala wira Yesu aanilipihenrye so: “Atith’inyu ari wirimu [animwaavaha] eroho yowarya ale anavekela”.​—Luka 11:13.

Hata Yesu aanoona okhala vootthuneya onvekela Tiithi awe wira omukhaliherye opaka soothanla suulupale. Biibiliya onihimya wira okathi Yesu aathanla awe awiixutti 12, aahiviriha “ohiyu wothene amulompaka Muluku”.​—Luka 6:12.

Ntoko Yesu, anamunceene olelo-va, aahakalala vaavo yoonale aya moota Muluku aakhunle awe mavekelo aya wira apake soothanla sooloka. Regina, ooFilipina, oohimya mixankiho sinceene aarina awe, ntoko: waakhaliherya anaawe ni amamawe nuumala okhwa aiyawe, woomoliwa muteko ni oxanka mwaha wa waahuwa anaawe. Exeeni yaamukhalihenrye opaka soothanla sa miruku? Owo onihimya so: “Kaaninvekela Yehova Muluku wira okikhaliherye”. Kwabena, onikhala oGana, onnihimya nthowa naya onivekela awe, oriki: “Miyo kaahikhalana muteko wooteka yoowo kaaliviwa aka musurukhu munceene, masi koomoliwa. Nto kinninvekela Yehova moohihiyererya wira okikhaliherye opaka soothanla sooloka. Kinnikupali tthiri wira owo ookikhaliherya ophwanya muteko onkeemererya ophwanya sootthuneya saka sa werutthuni ni wataana saana ni Muluku”. Nyuwo-tho munoowerya ophwanya malakiheryo a Muluku akhala wira munoovekela voohimya sa mixankiho sikhanle oohonona wataana wanyu ni Muluku.

Nooweha mireerelo vakhaani ninrowa ahu ophwanya akhala wira nnoovekela. (Mwa ntakiheryo, moone ekaaxa eni: “Mireerelo sa Ovekela”.) Masi wira mphwaye mireerelo iyo, wanipacerya muhaana omusuwela Muluku ni yootthuna awe. Nto mwaaphavelaka opaka eyo, mwaavekele Anamoona a Yehova wira yookhaliheryeni omusoma Biibiliya.a Eyo pooti okhala nivalo noopacerya wira mmwaattamele ole ‘oniwiwa ale aninvekela’.​—Esalimo 65:3.

[Enoota]

[Eponto yuulupale epaaxina 7]

“Mwareye Apwiya muritti anyu: awo t’aniwemexani”.​—Esalimo 55:23

[Ekaaxa epaaxina 7]

Mireerelo sa Ovekela

Murettele: “Muhukhuwé mwaha w’etthu p’itthu. Vano, okathi wothene nweliherye mavekelo anyu wa Muluku mmulompaka, munvaraka metto mmuxukhuruku-tho. Siso murettele wa Muluku, onvikana osuwela wa mutthu, onosuka mirima sanyu n’iroho sanyu mwa Yesu Kristu”.​—aFilipi 4:6, 7.

Ohakalalihiwa ni Muluku: “Nimuttottopele Muluku, Tithi awe Yesu Kristu Pwiy’ahu, Tithi a ikharari ni Muluku onnihakalaliha inamuna sothene. Yowo onninihakalaliha mohawani mwahu mothene”.​—2 aKorinto 1:3, 4.

Opaka soothanla sa miruku: “Akhalá mwa nyuwo ohirina ankhili, anvekele Muluku: onovahiwa, okhala wira Muluku onnavaha atthu othene ni murimène, ahùlumelaka”.​—Yakobo 1:5.

Oxintta soweeha: “Mulompeke, wira muhimore”.​—Luka 22:40.

Oleveleliwa soottheka: “Atthu aka yaithanlenlyaka yarukunuxa mirima saya, yalompaka vale, ekiphavelaka, ehiyaka iphiro saya sotakhala, miyo kinimwawiriyana wirimu oryaka, kinimwalevelela sottheka saya, kinoreriha-tho elapo aya”.​—2 Wahala 7:14.

Waakhaliherya akina: “Malompelo n’uvara metto wa mutthu òrera murima onniwerya valupale”.​—Yakobo 5:16.

Ohakalala: Yehova Muluku aahimuleela Salomoni wira: “Miyo kihakhelela malompelo anyu ni maxonttelo anyu”.​—1 Mamwene 9:3.