MWAHA WA VAKAAPANI | NIIREKE NYUWO MUNNIPHAVELA OMUSOMA BIIBILIYA?

Xeeni Vanitthuneya Anyu Omusoma Biibiliya?

Tiivi ekhanle yoolakela ya okumi?

Xeeni atthu anihaawa aya ni okhwa?

Exeeni enrowa wiiraneya muhoolo?

Niireke Muluku onnikithokorerya?

Niireke mootoko wuupuwela makoho ala? Akhala wira ti siiso, nto khahiyo muri mekhinyu. Olumwenku wotheene atthu anniphavela osuwela wakhuliwa wa makoho ala. Niireke vanniweryaneya ophwanya waakhuliwa iwo?

Atthu anci anaakhula wira, “aayo!” Mwaha aya? Mwaha woowi Biibiliya ohaakhula makoho aya. Niireke munniphavela osuwela ele Biibiliya onihimya awe? Nto waaniheryasa, munoophwanya mureerelo mwamusoma Biibiliya ni Anamoona a Yehova.a

Voohimya sa omusoma Biibiliya, akina anaakhula so: “Nkireere waatteliwa miteko; Biibiliya oxankiha”. Masi ahaavo akina aneemya eparakha ya wiixutta ele Biibiliya enihimya awe. Muthokorerye matakiheryo vakhaani:

Gill, a wInglaterra onihimya so: “Miyo kiheetta ikerexa Katoolika, eProtestante, etemplo Sique, eBudista, ni koosoma eteologia wuniversidade. Masi, makoho aka voohimya sa Muluku khiyaakhuliwa. Nto Namoona a Yehova aahiphiya owannyaka. Moota Biibiliya aakhunle awe makoho aka, waahikivara murima ni kaaheemya omusoma Biibiliya”.

Koffi, oBenin, oni: “Kaahikhalana makoho manci voohimya sa okumi, masi moota aakhula awe pastore aka khiwaakisivela. Nto, Namoona a Yehova aahikaakhula omurumeelaka Biibiliya paahi. Vaavo aakikonhe awe akhala wira kaaniphavela wiixutta itthu sikina, kaaheemya”.

José, oBrasil oni: “Kaaniphavela osuwela mukhalelo wa alipa ookhwa. Kaakupali wira awo anniwerya waahaaxa akumi, masi kaaniphavela osuwela ele Biibiliya yaaxuttiha awe. Nto kaahipacerya omusoma Biibiliya ni mpatthani aka yoowo aari Namoona”.

Dennize, oMéxico oni: “Kaaniimananiha omusoma Biibiliya, masi nkaawerya omwiiwexexa. Nto Anamoona a Yehova yaahikitthokiherya saana iprofesia sa mBiibiliyani. Kaahiphavela wiixutta itthu sikina”.

Anju, oNepal oni: “Kaaniikoha akhala wira Muluku aanikikhapelela. Nto kaahilakela onvekelaka Yena. Nihiku nimosa, Anamoona a Yehova yaahikixukurya, ni kaaheemya omusoma Biibiliya”.

Sowiiraneya iya sinnivarihana ni masu a Yesu ani: ‘Ooreeriwa taale anicalela soophavela saya sa omunepani’. (Matheyo 5:3, Tradução do Novo Mundo) Tthiri atthu anniphavela osuwela itthu sa omunepani. Nto Muluku paahi toniwerya onikhaliherya omurumeelaka Biibiliya.

Nto Omusoma Biibiliya ontaphulelani? Onrowa wookhaliheryani sai? Makoho ala animwaakhuliwa ni mwaha onittharelana.

[Enoota]

[Ekaaxa epaaxina 4]

IKEEKHAI SA BIIBILIYA

NSINA: Nuulumo noowi Biibiliya, wala bi·bliʹa mwa eGriki, nintaphulela “iliivuru saamukhaani”.

SIRI MUHINA: Iliivuru 39 sa eHeeberi (ipantte sikina sa aramaiko) ni iliivuru 27 sa eGriki.

ALE AMULEMPE: Atthu oowiiraka 40; iyaakha sinivikana 1.600, okhuma 1513 AEC mpakha 98 EC.b

MATTAAVA: Ootaphuleliwa otheene wala mpantta awe mwa mattaava anivikana 2.500.

WULAANA WAWE: Aakhala aBiibiliya oowiiraka ibilyau 5; Biibiliya eliivuru yootepa osuweliwa molumwenkuni.

[Enoota]

MWAHA WA VAKAAPANI | NIIREKE NYUWO MUNNIPHAVELA OMUSOMA BIIBILIYA?

Eprograma Ya Omusoma Biibiliya Wa Atthu Othene

Anamoona a Yehova annisuweliwa vanci mwaha wa muteko aya woolaleerya. Masi mwaanisuwela wira ninnimusomiha-tho Biibiliya olumwenku wotheene?

Eyaakha ya 2014, Anamoona anivikana 8.000.000 a ilapo 239 yaahiiriha soosoma sa Biibiliya sinivikana 9.250.000 khula mweeri.a Tthiri atthu anaasomiha ahu Biibiliya, annivikana nummuru na atthu a ilapo sowiiraka 140!

Wira evare muteko ola wa wiixuttiha, Anamoona a Yehova annaakumiherya aBiibiliya, iliivuru, irevista, ni itthu sikina sinimutthokiherya Biibiliya sowiiraka ebilyau emosa nnimeya khula eyaakha, mwa mattaava oowiiraka 700! Muteko owo khonlikana ni miteko sikina maana onnaakhaliherya atthu omusoma Biibiliya ni nttaava aniphavela aya.

WAAKHULIWA WA MAKOHO ANIMAKELA OPAKIWA VOOHIMYA SA EPROGRAMA AHU YA OMWIIXUTTIHA BIIBILIYA

Exeeni eri yoosoma ya biibiliya?

Ninnithokorerya myaha sinci sa mBiibiliyani. Mwa ntakiheryo, muthokorerye mwaha onilavula sa Muluku. Muluku ti pani? Owo ta mukhalelo xeeni? Niireke ookhalana nsina? Onikhala woowi? Nnoowerya omwaattamela? Nto yoosoma eyo ennaakhaliherya atthu osuwela iveersu sa Biibiliya sinaakhula makoho ala.

Wira naakhaliherye atthu ophwanya waakhuliwa waya, ninnirumeela eliivuru ya ipaaxina 224 yeeyo eni: Biibiliya Oniixuttiha Exeeni Tthiri?b Eliivuru ela elokiheriwe wira yaakhaliheryeke atthu wiiwexexa sowiixuttiha soopacerya sa Biibiliya, ntoko: Ekeekhai voohimya sa Muluku, Yesu Kristu, ohaawa wa apinaatamu, ohihimuxiwa, ovekela, ni itthu sikina.

Opuro xeeni ni okathi mutthu okhanle awe oosoma?

Nyuwo pooti othanla okathi ni opuro muniphavela anyu osoma.

Yoosoma enimaliha minutu mikavi?

Atthu anci annirumeela ewoora emosa wala ovikana khula esumana. Yoosoma pooti okhala ya okathi vakhaani wala munceene moovarihana ni okathi anyu. Akina anniviriha munutu 10 wala 15.

Eniliviwa kavi yoosoma eyo?

Yoosoma ya Biibiliya ni iliivuru sinirumeeliwa khasinliviwa etthu. Yesu aahaaruma awiixutti awe wira: “Ntoko sivahiwanyu mahala, siso-tho nvaheke mahala”.​—Matheyo 10:8.

Yoosoma enimaliha myeeri mikavi?

Nyuwo pooti ovikaniha osoma moovarihana ni okathi muniphavela anyu. Eliivuru Biibiliya Oniixuttiha Exeeni Tthiri? erina miru 19. Nyuwo pooti osoma muru mmosa wala sotheene moovarihana ni makhalelo anyu.

Niireke yoosoma ennikiiriha okhala Namoona a Yehova?

Nnaari. Mwa nttittimiho, hiyo ninnikupali wira khula mutthu ohaana ehakhi yoothanla sookupali sawe. Atthu pooti osuwela sowiixuttiha soopacerya sa Biibiliya, masi awo ahaana othanla mmansaya.

Kinrowa ophwanya woowi soohimmwa sikina?

Web saite jw.org ookhalana soohimmwa sekeekhai voohimya sa sookupali ni muteko wa Anamoona a Yehova.

Kinrowa ovekela sai yoosoma ya Biibiliya?

● Nyuwo pooti ovekela yoosoma eyo va www.pr2711.com/vmw.

● Nyuwo pooti waalepela Anamoona murumeelaka endereso, yoowaattamela eri epaaxina 2 ya erevista ela.

● Mulavule ni Anamoona a Yehova, murumeelaka elista telefonika ya elapo anyu opuro oni: “Anamoona a Yehova”.

[Inoota]

[Ekaaxa ipaaxina 5, 6]

“Okathi keetta aka oxikola, khiwaakisivela osoma; masi omusoma Biibiliya waanikihakalaliha. Nave itthu kaaxutta aka saanikisivela!”​—Katlego, Afrika do Sul.

“Kursu owo aahaakhula makoho aka otheene ni kaahixutta itthu sikina-tho”.​—Bertha, Mexico.

“Miyoyo kaasomihiwa Biibiliya owannyaka okathi kaaphavela aka. Tthiri miyo kaaphavela yeeyo!”​—Eziquiel, Brasil.

“Yoosoma ya Biibiliya yaakhalana minutu 15 mpakha 30; ikwaha sikina ovikana-vo moovarihana ni makhalelo aka a nihiku nlo”.​—Viniana, Australia.

“Miyo nkaakupali wira kursu owo khaaliviwa etthu!”​—Aimé, Benin.

“Ole aakixuttiha Biibiliya aari oopixa murima ni oophenta. Nto naahikhala apatthani”.​—Karen, Irlanda do Norte.

“Atthu anceene annimusoma Biibiliya hata ahikhanle Anamoona”.​—Denton, England.

[Ekaaxa epaaxina 7]

Etthu Enikhaliherya Imusi

“Okathi amwaaraka yaapacenrye aya omusoma Biibiliya, okumi aya waahiturukeya. Emusi ahu yaanihakalala. Kiphavelaka osuwela ele yiixutta aya, kaahipacerya-tho omusoma Biibiliya. Ele kaaxutta aka yaahikiiriha okhala mutthu ooloka. Tthiri omusoma Biibiliya woolipiha emusi ahu”.​—Eziquiel.

“Nuumala opacerya omusoma Biibiliya, kaahihiya olya mirette sootakhala, ohapaliwa, ni kaahiixutta ohinanariwa mowaakuveya. Enupa aka ti yooloka ni yootthokiheya. Kinnaavaha efaita atthu a etthoko aka ni kinnisiveliwa ovarana muteko hoothe. Vano ka mutthu oohakalala vanceene”.​—Karen.

“Atthu akina yaanikinyokha mwaha woomusoma Biibiliya. Masi aiyaka yaanikhaliherya yoothanla aka, ni yaahimya so: ‘Nkincala ele atthu anilavula aya. Okumi anyu ti wooloka vano; eyo ennikisivela. Muhihiye omusoma Biibiliya’. Emusi ahu khetonko ohakalala ntoko vano!”​—Vinian.