BIIBILIYA ONNIRUKUNUXA MIRIMA SA ATTHU
Kihiixutta wira Yehova toomoriwa ikharari ni toolevelela
Elavuliwe ni Normand Pelletier
MWAAKHA OYARIWE AWE: 1954
ELAPO ONIKHUMA AWE: CANADÁ
MWAHA ENE: NAWIIYE NI AAMWEETTA JOOKU A MUSURUKHU
MWEETTELO AKA WA KHALAI: Miyo kinnuwale muttetthe wa atthu oohaawa epooma ya Montreal. Kaari mwaana ookiseriwa. Kirina ene iyaakha 6, apaapa yaahikhwa, nto amaama anahala mekhaya yaakhapelelaka anamwane 8.
Okhuma enamwane aka, waanikisivela olya mirette soohapala, omweetta jogatina, ni weetta ni atthu ootakhala. Kirina ene iyaakha 10, kaahipacerya waakhaliherya anamararuwa ni atthu yaakophiha musurukhu analiviwa ijuuru sinci. Owiiyerya atthu ni waawoka yaari yoolema aka. Waalikanasa ni olya mirette soohapala.
Kirina ene iyaakha 14, kaahixutta okhala mulavilavi oowaawoka atthu. Mwa ntakiheryo, kaanithuma iroroce, ipulsera, ni anela yaaheliwa eweero vasulu vaya. Nto kaanilepa vasulu vaya “ouro 14 quilate”, kinatumiha mphironi ni mapuro yaapwehiwa ikaaro sa shopping centers. Waanikisivela ophwanya musurukhu mwa enamuna eyo! Nihiku nimosa, kaahiphwanya idoolare 10.000!
Kirina ene iyaakha 15, kaahoomoliwa enupa yaakhala anaxikola; nto eyo yaahikiiriha ohikhalana opuro wookhala. Kaanirupa mphironi, mparkeni, wala inupa sa apatthani aka.
Mwaha wa mweettelo aka, mapoliisia yaamakela okivara. Masi okhala wira nkaatumiha itthu soowiiyiwa, nkaatonko otthukiwa. Masi kaahaana oliva muulutha mwaha wa wootha, ni otumiha itthu voohikhalana elisensa. Nto okhala wira nkaamoova mutthu, kaanaavekela atthu ijuuru sinceene. Mweettelo owo waari wowoopiha, nto kaaneetta ni kapwitthi. Ikwaha sikina, kaaneetta ni igrupu sa anakrime.
MOOTA BIIBILIYA ORUKUNUNXE AWE OKUMI AKA: Okathi woopacerya kaiwale aka sa Biibiliya kaarina iyaakha 17. Kaakhala ni namorada aka yoowo aapacenrye omusoma Biibiliya ni Anamoona a Yehova. Okhala wira nkaaphavela mweettelo wooloka onitumereriwa ni Biibiliya, kaahimuhiya muthiyana ole nto kinakhala ni mukina.
Masi, muthiyana ole aahipacerya-tho omusoma Biibiliya! Aahipaka marukunuxo mookumini, nave aanikhala oowiiyeviha ni oopixa murima. Eyo yaahikivara murima. Nto okathi kaalattuliwaka orowa Empa ya Omwene ya Anamoona a Yehova, kaaheemya. Miyo kahaakheliwa ni atthu ooreera murima ni oophenta. Eyo yaanivirikana ni olumwenku kaasuwela aka! Nkaatonko ophentiwa siisaale ni amusi aka, hata okathi kaari aka mwaana. Masi moota kaaphentiwe aka ni Anamoona, waahikivara murima. Nto okathi kaavahiwe aka yoosoma ya Biibiliya, kaaheemya moohakalala.
Waaniheryasa ele yaaxuttaka mBiibiliyani ehoopola okumi aka. Miyo ni apatthani aka anli niira nuupuwelelaka wiiya opuro omosa, maana kaahaana oliva musurukhu waavikana 50.000 idoolare sene mwaha wa jogatina. Kinnihakalala vanci okhala wira kaahitthikela ottuli! Ale yeettana aka yaahirowa ohoolo ni palano ole. Masi mmosa aahivariwa, nto mukina aahiiviwa.
Yoosoma aka ya Biibiliya yaahikooniherya wira kaahaana opaka marukunuxo. Mwa ntakiheryo, kaahixutta wira ‘anawiye, anamilili, alipa-òwapa akhw’aya, anamuhapaliwa, ni atthu oowaakha itthu sanene: ‘khavo a yala anwerya okela momweneni mwa Muluku’. (1 aKorinto 6:10) Okathi kaasomale aka yoolepa eyo, kaahipacerya omoroxa maithori. Kaahoona wira kaahaana orukunuxa okumi aka moomalela, maana kaari mutthu oowali, ootakhala ni nawoothe.—aRoma 12:2.
Masi, kaahixutta-tho wira Yehova toomoriwa ikharari ni toolevelela. (Yesaya 1:18) Kaahinvekela Yehova, kinvaraka metto wira okikhaliherye ohiya mweettelo aka woohiloka. Nto vakhaani-vakhaani, kaahiwerya ohiya mweettelo ole. Mwa ntakiheryo, kaahilepiha ekasamento ni muthiyana ole kaakhalanaka.
Miyo kaarina iyaakha 24, kaahithela, ni kaahikhalana anamwane 3. Nto kaahaana waavya muteko wookhalela. Masi nkaasomme vanci ni nkaasuwela itthu sinci. Kaahinvekela-tho Yehova. Nto kinarowa waavya muteko. Ale kaavekelaka muteko, kaaleela wira kaaphavela orukunuxa okumi aka ni ophwanya yoolya mookhalela. Ikwaha sikina, kaanaalela wira kaamusoma Biibiliya ni Anamoona, nto kaaphavela okhala mutthu ooloka. Masi khuuvo aakiphavela. Wanikisa waya, nuumala ohimya yoolakela aka, mulopwana mmosa aahimyale so: “Nkinsuwela nthowa naya, masi ehaavo etthu enkileela wira kihaana woovahani muteko”. Yehova aahaakhula mavekelo aka. Nto moohipisa, miyo ni amwaaraka naahibatiziwa khukhala Anamoona a Yehova.
MOOTA OTTOTTENLE AKA MUREERELO: Olelo-va kamukumi mwaha wa weettela malakiheryo a Biibiliya ni otthara mweettelo wa eKristau. Emusi aka ti yoohakalala. Nave kookhalana yowuupuxerya ya murima yooloka, maana koosuwela wira Yehova ookilevelela.
Vano soovira iyaakha 14, kivaraka muteko wa Muluku wa okathi wotheene. Muteko aka waakhaliherya atthu omwiixutta Biibiliya; nave mwaaraka ookela niinano muteko mmosaru. Mwa iyaakha 30 sivinre, kihaakhaliherya atthu 22 yaawo anivaranaka muteko okhala Anamoona a Yehova. Nlelo kinnirowa ilooja sa shopping centers, masi nkinrowela wiiya. Kiniphavela waavaha atthu yoolipelela ya elapo esya ehinrowa okhala anawiiye.—Esalimo 37:10, 11.
[Eponto yuulupale epaaxina 11]
Olelo-va kamukumi mwaha wa weettela malakiheryo a Biibiliya