NYUWO MWAANISUWELA?

Niireke aYuda yaaronwe oYerusalemu Pentekoositi a 33 EC, yaakhuma wa “maloko othene a vathi”?

Filo, muYuda yoowo aakhala okathi owo, oolepa mwaha onivarihana ni eliivuru ya Miteko 2:5-11, wira atthu yaahirowa oYerusalemu nihiku na Pentekoositi a 33 EC.

Voohimya sa ale yaaronwe oYerusalemu, Filo, aalempe so: “Atthu oohikontareya yaakhuma mittetthe soovirikana, akina mwentto, akina ni ikalawa, akhumaka epantte enikhuma nsuwa, onikela nsuwa, onikela epheyo ni okuusini mwaha wa niira nlo”. Owo aahilavula-tho sa epaphelo ya Agripa I, musulu awe Herodi Muulupale, aamulepenle awe Namalamulela a oRoma Caligula. Epaphelo eyo, Agripa aahilavula sa Yerusalemu oriki: “Muttetthe woowaarya . . . ti ekapitaali ohiya ya oYudeya paahi masi-tho ya ilapo sinceene mwaha wa atthu akina yaawo khalai yaaroihiwe ilapo sowaattamela sinilamuleliwa ni aRoma”.

Agripa aahilepa ilapo saaphwanyaneya aYuda ohela muhina mapuro oorakamela a oMesopotamia, mpantta Onikela Epheyo wAfrika, wAsia Menor, oGresia, ni isisiro sa oMediteraaneo. Musomi Joachim Jeremias, aahimmye so: “Nnaamwi ipaphelo iyo sihiromolaka mikwaha sa orowa oYerusalemu, masi atthu yaanirowa, maana nlamulo naahimya wira aYuda otheene oowunnuwela yaahaana orowa waattittimiha Apwiya Muluku aya”.​—Otumererya 16:16.

Yaavahiwa sai opuro woorupa, atthu anceene yaale yaarwa oYerusalemu okathi wa ifesta sa aYuda?

Khula eyaakha, atthu a oYerusalemu yaanuupuwelela ifesta tthaaru, eyo piiyo, Paasikha, Pentekoositi, ni Niira na Maxaxa. Eseekulu yoopacerya, ikonto imiya sene sa atthu yaanirowa oYerusalemu okathi wa ifesta iyo, atthu awo yaakhuma mittetthe sa wIsarayeli ni ilapo sikina yaakhala aYuda. (Luka 2:41, 42; Miteko 2:1, 5-11) Otheene aya yaanitthuneya ophwanya opuro woorupa.

Akina yaarupa wa apatthani aya, ni inupa saamaka aya aletto. Anamunceene yaamaka muheemani mukerekhere mwa ixiri sa epooma. Mukwaha wookiserya Yesu aari awe oYerusalemu, aarumpe muttetthe wa oBethania.​—Matheyo 21:17.

Waattamela otemplo, soophwanyiwa milepe sinceene sa etanki yaarumeeliwa wira atthu arapeke. Opuro owo waanirumeeliwa ni atthu ale yaarweela niira nlo wira ephumurye ni wiireeriha ehinatthi okela mutemplo. Yoolepa emosa ephwanyiwe opuro ola enooniherya wira Theodotus namukuttho ni mukhulupale a esinagoga ya opuro ole, “aahitekiha esinagoga eyo wira esommweke eTorá . . . Ohiya-vo, aahiteka inupa sa aletto, isaala, ni itanki sa maasi wira sirumeeliweke ni aletto”.