Nilokiherye Inamuna Sahu Soolaleerya: Moota Wowaakhula Ale Aniphavela Onikwasa Masu
Otthuneya Waya: Nilikanyihe wira ennaattamela ehasara yeephattu. Wira atthu ahikhwe ahaana otthyawa. Vano nyuwo munnirowa wa namwaattamanani anyu wira mmulopole, masi onookwasani masu oriki khoreere waatteliwa miteko. Tthiri, nyuwo khimwaarowa omuhiya mowaakuveya maana muniphavela omukhaliherya! Moolikanasa, anamunceene a muttetthe ahu annikwasa masu, khanisuwela wira ihapari sinilaleya ahu sinoopola ikumi. Waaniheryasa okathi nnaaphwanya ahu, aniira yaatteliwe ene miteko. (Math. 24:37-39) Aahiiso sihaavo itthu sowoothiwa yiiwale aya. (Math. 11:18, 19) Wala anuupuwela wira hiyo nnoolikana ni itiini sikina sinipaka itthu soohiloka. (2 Ped. 2:1, 2) Nto, akhala wira mutthu owo wanipacerya khonicalela, nihaakuveke omuhiya.
Moota Wowaakhula:
• Muhinatthi opacerya olaleerya khula empa, muupuwelele vakhaani moolumo anilavuliwa ni atthu wira yaakwase masu anna, ni muupuwelele moota wowaakhula.
• Akhala wira mutthu owo khoniphavela ovaanela, mooreerela murima muhaakuve omuhiya. Omuttottopela pooti okhaliherya. Mwa ntakiheryo, akhala wira onihimya wira ohaana etiini awe, pooti waakhula so: “Kinnihakalala mwaha womphwanya mutthu ntoko nyuwo onisiveliwa masu a Muluku”. Nave-tho, weemererya muupuwelo wala makhalelo a mutthu owo pooti wookhaliheryani. Mwa ntakiheryo, akhala wira onihimya wira ohaatteliwa miteko, pooti ohimya so: “Kihiiwa. Masi kihinatthi okhuma, ehaavo etthu eniphavela aka woovahani”. Enamuna ekina enikhaliherya, ti opaka nikoho. Pooti omukoha so: “Exeeni ehiniphavela anyu, kiireke Biibiliya, wala etiini?”
• Mukhale a miruku. Muupuweleke wira Yehova khonimukhanyererya mutthu wira omwiiwelele. (Otum. 30:19) Khula mutthu ohaana muritti awe ohoolo wa Muluku. (aGal. 6:5) Akhala wira mutthu owo khoniphavela tthiri oniwiriyana, nihaana okhuma. Nattittimiha moonelo awe, nnimwaakhaliherya anna akina wira amulaleerye muhoolo.—1 Ped. 3:15.
Mweererye Ela Mweeri Yoola:
• Nuumala okhuma vapuwani wa mutthu ookwanseni masu, nvaanele ni ole murina anyu ni moone akhala wira muhaakhula saana.