MAKHALELO A MAKRISTAU
Kinrowa Owerya Liini Okhala Pioneero Ookhaliherya?
Etemplo ooniheriwe awe Ezekiyeli yooniherya wira atthu a Yehova yaarowa opakaka soovaha soohikhanyereriwa. Nto hiyo ninrowa wiimananiha sai wira nikhaliherye omwene?—aHé 13:15, 16.
Enamuna emosa ti okhala pioneero ookhaliherya. Mwaakha wa 2018 wookhalana myeeri sinceene sirina Isaabadu ni Ittiminku 5. Eyo enimwaakhweiherya ale anivara muteko wa mulaponi esumana yotheene wira akhaleleke nthiti muteko woolaleerya wuumalani wa esumana. Ohiya-vo, anamalaleerya pooti othanla ovahererya iwoora 30 wala 50 myeeri sa Março ni Abril ohela muhina mweeri anixukuriwa aya ni mutokweene a esirkwiitu.
Nto ninrowa opakaka exeeni vakhala wira makhalelo ahu khanneemererya okela muteko wa opioneero wookhaliherya? Hiyo pooti wiimananiha wira nipake ele eniwerya ahu ni olokiherya muteko oninvarela ahu Muluku. Khula makhalelo arina ahu, omphenta wahu Yehova ohaana onitumererya okhalela nthiti miteko sa Muluku mwaakha wa 2018!—Ho 14:2.
Kinrowa omutakiha sai Sabina Hernández?
NWEHE EVIIDIYU ENI: KIKHALIHERIWAKA NI YEHOVA KINNIWERYA OVARA KHULA ETTHU, NTO MWAAKHULEKE MAKOHO ALA ANITTHARELANA:
Exeeni enimwiiriha Sabina okhalela nthiti muteko wa Yehova?
Moota xeeni ntakiheryo na Sabina nnoolipihaayani?
Mwaakha wa muteko wa 2018, myeeri xeeni munrowa anyu owerya okhala pioneero ookhaliherya?