Yesu Ookhalana Owerya Wowoomola malaikha Ootakhala

Nuumala omaalihiwa munamukhaya ole muulupale, awiixutti ale yaahiphiya okhopela wa ephareya, weiwo yaakhumelenle etthu yaatikininhe. Alopwana anli ootakhala yaahikhuma omahiye anarowa okumana Yesu. Alopwana awo yaavariwe ni malaikha ootakhala! Mmosa aalopwana awo, woonasa wene aari ootepa otakhala ni aahiviriha okathi munceene eettihiwaka ni minepa sootakhala.

Mukhalelo wa mulopwana ole waari wowooniha othunku ni eetta ohiwanre etthu. Othana ni ohiyu “etta omahiye n’umwako, akhuwelaka, ìvulalihaka ni maluku”. (Marko 5:5) Mulopwana ole aari ootepa otakhala ni aaniwiiriha atthu woova ovira ephiro ele. Atthu akina yaaheererya omutthukwa, masi aanikwasa ikwirinti iyo. Tthiri khuuvo mutthu aawerya omutthukwa.

Nuumala omwaattamela, owo aahikokhora ohoolo wa Yesu. Nlaikha nne nootakhala naahimmoroxela vathi nnamwiiriha okhuwela oriki: “Murina-ni ni miyo, nyuwo Yesu, Mwana a Muluku Mulupalexa? Kinnolipelihani ni nsina na Muluku: muhikihaxé!” Yesu aahooniherya wira ookhalana owerya ovikana malaikha ale ootakhala, orumaka wira: “Weyo, nlaikha nonanara, okhumé mwa mutth’ula”.—Marko 5:7, 8.

Tthiri, atthu anceene yaahivariwa ni malaikha ootakhala. Yesu aahimukoha mulopwana ole wira: “Nsina nawo t’ani?” Owo aahaakhula wira: “Nsina naka Muttitthí, mana khinrere”. (Marko 5:9) Muttitthi wa anakhotto ooRoma waanikhalana atoropa anceene. Tivonto, malaikha manceene yaahiiraana wira amuhaaxeke. Awo yaahimuxonttela Yesu wira “ehòmoleliwe mapuro aya òwìxerya”. Woonasa wene, yaanisuwela wira muhoolo anrowa otthukweliwa opuro owo vamosa ni muhooleli aya Satana.​—Luka 8:31.

Waattamela opuro ole saahikhala ikuluwe 2.000 saalya. Nto moovarihana ni Nlamulo, ikuluwe saari inama sa mwiikho ni aYuda khiyeemereriwa ohuwa. Malaikha ale yaahihimya wira: “Munirumihele ikuluwe iye, wira nakele seiye”. (Marko 5:12) Nto Yesu aahaaleela okela mukuluweni. Vano, ikuluwe iye 2.000, saahirowa oneri khwiirihela mphareya.

Vaavo atthu ale yaalyiha ikuluwe yoonale aya eyo, yaahirowa mmuttettheni ni opooma olaleya muhupi ole. Nto atthu awo yaahirowa oweha etthu yiiraneyale. Vaavo yaaphiyale aya, yaahinweha mulopwana ole aavariwe minepa sootakhala ori ene mukumi. Masi mulopwana ole, aahiwarihiwa ikuwo khukilaathi vaari Yesu!

Atthu ale yaiwale ni yoonale etthu yaamwiiranenle mulopwana ole, yaahitikinihiwa ahinasuwela etthu yaataphulela aya. Nto yaahimoomola Yesu mmuttettheni mwaya. Okathi Yesu aakhuma awe ni ekalawa, mulopwana ole aavariwe malaikha ootakhala, aahimuxonttela Yesu wira omutthare. Masi Yesu aahimwaakhula wira: “Muroke owannyu: mwalèle amus’inyu sothene siwirenlyayani Apwiya, n’ikharari somorenlyayani”.​—Marko 5:19.

Okhala wene, Yesu aanaaleela ale aavoniha awe wira ahimuleele mutthu, okhala wira khaaphavela wira atthu amulavuleke attharihelaka itthu yiiwa aya. Masi yowiiraneya ela, yaari ethoonyeryo yoowi Yesu ookhalana owerya. Nave aamwaalaleerya atthu Yesu aahaarowa awe olavulana mmensawe. Muhupi ole waahaakhaliherya atthu otheene ohilavula moohiloka ni ohikhumuwa mwaha wookhwa ikuluwe sinceene. Tivonto, mulopwana ole aahirowa olaleya ele Yesu aapanke awe mittetthe sa oDekaapoli.