Nilokiherye Inamuna Sahu Soolaleerya​—Nihiyeke Omusomiha Biibiliya Mutthu Ohinrowa Vahoolo

OTTHUNEYA WAYA: Atthu ahaana ovekela ni nsina na Yehova wira yoopowe. (aRo 10:13, 14) Aakhala atthu aneemya omusoma Biibiliya masi ahiniphavela weettela malamulo a Yehova. Ninnirumeela mwa miruku okathi ahu woolaleerya, vaavo nnaakhaliherya ahu atthu aneemya opaka marukunuxo wira emusivelihe Yehova. Akhala wira naxikola onniviriha okathi munceene omusomaka Biibiliya masi ohirowaka vahoolo, mwa miruku nyuwo pooti ohiya osoma ni mutthu owo ni owaavya atthu akina Yehova onaathanlela awe mmutthenkesoni mwawe. (Yoh 6:44) Akhala wira muhoolo mutthu owo onimooniherya wira onniphavela opaka marukunuxo ni onniphavela “ekumi ehinimala”, mooreera murima pooti otthikela osoma ni yena.​—Mit 13:48.

MOOTA WOOPAKA EYO:

• Mmuttottopele mwaha woophavela wiixutta ekeekhai.​—1 Ti 2:4

• Mmooniherye otthuneya waya weettela itthu oniixutta awe.​—Luk 6:46-49

• Mooreera murima muthokorerye nlikanyiho na Yesu na mulipa-oowaala, ni mmukohe etthu enimukhoottiherya orowa vahoolo.​—Mat 13:18-23

• Mwa miruku mmuleele nthowa naya munrowa anyu ohiya osoma ni yena

• Mmuleele wira mahiku makina munoomuxukuryaka wira mmulipiheke. Nave mmuleele wira muhoolo aphavela-tho otthikela osoma, pooti wooleelani

NWEHE EVIIDIYU, NUUMALA-VO MWAAKHULEKE MAKOHO ALA ANITTHARELANA:

• Exeeni mwiixuntte anyu voohimya sa ovaanela onooniherya wira naxikola ole khonirowa vahoolo mwa omunepani?

• Moota xeeni namalaleerya omukhalihenrye awe naxikola wiiwexexa wira ohaana opaka marukunuxo?

• Namalaleerya omukhalihenrye sai naxikola oweha wira aaphavelaka-vale muhoolo pooti otthikela osoma?