Exeeni Yaamwiiriha Mutthu Orava Mwiikho?

Vaavo aattamela awe Paasikha a 32 EC, Yesu iira oluttuweliwe ene wiixuttiha oGalileya. Woonasa wene, aahimurowela Paasikha oYerusalemu, moovarihana ni Nlamulo na Muluku. Masi, Yesu aaniikasoopa okhala wira aYuda yaaphavela omwiiva. (Yohani 7:1) Nuumala-vo, aahitthikela oGalileya.

Waaniheryasa, Yesu aari oKafarnawu, okathi aFarisi ni alipa-oolepa yaakhumme oYerusalemu yaarwiiye aya okumana ni yena. Xeeni ahalaka opaka mukwaha ole? Awo yaaphavela mathowa wira amootherye Yesu wira aanihonona soolema saya sa etiini. Vano yaahimukoha wira: “Awixutti anyu ahinttharela-ni ikano s’atthu a khalai? Awo annolya ehinyanwe!” (Matheyo 15:2) Muluku khotonko waavekela arumeyi awe otthara yoolema ya ‘olya ohinyanwe orattene’. (Marko 7:3) Nto aFarisi ale yoona wira ohipaka eyo waari oveeha wuulupale.

Ohiya owaakhula mooluluwanya, Yesu aahiwooniherya wira atthu ale yaanihonona Nlamulo na Muluku. Nuumala-vo, Yesu aahaakoha wira: “Khi nyuwo, muhinttharela-ni soruma sa Muluku mwaha wa ikano sanyu? Vekekhai, Muluku òhimya wira: ‘Mwattittimihe atitth’inyu n’ame anyu’. Òhimya-tho wira: ‘Ole onaveha atithi awe walá ame awe, ìviwe’. Nto nyuwo munnihimya wira: akhalá mutthu onahimerya atithi awe walá ame awe wira: ‘Sorera sarinanyu wakhela wa miyo ti s’onvaha Muluku’, mutth’ule khanvareliwa wattittimiha atithi awe n’ame awe”.​—Matheyo 15:3-6; Okhuma 20:12; 21:17.

AFarisi yaahimya wira musurukhu, ematta aahiiso khula etthu aavahiwa Muluku yaari ya etemplo. Nto khiyeemereriwa opakeliwa etthu ekina. Masi etthu eyo nlelo yaanikhala ni mutthu owo. Mwa ntakiheryo, mwaana ahimya wira musurukhu aahiiso etthu ekina ti ‘korbani’, eyo piiyo, etthu evahiwe Muluku aahiiso etemplo; yoovaha eyo yaakhala ntoko yaari otemplo. Musurukhu aahiiso yoovaha eyo yaanirumeeliwa ni mwaana owo, masi kheemereriwa orumeela wira aakhaliherye atthu oowuuluvala aahiiso anamuyari awe oothoiwa. Nto eyo yaanimukhoottiherya mwaana waakhapelela anamuyari awe.​—Marko 7:11.

Yesu aahiwooniherya wira yaanihonona Nlamulo na Muluku, oriki: “Nyuwo mopwetexa yoruma ya Muluku, mwaha wa ikano sanyu. Anawothe! Profeta Yesaya khòthale ahimyaka sa nyuwo wira: ‘Atthu ala annikittittimiha ni molumo pahi: mirima saya siri ottaiwene ni miyo. Awo annikikokhorela siyo: ikano sinixuttihaya ti soruma s’atthu pahi’”. AFarisi ale khiyaawenrye omwaakhula Yesu. Tivonto Yesu iitthanne awe muttitthi ole waari vakhiviru khwiira: “Mukiwiriyane, musuwele sana. Enimuraviha mwikho mutthu khahiyó ele enkela mwano mwawe. Itthu sinkhuma mwano ti sinimuraviha mwikho mutthu”.​—Matheyo 15:6-11; Yesaya 29:13.

Muhoolo mwaya Yesu ori ene etthoko aamanke awe, awiixutti awe yaahimukoha wira: “Mosuwela wira aFarisi yahithamala enanariwene, mwaha w’owiwani mulavulaka siso?” Yesu aahiwaakhula wira: “Miri sothene sihiphatteiwe n’Atithi ari wirimu, sinopheliwa. Mwahíyeke: awo atthú ahinòna aniwettiha òhona akina. Vano, mulipa-òhòna amwettihaka mukhw’awe ohinòna, òwanli aya anomorela mulittini”.​—Matheyo 15:12-14.

Yesu aahitikinihiwa nuumala onweha Pedru, omukohaka ele yaamwiiriha mutthu orava mwiikho. Yesu aahiwaakhula wira: “Khamunsuwela wira sothene sinkela mwano mwa mutthu sinnivira mmirimani, khíyakhumela otá? Nto itthu sinkhuma mwano, sinnivenya mmurimani: iyo ti sinimuraviha mwikho mutthu. Vekekhai, mmurimani mwa mutthu sinnikhuma sowupuwela sonanara, wiva, oraruwa, enamuttompe, wiya, owotherya atthu n’uwapa. Iya t’itthu sinimuraviha mwikho mutthu. Vano, olya ohinyanwe khunimuraviha mwikho mutthu”.​—Matheyo 15:17-20.

Khahiyo wira Yesu aakhoottiherya oratta aahiiso onyawa ahinatthi olokiherya yoolya wala olya. Masi Yesu aapwapwela mukhalelo wowootha wa ahooleli ale a itiini, maana yeererya ohonona exariya ya Muluku mwaha wa soolema sa apinaatamu. Tivonto, miteko sootakhala sinikhuma vamurimani ti sinimwiiriha mutthu orava mwiikho.