Ireferensia sa Okumi ni Orummwa Ahu Ekaderno Enirumeeliwa Omuthukumanoni
1-7 ya Abril
MIHAKHU SINIKHUMA MBIIBILIYANI | 1 AKORINTO 7-9
“Ohithela Aahiiso Ohitheliwa—Yoovaha ya Muluku”
w11 15/1 17-18 etti. 3
Mwiiriheke Ohithela Wanyu Okhumela Saana
3 Mutthu oohithela aahiiso oohitheliwa onnikhalana okathi munceene ni onkhala ootaphuwa onvikana mutthu oothela. (1 aKor. 7:32-35) Iyo ifaita suulupale sikhanle oomweemererya wuncererya muteko oninvarela awe Muluku wuncererya waaphenta wawe atthu akina, ni omwaattamela Yehova. MaKristau manceene, annoona mireerelo mutthu oniphwanya awe mwaha wa ohithela, nto awo annilakela oviriha okathi ehithenle. Akina wanipacerya khiyaarina palano a ohithela, masi nuumala makhalelo aya oturukeya, yaahipaka nivekelo ni yaahoona wira akhaliheriwaka ni Yehova yanwerya okhapelela murima aya. Tthiri, awo aheemererya makhalelo masya ni aalakela okhala ehithenle.—1 aKor. 7:37, 38.
w08 15/7 27 etti. 1
Iponto Suulupale sa Ipaphelo sa aKorinto
7:33, 34—Itthu xeeni “sa vathí-va” sinaaxankiha alopwana oothela aahiiso athiyana ootheliwa? Paulo aahimya itthu sa werutthuni seiyo muKristau oothela onitthuneya awe ovaha ephoole. Itthu iyo sinihela muhina eyoolya, ikuwo, ni opuro wookhala, masi khasinihela muhina itthu soohiloka sa olumwenku ola seiyo maKristau anitthuneya aya osyaka.—1 Yohani 2:15-17.
w96 15/10 12-13 etti. 14
Ohithela Aahiiso Ohitheliwa—Onnimweemererya mutthu ovara miteko mootaphuwa
14 MuKristau oohithela, yoowo onirumeela mukhalelo awe wira ophaveleke itthu sa nrima, khonipaka etthu “yorera” onvikana mukristau oothela aahiiso ootheliwa. Owo onnivikaniha okhala oohithela, ohiya mwaha wa ‘Omwene’ masi mwaha wa soophavela sa omwaneene. (Matheyo 19:12) Mulopwana oohithela aahiiso muthiyana oohitheliwa, oohaana ‘othokorerya muteko w’Apwiya’, ‘wetetela itthu sowasivela Apwiya’ ni ‘wivahererya wa Muluku’. Eyo entaphulela wiivahererya omurumeela Yehova ni Yesu Kristu moomalela. Eyo ti enamuna emosa paahi maKristau oohithela aahiiso oohitheliwa akhanle aya oowooniherya wira anniira saana waavikana maKristau oothela.
Otokosa Itthu sa Efaita Soomunepani
lv 220-221
Apendise
Sookhala mikhalelo sikina sootakhalexa, siniwiiriha maKristau makina othanla omwalana wala ovalaana nnaamwi ohikhanle orarunwe. (1 aKorinto 7:11) Nkahaya muthokorerye itthu sikina sootepexa, siniwiiriha atthu akina othokoreryaka ntoko mathipelo a ovalaana.
• Okhootta okhaliherya etthoko: Atthu a vatthokoni pooti ohaawaka, mwaha woohikhala yoolya ni soowara, akhala wira mulopwana owo khoniphavela oruuha itthu iyo.—1 Timótheyo 5:8.
• Omuhaaxa ole othelanne awe mmukhalelo wa werutthuni: Pooti wira mulopwana wala muthiyana oowali, onnimuhaaxa vanceene ole othelanne awe, nto ekumi ya ole onihaaxiwa enikhala mmaxakhani.—aGalasia 5:19-21.
• Omukhoottiherya ole othelanne awe omukokhorela Yehova: Mulopwana wala muthiyana, pooti weereryaka ikwaha sinceene wira ole othelanne awe, ohiye omukokhorela Yehova”.—Miteko 5:29.
w00 15/7 31 etti. 2
Munoowerya Okhala Oowiisuumaliha Olumwenku Ola Wootakhala
Amiravo ahaana osyaka waakuvela othela aahiiso otheliwa okathi yoole erutthu aya eniphavela aya paahi orupihana. Othela aahiiso otheliwa, muritti muulupale, nto onitthuneya wiilokiherya vahinatthi wira mutthu okhale oolikana eene. (Maphattuwelo 2:24) Ti vooloka olipelela mpakha ovira okathi “w’okhummwa murima”, eyo piiyo okathi mutthu oniphavela awe paahi orupihana. Nave okathi owo pooti ohikhweya okhala oowiisuumaaliha aahiiso ohiraruwa. (1 aKorinto 7:36) Vaarowa okhala othoiwa miruku ni vootthekeya, mutthu oniphavela othela wala otheliwa opacerya weetta onamuttompe mwaha woohimphwanya mutthu oniphwanelela othelana!
Omusoma Biibiliya
8-14 ya Abril
MIHAKHU SINIKHUMA MBIIBILIYANI | 1 AKORINTO 10-13
“Yehova Toororomeleya”
Makoho Anikohiwa ni Ale Anisoma Irevista Sahu
Murummwa Paulo olempe wira Yehova “khanihiya wira mwehereriwe ovikana ikuru sanyu”. (1 aKorinto 10:13) Niireke eyo enitaphulela wira Yehova onnithanla vahinatthi weehereriwa oniwerya ahu ovilela nuumala-vo khiyathanla muxankiho ene?
▪ Akhala wira eyo ekeekhai, nkahaya muupuwele moota okumi ahu waarowa aya okhala. Mwa ntakiheryo, nkahaya muupuwele ela: mwaana a munna ohiixiiva. Tiithi awe ooriipiwa murima vanceene. Owo onnikoha akhala wira Yehova aanisuwela itthu saarowa okhumelela nto onathanla akhala wira owo ni amwaarawe yanwerya ovilela ehasara ele. Olumwenku ola, anamunceene a hiyo nnookumanana ihasara. Nto niireke nihaana okupali wira Yehova onniweha-weha itthu sotheene sinikhumelela mookumini mwahu?
Vaavo ninrowa ahu omuthokorerya 1 aKorinto 10:13, ninrowa woona wira Biibiliya khonikhaliherya muupuwelo woowi Yehova onnisuwela vahinatthi mixankiho siniwerya ahu ovilela, nto onathanla muxankiho ene onrowa ahu okumana. Xeeni vanihimya ahu siiso? Nrowe nthokorerye mathowa maxexe.
Noopacerya, Yehova ohaavaha apinaatamu othanla mootaphuwa, niire so, otaphuwa wira apakeke soothanla saya. Yehova oniphavela wira nipakeke soothanla sahu. (Otumererya 30:19; 20; Yoxuwa 24:15) Akhala wira ninnipaka soothanla sinimusivela Yehova, nto nihaana ororomela wira onoonikhaliherya. (Miruku 16:9) Masi akhala wira nimpaka soothanla soohiloka, nnoohepha ele enaala ahu. (aGalasia 6:7) Vaakhanle wira Yehova aamuthanla vahinatthi mixankiho sahu, nto niireke naamukhalana othanla mootaphuwa?
Na nenli, Yehova khonnaakiherya ‘oreriwa n’utakhaliwa ohinimuthanla mutthu’. (Musuweli 9:11) Mutthu—pooti omukhumelela ehasara—okhala wira ori opuro woohiloka ni okathi woohiloka. Yesu aahilavula sa ehasara yaawiivale atthu 18, okathi yaamorenle aya empa. Yesu ahooniherya wira khahiyo Muluku taawiivale atthu ale. (Luka 13:1-5) Nto khahiyo vooloka wuupuwelaka wira ehinatthi okhumelela ehasara, Muluku onnaathanla tani anrowa woopowa aahiiso okhwa.
Na neeraru, khula mmosa a hiyo ookhalana eparakha yoovikaniha okhala ororomeleya wa Yehova. Satana aahimmye wira arumeyi a Yehova, animurumeela yena mwaha wa itthu onaavaha awe. Satana aahimmye wira hiyo khininwerya okhala oororomeleya wa Yehova akhala wira ninnikumana mixankiho sinceene. (Yobi 1:9-11; 2:4; Wisupulula 12:10) Vaakhanle wira Yehova onninaakiherya mixankiho sikina, nto eyo yaarowa wooniheryaka wira Satana aahimya ekeekhai.
Na neexexe, Yehova khoniphavela osuwela vahinatthi itthu sotheene sinrowa onikhumelela. Ekeekhai wira Yehova onoowerya osuwela itthu sinrowa okhumelela muhoolo aphavela vale. (Yesaya 46:10) Masi, Biibiliya onnooniherya wira Yehova onnithanla ohiphavela osuwela vahinatthi itthu sotheene sinrowa onikhumelela muhoolo. (Maphattuwelo 18:20, 21; 22:12) Yehova toophenta ni taxariya, nto khonnikhoottiherya opaka soothanla sahu mootaphuwa.—Otumererya 32:4; 2 aKorinto 3:17.
Nto, Paulo aaphavela ohimya exeeni vaavo aahimmye awe wira Yehova “khanihiya wira mwehereriwe ovikana ikuru sanyu”? Ni masu ala, Paulo onnitthokiherya ele Yehova onipaka awe okathi wa weehereriwa ohiya nihinatthi weehereriwa. Akhala wira ninnimuroromela Yehova, owo onrowa onikhaliherya okathi ninkumana ahu khula yooweeha mookumini mwahu. (Esalimo 55:23) Vano, nrowe nthokorerye mathowa manli yaamwiirinhe Paulo olavula masu awo.
Nthowa noopacerya ti noowi mixankiho sothe-ene sinikumana ahu “sinnapwanya” atthu otheene. Okathi wotheene ninkhala ahu olumwenku ola wa Satana, nnookumanaka mixankiho sinceene, hata ihasara. Masi, akhala wira ninnimuroromela Yehova, nnoovilelaka mixankiho iyo ni ovikaniha okhala oororomeleya. (1 Pedro 5:8, 9) Wanipacerya wa ekapiitulu 10 ya 1 aKorinto, Paulo oolepa soweeha saaphwannye aIsarayeli moothakoni. (1 aKorinto 10:6-11) Ale yaamuroromela Yehova yaahiwerya ovilela soweeha iyo. Masi aIsarayeli akina khiyaamwiiwelenle Yehova. Nto awo khiyaavikaninhe ororomeleya okhala wira khiyaamuroromenle Yehova.
Nthowa na nenli, okhala wira Muluku “t’òroromeleya”. Eyo enitaphulela exeeni? Oweha moota Yehova onaakhapelela awe arumeyi awe okhuma khalai, ninnoona wira moororomeleya onnaakhaliherya ‘ale animphenta, ni anìwelela ikano sawe’. (Otumererya 7:9) Nave ninniixutta wira okathi wotheene Yehova onnimaliherya sooleiherya sawe. (Yoxuwa 23:14) Tthiri nikupaliki itthu iya piili: (1) Yehova khonrowa weemererya wira yooweeha etepaxe ovila nihinwerya ahu ovilela, ni (2) owo ‘ononivaha ikuru’ . . . wira nixintte.
Moota xeeni Yehova ‘onaavaha awe ikuru’ ale animuroromela? Tthiri owo pooti okumiha muxankiho ahu. Masi muupuweleke wira Paulo ohimmye wira Yehova “onimovahani ikuru sinweryananyu ovilela n’uxintta”. Tivonto, Yehova khula okathi onninivaha ikuru wira nivikanihe okhala oororomeleya. Nrowe nthokorerye inamuna vakhaani sa moota onipaka awe eyo:
▪ Yehova ‘onninihakalaliha mwa inamuna sothene’. (2 aKorinto 1:3, 4) Owo onoowerya omaaliha muupuwelo ni murima ahu omurumeelaka Biibiliya, munepa awe wootteela ni murumeyi oororomeleya ni a ankhili.—Matheyo 24:45; Yohani 14:16, aRoma 15:4.
▪ Yehova pooti orumeela munepa awe wootteela wira onikhaliherye. (Yohani 14:26) Munepa wootteela pooti onikhaliherya wuupuwelela sowiiraneya ni malakiheryo a mBiibiliyani wira nipake soothanla mwa miruku.
▪ Yehova pooti orumeela malaikha wira anikhaliherye.—aHéberi 1:14.
▪ Yehova pooti waarumeela anna ni arokora wira anikhaliherye. Awo pooti onlipiha ni moolumo ni miteko saya.—aKolosi 4:11
Nto, exeeni yiixuntta ahu ni moolumo a Paulo aniphwanyaneya 1 aKorinto 10:13? Yehova khonithanla sooweha ninrowa ahu okumana. Masi nikupaliki wira namuroromela Yehova nnoowerya ovilela sooweha iyo. Ninnisuwela wira okathi wotheene Yehova onrowa onivaha ikuru wira niweryeke ovikaniha okhala oororomeleya wa yena!
Otokosa Itthu sa Efaita Soomunepani
w04 1/4 29
Makoho Anikohiwa ni Ale Anisoma Irevista Sahu
Xeeni yoolepa ya 1 aKorinto 10:8 enihimya aya wira aIsarayeli yaiviwe mwaha wa orupihana woohiloka yaari 23.000 vakhalaka wira yoolepa ya Mothakoni 25:9 enihimya wira yaari 24.000?
Aakhala mathowa manceene waanyiheryasa aniiriha mammeru aniromoliwa iveersu iya piili okhala oovirikana. Vanikhala wira atthu yaakhwiiye yaahivikana 23.000 ni khiyaaphin’ye 24.000. Eyo ehiiriha wira yoolepa ya 1 aKorinto 10: 8 nummuru nlo ohimmwaka okhala 23.000, ni yoolepa ya Mothakoni 25:9 ohimmwaka okhala 24.000.
Nrowe nithokorerye muupuwelo mukina. Murummwa Paulo aahihimya yowiiraneya ya aIsarayeli elapo ya oXitimi ntoko yoolopola yaaroiheliwa maKristau a oKorinto wa khalai, epooma yeeyo yaasuweliwa vanceene mwaha wa mweettelo woohiloka. Owo aalempe so: “Nihìreké s’ekhapa, ntoko sìralyaya akinaku a yale: tivó, yahikhwasa atthu ikonto miloko mili ni ttharu [23.000] nihiku nimosá pahi”. Murummwa Paulo aahimmye wira atthu yaiviwe ni Yehova mwaha wa onamuttompe, yaari 23.000.—1 aKorinto 10:8.
Eliivuru ya Mothakoni ekapiitulu 25, enihimya wira aIsarayeli “yahìvahererya mmatatani mwa muluku Bayali-Peyori. Vano Apwiya [Yehova] yahaviruwela vanjene”. Nuumala-vo Yehova aahimuruma Moise owiiva “makhulupale othene a àtthu”. Moise aahaaruma alipa-oophuka milattu ovara muteko owo. Wanikisa waya, nuumala Pineha moowakuveya omwiiva mwIsarayeli aamuruuhale muthiyana ooMadiyani omaxaxani yaamanke aIsarayeli, “ehasara yowiva atthu” yaahimala”. Yowiiraneya ela enimala ni masu anihimya so: “Atthu yakhwiye mwaha w’ehasar’eyo yari atthu ikonto miloko mili ni xexe (24.000)”.—Mothakoni 25:1-9.
Vanikhala wira nummuru ninhimmwa eliivuru ya Mothakoni anihela muhina “makhulupale othene àtthu” yaawo yaiviwe ni alipa-oophuka milattu vamosa ni atthu Yehova aawiivale awe mmansawe. Woonasa wene makhulupale yaiviwe ni alipa-oophuka, yaahiphiya 1000, nto eyo yaahiiriha nummuru nlo wuncerereya mpakha ophiya 24.000. Hata makhulupale awo yaararunwe, wiirela mpantta ifesta, aahiiso oweemererya atthu opaka itthu iyo, awo yaahikhalana nthowa mwaha “woowivahererya mmatatani mwa muluku Bayali-Peyori”.
Nuulumo noowi ‘yahìvahererya’ ereferensia emosa ya Biibiliya enihimya wira pooti otaphulelaka: “waataana vanceene ni mutthu”. AIsarayeli yaari atthu oowiivahererya wa Yehova, masi okathi yaatanne aya ni Bayali-Peyori, yaahihonona nivarihano yaapanke aya ni Muluku. Nuumala ovira iyaakha 700, omurumeelaka profeta Hoseya, Yehova aahaahimeerya aIsarayeli wira: “Awo, vaphiyalyaya omwako Bayali-Peyori, yahipajerya omukokhorela muluku Bayali, khukhala òthanyeya ni òphweliha ntoko muluku amukokhorelaya”. (Hoseya 9:10) Atthu ootheene yahaaroromelen’ye yaahiphwanya ehukhumo ya Muluku. Nave Moise aahiwuupuxerya aIsarayeli wira: “Nyuwo muhóna ni maitho anyu itthu sìralyaya Apwiya oBayali-Peyori. Weiwo, Apwiya Muluku anyu yahapwetexa othene ale yamukokhorenle muluk’uwo éthiru, khwakumiha eriyari anyu”.—Otumererya 4:3.
Makoho Anikohiwa ni Ale Anisoma Irevista Sahu
Niireke vannitthuneya murokora owaraka nleeso okathi oniiriha awe yoosoma ya oryeene ni munna?
▪ “Makoho Anikohiwa ni Ale Anisoma Irevista Sahu” yaakumiheriwe erevista Owehaweha ya 15 a Julyo 2002, vaahihimmwa wira murokora ohaana owara nleeso khula okathi oniiriha awe yoosoma ya Biibiliya oryeene ni munna, okhale oobatiziwa wala nnaari. Nuumala othokoreriwa saana mwaha ola vahooniwa wira vannitthuneya opaka marukunuxo.
Vakhala wira munna ori ni murokora owo okathi oniiriha awe yoosoma ya Biibiliya toobatiziwa, murokora owo ohaana owara nleeso. Murokora owo onnooniherya ottittimiha marehereryo a Yehova voohimya sa okhulupale mmulokoni wa eKristau okhala wira owo onivara muteko yoole okhala wene waarowa ovariwa ni munna. (1 aKor. 11:5, 6,10) Okathi mukina owo pooti onvekela munna orina awe wira omurantteleke wiiriha yoosoma eyo vakhala wira munna owo onniwerya opaka eyo.
Vakhala wira murokora owo oniiriha yoosoma ya Biibiliya ya khalai masi oryeene ni namalaleerya oohibatiziwa mulopwana yoowo ohikhanle iyawe, Biibiliya khonimukhanyererya murokora owo owara nleeso. Masi, yowuupuxerya ya murima ya arokora akina pooti waatumereryaka owara nleeso khula okathi aryaaya ni munna.
Omusoma Biibiliya
22-28 ya Abril
MIHAKHU SINIKHUMA MBIIBILIYANI | 1 AKORINTO 14-16
“Muluku Onomaliherya Oruma Sothene”
w98 1/7 21 etti. 10
“Nwanani Onrowa Okiserya Opwetexiwa, Okhwá”
10 ‘Omala’ onihimmwa wanikisa wa Iyaakha Ekonto Emosa ya Olamulelo wa Kristu, okathi Yesu moowiiyeviha ni moororomeleya onrowa awe omuttikiherya Omwene Muluku awe ni Tiithi. (Wisupulula 20:4) Yoolakela ya Muluku ya “othukumanya mwa Kristu itthu sothene” enrowa wiiraka yiiranen’ye ene. (aÉfeso 1:9, 10) Wanipacerya, Kristu ohaana waapwetexa “makhulupale othene n’ikuru sothene n’uwerya wothene” ohinivarihana ni olamulelo wa Muluku. Eyo enithoonyerya ekhotto ya Harmagedoni. (Wisupulula 16:16; 19:11-21) Paulo aahimmye so: “Kristu ohana okhala mwené, mpakha Muluku wapweha awanani othene vathí va inawu sawe. Nwanani onrowa okiserya opwetexiwa, okhwá”. (1 aKorinto 15:25, 26) Mixankiho sotheene sikumiheriwe ni etampi ya Adamu ni okhwa, sinoomalihiwa. OKathi owo, Muluku onimwaahihimuxa atthu akhwiiye ni anootthikela okhala akumi.—Yohani 5:28.
Omwene Onnipaka Otthuna wa Muluku Valaponi
21 Nto sai voohimya sa ele enikhumelela mwaha wa oretta, yookhumelela ya etampi, niire so, okhwa? Owo ti nwanani ahu “okiserya” yoowo oniwanana aya apinaatamu otheene oohimalela yoowo moohipisa-va onrowa omala-malihiwa. (1 aKor. 15:26) Niireke okhwa ti nwanani Yehova ohininwerya awe? Nwehe ele Yesaya yaahimmye awe vahinatthi wira: “Apwiya anomaliha khuluwí okhwa. Apwiya Muluku animùkuttha maithori owitho wothene”. (Yes. 25:8) Niireke nyuwo munniwerya woona makhalelo a okathi owo? Okathi ole atthu khantthuna orowaka onaakhwani, khonrowa okhala mahiye hata maithori khanrowa omoraka mwaha wa okhweliwa! Ohiya-vo atthu—anrowa omoraxaka maithori mwaha wootteeliwa murima okhala wira Yehova onrowa omwaakhwaniherya natiri awe a waattikiherya ekumi atthu akhwiiye! (Mmusome Yesaya 26:19.) Wuukiseryani waya owereya wotheene waakumiheriwa ni okhweliwa onrowa omala-malihiwa.
w12 1/9 17 etti. 17
Murettele wa Iyaakha Ekonto Emosa ni Muhoolo Mwaya
17 Tthiri khaavo masu oophwanelela anooniherya omaliheriwa wa itthu anilikana ni ala: “Siso Muluku onomaliherya oruma itthu sothene”. Nto masu ala antaphulelani? Nkahaya muupuwele okathi wa wEdeni vaavo Adamu ni Eva yaari aya oomalela; awosa yiirela mpantta emusi ya murettele ni yowiiraana ya Yehova. Yehova, Mukhulupale a Olumwenku wotheene, taalamulela soopattuxiwa sawe sotheene ohela muhina malaikha awe ni apinaatamu. Awo yaaniwerya ovaanela nuuwo, ni omukokhorela ni oreelihiwa. Nto Yehova ‘taruma itthu sothene’.
Otokosa Itthu sa Efaita Soomunepani
w12 1/10 9, ekaaxa
Niireke Murummwa Paulo Ahaakhoottiherya Athiyana Olavula?
Murummwa Paulo aahilepa wira: ‘Athiyana ahana omàlaka’ mmulokoni. (1 aKorinto 14:34) Masu ala a Paulo anitaphulelani? Niireke owo aamuyeviha miruku saya? Nnaari. Owo ikwaha sinceene aanilavula wira athiyana yaniixuttiha miruku sooreera. (2 Timótheyo 1:5; Tito 2:3-5) Epaphelo Paulo aalepenle awe aKorinto, owo ahaalopola ohiya athiyana paahi, masi atthu otheene yaarina ehakhi ya olavula mattaava ni ohimya iprofesiya wira ‘ehilavuleke’ okathi munna mukina onilavula awe. (1 aKorinto 14:26-30, 33) Waaniheryasa, epantta ele ya elapo, athiyana akina maKristau, yaakhala ootteliwa murima vanceenexa mwaha wa itthu yiixutta aya nto khiyaalavula-tho okathi alipa a mwaha yaalavula aya. Wira aphuke waakanyerereya wiiraneya vale, Paulo ahaalipiherya athiyana wira ‘yakoheke aiyaya owani’.—1 aKorinto 14:35.
it-2 393
Ohintta
Mowiiraana ni Yesu, maKristau oowoottihiwa yaawo anrowa olamulelaka ni yena, annihihimuxiwa wira yaakhele ekumi ehinimala ni erutthu sintoko malaikha, masi awo annivahiwa erutthu ehinikhwa ni ehinintta. Mwaha woororomeleya okumi aya wotheene: okhwa ni erutthu ya opinaatamu enintta, vano awo annivahiwa erutthu ehinintta, ntoko Paulo aahimmye awe yoolepa ya 1 aKorinto 15:42-54. Ohikhwa, waaniheryasa onihimmwa mukhalelo wa okumi orina aya, eyo piiyo, okumi Muluku onaavahawe khonikhwa ni khonipwetexeya. Vano ohintta, waaniheryasa onihimmwa muthinto wa erutthu onivahiwa aya ni Muluku, niire so, erutthu aya khenintta, khenihononeya, ni khenipweteya. Nto vanikhala wira Muluku onnaavaha owerya woowiikhaliherya mmansaya, eyo piiyo, awo khanitthuneya okhaliheriwa ni yena wala ovahiwa ikuru. Eyo ennavirikaniha ni soopattuxiwa sikina sa wiirimu ni valaponi. Eyo enooniherya wira Muluku onnaaroromela. Mwaha wookhalana mukhalelo owo woohipwetexeya, eyo khentaphulela wira khanrowa omwiiwelelaka Muluku Tiithi aya ni Yesu Kristu okhanle Muhooleli aya. Awo anoovikaniha wiiwelela malakiheryo awe.—1 aKor 15:23-28; nwehe okumi ohinikhwa; erutthu.
Omusoma Biibiliya
29 a Abril–5 a Maio
MIHAKHU SINIKHUMA MBIIBILIYANI | 2 AKORINTO 1-3
“Yehova—‘Muluku ‘Onnihakalaliha Okathi Wothene’”
“Munleke Vamosa Naale Aninla”
4 Nave Tiithi ihu oophenta, ootoko okhweliwa ni arumeyi awe ntoko Abrahamu, Isakhi, Yakobe, Moise ni Mwene Davidi. (Mothakoni 12:6-8; Matheyo 22:31, 32; Miteko 13:22) Tthiri Biibiliya onnooniherya wira Yehova onniphavela—waahihimuxa—arumeyi awo oororomeleya. (Yobi 14:14, 15) Nave-tho, arumeyi awo anrowa okhalana okumi wooloka ni woomalela. Yehova ootoko okhweliwa Mwanawe oopacerya. Biibiliya onihimya wira Yesu taari “muraji” opattuxiwa ni Muluku. (Miruku 8:22, 30) Tthiri nkahaya nuupuwele moota Yehova oonale awe owereya vaavo anweha awe Mwanawe okhwaaka wowooniha othunku.—Yohani 5:20; 10:17.
“Munleke Vamosa Naale Aninla”
14 Nave, ti voovila ommaaliha mutthu oriipiwe murima. Masi Biibiliya onihimya wira “nlumi na musuweli ninnivoliha makhwatta”. (Miruku 12:18) Atthu anceene aaphwanya moolumo oomaaliha ari ebroxura Vaavo Vanikhw’awe Ole Onimphenta Anyu. Nto, ikwaha sikina etthu enireerela ahu opaka ti ‘wunla vamosa n’ale aninla’. (aRoma 12:15, Waataana wa Naanaano) Gaby, yoowo okhweliwe iyawe, onihimya wira enamuna emosa onooniherya awe oriipiwa murima, wunla. Nave onnincererya oriki: “Tthiri, kinniphwanya nimaaliho vaavo apatthani aka aninla aya ni miyo. Okathi owo, nkinoona wira kiri mekhaka”.
Otokosa Itthu sa Efaita Soomunepani
Makoho Anikohiwa ni Ale Anisoma Irevista Sahu
Enithoonyerya exeeni “ekanyeryo” ni “eseelu”, seiyo Muluku oninvaha awe khula muKristau oowoottihiwa? 2 aKor. 1:21, 22.
▪ Ekanyeryo: Moovarihana ni eliivuru emosa, nuulumo na eGriki noowi “ekanyeryo” nri 2 aKorinto 1:22, naari “nlamulo ni mukhalelo waarumeeliwa okathi wa nakoso”, nenno naataphulela “oliva vakhaani-vakhaani, opweha, opacerya oliva, oleiherya, weiwo oniliverya vahinatthi mpantta mmosa wa esisapo, ni ororomeliha etthu eyo eniliviwa, aahiiso enilipiherya ekontrato epakiwe”. Voohimya sa maKristau oowoottihiwa, oliveriwa waya aahiiso etthuvo aya, ennihimmwa eliivuru ya 2 aKorinto 5:1-5, wira onitaphulela waakhela wiirimu erutthu ehinlipelela okhwa. Nave etthuvo eyo enihela muhina waakhela okumi ohinikhwa-tho.—1 aKor. 15:48-54.
EGriki ya vano, nuulumo nimosaru ninnirumeeliwa ohimmwaka anela oniwarihiwa muthiyana oowaakameliwa. Nna ntakiheryo nookhalela wa ale anrowa okhala mwaara a Kristu a nthoonyeryo.—2 aKor. 11:2; Wis. 21:2, 9.
▪ Eseelu: Khalai yaarumeeliwa eseelu ntoko asinatura onooniherya wira ti ya mutthu owo, ti yookhalela, aahiiso yooweemereriwa. Voohimya sa ale oowoottihiwa, enithoonyerya wira aavahiwa “eseelu” aahiiso ekanyeryo, otthittiwa mwa nthoonyeryo ni munepa wootteela wa Muluku. (aÉf. 1:13, 14) Eseelu ela enrowa okhala yoomalela, akhala wira mutthu owo onoororomeleya mpakha okhwa aahiiso mpakha okathi vakhaani ahinatthi opacerya maxakha maalupale.—aÉf. 4:30; Wis. 7:2-4.
w10 1/8 23
Nyuwo Mwaanisuwela?
Murummwa Paulo aaphavela ohimya exeeni ni moolumo oowi ‘ohooliwa mooxinttani’?
▪ Murummwa Paulo aalempe so: “Muluku. . . “annihoola mooxinttani okathi p’ukathi mwa Kristu, ni mwa hiyo onnooniherya mapuro otheene wunkhela w’osuwela w’awe. Okhala wira hiyo na muhiriri wooreera wa Kristu ohoolo wa Muluku mwa yaawo owoopowa hata w’ale anrimeela. Nto wa akina muhiriri w’okumi onivaha ekumi. Vano t’ani ophwanenle itthu iya?”—2 aKorinto 2:14-16, WN.
Murummwa Paulo aalavula sa yoolema ya aRoma ya opaka efesta wira emuttittimihe mukhulupale aanakhotto nuumala waaxintta awanani a ekuvernu ya elapo aya. Okathi wa ifesta iyo saanesihiwa mustaraatani mihakhu, atthu yaavariwe, nave saanikuxiwa inyompe piili wira saavahiwe mukuttho mwaha wa muhooleli aanakhotto aaxinttale nave sanikuxiwa inyompe wira savahiwe mukuttho. Wuumalani wa efesta eyo saanipahiwa inama savahiwa mukuttho, nave woonasa wene atthu yaavariwe okhottoni yaaniviwa.
Enciclopédia Bíblica Padrão Internacional enihimya wira “mwa nthoonyeryo, “muhiriri wooreera wa Kristu” onnaaphwanyiha ekumi atthu, nave akina onnaaphwanyiha okhwa. Vanikhala wira eyo enivarihana ni yoolema ya aRoma ya opaha erupani mustaraatani. Wunkhela ‘muhiriri’ yoowo waataphulela ovuwihiwa wa anakhotto ooxintta, nawe waaniwuupuxerya atthu yaavariwe okhottoni moota yaarowa aya wiiviwa.
Omusoma Biibiliya