Watchtower EBIBLIOTEKA ONLAINE
Watchtower
EBIBLIOTEKA ONLAINE
Emakhuwa
  • BIIBILIYA
  • ILIIVURU
  • MITHUKUMANO
  • mwbr19 Maio ipaax. 1-8
  • Ireferensia sa Okumi ni Orummwa Ahu Ekaderno Enirumeeliwa Omuthukumanoni

Mpantta ola khekhanle eviidiyu.

Muniswaamihe, khivaniweryaneya orumiha eviidiyu ela.

  • Ireferensia sa Okumi ni Orummwa Ahu Ekaderno Enirumeeliwa Omuthukumanoni
  • Ireferensia sa Okumi ni Orummwa Ahu Ekaderno Enirumeeliwa Omuthukumanoni—2019
  • Miru Saamukhaani
  • 6-12 ya Maio
  • MIHAKHU SINIKHUMA MBIIBILIYANI | 2 AKORINTO 4-6
  • “Hiyo Khannojela Muteko Ahu”
  • (2 aKorinto 4:16)
  • w04 15/8 25 itti. 16-17
  • Muhikhulumuwe Omurumeela Muluku Hata Mooceyaka
  • (2 aKorinto 4:17)
  • it-3 epax. 256 etti. 1
  • Ovilela
  • (2 aKorinto 4:18)
  • Otokosa Itthu sa Efaita Soomunepani
  • (2 aKorinto 4:7)
  • w12 1/2 ipax. 28-29
  • “Mmutteelihe Murima Yehova”
  • (2 aKorinto 6:13)
  • w09 15/11 21 etti. 7
  • Nvikaniheke Ophentana Ntoko Axinna
  • Omusoma Biibiliya
  • (2 aKorinto 4:1-15)
  • 13-19 ya Maio
  • MIHAKHU SINIKHUMA MBIIBILIYANI | 2 AKORINTO 7-10
  • “Muteko Ahu Wowaakhaliherya Atthu Aniphwanyiwa Ihasara”
  • (2 aKorinto 8:1-3)
  • w98 1/11 epax. 25 etti. 1
  • “Muluku Onsiveliwa N’ule Onvaha Murima Omuttenlene”
  • kr 209 etti. 1
  • Muteko Onaakhaliherya Ale Axankale Oninvuwiha Yehova
  • (2 aKorinto 8:4)
  • kr 209-210 itti. 4-6
  • Muteko Onaakhaliherya Ale Axankale Oninvuwiha Yehova
  • (2 aKorinto 9:7)
  • kr 196 etti. 10
  • Onikhuma Vai Musurukhu Onivareliwa Miteko sa Omwene?
  • Otokosa Itthu sa Efaita Soomunepani
  • (2 aKorinto 9:15)
  • w16.01 epax. 12 etti. 2
  • Mooniheryeke Oxukhurela ‘Yovaha Yotikiniha’ ya Muluku
  • (2 aKorinto 10:17)
  • g99 8/7 ipax. 20-21
  • Niireke Wiittottopa Etthu Yoohiloka?
  • Omusoma Biibiliya
  • (2 aKorinto 7:1-12)
  • 20-26 ya Maio
  • MIHAKHU SINIKHUMA MBIIBILIYANI | 2 AKORINTO 11-13
  • “Paulo Aahivilela ‘Ohawa Mwerutthuni’”
  • (2 aKorinto 12:7)
  • w08 15/6 3-4 etti. 3
  • Awo Yaari Oolipa Nnaamwi Yaarina Sootteettheya Saya
  • (2 aKorinto 12:8, 9)
  • w06 15/12 24 itti. 17-18
  • Apwiya Yehova Annaavaha “Eroho Yowarya [Munepa Wowaarya] Ale Anavekela”
  • (2 aKorinto 12:10)
  • w18.01 9 itti. 8-9
  • ‘Awo Anninvaha Ikuru Mutthu Okhulumunwe’
  • Otokosa Itthu sa Efaita Soomunepani
  • (2 aKorinto 12:2-4)
  • w18.12 epax. 8 itti. 10-12
  • Makoho Anikohiwa ni Ale Anisoma Irevista Sahu
  • (2 aKorinto 13:12)
  • it-1 325
  • Ebexo
  • Omusoma Biibiliya
  • (2 aKorinto 11:1-15)
  • 27 a Maio–2 a Junyo
  • MIHAKHU SINIKHUMA MBIIBILIYANI | AGALASIA 1-3
  • “Miyo Kahinvanya Oholo W’atthu”
  • (aGalasia 2:11-13)
  • w17.04 epax. 25 etti. 16
  • Niireke Munnilaleya Exariya ya Yehova?
  • (aGalasia 2:14)
  • w13 15/3 epax. 5 etti. 12
  • ‘Ale animphenta Yehova, ‘Khivo Etthu Enakwattuliha’
  • Otokosa Itthu sa Efaita Soomunepani
  • (aGalasia 2:20)
  • w14 15/9 epax. 16 itti. 20-21
  • Nimurumeele Muluku Moororomeleya Hata Nihaawaka Vanceene
  • (aGalasia 3:1)
  • it-2 epax. 171 etti. 3
  • Epaphelo yaaroiheliwa aGalasia
  • Omusoma Biibiliya
  • (aGalasia 2:11-21)
Ireferensia sa Okumi ni Orummwa Ahu Ekaderno Enirumeeliwa Omuthukumanoni—2019
mwbr19 Maio ipaax. 1-8

Ireferensia sa Okumi ni Orummwa Ahu Ekaderno Enirumeeliwa Omuthukumanoni

6-12 ya Maio

MIHAKHU SINIKHUMA MBIIBILIYANI | 2 AKORINTO 4-6

“Hiyo Khannojela Muteko Ahu”

(2 aKorinto 4:16)

w04 15/8 25 itti. 16-17

Muhikhulumuwe Omurumeela Muluku Hata Mooceyaka

16 Ekeekhai wira okhapelela okumi ahu wa omunepani ti etthu yootepa otthuneya. Okathi ompatthani ahu ni Yehova Muluku onlipa aya, ikwaha sikina pooti wooceya aka, masi khaninkhulumuwa mwaha woomurumeela yena. Yehova ‘onninvaha ekumi mutthu okhulumunwe: onninjererya ikuru sa mutthu òhilipa’. (Yesaya 40:28, 29) Murummwa Paulo, aahoona moota yaamukhalihenrya aya masu anihimya so: “Tivó vahinojeyahu. Nto, vari wira erutthu ahu enrowa omalamala, masi murim’ahu onotepa wululiwa nihiku ti nihiku”.​—2 aKorinto 4:16.

17 Nwehe wira masu oowi: “nihiku ti nihiku”, anooniherya wira khula nihiku nihaana ottottela mureerelo soovaha sa Yehova. Murokora mmosa moororomeleya aahirumeela ntoko misionaaria iyaakha 43. Nnaamwi ikwaha sikina wamphwanya omeekha ni wooceya yena khaahiyale muteko ole. Owo aahimmye so: “Kookhalana yoolema ya opeherya voosiisu, nto kihinatthi opacerya ovara miteko sikina kinniivaha okathi wa ovekela ni osoma Nuulumo na Yehova. Opaka eyo mahiku otheene, wookikhaliherya ovilela mpakha olelo-va”. Hiyo nnoowerya ororomela owerya wa Yehova weiwo onivaha ikuru vakhala wira mahiku otheene nnoovekelaka ni wuupuwelela mikhalelo sawe ni sooleiherya sawe.

(2 aKorinto 4:17)

it-3 epax. 256 etti. 1

Ovilela

Ti vootthuneya vanceene ohiliyala yoolipelela ahu ya eKristau, eyo piiyo ekumi ehinimala olumwenku woohikhalana etampi. Hata wiiviwa ni awanani ahu ohiniirihe opweteiwa yoolipelela eyo. (aRo 5:4, 5; 1 aTe 1:3; Wis 2:10) Ohaawa onniphwanya olelo-va, khahiyo etthu nalikanyiherya ni yoolipelela ahu eyo yuulupalexa. (aRo 8:18-25) Mwaha wa yoolipelela ya okhala mahiku otheene, khula muxankiho onniphwanya nnaamwi owereyaka vanceene olelo-va, onoomala ni “khahiyo etthu”. (2 aKor 4:16-18) Muhiliyale wira soweeha iyo sinnivira, nave ovarexexa yoolipelela ahu ya eKristau pooti onikhaliherya osyaka ohiroromeleya wa Yehova Muluku.

(2 aKorinto 4:18)

Otokosa Itthu sa Efaita Soomunepani

(2 aKorinto 4:7)

w12 1/2 ipax. 28-29

“Mmutteelihe Murima Yehova”

Munna David Splane a Nikhuuru Noolamulela aahithokorerya muru wa mwaha ola onikhuma mBiibiliyani. (2 aKorinto 4:7) Muhakhu xeeni owo? Niireke osuwela, wala ankhili? Munna owo aakhunle so: “Nnaari, muhakhu murummwa Paulo aahimya awe ti olaleya ‘ekekhai’”. (2 aKorinto 4:1, 2, 5) Munna Splane aahiwuupuxerya anaxikola ya oGileade wira miyeeri 5 yaavirinhe aya esomaka, saahaakhaliherya okhala oolikana ene wira yaakhele yoothanleliwa ya vameekhaaya ya muteko wa Muluku. Awo yaahaana ottittimiha vanceene yoothanleliwa eyo.

Mulipa-oolavula mwaha aahitthokiherya wira ‘miyapu soloko’, enihimmwa erutthu ahu ya opinaatamu. Owo aahooniherya ovirikana okhanle eriyari ya mwaapu wa oloko ni mwaapu wa eweero. Miyaapu sa eweero, khasinrumeeliwa mahiku otheene. Masi miyaapu sa oloko sinipakiwa wira sirumeeliweke mahiku otheene. Akhala wira nnoohela muhakhu mmwaapuni mwa eweero, woonasa wene nnoovahaka efaita vanceene mwaapu owo ni muhakhu ori muhina mwaya. Nuumala-vo, munna Splane aahihimya so: “Nyuwo anaxikola a oGileade muhiphaveleke ohimmwa wala ottottopeliwa. Sintoko mamissionaario muhaana okhalana yoolukama ya waakhaliherya atthu waataana ni Yehova. Nyuwo munlikana ni miyaapu sooreera sa oloko”.

(2 aKorinto 6:13)

w09 15/11 21 etti. 7

Nvikaniheke Ophentana Ntoko Axinna

7 Ankhi hiyo? Ninrowa wooniherya sai wira ‘ninnatthukulela murima’ axinnihu? Atthu arina iyaakha simosaru ni anikhuma elapo emosaru pooti woonaka okhweya otthukulelana murima. Okhala-wene atthu yaale anisiveliwa matthekulelo mamosaru ikwaha sinceene animakela oviriha okathi munceene eri ene hoothe. Masi vakhala wira soophavela simosaru nirina ahu ni anna akina sinninivalaniha ni akhwiihu, nihaana ‘watthukulela murima ahu’. Nto niikoheke so: ‘Kiireke kinniviriha okathi kilaleeryaka wala otthekula ni anna ahikhanle apatthani aka? Kaakhala Empa ya Omwene, kiireke kinivaanela paahi ni anna wala arokora yiixuntte ekeekhai khalai, ni kinuupuwela wira ale a niinaano ahaana toko opaka marukunuxo wira ephwanelele okhala apatthani aka? Kiireke kinnaakoha ihaali anna otheene waahela muhina amiravo ni anna oowuuluvala?’

Omusoma Biibiliya

(2 aKorinto 4:1-15)

13-19 ya Maio

MIHAKHU SINIKHUMA MBIIBILIYANI | 2 AKORINTO 7-10

“Muteko Ahu Wowaakhaliherya Atthu Aniphwanyiwa Ihasara”

(2 aKorinto 8:1-3)

w98 1/11 epax. 25 etti. 1

“Muluku Onsiveliwa N’ule Onvaha Murima Omuttenlene”

Woopaceryani, Paulo aahilavula ni maKristau a oKorinto voohimya sa moota maKristau a oMacedonia yaavanhe aya ntakiheryo nooloka na waakhaliherya akhwaaya. Paulo aalempe so: “Awo ahooniherya otteeliwa w’aya murima wuulupale eriyari ya mixankiho sinci-ene n’uhawa waya”. MaKristau a oMacedonia khiyaakhanyereriwa ovaha misonkheryo. Moovirikana ni vo, Paulo aahihimya wira “awo yahinivekela, vanci-ene mahala oowiiraka mpantta muteko wo wakhaliherya atthu ooreera murima”. Tthiri vanooneya wira atthu a oMacedonia yaanivaha vanceene maana nnaamwi nave yaari ‘oohaawa’, vanceene yaanaakhaliherya “akhwaaya”.​—2 aKorinto 8:2-4, Waataana wa Naanaano.

kr 209 etti. 1

Muteko Onaakhaliherya Ale Axankale Oninvuwiha Yehova

WAARI mwaakha wa 46 Nuumala Kristu Orwa, vaavo elapo ya oYudeya yaarina aya etala yuulupale. Awiixutti a Yesu, a oYudeya khiyaarina musurukhu wira athume yoolya okhala wira waatthuneya musurukhu munceene ni soolya saanithowa. Atthu yaanitepa ovoliwa, nto erutthu aya yaanitteettheya. Masi awo yaarowa okhapeleliwa ni ntata na Yehova okhala wira awiixutti akina a Kristu yaarowa orumeela enamuna yahaatonko wooniwa wira yaakhaliherye. Nto etthu xeeni yaarowa wiiraneya?

(2 aKorinto 8:4)

kr 209-210 itti. 4-6

Muteko Onaakhaliherya Ale Axankale Oninvuwiha Yehova

4 Mwa epaphelo awe ya nenli Paulo aalepenle awe aKorinto, aahitthokiherya wira muteko wa maKristau onnivariwa mwa inamuna piili. Nnaamwi epaphelo ele Paulo aalepela maKristau oowoottihiwa, masu awe annivareleya muteko wa maKristau ari “ipwittipwitthi sikina”. (Yohani 10:16) Enamuna yoopacerya ya orummwa ahu, ti “muteko w’owatàniha atthu akina”, eyo piiyo, muteko woolaleerya ni wiixuttiha. (2 aKor. 5:18-20; 1 Tim. 2:3-6) Epantte ekina ya orummwa ahu tuule onivara ahu mmureerelo wa annihu. Tthiri Paulo aahimya ‘muteko wa wakhaliherya atthu’ anixanka. (2 aKor. 8:4) Mwa ifrase piili soowi “muteko [orumwa] w’owatàniha atthu akina” ni “muteko [orummwa] wo wakhaliherya atthu” anixanka, sookhalana nuulumo noowi “muteko [orummwa]”, nuulumo nlo nikumihiwe nttaava na eGriki noowi di·a·ko·ni’a. Nto nuulumo nla nintaphulela exeeni?

5 Mwaha woorumeela nuulumo nimosaru na eGriki ohimyaka miteko iyo miili, Paulo onnipweha opuro omosa miteko sa waakhaliherya atthu ni inamuna sikina sa orummwa saavariwa mmulokoni wa eKristau. Ohinatthi ohimya masu ala, owo iira olavunle ene moolumo oowi: ‘Orumela khunlikana, masi Pwiya ori mmosaru. Miteko khasinlikana, . . . Itthu iya sothene sinìriwa n’iroho [munepa mmosaru]”. (1 aKor. 12:4-6, 11) Tthiri Paulo aanihimya miteko sotheene saavariwa mmulokoni okhala “miteko sa Muluku”. (aRom. 12:1, 6-8) Tivonto Paulo oonale awe okhala vooreerela ovarela muteko okathi awe, wira ‘àrumele atthu òwamini’!​—aRom. 15:25, 26.

6 Paulo aahaakhaliherya atthu oKorinto woona wira muteko wowaakhaliherya atthu anixanka waaniirela mpantta omurumeela ni omukokhorela waya Yehova. Nkawehani masu aalavunle awe moottharelana oriki: maKristau anakhaliherya akhwaaya anipaka eyo mwaha wa ‘wiwelela waya ni wettela waya ehapari yorera ya Kristu’. (2 aKor. 9:13) Ophavela waya ovarihela muteko ele Kristu eniixuttiha awe, ti etthu yaawiiriha maKristau ale waakhaliherya axinnaya. Tivonto Paulo aahimya awe wira itthu yaawiirela aya axinnaya seiyo sooniherya oreera waya murima, ti sooyeva mwa ‘eparakha yulupalexa Muluku avahalyawe’. (2 aKor. 9:14; 1 Ped. 4:10) Ehimyaka sa waakhaliherya annihu oothoiwa, ohela mpuwa waakhaliherya ale aphwanyiwe ni ihasara, erevista A Sentinela 1 ya Março 1976, yaahimya so: “Hiyo khanikhanle oohoveryaka akhala wira Yehova Muluku ni Mwanawe, Yesu Kristu, annivaha efaita miteko moota owo”. Aayo miteko soowaakhaliherya anna akina sookhalana efaita yuulupale mmuteko wa Muluku.​—aRom. 12:1, 7; 2 aKor. 8:7; aHéb. 13:16.

(2 aKorinto 9:7)

kr 196 etti. 10

Onikhuma Vai Musurukhu Onivareliwa Miteko sa Omwene?

10 Etthu yoopacerya enniiriha opaka soovaha soohikhanyereriwa mwaha woowi hiyo ninnimphenta Yehova ni nimphavela opaka itthu “sinimusivela”. (1 Yoh. 3:22) Yehova tthiri onnitteeliwa murima ni soovaha arumeyi awe anivaha aya ni murima aya wotheene. Nrowe nithokorerye masu a murummwa Paulo voohimya sa ovaha wa eKristau. (Mmusome 2 aKorinto 9:7.) MuKristau a ekeekhai khonitthuneya okhanyereriwa wala woovelela ovaha etthu. ‘Khula mutthu avaheke attharihaka murim’awe’. Eyo enitaphulela wira mutthu owo mwaneene onnoona wira vanitthuneya nikhaliheryo nto khiyakhaliherya. Atthu anivaha mwa enamuna eyo anniphentiwa ni Yehova okhala wira ‘anivaha murima wattenle ene’. Biibiliya mukina onihimya so: “Muluku onnaaphenta ale aniphenta ovaha”.

Otokosa Itthu sa Efaita Soomunepani

(2 aKorinto 9:15)

w16.01 epax. 12 etti. 2

Mooniheryeke Oxukhurela ‘Yovaha Yotikiniha’ ya Muluku

2 Paulo aanisuwela wira soolakela sotheene sa Muluku saarowa wiiraneya mwaha wa mukuttho wa okumi woomalela wa Yesu. (Mmusome 2 aKorinto 1:20.) Ela enooniherya wira “sovaha sotikiniha” sa Yehova khahiyo paahi mukuttho wa Yesu, masi sinihela muhina oreera murima ni ophenta Yehova onrowa awe onooniherya muhoolo. Mwekeekhai, yoovaha eyo ti yootikiniha vanceene, vahiniweryaneya awe pinaatamu otthokiherya oratteene. Nooneleke sai yoovaha eyo yuulupalexa? Nto yoovaha ela enrowa onikhaliherya sai okathi oniilokiherya ahu Wuupuwelela Okhwa wa Yesu, Namararu, 23 a Março, 2016?

(2 aKorinto 10:17)

g99 8/7 ipax. 20-21

Niireke Wiittottopa Etthu Yoohiloka?

Mwa Soolempwa sa eGriki sa eKristau, verbo oowi kau·khá·o·mai, yoowo onitaphulela “wiixinnuuha, wiihelana, wiihimya”, onnirumeeliwa ephavelaka ohimmwa etthu yooloka wala yoohiloka. Mwa ntakiheryo Paulo aahimmye wira hiyo pooti ‘wittottopa niroromelaka okaweliwa ovuwa wa Muluku’. Owo aahihimya-tho wira “Yakhalá antthuna wittottopa, yittottopeke mw’Apwiya”. (aRoma 5:2; 2 aKorinto 10:17) Eyo entaphulela wira wiittottopa mwaha wookhala arumeyi a Yehova Muluku pooti onikhaliherya ovuwiha nsina nawe ni mweettelo awe.

Omusoma Biibiliya

(2 aKorinto 7:1-12)

20-26 ya Maio

MIHAKHU SINIKHUMA MBIIBILIYANI | 2 AKORINTO 11-13

“Paulo Aahivilela ‘Ohawa Mwerutthuni’”

(2 aKorinto 12:7)

w08 15/6 3-4 etti. 3

Awo Yaari Oolipa Nnaamwi Yaarina Sootteettheya Saya

Murumeyi mukina oororomeleya, Murummwa Paulo, aahinvekela Yehova wira omalihe “ohawa mwerutthuni” eyo piiyo muxankiho yoowo wahaamala. Yena aahimuxonttela Yehova ikwaha tthaaru wira omwaakiherye ohaawa iwo. Hata nihisuwelaka muxankiho ene, moohaanyiherya owo waanimwiiriha Paulo ohiphwanya ohakalala mmutekoni mwa Yehova. Paulo aahilikanyiherya muxankiho owo ni omakela omaniwa mmalakuni. Yehova aakhunle so: “Eparakh’aka ehophiyeryani: owerya waka onnitepexa osuwanyeya mohilipani”. Yehova khaamalinhe ohaawa iwo wa mwerutthuni. Paulo aahaana ovilela ohaawa iwo. Yena aahimmye so: “Tthiri, kakhalaka òhilipa, vavonto kinlipaka”. (2 aKor. 12:7-10) Moolumo ala antaphulela-ni?

(2 aKorinto 12:8, 9)

w06 15/12 24 itti. 17-18

Apwiya Yehova Annaavaha “Eroho Yowarya [Munepa Wowaarya] Ale Anavekela”

17 Muluku aahaakhula mavekelo a Paulo ohimyaka so: “Eparakh’aka ehophiyeryani: owerya waka onnitepexa osuwanyeya mohilipani”. Paulo aalempe so: “Siso kinnitthunexa wivuwiha mwaha w’ohilipa waka, wira owerya wa Kristu okhaleke mwa miyo”. (2 aKorinto 12:9; Esalimo 147:5) Tivonto, aahiweha wira Muluku omurumeelaka Kristu, aanimukhaliherya vanceene ni owerya wawe. Olelo-va, Yehova onnaakhula mavekelo ahu mwa enamuna emosaru. Owo onaakhapelela sintoko eheema arumeyi awe.

18 Nnaamwi eheema ehikhoottiheryaka epula ni ipheyo ophiya muhina mwaya, eyo ennimukhapelela mutthu ohirumpwa epula wala ophwanyiwa epheyo mootepana. Moolikanasa, nikhaliheryo ninvahiwa ahu ni “owerya wa Kristu” khaninkhoottiherya oniphwanya soweeha wala ovela-vela. Nto opuro owo wootthyawela onninikhapelela mwa enamuna ya omunepani itthu sa olumwenku ola sikhanle onihaaxa ni mattheere anivonyiwa ni namalamulela a olumwenku ola, Satana. (Wisupulula 7:9, 15, 16) Nto hata soophwanyakani soweeha, seiyo sinikhala wira khasimmala, mukupalixa wira Yehova onnisuwela ekhotto eniwana anyu ni iwaakaru okhuwela “onowakhulani”. (Yesaya 30:19; 2 aKorinto 1:3, 4) Paulo aalempe so: “Muluku t’òroromeleya: khanihiya wira mwehereriwe ovikana ikuru sanyu. Okathi onehereriwanyu, Muluku onimovahani ikuru sinweryananyu ovilela n’uxintta”.​—1 aKorinto 10:13; aFilipi 4:6, 7.

(2 aKorinto 12:10)

w18.01 9 itti. 8-9

‘Awo Anninvaha Ikuru Mutthu Okhulumunwe’

8 Mmusome Yesaya 40:30. Woonasa wene hiyo pooti osuwelaka opaka itthu sinceene, masi khaninwerya opaka itthu iyo nirumeelaka ikuru sahu paahi. Ela ti etthu otheene ahu nintthuneya ahu wiixutta. Murummwa Paulo aaniphavela opaka itthu sinceene, masi owo khaawerya opaka khula etthu aaphavela awe. Vaavo aamulenle awe Yehova muxankiho awe, Yehova aahimmye wira: “Owerya waka onitepaxa osuwanyeya mohilipani”. Paulo aahiiwexexa ele Yehova aamulenle awe. Ti maana aya Paulo aahimmye awe so: “Kakhalaka ohilipa, vavo-nto kinlipaka”. (2 aKorinto 12:7-10) Aatthuna ohimya exeeni ni masu ala?

9 Paulo aanisuwela wira khaawerya opaka itthu sotheene ni ikuru sawe paahi. Owo aanitthuneya okhaliheriwa ni mutthu orina ikuru sihinimala. Munepa wootteela wa Muluku waaninvaha ikuru Paulo okathi aakhulumuwa awe. Ikuru iyo saanimukhaliherya opaka itthu sinceene. Nave, munepa wa Muluku waaninvaha Paulo owerya wa omaleliha itthu ahaarowa awe owerya ni ikuru sawe paahi. Eyo pooti oniiraneela. Okathi Yehova onnivaha awe munepa awe wootteela, ninkhala oolipa!

Otokosa Itthu sa Efaita Soomunepani

(2 aKorinto 12:2-4)

w18.12 epax. 8 itti. 10-12

Makoho Anikohiwa ni Ale Anisoma Irevista Sahu

“Erimu yaneraru” eniromoliwa ni 2 aKorinto 12:2, woonasa wene onihimmwa Omwene wa Omesiya onilamuleliwa ni Yesu Kristu ni maKristau 144.000 oothanliwa, nave ennisuweliwa okhala “erimu esyá.​—2 Ped. 3:13.

Erimu eyo ennihimmwa okhala “yaneraru” mwaha woowi eguvernu aya eri emosa paahi, ni ti yootepexa oloka ovikana iguvernu sotheene sitonko okhala.

‘Oparayiisu’ Paulo aaroihiwe awe mowoonihiwani, woonasa wene enihimmwa (1) eparayiisu yekeekhai yeeyo enrowa okhala valaponi, (2) eparayiisu ya omunepani yeeyo enrowa okhala okathi owo yeeyo enrowa okhala yootepa wunnuwa ovikana eparayiisu ya omunepani ekhanle olelo-va, ni (3) eparayiisu ya Muluku yeeyo enrowa okhala wiirimu okathi wa elapo esya.

(2 aKorinto 13:12)

it-1 325

Ebexo

“Ebexo Yoowaarya”. MaKristau oopacerya yaanivahana “ebexo yoowaarya” (aRo 16:16; 1 aKor 16:20; 2 aKor 13:12; 1 aTe 5:26), aahiiso ebexo ya niphento (1 Pe 5:14), woonasa wene ebexo eyo yaavahana alopwanaru aahiiso athiyanaru. Vanikhala wira enamuna eyo ya maKristau oopacerya a okohana ihaali yaavarihana ni yoolema ya khalai ya aHeeberi yeeyo atthu yaakohana aya ihaali ni ebexo yoowaarya aahiiso ebexo ya niphento. Nnaamwi Biibiliya ohilavulaka vanceene voohimya sa “ebexo yoowaarya” wala “ebexo ya niphento”, woonasa wene eyo yaari etthu yooniherya niphento ni wiiraana waakhanle mmulokoni mwa eKristau.​—Yoh 13:34, 35.

Omusoma Biibiliya

(2 aKorinto 11:1-15)

27 a Maio–2 a Junyo

MIHAKHU SINIKHUMA MBIIBILIYANI | AGALASIA 1-3

“Miyo Kahinvanya Oholo W’atthu”

(aGalasia 2:11-13)

w17.04 epax. 25 etti. 16

Niireke Munnilaleya Exariya ya Yehova?

Mmusome aGalasia 2:11-14. Pedru aawoova atthu. (Miruku 29:25) Pedru aanisuwela moota Yehova aawoonela awe Amalapo. Hata vari siiso, owo aaniwoova maKristau oowunnuwihiwa aYuda, yaawo yaaxukurya oYerusalemu wira khiyaarowa omoonaka saana, mwaha wa weetta ni maKristau yahaakhanle aYuda. Murummwa Paulo aahimuleela Pedru wira aamwiipaka. Nthowa xeeni? Nthowa noowi Paulo aahimwiiwa Pedru owaakiheryaka Amalapo okathi wa muthukumano oYerusalemu mwaakha wa 49. (Miteko 15:12; aGalasia 2:13) Nuumala Pedru ohiya weetta ni maKristau ale yahaakhanle aYuda, awo yoonenle sai? Niireke yaahikhumuwa? Niireke Pedru aahihiihiwa miritti sawe mwaha wa yoovonya awe?

(aGalasia 2:14)

w13 15/3 epax. 5 etti. 12

‘Ale animphenta Yehova, ‘Khivo Etthu Enakwattuliha’

12 Pedru aahooniherya omoova pinaatamu, nto ikwaha sikina khiyamora mwa enamuna yoohiloka; masi owo aahivikaniha ororomeleya wa Yesu ni wa Yehova. Mwa ntakiheryo, aahimukhootta Pwiya awe ohoolo wa atthu ikwaha tthaaru. (Luka 22:54-62) Muhoolo mwaya, Pedru aahivonya khuhikhalana moonelo weeKristau, khupacerya ohaacalela maKristau yahaakhanle aYuda; nto mwaha woohinnuuhiwa ohinawoona oloka ntoko maKristau aYuda yainuwihiwe. Masi, murummwa Paulo aahithokorerya mwaha ole mwa enamuna yookhalela, tthiri aanisuwela wira mmulokoni khokhanle opuro woothanlana. Moonelo wa Pedru, khiwaalonke. Ohinatthi mweettelo ole wa Pedru waakhumuliha anna, Paulo aahipaka etthu khumukhaliherya Pedru ohoolo wa atthu. (aGal. 2:11-14) Niireke Pedru ahooniherya wixinnuha mpakha ohiya otthimaka wawe wira ophwanye ekumi. Nnaari. Owo aahithokorerya saana miruku sa Paulo, khuvarela muteko ni khuvikaniha otthimaka.

Otokosa Itthu sa Efaita Soomunepani

(aGalasia 2:20)

w14 15/9 epax. 16 itti. 20-21

Nimurumeele Muluku Moororomeleya Hata Nihaawaka Vanceene

20 Ankhi okathi onitupheliwa ahu orumeeliwaka olavilavi? Ninrowa opaka exeeni wira nikhoottele muupuwelelo wookhulumula? Enamuna emosa erina owerya wuulupale enrowa onikhaliherya oxintta muxankiho owo, ti wuupuwelela yowoopola ya Yesu. Eyo ti etthu murummwa Paulo aapanke awe. Owo okathi mukina aaniixoona okhala mutthu ootakhaliwa. Masi owo aanisuwela-tho wira Kristu aahikhwa, aakhwelaka atthu oottheka. Nto Paulo aari mmosa wa atthu awo. Tivonto owo aalempe awe oriki: “Ekum’ila kirinaka vano mwerutthuni, miyo kokhalana mwaha w’omwamini Mwana a Muluku, owo òkiphenta ni, ohìvahererya wokhwani mwaha wa miyo”. (aGal. 2:20) Tthiri, Paulo aanixukhurela yowoopola. Owo aanaamini wira yowoopola ele yaanimukhaliherya.

21 Muupuwelelo mmosaru aarina awe Paulo wira yowoopola yaari yoovaha ya Yehova, onoowerya wookhaliheryani nyuwo vanceene. Eyo khenitaphulela wira okhulumuwa wanyu onrowa omala naananoru. Anamunceene a hiyo anrowa owananaka inamuna sa olavilavi wa Satana mpakha okela elapo esya. Masi muupuweleke wira: Paahi atthu yaale ahinrowa wooceya tanrowa waakhela etthuvo. Hiyo nri vakhiviru va nihiku noovuwa nenlo Omwene wa Muluku onrowa awe okumiherya murettele ni waattikiherya okhala oomalela atthu otheene oororomeleya. Mwiimananihe wira mukele Momweneni mmo, hata nviraka mohaawani munceene.

(aGalasia 3:1)

it-2 epax. 171 etti. 3

Epaphelo yaaroiheliwa aGalasia

Moolumo otikiniha a Paulo aahimmye awe wira: “Nyuwo aGalasia, mw’àloló”, khanooniherya wira yena aahimya mooluluwanya nloko na atthu, a nihimo ninsuweliwa okhala gálica yaawo yaakhala mpantta onikela epheyo wa Galácia. (aGál 3:1) Ohinatthi olavula moolumo awo, Paulo aapwapwela atthu akina a muloko ole okhala wira yaahihiya ehapuxiwaka ni mweettelo wa atthu yaathipelela waakhanyererya akhwaaya weettela ikano sa eYuda, eyo piiyo, aYuda yaamananiha weettela ikano sa Moise ohiya weettela exariya moovarihana ni waamini waakumiheriwa ni nivarihano na naanaano. (2:15–3:14; 4:9, 10) Mwa mukhalelo wa nihimo (raça), miloko sa oGalasia (1:2), seiyo Paulo aalepenle awe epaphelo, saahikhalana atthu a nloko na aYuda ni atthu yahaakhanle aYuda. Eriyari ya atthu awo yahaakhanle aYuda nave akina yaari oowinnuwihiwa ni yaakenle eYuda othana-thanaru ni akina yaari oohinnuwihiwa. Nave moohaanyiherya akina yaari a elapo ya oCelta. (Miteko 13:14, 43; 16:1; aGa 5:2) Atthu awo yaanisuweliwa okhala maKristau a oGalasia mwaha woowi yaakhala muttetthe waitthaniwa oGalasia. Epaphelo yotheene enooniherya wira Paulo aalepela atthu aasuwela awe vanceene yaawo yaakhala epantte enikela epheyo ya eprovinsia eyo ya oRoma, ohiya atthu ahaasuwela awe, yaawo woonasa wene ahatonko awe waaxukurya.

Omusoma Biibiliya

(aGalasia 2:11-21)

    Watchtower EBIBILIOTEKA ONLAINE (1982-2025)
    Okhuma
    Okela
    • Emakhuwa
    • Ovaha
    • Siniphavela Anyu
    • Copyright © 2025 Watch Tower Bible and Tract Society of Pennsylvania
    • Malamulo Oorumeela
    • Mwaha Woosuka Isiiri
    • Privacy Settings
    • JW.ORG
    • Okela
    Ovaha