Mwaana a Muluku ti “Warya W’olumwenku”

Nihiku nookiserya na Niira na Maxaxa na mahiku 7, Yesu aahiwiixuttiha atthu ori ene mpantta mmosa wa etemplo wiitthaniwa “nipuro na muhakhu”. (Yohani 8:20; Luka 21:1) Woonasa wene, naari Nivate na Athiyana, opuro yoowo atthu yaahela aya soovaha saya.

Ohiyu wa khula nihiku na niira, opuro ole waakhala woomwaleeleya. Maana, saahikhala mithuko suulupale seiyo saarina opuro waaheliwa makhura. Mithuko iye saanaarya vanceene ni saanimwaleela opuro woorakamela. Etthu Yesu aahimmye awe yaaniwuupuxerya atthu ale yanwiriyana, masu ala: “Miyo ki warya wʼolumwen-ku. Ole onkitthara khanetta-tho mwepiphini: owo onokhalana warya onvaha ekumi”.​—Yohani 8:12.

AFarisi yaahikhootta masu a Yesu ariki: “Nyuwo munìkhalela onamona mmansinyu: onamon’anyu khuhiyó w’ekekhai!” Yesu aahiwaakhula wira: “Hatá kìkhalelaka onamona kimwanene, onamon’ak’ola ti w’ekekhai, okhala wira miyo kinnisuwela okhumalyaka n’onkelaka! Vano nyuwo khamunsuwela okhumalyaka, nnákhala onkelaka”. Nave Yesu aahincererya oriki: “Ikano sanyu sinihimya wira onamona w’atthu anli ti w’ekekhai. Vano, miyo kinnìkhalela onamona mmansaka, nave Atithi akirumme annikikhalela-tho onamona”.​—Yohani 8:13-18.

Akhoottaka moolumo awe, aFarisi yaahimukoha wira: “Atith’inyu ari vai?” Yesu aahiwaakhula mooluluwanya oriki: “Nyuwo khamunkisuwela, nnákhala khamunasuwela Atithi. Mwakisuwenle miyo, mwamwasuwela-tho Atithi”. (Yohani 8:19) Nnaamwi aFarisi yaaphavela onvara Yesu, khuuvo mutthu anvanre.

Yesu aahitthikela masu ale aalavunle awe oriki: “Miyo kinorowa. Nyuwo munokiphavela, nto munimokhwa mutampini mwanyu. Weiwo onrowaka, nyuwo khamunwerya ophiya-wo”. Okhala wira aYuda ale khiyiiwexenxe moolumo a Yesu, awo yaahipacerya okohana ariki: “Khino onrowa wisiva? Mana onihimya wira: ‘Weiwo onrowaka, nyuwo khamunwerya ophiya-wo’”. Awo khiyaasuwela ele Yesu aaphavela awe ohimya, maana khiyaasuwela opuro aakhumme awe. Nto Yesu aahaatthokiherya wira: “Nyuwo mw’àtthu a vathí-va: miyo ki mutthu a wirimu. Nyuwo mw’àtthu a molumwenkuni-mu: miyo nkihiyó òlumwenku yola”.​—Yohani 8:21-23.

Yesu aahimya okathi aari awe wiirimu ohinatthi orwa valaponi wira okhale Mesiya aaleiheriwe aahiiso Kristu. Yoowo makhulupale a itiini yaamulipelela aya. Masi, awo yaahimukoha wira: “Nyuwo mwá tani?”​—Yohani 8:25.

Nnaamwi aYuda yahamphavela ni yaamulupattha, Yesu aahaaleela wira: Xeeni oyiihaka okathi aka kilavulaka ni nyuwo? Nave olavulaka sa Tiithi awe, Yesu aahaatthokiherya aYuda nthowa naya yaatthuneya aya onwiriyana Mwaana, oriki: “Ole okirumme t’èkekhai: ni miyo kinnilaleya mulaponi-mu itthu seiyo simwiwalyaka yowo”.—Yohani 8:25, 26.

Nuumala-vo, Yesu aahooniherya omuroromela Tiithi awe, nnaamwi aYuda yahaamuroromela. Tivo, Yesu aahimmye awe wira: “Okathi onrowa anyu omuthomeya Mwana a mutthu, munosuwela wira miyo t’ule onikhala ni wira miyo nkinìra etthu mekhaka: miyo kinnilaleya itthu sikixuttihalyaya Atithi. Ole okirumme ori ni miyo: khakihiyalé mekhaka, mana mahiku othene miyo kinnìra itthu sinimusivela”.​—Yohani 8:28, 29.

Nto aYuda akina yaahimwaamini Yesu. Vano Yesu aahaaleela atthu ale yaamwaamini wira: “Nyuwo, mwakhalela nthiti molumo aka, vekekhai munokhala awixutti aka; munosuwela ekekhai, vano ekekhai yeyo enimokhalihani òtaphuwa”.​—Yohani 8:31, 32.

Atthu akina yoona wira masu ale a Yesu yaari oohikhalela. Nto yaahikhootta ahimyaka wira: “Hiyo nri a nloko n’Abrahamu: khinnakhale ipottha sa mutthu. Vano nyuwo munihimya sai wira: ‘Munokhalihiwa òtaphuwa’?” Nnaamwi aYuda yaasuwela wira yaatoko olamuleliwa ni atthu a ilapo sikina, awo yaahikhootta wiireliwa ipottha. Masi Yesu aahiwooniherya wira nlelo yaari ipottha, oriki: “Kinolèlani ekhweli wira: othene ale anìra etampi, t’akhanle ipottha s’etampi”.​—Yohani 8:33, 34.

Okhala wira aYuda ale yaahikhootta okhala ipottha sa etampi, eyo yaari etthu yowoopiha. Tivo Yesu aatthokihenrya awe wira: “Epottha khinkhala vatthokoni mahiku othene: mwana t’onkhala-vo mahiku othene”. (Yohani 8:35) Epottha khenikhalana ehakhi ya waakhela soohiyeriwa, maana eyo pooti woomoliwa. Masi mwaana a etthoko eyo aahiiso oophwanyiwa, torina ehakhi ya ohalana itthu iyo “mahiku othene” mpakha okhwa wawe.

Wiixutta ekeekhai voohimya sa Mwaana, tonrowa waakhaliherya atthu otaphuwa okhala ipottha sa etampi ni okhwa. Nto Yesu aahimmye wira: “Mwana, awopolani, tthiri munokhala òtaphuwa”.​—Yohani 8:36.‵