3. Xeeni oryaaya vootthuneya okhalana mikhalelo somunepani, nto ninrowa ophwanya sai?

³ Mikhalelo sa Omunepani: Mikhalelo sa omunepani ti sootepa otthuneya, ohiya osuwela itthu sinci wala okhalana osuwela wooyaraniwa. Mulopwana oowunnuwa momunepani onnimananiha opaka itthu ntoko Yehova ni Yesu sinipaka aya. (1 aKor. 2:15, 16) Owo onnooniherya yoowiima ya munepa wa Muluku. (aGal. 5:22, 23) Nave, owo ti namalaleerya ooluttuweliwa onipaceriha soophavela sa Omwene. (Math. 6:33) Nyuwo munoowerya wunnuuherya mikhalelo sa omunepani orweela mwa okhalana yoosoma yoomwaneene yoohihiyererya. Ela enihela muhina omusoma Biibiliya khula nihiku, Owehaweha ni Despertai! sa khuta mweeri, wiilokiherya ni orowa omuthukumanoni. (Esal. 1:1, 2; aHéb. 10:24, 25) Vaavo Paulo aamutumererya awe mmiravo Timootheyo orowa vahoolo momunepani, aalempe so: “Mwipasope . . . n’itthu sinixuttihanyu”. (1 Tim. 4:15, 16) Nto mwiilipiheke mwavahiwa myaha sa Exikola ya Orummwa wa Muluku. Mwiilokiheryeke mwaarowaka olaleerya, ni mulaleeryeke moohihiyererya. Mwiimananiheke okhalana soolukama somunepani ntoko, okhala pioneero, orumeela oBetheli, wala orowa Exikola ya Biibiliya ya Anna Oohithela. Opaka eyo onimookhaliheryani ‘ohitthara [itthu] sohiloka s’omiravo’.​—2 Tim. 2:22.

Iponto Suulupale sa Muteko Woolaleerya

Okhuma mweeri wa Feverero epacenrye aya eprograma ya olokiherya Isalau sa Omwene ni anna ookhuma oBetheli, Isalau 48 soottottela mureerelo eprograma ela. Nnaamwi iwoora saavinre silokiheriwaka Isalau iyo sihiirelaka mpantta muteko woolaleerya, olokiheriwa wa Isalau ori muteko wootteela. Nto vaavo onitakaaheriwa aya ni wiimananiha wahu mmutekoni woolaleerya, sinninvuwiha Yehova ni owiiriha ale a murima saana omulompa Muluku a ekeekhai.