Ireferensia sa Okumi ni Orummwa Ahu Ekaderno Enirumeeliwa Omuthukumanoni
1-7 ya Julyo
MIHAKHU SINIKHUMA MBIIBILIYANI | AKOLOSI 1-4
“Murule Omutthu wa Khalai, ni Nware Omutthu wa Naanano”
w11 15/3 10 itti. 12-13
Mwaakheleke Munepa wa Muluku, Ohiya Munepa wa Olumwenku
12 Mukhalelo xeeni wa omunepani kinooniherya aka? (Mmusome aKolosi 3:8-10, 13.) Munepa wa olumwenku onniwiiriha atthu weettela soophavela sa erutthu. (aGal. 5:19-21) Tthiri hiyo nneehereriwa weettela makhalelo ahu okathi itthu sihinneettela aya saana sintoko okathi muKristau mukina onninyokha awe, oniveeha wala onitthekela. Ohiya-vo, makhalelo a vatthokoni vahu pooti wooniherya akhala wira nneettihiwa ni munepa wa Muluku wala munepa wa olumwenku. Waanyiheryasa pooti otthuneyaka wiivarerya saana. Mwiikoheke so: ‘Miyeeri 6 sivinre, kiireke koolokiherya mukhalelo aka wa eKristau, wala kootthikela ovara soolema sikina soohiloka sintoko malavulelo ni mweettelo?’
13 Munepa wa Muluku pooti onikhaliherya ‘orula omutthu wa khalai’ ni miteko saya, ni owara ‘omutthu wa naanano’. Eyo enoonikhaliherya okhala atthu oophenta ni ooreera murima. Okathi wotheene ninrowa okhalaka oolikanene wira nilevelelaneke hata nikhalanaka mathowa maalupale wala nitthekeliwaka. Khaninrowa oviruwaka okathi nniireliwa ahu itthu soohixariya ni khaninrowa wooniheryaka “makhalelo othene òwawa, ònanariwa, òwali, òviruwa ni òruwana”. Ohiya-vo, ninrowa wiimananihaka oreerelana “murima n’umorelana ikharari”.—aÉf. 4:31, 32.
Niireke Nyuwo Moorukunuxa Mukhalelo Anyu?
18 Masi khivaniphiyerya paahi omusoma ni omwiixutta Biibiliya wira nirukunuxe mukhalelo ahu. Anamunceene annimusoma Biibiliya ikwaha sikina, akina khanliyala itthu siniixutta aya. Waanyiheryasa nyuwo mootoko okumana ni atthu siiso mulaleeryaka. Atthu akina anniwerya ohela mmuruni masu manceene ari mBiibiliyani enawerya oromola. Hata vari siiso, eyo khenirukunuxa muupuwelo aya wala ekumi aya. Exeeni enaahalela? Wira Nuulumo na Muluku nimurukunuxe mutthu owo, ohaana weemya ele eniixutta awe wira emukele vamurimani. (aGal. 6:6) Tivonto, nihaana oviriha okathi nuupuwelelaka ele eniixutta ahu. Vanooreera wiikohaka so: ‘Kiireke kinnikupali wira ela eniixutta aka enihela muhina itthu sinceene ohiya paahi okupali wira iya sowiixuttiha sa etiini? Kiireke koosuwela wira ela ekeekhai? Ohiya-vo kinniweha moota woovarihela muteko ele eniixutta aka ohiya paahi oweha moota woowiixuttiha akina? Kinniweha wira Yehova onlavula ni miyo mmensawe?’ Wuupuwelela ni otthokelela saana makoho ala, anoonikhaliherya wunnuuherya vamurimani moota sinimoonela ahu Yehova. Omphenta wahu onrowa wunnuwaka. Akhala wira masu a Muluku anoovara murima ahu, nnoowerya opaka marukunuxo.—Mir. 4:23; Luka 6:45.
19 Osoma Nuulumo na Muluku khula nihiku ni otthokelela, onoonikhaliherya ovikaniha opaka saana itthu sooreera saapaka ahu okhuma khalai. Biibiliya onihimya so: ‘Murule omutthu wa khalai ni miteko saya, nware omutthu wa nanano, [wira muululiwe mwaha wa osuwela wanyu]’. (aKol. 3:9, 10) Tthiri nnoowerya okhumela saana navikaniha wiiwexexa ele Nuulumo na Muluku enihimya aya. Opaka eyo enoonikhaliherya olokiheryaka ni okhapelela mukhalelo ahu wa eKristau wira nisyake miraakho sa Satana.
Otokosa Itthu sa Efaita Soomunepani
it-3 412 itti. 2-4
Omwene wa Muluku
‘Omwene wa Mwan’awe Onimphentexawe’. Evinre ene mahiku 10 nuumala Yesu ohokolowela wiirimu, nihiku na Pentekoositi a 33 Nuumala Kristu Orwa, awiixutti awe yaahiweha itthu saakupalinhe wira vekeekhai Yesu “ovuwihiwa n’uwerya wa Muluku, khuvahiwa Eroho Yowarya, Atithi yamuhimenryaya wira anonvaha”. (Mit 1:8, 9; 2:1-4, 29-33) ‘Nivarihano na ninaano’ naahipacerya ovara muteko mookumini mwaya, nto awiixutti awo yaahipacerya wiirela mpantta “nloko n’atthu òwarya”, eyo piiyo “Israeli a Muluku”.—aHé 12:22-24; 1 Pe 2:9, 10; aGa 6:16.
Vano Kristu ookilaathi moono woolopwana wa Tiithi awe, nave oothanliwa wira okhale Muru wa muloko. (aÉf 5:23; aHé 1:3; aFi 2:9-11) Soolempwa sinnooniherya wira okhuma nihiku na Pentekoositi a 33 Nuumala Kristu Orwa, waahikumiheriwa omwene wa omunepani yoowo waalamulela atthareli a Kristu. Vaavo murummwa Paulo aalepenle awe epaphelo maKristau a oKolosi, aahimuhimya Yesu Kristu okhala mutthu aarina omwene. Aalempe so: “Yowo [Muluku] ònakiherya owerya w’epiphi, khunithamiherya momweneni mwa Mwan’awe onimphentexawe”.—aKol 1:13; mulikanyiherye ni Mit 17:6, 7.
Omwene wa Kristu, okhuma nihiku na Pentekoositi na 33 Nuumala Kristu Orwa, onnooneya okhala wa omunepani ni onnimulamulela Yerusalemu a omunepani, eyo piiyo maKristau athanliwe ni munepa wa Muluku wira ekhale anamwane oomunepani a Muluku. (Yoh 3:3, 5, 6) Okathi maKristau awo oowoottihiwa ni munepa anirowa aya waakhela etthuvo aya wiirimu, khanrowa okhala-tho arumeyi a valaponi a omwene wa Kristu wa omunepani, masi anrowa okhala mamwene vamosa ni Kristu wiirimu.—Wis 5:9, 10.
w08 15/8 28 etti. 9
Iponto Suulupale sa Ipaphelo sa aGalasia, aÉfeso, aFilipi, ni aKolosi
2:8—Sinitaphulela exeeni ‘ikuru s’olumwenku’ aahiiso itthu sa vathi? Sinihimmwa itthu siniirela mpantta olumwenku wa Satana, ntoko itthu sootthuneya, aahiiso malakiheryo animwiiriha mutthu opaka etthu. (1 Yohani 2:16) Itthu iyo sinihela muhina soowiixuttiha sa ifilosofia, osiveliwa mihakhu, ni itiini sowootha sa olumwenku.
Omusoma Biibiliya
8-14 ya Julyo
MIHAKHU SINIKHUMA MBIIBILIYANI | 1 ATESALONIKA 1-5
“Mulipihaneke, ni Mukhaliheryaneke”
w11 15/6 26 etti. 12
“Mwattittimiheke Ale Anohawelani Mmutekoni Mw’Apwiya Eriyari Anyu”
12 ‘Ohoolela’ muloko onihela muhina itthu sinceene ohiya paahi wiixuttiha. Nuulumo nimosaru ninniphwanyaneya yoolepa ya 1 Timótheyo 3:4. Paulo aahihimya wira axitokweene yaahaana okhala atthu ‘anisuwela oweettiha saana atthu a etthoko aya, ni okhalana anamwane òrumeya ni oottittimiha’. Yoolepa ela nuulumo noowi “wettiha” khahiyo paahi onihimmwa owiixuttiha anaaya, masi-tho onihela muhina weettiha saana etthoko aya ni okhalana anamwane oowiiwelela. Tthiri axitokweene annihoolela muloko, yaakhaliheryaka anna ootheene omwiiwelela Yehova.—1 Tim. 3:5.
w11 15/6 epax. 28 etti. 19
“Mwattittimiheke Ale Anohawelani Mmutekoni Mw’Apwiya Eriyari Anyu”
19 Exeeni mwaarowa anyu opaka vaakhanle wira moovahiwa etthu yowoosivelani? Niireke khimwaarowa wooniherya oxukhuru wanyu murumeelaka saana etthu eyo? Yehova oomurumeela Yesu Kristu wira onivahe “atthu” ntoko sovaha. Enamuna emosa mukhanle anyu oowooniherya oxukhurela wanyu soovaha iyo, owiriyana ni ephoole myaha sinilavula aya axitokweene ni weettela malakiheryo aya. Nave-tho nyuwo pooti wooniherya oxukhurela wanyu nvahaka ikomentaario soolipiha mmuthukumanoni. Mukhaliheryeke muteko anihoolela aya axitokweene, sintoko olaleerya. Vakhala wira mootoko ottottela mureerelo miruku mwaavahiwe anyu ni axitokweene, niireke mootoko waaxukhurela? Nave-tho nnoowerya wooniherya oxukhuru nittittimihaka emusi aya. Tthiri wira vaweryaneye mutokweene okhaliherya mooluttuweliwa muloko, emusi awe ennileva okathi yaarowa aya oviriha eri ene hoothe.
“Ophentana . . . W’ekekhai, Woneyeke ni Miteko”
13 Mwaakhaliheryeke ale ootteettheya. Yooruma ya mBiibiliyani yoowi, “mwakhaliheryeke ale òlosowa, mwavileleke atthu othene”, pooti weehererya ophenta wahu wekeekhai. (1 aTes. 5:14) Anna anceene yaarina waamini woolosowa khalai, vano waamini waya woolipa. Masi akina nlelo anitthuneya waavilela ni waakhaliherya. Ninrowa waakhaliherya sai? Hiyo pooti omurumeela Biibiliya wira naalipihe, waalattula wira nalaleerye hoothe aahiiso waawiriyana vaavo annileela aya mixankiho saya. Nave khanimphavela waavaha masina annihu oowi, ale “toolosowa”, wala ale “toolipa”. Masi nihaana osuwela wira khula mutthu ookhalana mikhalelo sawe soolipa ni soolosowa. Hata murummwa Paulo aaheemererya wira aahikhalana mikhalelo soolosowa. (2 aKorinto 12:9, 10) Otheene ahu ninnitthuneya okhaliheriwa ni olipihiwa ni akina.
Mutakiheke Oreera Murima wa Yesu
16 Masu ahu anooniherya oreera murima. Othunku ahu onooniiriha ‘walipiha murima ale ahilimpe’. (1 aTes. 5:14) Ninrowa ohimya exeeni wira naalipihe atthu awo? Nyuwo munoowerya waalipiha vakhala wira munniwoonela othunku. Hiyo pooti waattottopela mwaha wa makhalelo aya ooloka ni itthu sinisuwela aya. Nihaana owuupuxerya wira Yehova onvahererya mwanawe mwaha wa atthu awo, ni onniwoona okhala a faita vanceene. (Yoh. 6:44) Hiyo nihaana waaroromeliha wira Yehova onnaakhapelela arumeyi awe yaale ariipiwe murima, wala arina muxankiho. (Esal. 34:19) Masu ahu anooniherya othunku, pooti waalipiha ale ariipiwe murima.—Mir. 16:24.
Otokosa Itthu sa Efaita Soomunepani
it-2 155
Onamuttompe aahiiso oraruwa
Onamuttompe aahiiso oraruwa, etampi yuulupale ekhanle oomwiiriha mutthu woomoliwa (okumihiwa) mmulokoni mwa eKristau. (1 aKor 5:9-13; aHé 12:15, 16) Murummwa Paulo onnihimya wira mutthu oniraruwa wala oneetta onamuttompe onnitthekela erutthu awe okhala wira onnirumeela ipantte sa erutthu mwa enamuna yoohiloka. Mukhalelo wa omunepani wa mutthu owo onnihononeya, onniveehiha muloko wa Muluku, ni pooti ophwanya iretta sihinipenuuwa wala ovoniwa seiyo siniravihaniwa mooraruwani. (1 aKor 6:18, 19) Nave-tho mutthu owo onniwaakha wala ottottela mureerelo idireito sa axinnawe a ekristau (1 aTe 4:3-7) okhala wira (1) onniruuha mweettelo woohiloka mmulokoni, onnipaka itthu sowuuliha muru ni onniveehiha muloko (aHé 12:15, 16), (2) onnimwiiriha mutthu owo omurupinhe awe okhala oothanyeya mwa moonelo wa atthu akina vamosa ni Muluku, ni akhala wira khotheliwe nave pooti ohitteeliwaka murima nuumala otheliwa, (3) onniwiiriha atthu a emusi awe wooniwaka sintoko atthu arina mweettelo woohiloka, aahiiso (4) pooti waahaaxa anamuyari awe, omuhela muhina noivo wala noiva awe mutthu owo onraruwana awe. Mutthu oneetta onamuttompe wala oniraruwa khahiyo paahi oninveeha munnawe, masi-tho onnimutthekela Muluku yoowo onrowa waahukhumu anamattheka.—1 aTe 4:8.
w15 15/7 ipax. 18-19 itti. 14-15
“Wopoliwa Wanyu Ori Vakhiviru”!
14 Exeeni enrowa okhumelela nuumala Gogi a Magogi opacerya waatuphela atthu a Muluku? Marko ni Matheyo aalepa masu oolikana ariki: “Owo [Mwana a mutthu] onoruma malaikh’awe wira yathukumanye atthu òthanliwa mulaponi mothene mwa vathí, okhuma wopajeryani w’elapo mpakha wokiseryani w’erimu”. (Mar. 13:27; Math. 24:31) Muteko owo wowaathukumanya atthu khonihimya othukumanyiwa woopacerya wa alipa-oowoottihiwa; nnakhala khonihimya otthittiwa ekanyeryo ya Muluku wookiserya wa alipa oothanliwa nlelo ari valaponi. (Math. 13:37, 38) Othanliwa nno oniiraneya ahinatthi opacerya maxakha maalupale. (Wis. 7:1-4) Nto muteko xeeni woothukumanya aahimya awe Yesu? Owo okathi yoole a 144.000 nlelo ari valaponi anrowa aya waakhela etthuvo aya ya orowa wiirimu. (1 aTes. 4:15-17; Wis. 14:1) Yowiiraneya eyo enrowa okhumelela nuumala Gogi a Magogi opacerya waatuphela atthu a Muluku. (Ezek. 38:11) Okathi owo anrowa waakhwanela masu ala a Yesu ani: “Vano anaxariya anrowa warya ntoko nsuwa Momweneni mw’Atithi aya”.—Math. 13:43.
15 Niireke eyo enitaphulela wira onoophiya okathi alipa-oowoottihiwa anrowa aya “okuxiwa”? Atthu anceene aneettela eKristau yoowoka anaamini wira yowiixuttiha ela enitaphulela wira maKristau awo anookuxiwa ni irutthu saya arowaka wiirimu. Tthiri awo anikupali wira orwa wa Yesu onrowa okhala wowooneya ni wira onrowa olamulelaka elapo. Masi, Biibiliya onnooniherya oratteene wira “nthonyeryo na Mwana a Mutthu” ninrowa okhumelela wiirimu ni wira Yesu onimoorwa “mmekuni” a wiirimu. (Math. 24:30) Moolumo ala otheene anihimya wira owo khunrowa wooneyaka. Ohiya-vo, noosuwela wira “Mutthu n’ikuru sawe [ephome ni erutthu] pahi onnojela wakhela omwene wa Muluku”. Nto ale anrowa wiirimu, anitthuneya “otatuxiwa; etthu ila enokhumelela nananoru, ntoko otthukula maitho ni waphila, vanrowaya wompwa nlope nokiserya”. (Mmusome 1 aKorinto 15:50-53.) Tivonto, vahinreerela ahu orumeela nuulumo noowi “okuxiwa” okhala wira nuulumo nla khannivarihana ni ele eri mBiibiliyani, alipa-oowoottihiwa ari valaponi anrowa othukumanyiwa mwa okathi vakhaani.
Omusoma Biibiliya
15-21 ya Julyo
MIHAKHU SINIKHUMA MBIIBILIYANI | 2 ATESALONIKA 1-3
‘Onnooniheriwa Mutakhali’
it-1 epax. 704 etti. 3
Omuttittimiha Muluku
Yookhala etthu ekina yootikiniha, enivirikanya ni ‘esiiri yaavithiwe’ ya Yehova. Onihimmwa ‘owerya wotakhala’. Eyo yaanaatikiniha maKristau a eseekulu yoopacerya okhala wira okathi wa murummwa Paulo atthu khiyaamusuwela tani aari “mutakhali”, nave iira ohinatthi wooniheriwa. Hata nuumala “mulopwana” owo, okhumelela khaarowa osuweliwa ni anamunceene, maana otakhala wawe khiwaarowa wooneyaka ni waarowa wiiraneyaka mowoothererya sintoko miteko sooreera. Tthiri waarowa okhala ommwareela Muluku orumeelaka miteko sooreera. Paulo aahimmye wira ‘owerya wotakhala’ waanivara muteko aya okathi ole, mwaha woowi saahikhala soohapuxa sinceene sootakhala mmulokoni mwa eKristau seiyo saarowa wiiriha okhumelela anammwareya. Wanikisa waya otakhala iwo wammalihiwa okathi Yesu aarowa awe opacerya olamulelo awe ohinooneya. Murumeyi owo oomwareya yoowo oneettihiwa ni Satana, aamukhala vasuluxa waavikana “atthu otheene anooniwa okhala ‘muluku’ wala itthu sinikokhoreliwa” (eGri., se’ba·sma). Nwanani owo muulupale a Muluku, yoowo ori ntoko ekaruma ya Satana, aarowa okhala mutthu oowoototha ni anwiiviha atthu otheene yaarowa otakiha mweettelo awe. Okhumela wawe saana “mutakhali” owo waarowa opacerya mwaha wa ohisuweliwa saana ni mwaha wowoothererya ovara itthu sinikhala wira sooreera.—2 aTe 2:3-12; mmulikanyiherye ni Mat 7:15, 21-23.
it-2 808 etti. 6
Wootha
Yehova Muluku onnahiya “eweriwaka ni wotha” ale anithanla owokiwa, wira “yaminiki itthu sihikhanle s’ekhweli” ohiya ihapari sooreera voohimya sa Yesu Kristu. (2 aTe 2:9-12) Eyo ennilikanyiheriwa ni etthu yamwiranenle mwene Akhabi a wIsarayeli wa khalai. Maprofeta owootha yaahimukupaliha Akhabi wira aamwaaxintta anakhotto oRamothi w’oGaladi, nnaamwi profeta a Yehova Mikaya aamulenle wira yena yammukhumelela ehasara. Sintoko ooniheriwe awe Mikaya, Yehova aaheemya wira yoopattuxiwa emosa ehinooneya epakeye nawoothe wira ewootothe maprofeta a mwene Akhabi. Eyo enooniherya wira, nlaikha nlo naahirumeela owerya waya wira niwootothe maprofeta awo wira ehihimye ekeekhai masi elavuleke itthu sowootha saarowa omusivela mwene Akhabi. Nnaamwi aaleeliwe maxakha yaarowa omukhumelela, Akhabi aaheemya wootothiwa ni anawoothe awe, nto eyo yaahimwiiriha wiiviwa.—1 Ma 22:1-38; 2 Wa 18.
Otokosa Itthu sa Efaita Soomunepani
it-2 149 etti. 8
Mooro
Murummwa Pedru olempe wira “erimu ya vano n’ilapo ya vano ennisukiwa wira epahiwe ni moro”. Moovarihana ni mwaha oniromoliwa vamosa ni soolepa sikina, vanooneya wira mooro onihimmwa khahiyo wa ekeekhai masi onithoonyerya opwetexiwa moohilipelela otthikela okhala. Sintoko epula yuulupale yaarumpe okathi wa Nowe yahaapwetenxe aya erimu ni elapo yekeekhai, ni yaawiivale aya paahi atthu ootakhala murima, nave etthu emosaru enimwiiraneya okathi onrowa awe wooniheriwa Yesu Kristu ni malaikha oowerya eriyari ya malumi a mooro wira yaapwetexe atthu ootakhala murima ni olumwenku ola wootakhala aniirela aya mpantta.—2 Pe 3:5-7, 10-13; 2 aTe 1:6-10; mulikanyihe ni Yes 66:15, 16, 22, 24.
it-2 402 etti. 6
Wuupuxeriwa
‘Moolumo Oowuupuxeriwa’—Eekeekhai ni Oowoothiwa. Nuulumo na eGriki noowi pneu’ma (munepa) ninnirumeeliwa mwa enamuna ya vameekhaaya ipantte sikina sa iliivuru silempwale ni arummwa. Mwa ntakiheryo, yoolepa ya 2 aTesalonika 2:2, murummwa Paulo aahaatumererya axinnawe a oTesalonika wira: muhukhuwé vowakuveya siso, nnákhala muhituthuwé mwaha w’ohimmwaka wira nihiku n’Apwiya nri vakhiviru. Akhalá ohimmye etthu ila, alavulaka sa Muluku [“Munepa”] walá alaleyaka: akhalá onihimya wira ti miyo kolepenleni”. Vanooneya wira Paulo oorumeela nuulumo noowi pneu’ma (munepa) okathi aalavula awe inamuna saarumeeliwa wira olaleiwe muhupi, ntoko: moolumo yaahimmwa ni eyano wala olempwa mpapheloni. Ti maana aya Eliivuru ya Langes eniitthaniwa Comentário Sobre as Escrituras Sagradas (epax. 126) elavulaka voohimya sa yoolepa eyo enihimya so: “Ni moolumo ala, Murummwa aaphavela ovaha malakiheryo oomunepani, muhupi wa muhoolo, moolumo a profeeta”. Eliivuru Estudos de Palavras do Novo Testamento) ya Vincent (Etaphuleliwe ni elokiheriwe ni P. Schaff, 1976), enihimya so: “Mwa munepa. Ni moolumo a eprofeeta yaalavuliwa ni atthu okathi wa mithukumano suulupale sa eKristau, yaihimya osuwelihiwa ni Muluku itthu saarowa okhumelela muhoolo”. (1957, Evolume. IV, epax. 63) Nnaamwi anamataphulela akina nuulumo noowi pneu’ma yoolepa ela ni soolepa sikina etaphulelaka ni masu oowi “munepa”, aBiibiliya akina anitaphulela so : “ihapari sa munepa” (The Bible—An American Translation), “ohimya etthu ya muhoolo” (A Bíblia de Jerusalém), “wuupuxeriwa” (D’Ostervald; Segond [efrancês]), “moolumo oowuupuxeriwa” (Novo Mundo).
Omusoma Biibiliya
22-28 ya Julyo
MIHAKHU SINIKHUMA MBIIBILIYANI | 1 TIMÓTHEYO 1-3
“Mphaveleke Ovara Muteko Wooreera”
Niireke Munnoona Otthuneya Waya Wunnuwa Momunepani?
3 Mmusome 1 Timótheyo 3:1. Murummwa Paulo aahaattottopela anna yaawo ‘aniphavela’ wira akhale axitokweene. Wira mutthu ophwanye etthu erakamenle, owo ohaana wiimananiha aahiiso wookola moono awe wira ophwanye wala okuxa etthu eyo. Vano nkahaya mmuupuwele munna oniphavela okhala murummwa oorumeela. Owo onnoona wira ohaana wiimananiha olokiherya mikhalelo sawe ntoko muKristau. Nto, nuumala okhala murummwa oorumeela, onnivikaniha wiimananiha wira ophwanelele okhala mutokweene.
km 2/79 epax. 3 etti. 7
Ale ‘aniiphwanyiha nttittimiho nooreera’
7 Ti vookhweya osuwela nthowa naya Paulo aahimmye awe wira alopwana awo “annìphwanyiha nttittimiho norera”. Khahiyo onihimmwa okhulupale wa mukerexa, sintoko atthu akina anuupuwela aya. Arummwa oorumeela anivara saana miteko saya annisuwela wira anooreelihiwa ni Yehova ni Yesu, nave annikhaliheriwa ni muloko wotheene. Awo “annìphwanyiha nttittimiho norera, annilipiherya murima olaleya omwamini Yesu Kristu”. Mwaha wookhalana moonelo wooloka voohimya sa muritti arina aya, awo annixukhureliwa vanceene mwaha wa muteko anvara aya ni annilipiherya waamini nave annilaleya waamini waya mohoova etthu ni ehoonaka ehaaya.
Otokosa Itthu sa Efaita Soomunepani
it-2 196-197
Masina Aamuhakhalai
Khivaareerela ohonona okathi mutthu osomaka wala onyakulihana voohimya sa masina a atthu a khalai, vanceenexa okathi murummwa Paulo aamulepenle awe Timootheyo. Khivaatthuneya osuka masina amuhavinre wira mutthu osuwelexe nihimo nawe, maana Muluku khaavaha efaita ovirikana waakhanle eriyari ya aYuda ni atthu yahaakhanle aYuda mmulokoni mwa eKristau. (aGa 3:28) Nave iliivuru saalempwale khalai saanihimya masina a nloko aayariwe awe Kristu mweemusini mwa Davidi. Moohipisa, nuumala murummwa Paulo olepa masu ala, epooma ya oYerusalemu yaahipahiwa vamosa ni iliivuru sa aYuda saalempwe masina aamuhakhalai a nihimo na aYuda. Muluku aaheemererya opwetexiwa. Paulo aaphavela omukhaliherya Timootheyo ni muloko wa eKristau wira ohihapuxiwe ohononaka okathi aya evaanyihanaka voohimya sa masina a amuhavinre, maana eyo khiyaavarihana ni waamini wa eKristau. Masina makina a atthu ni imusi saya wala mahimo aya aniromoliwa mBiibiliyani anninooniherya nloko na Mesiya aahiiso Kristu, nto awo tootepa otthuneya wa maKristau. Nave-tho masina makina annivaha onamoona voohimya sa ororomeleya waya soohimmwa siri mBiibiliyani, yooniheryaka oratteene wira soohimmwa siri mBiibiliyani ti sa ekeekhai.
cl 12 etti. 15
“Muluku ahu t’ula”
15 Mwiihaneliwo mukina oniitthaneliwa awe paahi Yehova ti “Mwené a mahiku òhimala”. (1 Timótheyo 1:17; Wisupulula 15:3) Eyo entaphulela-ni? Khivanikhweya hiyo wiiwexexa mwaha ola, masi vanooneya wira Yehova ti Muluku a mahiku otheene mwa inamuna piili, eyo piiyo, khalai ni muhoolo. Esalimo 90:2 enihimya so: “Nyuwo mwá Muluku okhuma wopajeryani mpakha mahiku othene”. Ela enooniherya wira Yehova khorina epacerelo, owo onnikhala mahiku otheene. Nave Yehova onniitthaniwa okhala “Humu mulupale” okhala wira onnikhala okhuma khalai ohinatthi opattuxiwa mutthu nnakhala etthu ekina valaponi! (Daniyeli 7:9, 13, 22) Tani oniwerya ovaanyiha ehakhi ya Muluku ya okhala Mwene Muulupalexa?
Omusoma Biibiliya
29 a Julyo–4 a Agosto
MIHAKHU SINIKHUMA MBIIBILIYANI | 1 TIMÓTHEYO 4-6
“Exeeni Erina Efaita—Omwiiwelela Muluku, Wala Wiithukumanyerya Mihakhu?”
w03 1/6 9 etti. 1-2
Mutteeliweke Murima ni Itthu Murina Anyu
Etthu emosa-emosa yaamwiiriha Paulo ohakalala waari mwaha wootteeliwaka murima ni itthu aarina awe. Ontaphulela-ni otteeliwa murina ni itthu mutthu orina awe? Mwa enamuna yookhweya, ontaphulela ohakalalaka ni itthu siri sootthuneya mookumini mwahu. Olavulaka sa mwaha ola, Paulo aahinvaha miruku Timootheyo ohimyaka so: “Omuttittimiha Muluku onimphwanyiha muhakhu mulupale mutthu onsiveliwa n’itthu sirinawe: tthiri, nrwaka molumwenkuni-mu khinarina etthu; siso-tho, nakhumaka-mu, khaninwerya okuxa etthu. Tivó, nakhalanaka yolya ni sowara, nihakalaleke ni seiyo”.—1 Timótheyo 6:6-8.
Nwehe wira Paulo oolikanyiha otteeliwa murima ni itthu mutthu orina awe ni omuttittimiha Muluku. Paulo aahiweha wira ohakalala wekeekhai oniphwanyiwa ni omuttittimiha Muluku, eyo piiyo ohela nipuro noopacerya muteko wa Muluku, ohiya mihakhu wala othaaciri. ‘Okhalana yolya ni sowara’ saari itthu saamukhaliherya Paulo wira ovikaniheke ovara muteko wa Muluku. Mwa moonelo awe, otteeliwa murima ni itthu mutthu orina awe onitaphulela omuroromela Yehova, hata simphwanyaka mixankiho.
g 6/07 epax. 6 etti. 2
Ophavela Okhala Thaaciri ni Mixankiho Sinikhumelela
Ekeekhai wira atthu anceene khanikhwa mwaha woophavela okhalana mihakhu sinceene. Hata vari siiso, ti vookhweya opweteiwa okumi aya amananihaka ophwanya mihakhu iyo. Ohiya-vo makhalelo a okumi aya pooti otepeleleya akhala wira oriipiwa murima onikumiheriwa ni muteko wala mixankiho sa musurukhu onniwiiriha ovelavela. Eyo pooti owiiriha ohiphwanya ikhove, owereiwa muru, okhuma makhwatta. Mixankiho iyo pooti omwiiriha mutthu okhwa ohuuluvanle. Okathi owo hata mutthu oonaka wira vannitthuneya opaka marukunuxo, woonasa wene pooti ohiweryaneyaka. Woonasa wene iyawe wala mwaarawe mutthu owo pooti opaceryaka ohimuroromela-tho; anamwane pooti okhalanaka mixankiho sa mmuupuweloni, ni okumi woohiloka. Ekeekhai wira pooti oweryaneyaka olokiherya itthu sikina masi onitthuneya wiimananiha vanceene. Tthiri atthu aninlela othaaciri ‘annihaxa mmasaya ni masoso malupale’.—1 Timótheyo 6:10.
g 11/08 epax. 6 itti. 4-6
Itthu 6 Wira Mutthu Okhumele Saana
Sintoko niwenhe ahu mwaha woopacerya wa epantte ela, atthu aniimananiha ophwanya muhakhu munceene yuupuwelaka wira ti etthu eniphwanyiha ohakalala, annoomola epheyo. Eyo khahiyo paahi enikumiherya oriipiwa murima masi-tho enniphwanyiha maxakha. Mwa ntakiheryo, vaavo atthu aniphavela aya ophwanya muhakhu munceene ikwaha sikina annihiya othokorerya emusi aya vamosa ni apatthani aya. Nave, ovara muteko okathi munceene, othanana, ni oxanka onniwiiriha atthu akina ohiphwanya ikhove. Musuweli 5:11 onihimya so: “Namuteko, akhalaná yolya yinjene walá vakhani, mano onnirupa orattene: masi thajiri onneteteya vanjene ni mihakhu sawe, khuhinawerya orupa ohiyu”.
Ohiya paahi okhala pwiya ootakhala, musurukhu woototha. Yesu Kristu aahilavula voohimya sa “wototha wa muhakhu”. (Mar 4:19) Mwa moolumo makina, mihakhu sinnileiherya ophwanyiha ohakalala masi eyo kheniiraneya. Mihakhu sinimukhanyererya paahi mutthu ohiphiyeriwa. Musuweli 5:9 onihimya so: “Ole omphavelexa musurukhu, khanrowa wira: Wokiphiyerya”.
Mwa masu ookwasa, ophenta musurukhu onnikumiherya mixankiho sinceene ohiya ophuka, wanikisa waya, onnikumiherya masooso, onyoonyiheya, wala ekrime. (Miruku 28:20) Itthu siniphwanyiha ohakalala tiiya: ovaha, olevelela, okhalana mweettelo wooloka, niphento, ni mukhalelo wa omunepani.
Otokosa Itthu sa Efaita Soomunepani
Moota Wookhalana Yowuupuxerya ya Murima Yooloka
17 Murummwa Pedru aalempe so: ‘Mukhalaneke yowuupuxerya ya murima yooloka’. (1 Pedru 3:16, NM) Ti vooreera okhalana yowuupuxerya ya murima eneemereriwa ni Yehova Muluku. Eyo ennivirikana ni yowuupuxerya ya murima ya anamunceene olelo-va. Olavulaka sa atthu awo, Paulo aahimyale so: ‘yowuupuxerya ya murima aya yootthittiwa ni eyuuma’. (1 Timótheyo 4:2, NM ) Eyuuma yooviha enipaha erutthu, enniiriha erutthu okhalana murala nto khuhiyoona owereya. Tthiri, yowuupuxerya ya murima ya atthu akina khenivara muteko, niire so, erina murala ni khenoona owereya, khenlopola, khenaakiherya, aahiiso wuuliwa muru wala ovaha nthowa nuumala opaka etthu yoohiloka. Olelo-va, anamunceene khanivaha efaita okathi yowuupuxerya ya murima aya vanihimya aya wira aapaka etthu yoohiloka.
it-2 688 itti. 5-6
Waasomela Atthu Soolempwa
Mmulokoni wa eKristau. Eseekulu yoopacerya, atthu anceene khiyaarina ikoopiya sa iroolu sinceene sa Biibiliya, nto eyo yaaniiriha otthuneyaka osommwa iliivuru iyo okathi wa mithukumano. Murummwa Paulo aahiruma miloko sa eKristau osomaka ipaphelo aalepela awe, nave aahitumererya wira nuumala osommwa ipaphelo iyo saahaana oroihiwa miloko sikina wira nave sasommwe. (aKol 4:16; 1 aTe 5:27) Nnaamwi mmiravo Timootheyo aari mutokweene a muloko wa eKristau, Paulo aahimutumererya wira aahaana olimalela osoma nuulumo na Muluku aahiiso “wasomela atthu Solempwa ni walalèrya n’uwixuttiha”.—1 Ti 4:13.
Ale anisoma Soolempwa ohoolo wa atthu anceene ahaana osomaka mowiiwanyeya. (Hab 2:2) Okhala wira yoosoma ya Nuulumo na Muluku yoolukama aya owiixuttiha atthu, mulipa-oosoma ohaana ovarerya saana ele enisoma awe ni osuwela ele mulipa-oolepa eniphavela awe ohimya. Nave ohaana okhalana ephoole okathi woosoma wira ohiwiirihe alipa-oowiriyana wuupuwelela itthu soohiloka. Moovarihana ni Wisupulula 1:3, ale anisoma eprofesia eyo mowiiwanyeya, vamosa ni ale aniwiriyana itthu silempwale ni eneettela, anoophwanya ohakalala.
Omusoma Biibiliya