Olaleerya Mooluttuweliwa Onnikumiherya Mireerelo — Mwaha ola okumihiwe Anuário das Testemunhas de Jeová de 2015

Ilapo sa wAmérica

Ikwaasuni Sinnirowa Omuthukumanoni

Epaaxina 54, ettima 1

Angela, yoowo onikhala oSuriname, aahixukurya nipuro naakhala ikwaasuni nowaattamela owannyawe. Namahoolela a nipuro nle aari murokora aahiiye ovara miteko sa Muluku, nto owo aahimweemererya Angela wira aalaleerye anamwane awo. Angela aahilavulana anamwane 85 nto aahiwooniherya iviidiyu sa jw.org. Nuumala-vo aahipacerya waasomiha Biibiliya anamwane anceene. Owo aanirowa ni mapioneero makina anli, nto khula mutthu aanikhalana egrupu awe.

Murokora ole aahiiye ovara miteko sa Muluku aahihimya wira aaniwiixuttiha anamwane awo isipo sa eliivuru ahu ya isipo ni aanisoma myaha sa mBiibiliyani ohiyu anamwane awo ahinatthi orupa. Owo aahihimya wira aaniphavela orowa omuthukumanoni, masi khaawerya waahiya anamwane ale 85 mekhaya nipuro nle yaakhala aya. Nto yaahipakiwa marehereryo wira anamwane ale otheene arowe Empa ya Omwene. Okhala wira opuro ole waari wowaattamela Empa ya Omwene, anna annaarowela anamwane awo. Vano murokora ole ni anamwane awo otheene 85 khanicompa mithukumano khula esumana.

OBrasil

“Nyuwo Khamukixukunrye Mahala”

Epaaxina 56, ettima 2 mpakha epaaxina 57, ettima 1

OBrasil, okathi aakawa awe etratato eni Niireke Alipa-ookhwa Anookhala-tho Akumi Tthiri? Jennifer aahiphiya ntthoko na muthiyana mmosa yoowo ailokiherya wira orowe omasikhoni wa mpatthani awe amphenta awe. Jennifer aahimuhimeerya muthiyana ole wira aaphavela onvaha etratato yaalavula sa nlipelelo na otthikela waaweha ale yaaphenta ahu akhwiiye. Muthiyana ole wanipacerya khaaphavela waakhelela etratato ele, masi nuuvira okathi uupuwelaka ahaakhelela etratato eyo. Okathi waakohiwe awe vakhala wira aamweemererya okuxa itratato sikina wira aakawele amusi ale akhweliwe, muthiyana owo ahoona wira eyo yaari etthu yooloka nto aheemererya okuxa itratato 9.

Jennifer aahitthikela omuxukurya muthiyana ole muhoolo mwaya, nto owo aahimmye so: “Nihiku noopacerya mwaakixukunrye anyu, kaahoona wira khimwaakixukunrye mahala. Muluku ahoorumani wira muruuhe muhupi wa nimaaliho waaphavela aka”. Owo aahikawa itratato sotheene aakunxe awe. Mmusi mmosa aalavula onaakhwani, aahisoma etratato eyo yotheene ohoolo wa atthu yaari vaavo. Atthu otheene yaahisiveliwa ni yaahimuxukhurela mwaha wa nimaaliho aaruuhale awe. Muthiyana ole ahaakhulela osomihiwa Biibiliya.

OFilipina

“Orumeela Mensagem Okathi wa Epula”

Epaaxina 63, ettima 2 mpakha epaaxina 64, ettima 1

Greg ni Alma yaahithaamela esisiro ya oCatanduanes oFilipina, wira yalaleerye muttetthe woothowa anamalaleerya a Omwene. Muttetthe ole waatta myaako, nto Greg ni Alma yahaana weetta ikiloomo 19 wira aphiye mpantta mukina wa muttetthe aya. Okathi mukina awo yaanimaliha iwoora piili yeettaka ni ekalawa wira arowe yalaleerye isisiro sikina. Okathi wa epula, vaanixankiha opaka mikwaha iyo sotheene. Ohiya okilaathiki owaani paahi ahilaleeryaka, awo yaahittottela mureerelo opunttheya wa miteko sa celulaari saakumiheriwe ni ekompaniya ya muttetthe ole yaaweemererya olepa mensagem manceene ahilivaka musurukhu wowaatta.

Greg onihimya wira aapacerya olepa mensagem awo ohimyaka nsina nawe. Nto khiyahimya so: “Kiniphavela wooleelani muhupi onikhuma mBiibiliyani”. Yoolepa emosa yoonale awe ovareleya muteko ti Yohani 17:3. Nuumala oromola yoolepa eyo, owo aanaakoha makoho ala manli: “Tuuvi Okhanle Muluku a Ekeekhai? ni Yesu Kristu Taani? Nto anaavekela atthu awo wira amwaakhule. Vakhala wira mutthu owo anaakhula, Greg aanimuroihela soolepa sikina ntoko, Esalimo 83:18 (NM). Vakhala wira mutthu owo aanaakhula khula okathi aamulepela awe mensagem, owo aanimukoha vakhala wira vaamureerela omuligarela wira avaanele oratteene. Greg ni Alma anihimya wira anamun­ceene yaanaakhula.

Greg ni Alma yaahimulepela muthiyana mmosa yoowo aarina makoho manceene a mBiibiliyani, nto awo yaahiroihelana mensagem manceene. Nto mensagem awo yaahikumiherya yoosoma ya Biibiliya. Muthiyana ole aahimuleela musulu awe ni mwaapara awe a omutekoni ele yaaxutta awe. Eyo yookumiherya obatiziwa wa atthu awo araru.

[Ipaaxina soohikhala etthu 5,6]