Ireferensia sa Okumi ni Orummwa Ahu Ekaderno Enirumeeliwa Omuthukumanoni
3-9 YA FEVERERO
MIHAKHU SINIKHUMA MBIIBILIYANI | MAPHATTUWELO 12-14
“Nivarihano Nenlo Ninheliwa Ahu Muhina”
it-3 epax. 155 etti. 4
Nivarihano
Nivarihano na Abrahamu. Nivarihano na Abrahamu woonasa wene naapacenrye ovara muteko okathi Abramu (Abrahamu) aalapunwe awe muro Eufrati orowaka oKanani. Nivarihano nlo naapakiwe sivinre ene iyaakha 430. (aGa 3:17) Yehova aahilavula ni Abrahamu okathi aakhala awe oMesopotamia, muttetthe wa wUri ni oKhaldeya, khumuhimeerya wira ahaana weetta mukwaha orowaka okhala muttetthe aarowa awe omuthoonyerya. (Mit 7:2, 3; Map 11:31; 12:1-3) Eliivuru ya Okhuma 12:40, 41 (LXX) ennooniherya wira okathi saavirale aya iyaakha 430 aakhalaka wExiitu ni elapo ya oKanani “nihiku nene nenlo” aIsarayeli yaahikhuma weepotthani wExiitu. Nihiku yaataphuliwe aya wExiitu naari nihiku na 14 a nisani mwaakha wa 1513 Ahinatthi Kristu Orwa, nihiku na Pasikha. (Okh 12:2, 6, 7) Eyo enooniherya wira Abrahamu aalapunwe muro Eufrate orowaka oKanani nihiku na 14 a nisani mwaakha wa 1943 Ahinatthi Kristu Orwa, woonasa wene waari okathi yoowo nivarihano na Abrahamu naapacenrye aya ovara muteko. Muluku aahimukhumelela-tho Abrahamu, nuumala orowa oKanani ni ophiya oSikhemi, khumuhimeerya wira: “Miyo kinovaha elapo ela osùlu anyu”, eyo yooniherya wira nivarihano nlo naanivarihana ni yooleiherya Muluku aapanke awe wEdeni, ooniheryaka wira “osùlu” waarowa okhumelela orweela wa apinaatamu, eyo piiyo, orweela wa nloko na apinaatamu. (Map 12:4-7) Sookhala sooleiherya sikina Yehova aahimmye awe muhoolo mwaya, sintoko enooniherya aya eliivuru ya Maphattuwelo 13:14-17; 15:18; 17:2-8, 19; 22:15-18.
(Maphatuwelo 12:3)
w89 1/7 epax. 3 etti. 4
Xeeni Vanreerela Ahu Osuwela Ekeekhai Voohimya sa Abrahamu?
Enihimmwa yooleiherya yootikiniha, yeeyo Yehova aamulenle awe Abrahamu ikwaha piili. (Maphattuwelo 18:18; 22:18) Wira akhwaniherye yooleiherya awe, Muluku onimwaahihimuxa atthu otheene akhwiiye. Awo anrowa okhala mareeliho waale anirowa ohihimuxiwa, okhala wira okathi owo makhalelo a valaponi, anrowa okhala ntoko a eParayiisu ya khalai. Nuumala-vo, anirowa wiixuttihiwa moota woophwanya ekumi yoohimala.—Maphattuwelo 2:8, 9, 15-17; 3:17-23.
it-2 epax. 676 etti. 1
Nlamulo
Moovarihana ni soohimmwa, asomi akina annikupali wira okathi mulipa-oothuma mathala aavahiwa awe, anooniheriwa mapuro yaavira aya, ni mikano saya. Okathi mulipa-oothuma aahimya awe wira ‘kinnoona’, eyo yooniherya wira owo aaneemererya. Vaavo Yehova aamuleihenrye awe Abrahamu onvaha elapo ya oKanani, aahimuleela wira ‘owehe’ ipantte soxeexe sa elapo eyo. Abrahamu khaahimmye wira “kinnoona”, okhala wira Muluku aahimuleela wira aarowa ovaha osuulu awe, muhoolo. (Map 13:14, 15) Nave Moise, sintoko muhooleli a nloko na aIsarayeli, Yehova aahimuleela wira ‘owehe’ elapo yooleiheriwa. Nto akhala wira yoowiiraneya nthokorenrya ahu wanipacerya ti yekeekhai, eyo enooniherya wira ovahiwa wa aIsarayeli elapo ele waari wookhalela, masi ahooleliwaka ni Yoxuwa. (Otu 3:27, 28; 34:4; muthokorerye nave etthu Satana anvanhe awe Yesu eri Mat 4:8.) Enamuna ekina yooniherya wira mutthu owo aaheemererya elapo eyo waari: weetteetta mulaponi mmo, wala okela ophavelaka okhala. (Map 13:17; 28:13) Iliivuru sa khalai, sinnooniherya wira waatta wa miri saaniheliwa muhina okathi yaathummwa aya mathala.—Mulikanyihe ni Map 23:17, 18.
Otokosa Itthu sa Efaita Soomunepani
Mphukeke Myaha Moophenta
12 Biibiliya onnooniherya moota arumeyi a Muluku anrowa aya okhalihanaka ni murettele ni ophuka myaha saya moophenta. Mwa ntakiheryo, Abrahamu ni Lothi yaahikhalana mihuwo sinceene, nto amakampusi aya yaahipacerya onyakulihana, okhala wira khiwaakhanle opuro waaphiyerya olyiha inama sotheene. Masi okhala wira Abrahamu aaphavela murettele, aahimuhiyerya Lothi opacerya othanla opuro aaphavela awe. (Maph. 13:1, 2, 5-9) Tthiri nla ntakiheryo nooloka! Niireke Abrahamu aahipweteiwa etthu mwaha wa oreera wawe murima? Nnaari. Nuumala wiiraneya ela, Yehova aahimuleiherya omureeliha vanceene, ovikana itthu saalenve awe. (Maph. 13:14-17) Yehova khoneemererya wira arumeyi awe apweteiwe moomalela, mwaha wa otthara malakiheryo awe, okathi aniphuka aya myaha saya moophenta.
it-3 epax. 484 etti. 5
Mulipa a Mukuttho
Melikhisedeki mwene oSalemi aari namukuttho muulupale (ko·hén). Biibiliya khonihimya etthu voohimya sa amuhataata awe, eyareliwo awe wala makhwelo awe. Onamukuttho awe khaahiyeriwe ni mutthu mukina, eyo piiyo, khaaranttenle ni khaarantteliwe. Melikhisedeki aarumeela ntoko mwene ni mulipa a mukuttho. Onamukuttho awe waari wuulupalexa ovikana onamukuttho wa Levi, okhala wira nloko na aLevi, naanimuliva mpantte wa namuloko Melikhisedeki, maana nlelo yaari osuulu wa Abrahamu tivo aanvanhe awe Melikhisedeki mpantte wa namuloko ni khureelihiwa ni yoowo. (Map 14:18-20; aHé 7:4-10) Mwaha waivaavo Melikhisedeki aathoonyerya Yesu Kristu, yoowo okhanle “mulipa a mukuttho wa mahiku othene, enamuna y’onamukuttho wa Melikhisedeki”.—aHé 7:17.
Omusoma Biibiliya
10-16 YA FEVERERO
MIHAKHU SINIKHUMA MBIIBILIYANI | MAPHATTUWELO 15-17
“Exeeni Yaamwiirinhe Yehova Oturuka Nsina na Abramu ni Nsina na Sarai”?
it-2 epax. 101 etti. 7
Yoottheka, Ophwanyaniwa Yoottheka
Mwa enamuna ekina, muupuwelo wa apinaatamu ni mweettelo aya ikwaha sinceene onniwiiriha ottheka. Etampi ni ovonya wa apinaatamu sikhumelenle mwaha wa etampi aravihiwe aya ni Adamu. (aRo 5:12; Esa 51:5) Masi Yehova, yoowo ori oohittheka, ‘onnisuwela wira hiyo ná ntthupi pahi’, ni toomoriwa ikharari. (Esa 103:13, 14) Owo aanimoona murumeyi awe Nowe okhala “òrera murima mw’atthu othene a mahiku awo”. (Map 6:9) Nave aahimuhimeerya Abrahamu wira: “Mwetteke va maithoni vaka: mukhalé òrera murima”. (Map 17:1) Nnaamwi alopwana ale anli yaari oohimalela ni akhwiiyene, yaanooniwa ni Yehova, yoowo ‘oniweha murima’ okhala sintoko atthu oohittheka. (1 Sa 16:7; munwehe-tho 2 Ma 20:3; 2 Wa 16:9.) Nave aaharuma aIsarayeli wira yaahaana ‘omurumela [Yehova] ni murim’aya wothene’. (Otu 18:13; 2 Sa 22:24) Owo onvaha Mwanawe oohittheka (aHé 7:26) sintoko mukuttho wowoopola, ni orweela mwa yoowo, anoothokoreriwa okhala anaxariya wala oohittheka, ale animwaamini ni animwiiwelela, okathi omosaru orumeelaka ntoko Mphuki a xariya ni oohittheka.—aRo 3:25, 26; nwehe nuulumo INTEGRIDADE; wala PERFEIÇÃO.
it-1 epax. 28 etti. 6
Abrahamu
Okathi woovira. Awo nlelo yiira aakhalaka oKanani mwa iyaakha 10, masi Sara nlelo khaayara. Nto, Sara aahikuxa epottha awe ya wExiitu Agari khunvaha Abrahamu, wira omuyarele mwaana nipuro nawe. Abrahamu aaheemererya. Nto, eyaakha ya 1932 Ahinatthi Kristu Orwa, okathi Abrahamu aarina awe iyaakha 86, aahiyareliwa Iximayeli. (Map 16:3, 15, 16) Waahivira-tho okathi munceene. Eyaakha ya 1919 Ahinatthi Kristu Orwa, okathi Abrahamu aarina awe iyaakha 99, sintoko ethoonyeryo wala eseelo ya nivarihano na vameekhaya, naakhanle eriyari ya Abrahamu ni yena, Yehova aahihimya wira alopwana otheene a etthoko ya Abrahamu yaahaana winnuwihiwa. Okathi omosaru, Yehova aahituruka nsina na Abramu kukhala Abrahamu, ‘okhala wira arowa okhala tiithi a maloko manjene’. (Map 17:5, 9-27; aRo 4:11) Nuuvira okathi, malaikha mararu, yaawo Abrahamu aakhenle awe moopatthaneya mwa nsina na Yehova, yaahimuleiherya Sara wira aamurupala ni ammuyara mwaana mwaakha waattharelana!—Map 18:1-15.
w09 1/2 epax. 13 etti. 3
Niireke Masina Aakhalana Yoothaphulela Aya?
Muluku aahituruka masina a atthu akina yaari oowunnuwela ophavelaka waaleiherya etthu. Mwa ntakiheryo, owo aahituruka nsina na Abramu, nenlo nintaphulela “Tiithi Ottittimiheya”, kukhala Abrahamu, nenlo nintaphulela ‘Tiithi a Maloko manjene’. Orweela mwa yootaphulela ya nsina nlo, Abrahamu aahikhala tthiri tiithi a maloko manceene. (Maphattuwelo 17:5, 6) Nwehe-tho ntakiheryo nikina na mwaarawe Abrahamu, Sarai, nenlo nintaphulela woonasa wene “Onyakulihana”. Muupuwele moota Sarai ahaareere awe ohakalala nuumala Muluku oturuka nsina nawe kukhala “Sara”, nenlo nintaphulela “Mai a maloko”, eyo yooniheryaka wira orweela mwa yoowo yaamukhumelela mamwene.—Maphattuwelo 17:15, 16.
Otokosa Itthu sa Efaita Soomunepani
it-1 epax. 615 etti. 3
Soowiiraneya
Yehova aahimuleela Abramu (Abrahamu) wira: “Musuwele etthu ila, muhiliyaleké: osùlu anyu onrowa okhalaka elapo ehikhanle yawaya; weiwo onrowa okhalihiwa epottha n’uhaxiwa mpakha iyakha miloko miloko mixexé”. (Map 15:13; munwehe-tho Mit 7:6, 7.) Ela yaahimmwale ohinatthi oyariwa mwaana aaleiheriwe, wala “osulu” Isakhi. (Map 16:16; 21:5) Eyaakha ya 1932 Ahinatthi Kristu Orwa, Abrahamu aahimuyara Iximayeli, mwaana a epottha ya Sara ya wExiitu, yiitthaniwa Agari, nave mwaakha wa 1918 Ahinatthi Kristu Orwa, aahiyariwa-tho Isakhi. (Map 16:16; 21:5) Nakontari iyaakha 400 muttuli, okhuma nihiku yaakhumme aya weepotthani, vaavo waamanle aya ‘ohaaxiwa’ (Map 15:14), nimmalela mwaakha wa 1913 Ahinatthi Kristu Orwa, ni okathi owo Isakhi aarina iyaakha 5. Vanikhala ntoko wira yaari eyaakha yeeyo Isakhi aattaruxiwe awe nipele okathi aakhala awe ‘elapo ehikhanle yawawe’ nto aahipacerya ohaaxiwa sintoko vaahimmwale aya, vaavo Iximayeli ‘amutheyawe’ Isakhi, nave Iximayeli okhathi ole aarina iyaakha 19. (Map 21:8, 9) Mahiku ahu ala, nnaamwi Iximayeli omutheya wawe Isakhi wooniwaka ntoko etthu yoohitthekeya, masi okathi ole yaari etthu yooveeha vanceene. Ninnisuwela eyo mwaha wa moota Sara oonenle awe ni moota Muluku aaphunke awe mwaha ole eemereryaka wira Agari ni mwana awe Iximayeli yoomoliwe. (Map 21:10-13) Mwaha woolempwa yoowiiraneya ela mBiibiliyani, eyo enooniherya wira okathi owo ti waapacenrye aya iyaakha 400 sa ohaaxiwa waahimmwale, ni saarowa omala okathi wa Okhuma waya wExiitu.—aGa 4:29.
it-2 epax. 73 etti. 6
Okhuma
“Nloko na nexexe”. Nihiliyale wira Yehova aahimuleiherya Abrahamu wira, nloko na neexexe, na osuulu awe naamutthikela oKanani. (Map 15:16) Iyaakha 430 sotheene, okhuma nihiku naapacenrye aya ovara muteko nivarihano na Abrahamu mpakha Okhuma waya wExiitu, yaahikhala maloko yaavikana maxexe, hata nisuwelaka wira atthu a mahiku ale yaanikhala iyaakha sinceene ahikhwiiye, sintoko soolempwa sinihimya aya. Masi saavinre iyaakha 215 paahi aIsarayeli akhalaka wExiitu. Maloko maxexe yaakenle wExiitu nnoowerya waalikela mwa enamuna ela, nirumeelaka sintoko ntakiheryo nloko nimosa paahi na wIsarayeli, nloko na Levi: (1) aLevi, (2) Kehathi, (3) Amurami, ni (4) Moise.—Okh 6:16, 18, 20.
Omusoma Biibiliya
17-23 YA FEVERERO
MIHAKHU SINIKHUMA MBIIBILIYANI | MAPHATTUWELO 18-19
“‘Mulamuli a Elapo Yotheene’ Aahipwetexa Epooma ya oSodoma ni oGomora”
‘Mulamuli a Elapo Yothene’ Onnipaka Itthu Sotheene Mwa Xariya
ABRAHAMU aahimukoha Yehova wira: “Nyuwo munlamula elapo yothene, khamunrowa wettela exariya?” (Maphattuwelo 18:25) Mulopwana ole oororomeleya Abrahamu, khahiyo wira aamukonhe Muluku mwaha woowi amwaanyiherya. Ohiya-vo, nikoho nawe ninnooniherya wira aanikupali wira Yehova aarowa ophukela mwa xariya ipooma sa oSodoma ni oGomora. Nave aanikupali wira Yehova khaarowa “owìva atthu òloka vamosá n’atthu òtakhala”. Omuhimyaka Yehova, Biibiliya onihimya so: “Owo t’ikuru sahu: miteko sawe ti soloka, iphiro sawe sothene ti sa xariya. Muluku ahu t’òroromeleya: owo khannòtotha. Owo t’àxariya ni t’owòkololowa”.—Otum. 31:19; 32:4.
Ovilela—Wookhalana Yoolakela
Tthiri, Yehova tori ntakiheryo noolokexa na ovilela. (2 Ped. 3:15) Ikwaha sinceene, ninnisoma mBiibiliyani wira Yehova toovilela. (Neh. 9:30; Yes. 30:18) Pooti wira munnuupuwela moota Yehova aavilenle awe okathi aakhula awe makoho a Abrahamu, voohimya sa yoolakela awe ya opwetexa oSodoma. Yehova khaamuhiihale Abrahamu okathi aakoha awe. Masi moopixa murima, aahiwiriyana makoho ni oxankiheya wa Abrahamu. Nuumala-vo, Yehova aahimooniherya Abrahamu wira aahiiwa yooveka awe, ni khaarowa opwetexa oSodoma akhala wira yamphwanyaneya anaxariya 10 epooma ele. (Maph. 18:22-33) Okhala wira Yehova toopixa murima, okhala wene onipaka itthu mwa xariya!
w10 15/11 epax. 26 etti. 12
Yehova Tori Namalamulela Ahu!
12 Nikupaliki wira Yehova moohipisa onootikitherya okhulupale awe. Owo khonirowa ohiya otakhala okhalaka wa mahiku otheene valaponi, nave ninnisuwela wira ninkhala mahiku ookiserya. Yehova aahaapwetexa atakhali okathi wa mutaaseke. Nave aahipwetexa ipooma sa oSodoma ni oGomora, Farawo ni anakhotto awe, Sisera ni anakhotto awe, hata Senakeribi ni anakhotto awe a wAsiriya khiyooponwe mmatatani mwa Mulamuli Muulupale. (Maph. 7:1, 23; 19:24, 25; Okhum. 14:30, 31; Makh. 4:15, 16; 2 Mam. 19:35, 36) Tivo niroromeleke wira Yehova Muluku, khonirowa ohiya nsina nawe niveehiwaka wa mahiku otheene ni waahiya anamoona awe ehaaxiwaka. Ohiya-vo, ninnoona ethoonyero ya orwa wa Yesu ni ya omala wa olumwenku ola wootakhala.—Math. 24:3.
Otokosa Itthu sa Efaita Soomunepani
w88 15/5 epax. 23 itti. 4-5
Niireke Ookhala Otonko Omoona Muluku?
Vano ninniwerya wiiwexexa etthu yaamwiirinhe Abrahamu ovaanela ni nlaikha naarummwale ni Muluku okhalaka ntoko aalavula ni mwaneene Yehova. Okhala wira nlaikha nlo naahimya moolumo a Muluku, yaawo aaphavela awe wira Abrahamu osuwele, nto nlaikha nlo naalavula nipuro na Muluku, ti maana aya soolempwa sinihimya aya wira: “Apwiya [Yehova] yahìsoniherya w’Abrahamu”.—Maphattuwelo 18:1.
Muupuwele wira nlaikha naarummwa ni Muluku naanwerya ohimya muhupi Awe, sintoko siisale telefoni wala radio oniwerya awe omuleela mutthu mukina moolumo ninlavula ahu. Vano, vanniweryaneya wiiwexexa moota Abrahamu, Moise, Manowa ni atthu akina yaawenrye aya olavula ni Muluku orweela wa malaikha. Nnaamwi yaawerya oweha malaikha awo ni yaawerya oweha ovuwa wa Yehova, atthu awo khiyanweha Muluku. Nto eyo khenivirikanya moolumo a murummwa Yohani ani: “Khavo otonko omona Muluku”. (Yohani 1:18) Etthu alopwana awo yaaweha aya yaari malaikha yaarummwale, ohiya mwaneene Muluku.
Mwaakhaliheryeke Atthu Akina Ovilela Oxanka
3 Lothi aahipaka yoothanla yoohiloka vaavo aathanlale awe othaamela oSodoma. Nnaamwi epooma ele yaari yooloka, atthu yaakhala epooma ele yaanirupihana moohiloka ni yaari ootakhala murima. (Mmusome 2 Pedru 2:7, 8.) Epooma ele yaari yoothaaciri, masi Lothi saahimukhumelela mixankiho sinceene mwaha woothaamela oSodoma. (Maph. 13:8-13; 14:12) Woonasa wene, mwaarawe Lothi aahitepa osiveliwa mihakhu aahiiso atthu a elapo ele yaawo yahaamwiiwelela Yehova. Nto okathi Muluku aapwetenxe awe ni mooro epooma ele, mwaarawe Lothi aahikhwa mwaha woohiiwelela malakiheryo a malaikha. Vano, nkahaya nwuupuwele anamwane anli axithiyana a Lothi. Awo yaanamorari ni alopwana ale yaakhwiiye epooma ele ya oSodoma. Nave Lothi aahiyeleela empa awe, mihakhu sawe ni mooriipiha murima amwaarawe yaahikhwa. (Maph. 19:12-14, 17, 26) Niireke okathi ole wooxankiha Yehova aahihiya ompixerya murima Lothi? Nnaari.
Omusoma Biibiliya
24 A FEVERERO–1 A MARÇO
MIHAKHU SINIKHUMA MBIIBILIYANI | MAPHATTUWELO 20-21
“Yehova Onnakhwaniherya Khula Etthu Onihimya Awe”
wp17.5 epax. 14 etti. 5—epax. 15 etti. 2
Muluku Aahimwiitthana Sara Okhala “Ooreerexa”
Niireke mwaha wa Sara otheya yooninerya wira khaarina waamini? Nnakhala vakhaani. Biibiliya onihimya so: “Ni wamini weiwo, Abrahamu yowo ahakhela ikuru s’oyara, arokhalaru òwùluvala, ni Sara, ahawerya orupala: owo ahamini wira Muluku, ammanenle natiri, t’òroromeleya”. (aHéberi 11:11) Sara aanimusuwela saana Yehova ni aanisuwela wira Muluku anwerya waakhwaniherya khula etthu onileiherya awe. Nave hiyo nihaana okhalana waamini sintoko aarina awe Sara. Nihaana omusuwela saana Muluku ekeekhai, Yehova. Vakhala wira nnoopaka eyo nnimoona etthu yaamwiiriha Sara okhalana waamini woolipa. Yehova toororomeleya ni onniwaakhwaniherya anatiri awe otheene. Ikwaha sikina, onnipaka eyo mwa enamuna nahaalipelela ahu ni moohakalaliha.
‘MWIREKE SOTHEENE SINOVEKELAWENI’
Okathi Sara aarina awe iyaakha 90, owo aahiwerya ophwanya etthu ahaareere awe wunlela. Owo aahimuyara mwaana ni iyaawe amphenta awe, Abrahamu, yoowo vano aarina iyaakha 100! Abrahamu aahinvaha mwanawe nsina na Isakhi nenlo nintaphulela “otheya” sintoko Yehova aahimmye awe. Nkahaya mmuupuwele Sara uuluvanle ene, masi otheyaka, vaavo aahimmye awe so: “Muluku òkinjererya otheya, vano, othene ale anrowa osuwela, anotheya vamosá ni miyo”. (Maphattuwelo 21:6) Mwiirirya ole woohakalaliha wa Yehova tthiri waahimutteeliha murima Sara okumi awe wotheene. Masi omukhapelela mwaana waari muritti muulupale wa yena.
Okathi Isakhi aarina awe iyaakha thanu ni aattaruxiwe awe nipele, emusi awe yaahipaka efesta wira etthape. Masi itthu khaseettale saana. Biibiliya onihimya wira Sara aahiweha wira Iximayeli aanimunyokha mwanawe. Iximayeli orina ene iyaakha 19 aanimutheya Isakhi. Khahiyo waari othweela paahi wa amiravo. Hata murummwa Paulo muhoolo mwaya aahihimya wira Iximayeli ammulupattha. Nave Sara aahiweha wira mweettelo wa Iximayeli waari woowoopiha wa Isakhi. Owo aanisuwela wira Isakhi khahiyo aari mwanawe paahi. Maana aarowa wiirela mpantta wiiraneya wa yootthuna ya Muluku. Nto, aahilipiha murima ni khumuhimeerya Abrahamu itthu sotheene siiraneya. Owo aahinvekela Abrahamu wira omoomole Agari vamosa ni mwanawe Iximayeli.—Maphattuwelo 21:8-10; aGalasia 4:22, 23, 29.
Abrahamu oonenle sai? Biibiliya onihimya wira: ‘Molumo ale yahimuripiha murima vanjene Abrahamu mwaha wa Iximayeli, okhala wira yowo-tho ari mwan’awe’. Nave Abrahamu aanisiveliwa vanceene ni Iximayeli ni khaawerya omoomola. Yehova aahiweha itthu sotheene siiraneya, nto aahimuhimeerya Abrahamu etthu yoopaka oriki: “Muhivelavelé mwaha wa mwan’owo n’ipotth’anyu. Mwireke sothene Sara sinovekelaweni, okhala wira ale ankhuma nloko na Isakhi t’anrowa okhala osùlu anyu”. Yehova aahimuleiherya Abrahamu wira ammukhapelela Agari ni mwaana owo. Nto, Abrahamu aahipaka etthu aarummwale awe ni Muluku.—Maphattuwelo 21:11-14.
Otokosa Itthu sa Efaita Soomunepani
wp17.3 epax. 12 enoota eri etti. 5
‘Nyuwo Mwa Muthiyana Oreera Saana’
Sara aari murokora awe Abrahamu a woopaapani. Oowanli aya yaayariwe ni tiithi mmosaru Terahi, masi ni omaama woovirikana. (Maphattuwelo 20:12) Olelo-va, ekeekhai wira ti vootthekeya mutthu omuthela murokora awe, masi okathi ole itthu saari soovirikana. Okhala wira atthu ale yaahattamela omalela waarina aya Adamu ni Eva, eyo yaaniwiiriha okhalana okumi wooloka. Nave othelana amusiru khiwaakumiherya maxakha anamwane yaayariwa. Masi, nuuvira iyaakha 400, atthu tiyaapacenrye aya okhala mahiku vakhaani valaponi, sintoko siniiraneya aya olelo-va. Nave waari okathi yoowo Yehova aakumihenrye awe Nlamulo na Moise nenlo naakhoottiha orupihana amusiru.—Onamukuttho 18:6.
w89 1/7 epax. 20 etti. 9
Abrahamu—Ntakiheryo Nooloka wa Atthu Aniphavela Okhala Mpatthani a Muluku
9 Abrahamu aahooniherya waamini wawe mwa enamuna ekina. Sintoko soolempwa sinihimya aya: “Abramu ahatekela altari Apwiya, nipuro nenlo namukhumelenlyaya”. (Maphattuwelo 12:7) Woonasa wene, eyo yaahela muhina ovaha mukuttho wa enama, okhala wira nuulumo na eHeeberi noowi “altari” nintaphulela “nipuro ninvahiwa mikuttho”. Muhoolo mwaya, Abramu aahitthikela ovaha mikuttho mittetthe sikina aathaamenle awe. Moowuncererya, owo “ahiromola nsina n’Apwiya [Yehova]”. (Maphattuwelo 12:8; 13:18; 21:33) Nuulumo na eHeeberi noowi ‘oromola nsina’ nintaphulela-tho “osuweliha (olaleya) nsina nlo”. Emusi ya Abrahamu, vamosa ni aKanani moohanyiherya yaanimwiiwa olaleyaka moohova nsina na Muluku, Yehova. (Maphattuwelo 14:22-24) Mwa enamuna emosaru, atthu otheene aniphavela okhala mpatthani a Muluku ahaana oromola nsina nawe ni omwaamini. Eyo enihela muhina olaleerya empa ni empa, ‘nimuhelelaka Muluku mukuttho w’otthapela, eyo piyo muhokorokho wa murim’ahu ni molumo anttottopela nsina nawe’.—aHéberi 13:15; aRoma 10:10.
Omusoma Biibiliya