Ireferensia sa Okumi ni Orummwa Ahu Ekaderno Enirumeeliwa Omuthukumanoni
7-13 ya Dezembro
MIHAKHU SINIKHUMA MBIIBILIYANI | ONAMUKUTTHO 10-11
“Omphenta Wahu Yehova Ohaana Okhala Wuulupale Ovikana Emusi Ahu”
it-2 epaax. 371 etti. 3
Mooro wooveeha.
Mooro ni Erupani Yooveeha. Eliivuru ya oNamukuttho 10:1, nuulumo na eHeeberi noowi zar (nuulumo noothiyana, za·ráh; nintaphulela, ohiloka) ninnirumeeliwa vaavo onihimmwa awe ‘moro w’oveha, Muluku aharumalya awe’, yoowo Nadabi ni Abihu anaawe Aroni yanvanhe aya Yehova, mwaha wa yeeyo Yehova ahikumiherya mooro khwaapwetexa. (Ona 10:2; Mot 3:4; 26:61) Vanikhala ntoko Nadabi ni Abihu yaapanke eyo ahapaliwe ene, ni ti yaawiirinhe onvaha Yehova mooro woohikhalela. Woonasa wene, mooro owo waari woohikhalela mwaha wa okathi, opuro, enamuna yaavanhe aya, wala yaarumeelale erupani yoovirikana ni ele enihimmwa eliivuru ya Okhuma 30:34, 35. Mwaha woohapaliwa waya, awo khiyaaleveleleya.
w11 15/7 ipaax. 31-32 etti. 16
Niireke Nyuwo Mookela Moomumulani Mwa Muluku?
Aroni munnawe Moise, aahikumana muxankiho muulupale waahela muhina anaawe anli Nadabi ni Abihu. Nkuupuwelani moota oonenle awe okathi anaawe yanvanhe aya Yehova mooro woonveeha. Nto eyo yaahimala-maliha inamuna sotheene sa waataana yaarowa aya okhalana ni axitiithi aya. Nave, yaahikhala etthu ekina. Yehova aahimuleela Aroni vamosa ni anaawe oororomeleya wira: “Muhimetthé mputu, muhiwaré milala [mooniheryaka oriipiwa murima]: mwira siso, munimokhwa, vano Apwiya animwaviruwela atthu othene”. (Ona. 10:1-6) Nto muhupi ole waari woowiiwanyeya saana. Omphenta wahu Yehova ohaana okhala wuulupale ovikana moota nnaaphenta ahu amusi ahu oohiroromeleya.
Otokosa Itthu sa Efaita Soomunepani
Nihaana Okhala Oowaarya Mweettelo Ahu Wotheene
Wira nikhale oowaarya, nihaana osoma oratteene ni otokosa wira nisuwele ele ennivekela awe Muluku wira nipake. Nkahaya nwuupuwele anaawe Aroni, Nadabi ni Abihu, yaawo yiiviwe mwaha wa orumeela “moro w’oveha”, woonasa wene ahapaliwe ene. (Onam. 10:1, 2) Moone ele Muluku yaamuhimeeryale awe Aroni. (Mmusome Onamukuttho 10:8-11.) Niireke masu ala anitaphulela wira hiyo nihiwuryeke etthu yoohapala nihinatthi orowa omuthukumanoni sa eKristau? Nkawehani eponto ela eni: Hiyo khanneettela Nlamulo na Moise. (aRom. 10:4) Mapuro manceene annihu aalimalela owurya eviinyu moohitepana okathi onilya aya ahinatthi orowa omuthukumanoni. Saahikhala ikoopho xexe sa eviinyu okathi waapakiwa Paasikha. Okathi naapacerihinwe aya Niira na Wuupuwelela, arummwa a Yesu yaahiwurya eviinyu yaathoonyerya ephome awe. (Math. 26:27) Biibiliya onnikhoottiha owurya woovikaniha mphimo ni ohapaliwa. (1 aKor. 6:10; 1 Tim. 3:8) Nave maKristau makina yowuupuxerya aya ya murima pooti waatumereryaka othanya moomalela soowurya soohapala ahinatthi orowa ovara miteko sa Muluku. Nnaamwi makhalelo avirikanaka khula elapo, etthu maKristau anireerela aya ori “osuwela ovirikana wa ele ekhanle yooloka ni ele ehikanle yooloka” wira awerye weetta voowaarya mwa enamuna enimusivela Muluku.
it-1 epaax. 135 etti. 4
Inama
Nlamulo naakhoottiherya okhuura inama, naavariheleya muteko paahi waale yeettela Nlamulo na Moise, okhala wira eliivuru ya Onamukuttho 11:8 enihimya wira: “Okhala wira [inama iyo] ti sa mwikho” wa nyuwo eyo piiyo aIsarayeli. Masi nuumala omala-malihiwa Nlamulo nlo, orweela wa mukuttho wa Yesu Kristu, nlamulo nlo khaninvareleya-tho muteko, vano apinaatamu otheene aakhalana eparakha emosaru yeeyo aarina awe Nowe, nuuvira Mutaaseke.—aKol 2:13-17; Map 9:3, 4.
Omusoma Biibiliya
14-20 ya Dezembro
MIHAKHU SINIKHUMA MBIIBILIYANI | ONAMUKUTTHO 12-13
“Etthu Nniixutta Ahu ni Malamulo Yaakhanle Voohimya sa Maretta”
wp18.1 ekwaaturu eri epaax. 7
Onihimya Itthu Soohikhalela, Wala Seekeekhai sa Muhoolo?
• Waavalaanya aretta.
Nlamulo na Moise naahimya wira atthu yaarina makuttula wala maretta, yaahaana ovalaanyiwa ni atthu akina. Masi mameediku apacenrye ovarihela muteko enamuna ela ya waavalaanya aretta, nuumala okhumelela eretta yuulupale ohinatthi Kristu orwa, nave mpakha-va enamuna ela ennikhumela saana.—Onamukuttho, ekapiitulu 13 ni 14.
Niireke Mwaanisuwela?
Okathi wa Isarayeli, aYuda anceene yaanoova enamuna emosa ya makuttula yahaareere wuulaana. Eretta eyo yaanikela mphomeni mwa mutthu. Ikwaha sinceene, eretta eyo yaanihonona erutthu ya mutthu. Eretta eyo yootakhala khiyaarina murette ni yaari yoowaakuva oraveya. Tivonto, mutthu aarina makuttula ahaana okhala ottaiwene wa atthu akina ni waasuweliha akina wira ookhalana makuttula.—Onamukuttho 13:45, 46.
it-2 epaax. 690 etti. 11
Makuttula Wala Maretta
Ikuwo ni ipa. Makuttula awo yaanikhala ikuwo soothererya wala sootteettheya aahiiso ikuwo sa esapala. Woonasa wene, eretta eyo yaanimala-mala nuumala okatthiwa ikuwo iyo, nto ikuwo iyo saahaana opwehiwa ottaiwene. Nto vakhala wira maretta awo ooripelela wala ooxeerya yaanivikaniha, ekuwo eyo yahaana opahiwa. (Ona 13:47-59) Vakhala wira exiri ya empa, yaanikhumelela makuttula ooripelela wala ooxeerya, namukuttho aanaaruma atthu wira akhume empa eyo. Ikwaha sikina, aanirumiha ovenxiwa maluku yaananarihiwe ni malepa, owakiwa exiri ya mpaani, nto etthaya ni maluku ene, yaahaana oyiiheriwa ota wa epooma. (Ona 14:33-57) Atthu akina anihimya wira makuttula yaakela ikuwo ni ipa, yaalikana ni namalele; masi asomi khanihimya eyo.
Otokosa Itthu sa Efaita Soomunepani
w04 15/5 epaax. 23 etti. 2
Iponto Suulupale sa Eliivuru ya Onamukuttho
12:2, 5—Xeeni muthiyana akhalana awe “mwikho” okathi aayara awe? Mwaha wa etampi niranve ahu, otheene ahu natthu ohimalela, mwaha wa yeeyo, otheene ahu nin’yariwa ni etampi eyo. Okathi muthiyana akhala awe ni mwiikho, mwaha wooyara, wala mwaha wa itthu sikina, ntoko okela mmweerini wala okathi mulopwana aayiiha awe mmiso wa elopwana awe, yaaniwuupuxerya aIsarayeli wira yaari atthu oottheka. Onamukuttho 15:16-24; Esalimo 51:5; aRoma 5:12
wp18.1 ekwaaturu eri epaax. 7
Miruku sa mBiibiliyani Sinnivareya Muteko Okathi Wotheene
• Okathi woowinnuwihiwa.
Nlamulo na Muluku naahimya wira mwaana aahaana winnuwihiwa nuumala mahiku 8. Vakhala wira mwaana owo innuwihiwa ahinatthi ophiya mahiku awo, eyo yaamwiiriha oyiiheya ephome yinceene. Maana okathi wa aIsarayeli, khisaakhanle ixipitaali ntoko mahiku ahu ala. Nto vaari vamiruku ovira esumana emosa wira onnuwihiwe mwaana.
Omusoma Biibiliya
21-27 ya Dezembro
MIHAKHU SINIKHUMA MBIIBILIYANI | ONAMUKUTTHO 14-15
“Wira Nimukokhorele Yehova Nihaana Okhala Oowaarya”
it-1 epaax. 305 etti. 5
Orapa
Yaahikhala mathowa manceene yaawiiriha aIsarayeli, orapa wala wiireeriha. Mathowa ene taala: Mutthu aarina maretta openuwa, mutthu aavara itthu saaravihiwe maretta, mulopwana aayiiheya mmiso wa elopwana awe, muthiyana aakela mmweerini wala aayiiheya ephome yinceene, nave mulopwana aarupa ni mwaarawe aanikhalana mwiikho ni yaahaana orapa. (Ona 14:8, 9; 15:4-27) Nto wiireeriha waanirumeeliwa mwa nthoonyeryo ephavelaka wooniherya oreerela waya okhala oowaarya ohoolo wa Yehova. (Esa 26:6; 73:13; Yes 1:16; Eze 16:9) Wiireeriha ni Nuulumo na Yehova ninlikanyihiwa ni maasi, wookhalana owerya wuulupale.—aEef 5:26.
it-2 epaax. 805 etti. 5
Okela Mmweerini
Muthiyana aanooniwa okhala ni mwiikho vaavo aaviriha awe okathi munceene eyiiheyaka ephome awe ovikana mahiku aakhala awe mmweerini, nave itthu sotheene ammaathela awe wala aakilaathela awe, waahela muhina atthu yaavara itthu iyo, yaanikhalana mwiikho. Okathi yaamala aya oyiiheya ephome awe, owo aahaana olipelela mahiku 7 wira ohikhalane mwiikho wala okhale ooreerihiwa.—Ona 15:19-30; nwehe-tho moolumo oowi LIMPO, LIMPEZA.
it-2 epaax. 724 etti. 10
Nipuro Noowaarya
2. Eheema yookumana, nave nuuvira okathi yiitthaniwa etemplo. Itthu sotheene, ohela muhina niyate na mutabernaakulu ni mayate a etemplo waari opuro woowaarya. (Okh 38:24; 2 Wa 29:5; Mit 21:28) Itthu saakhala vaniyateni, aari altari a mikuttho ni epasiya ya ekoobre. Paahi atthu yaireerinhe ti yaakela vaniyateni na etabernaakulu; mwa enamuna emosaru, khuuvo aawerya okela vaniyateni na etemplo ori ene ni mwiikho. Mwa ntakiheryo, muthiyana aarina mwiikho kheemereriwa ovara nnakhala okela nipuro noowaarya. (Ona 12:2-4) Khuuvo mutthu aarina mwiikho aawerya okhalana epantte mikuttho sa opatthani mutabernaakulu wala mutemplo, okhala wira aamookhwa.—Ona 7:20, 21.
Otokosa Itthu sa Efaita Soomunepani
it-3 epaax. 150 etti. 1
Naaru
Akhala wira namakuttula aamureerihiwa, nlamulo naahimya wira namukuttho aahaana okuxa ephome ya mwaanyompe aavahiwa ntoko mukuttho wooleveleliwa itampi, ohela muhina makhura, wira ottikitthele mukerekhere mwa niyaru noolopwana na namakuttula. (Ona 14:14, 17, 25, 28) Malakiheryo mamosaru yaanivareleya muteko ni epottha yaaphavela ovikaniha okhala ni pwiya aya. Moolikanasa, mwaneene epottha eyo aahaana oroiha epottha awe vamukhora vawe, ni othorola niyaru naya. Othoroliwa wa niyaru, yaathoonyerya wira epottha eyo yaaniphavela ohihiya omwiiwelela pwiya aya.—Okh 21:5, 6.
g 1/06 epaax. 14, ekaaxa
Namalele—Mureerelo Oniphwanyiha Awe ni Mixankiho Onikumiherya Awe!
NIIREKE BIIBILIYA ONNILAVULA SA NAMALELE?
Nlamulo na Muluku naahaavaha malakiheryo axineene ipa wira yaahaana okumiha maluku yaaravihiwe mwiikho, owaka exiri ya mpaani ni okumiha itthu sotheene saari mpaani, ni orihela “ota wa muttetthe”. Akhala wira makuttula wala malepa a ekoore yooripelela yaanitthikela, empa yotheene yaanooniwa okhala ya mwiikho, yaanipwexiwa nto maluku aya ni miri saya saaniriheliwa ota wa muttetthe. Malakiheryo awo, yooniherya ophenta wuulupale Yehova aawooniherya awe arumeyi awe wira ehaakhumelele ehasara.
Omusoma Biibiliya
28 A DEZEMBRO–3 A JANERO
MIHAKHU SINIKHUMA MBIIBILIYANI | ONAMUKUTTHO 16-17
“Etthu Nniixutta Ahu ni Nihiku na Oleveleliwa Itampi”
Itthu Nniixutta Ahu ni Eliivuru ya Onamukuttho
Mmusome Onamukuttho 16:12, 13. Nkahaya muupuwele ele yiiraneya Nihiku na Oleveleliwa Itampi: Mukhulupale a anamukuttho aanikela mutabernaakulu. Ntata nimosa aanikuxa muhasa osareyale ene erupani yoowunkhela. Vano ntata nikina, aanikuxa muhasa wa eweero osareyale ene makhala a mooro. Vano owo aaneemela ohoolo wa ekuwo yaakhuneela Nipuro Nowaaryexa. Eyo yaari ekwaha yoopacerya sa ikwaha tthaaru mukhulupale a anamukuttho aarowa awe Opuro Wowaaryexa. Mwa nttittimiho, owo aanikela Nipuro Nowaaryexa oneemela ohoolo wa Nivuku na Waataana. Owo aakhala ntoko wira eemela ohoolo wa Yehova Muluku! Moottharelana, aaniyeeherya ni ephoole erupani vamakhalani a mooro, nto opuro ole wotheene waaninkhela vanceene ni wunkhela iwo waakhala woohakalaliha. Moottharelana, aanitthikela nipuro Nowaaryexa okunxe ene ephome ya enama wira aleveleliwe itampi. Moone wira mukhulupale a anamukuttho aahaana opaha erupani ohinatthi ovaha ephome ya soovaha sa oleveleliwa itampi.
Itthu Nniixutta Ahu ni Eliivuru ya Onamukuttho
Exeeni nniixutta ahu mwaha wa orumeeliwa erupani Nihiku na Oleveleliwa Itampi? Biibiliya onihimya wira mavekelo anipakiwa ni arumeyi awe oororomeleya, Yehova onnoona ntoko erupani. (Esal. 141:2; Wis. 5:8) Muupuweleke wira mukhulupale a anamukuttho aanittittimiha vanceene okathi aakela awe ni erupani ohoolo wa Yehova. Moolikanasa, vaavo nimmwaattamela ahu Yehova nnivekelo nihaana ottittimiha vanceene. Ninnimuxukhurela vanceene Mpattuxa a Olumwenku wotheene oneemererya omwaattamela yena ntoko mwaana onimwaattamela awe tiithi awe. (Yak. 4:8) Owo onnineemererya okhala apatthani awe! (Esal. 25:14) Eyo eparakha yuulupale, nto khanimphavela opaka etthu nnakhala yaamukhaani yaarowa omunyoonyiha Yehova.
Itthu Nniixutta Ahu ni Eliivuru ya Onamukuttho
Muhiliyale wira mukhulupale a anamukuttho aahaana opaha erupani ohinatthi ovaha mukuttho. Opaka eyo, yaanimukhaliherya woona wira aaneemereriwa ni Muluku ohinatthi ovaha mikuttho. Yowiiraneya eyo enniixuttiha exeeni? Nkahaya mmuupuwele Yesu. Owo aanisuwela wira aarwiiye valaponi wira ovahe erutthu awe ntoko mukuttho. Masi ohinatthi opaka eyo, owo aahaana opaka etthu yootepa otthuneya, eyo piiyo, etthu yootepa otthuneya ovikana woopoliwa wa apinaatamu. Etthu xeeni? Owo aahaana olokiherya ephiro wira Yehova eemererye mukuttho awe. Aarowa opaka eyo, okhalaka oororomeleya ni omwiiwelela Yehova. Opaka eyo, yaahimukhaliherya Yesu woona wira opaka itthu moovarihana ni yootthuna ya Yehova enamuna yooloka mookumini mwahu. Yesu aahooniherya wira enamuna ya olamulela wa Yehova ti yoolokexa ni ya xariya.
Otokosa Itthu sa Efaita Soomunepani
it-1 epaax. 284 etti. 2
Azazeli
Ntoko aatthokihenrye awe murummwa Paulo, Yesu mwaha woovaha okumi awe woomalela wira owoopole apinaatamu oottheka, mukuttho awe onnivikana mikuttho sa “ephome ya inyompe ni ya ipuri”. (aHe 10:4, 11, 12) Owo aari ntoko enyompe yeeyo enoopola itampi, okapattaka “iretta sahu”, ‘ohaxiwaka mwaha wa sottheka sahu’. (Yes 53:4, 5; Mat 8:17; 1 Pe 2:24) Owo “òkapatta” itampi sa atthu otheene anaamini mukuttho awe. Owo ohooniherya etthu Muluku orumenle awe wira omalihe moomalela soottheka. Mwa enamuna eyo, maakhoro ‘athanleliwe Azazeli’, aathoonyerya mukuttho wa Yesu Kristu.
Xeeni Vanitthuneya Ahu Okhala Oowaarya?
Mmusome Onamukuttho 17:10. Yehova aahaaruma aIsarayeli wira ahilyeeke “ephome”. Ohilya ephome ya mwaamunama wala ohiheleliwa mwerutthuni, yooruma enivahiwa aya maKristau otheene. (Miteko 15:28, 29) Hiyo ninnikhootta khula etthu yaarowa omwiiriha Yehova ‘oniviruwela’ ni onoomola mmulokoni mwawe. Hiyo ninnimphenta owo ni nimphavela omuhakalaliha. Hata okathi yoole mameediku anihimya aya wira naahiheleliwe ephome nnimookhwa, hiyo khanneemya wira woova oniirihe wiiwelela sookhanyererya sa atthu ahinimusuwela Yehova ni ahimphavela omwiiwelela. Ekeekhai wira eyo ennikumiherya otheiwa ni oramusiwa mwaha wookhootta oheleliwa ephome, masi hiyo nimphavela omuhakalaliha Muluku. (Yuda 17, 18) Nto etthu xeeni enrowa onikhaliherya “wipasopa” wira nihilye wala nihiheleliwe ephome?—Otum. 12:23.
Omusoma Biibiliya