Ireferensia sa Okumi ni Orummwa Ahu Ekaderno Enirumeeliwa Omuthukumanoni
3-9 ya Maio
MIHAKHU SINIKHUMA MBIIBILIYANI | MOTHAKONI 27-29
“Mmutakiheke Yehova Muhikhalanaka Nthalu”
Nvaheke Efaita Yuulupale Mikhalelo sa Yehova
Anamwane axithiyana ale athanu yaahirowa omukoha Moise yiiraka: “Vano nsina n’atithi’ihu nihana ottipihiwa momusini mwaya mwaha w’ohikhalana àna axilopwana?” Nto yaahinvekela yiiraka: ‘Nanso, munivahe yohiyeriwa ntoko savahalyanyu axinna àtith’ihu’. Niireke Moise aakhunle so: ‘Nyuwo khamurina-tho etthu-va, maana eyo kheniiriwa’? Nnaari, ‘Moise ahimuroihela mwaha ole [Yehova]’. (Moth. 27:2-5) Yehova aakhunle sai? Owo aahimuleela Moise oriki: “Àna axithiyana a Selofehadi annivekela sinaphwanela. Mwavahe yohiyeriwa ntoko savahalyanyu axinna a atithi aya: yohiyeriwa y’atithi aya ekhale yawaya”. Yehova ahincererya-tho etthu ekina. Malakiheryo ale yaahipakeya okhala nlamulo nto khumulakiherya Moise oriki: “Mulopwana mmosá akhwa ahirina mwana mwamulopwana, mwan’awe mwamuthiyana akhele sòhiyeriwa sawe”. (Moth. 27:6-8; Yox. 17:1-6) Nto okhuma vaavale, khula muthiyana mwIsarayeli, yaarowa omwiiraneela ehasara ntoko ele, nlamulo nle naarowa omukhapelela.
Nvaheke Efaita Yuulupale Mikhalelo sa Yehova
Tthiri vannooneya wira mwaha ole waahiphukiwa voohikhala nthalu! Yehova ahaakhapelela athiyana ala yahaarina etthu yoolipana, mwa enamuna yoottittimiheya moolikana ni aIsarayeli akina yaarina makhalelo ooloka. (Esal. 68:6) Ela yowiiraneya emosa paahi ya mBiibiliyani, enooniherya ekeekhai yoohakalaliha eni: Yehova onnaathokorerya saana arumeyi awe otheene voohimuthanla mutthu.—1 Sam. 16:1-13; Miteko 10:30-35, 44-48.
Nvaheke Efaita Yuulupale Mikhalelo sa Yehova
Ninrowa omutakiha sai Yehova ohinaathanla atthu? Muhiliyale wira ohikhalana nthalu, wookhalana mikhalelo miili. Akhala wira khanirina nthalu, tivanrowa ahu waakhapelela akina mohaathanla. Ekeekhai wira otheene ahu vanninisivela okhala mutthu oohixankiha ni ohinaathanla atthu. Masi nihaana weemya wira khivanikhweya olokiherya murima ahu. Nto nipake exeeni akhala wira nihoona wira khinnaathokorerya saana akina? Okathi Yesu aphavela awe osuwela moota atthu yamoonela aya, owo aahakoha apatthani awe oororomeleya oriki: “Atthu anihimya wira Mwana a Mutthu t’ani?” (Math. 16:13, 14) Xeeni nihimutakihaka Yesu voohimya sa mwaha ola? Nyuwo pooti waakoha apatthani anyu wira ehimye ekeekhai akhala wira khamurina nthalu. Nto akhala wira owo onnoolelani wira yookhala etthu enooniherya wira munaathokorerya atthu muttharaka eraasa, makhalelo aya, wala mihakhu saya, munrowa opaka exeeni? Muhaana onvekela Yehova voohimya sa mwaha owo, ni omuxonttela wira ookhaliheryeni olokiherya murima anyu wira mmutakiheke Yena, muhaathanlaka atthu mwa inamuna sootheene.—Math. 7:7; aKol. 3:10, 11.
Itthu sa Efaita sa MBiibiliyani
it-3 epaax. 123 etti. 7
Soovaha
Soovaha sa eviinyu. Soovaha sa eviinyu, saavahiwa vamosa ni soovaha sikina, otepexa wene nuumala aIsarayeli okela Elapo Yooleiheriwa. (Mot 15:2, 5, 8-10) Soovaha iyo saahela muhina eviinyu (eviinyu yoowaawa) yeeyo yaayeheriwa valtari. (Mot 28:7, 14; munwehe Okh 30:9; Mot 15:10.) Murummwa Paulo aahaalepela maKristau a oFilipi ohimyaka so: “Nnaamwi kimwarexiwaka ntoko mukuttho wa yoovaha ya eviinyu wira kikhaliherye muteko wa Muluku, kinnihakalala vanceene”. Eveersu ela, murummwa Paulo onnirumeela nlikanyiho na soovaha sa eviinyu, ooniheryaka wiivahererya wawe wira aakhaliheryeke maKristau akhwaawe. (aFi 2:17) Ohinatthi okhwa, owo aahimulepela Timootheyo oriki: “Miyo kinniivahererya ntoko eviinyu yaayiiheriwa valtaari, nave woopoliwa waka ori vakhiviru”.—2 Ti 4:6.
10-16 ya Maio
MIHAKHU SINIKHUMA MBIIBILIYANI | MOTHAKONI 30-31
“Nwaakhwaniheryeke Anatiri Anyu”
it-3 epaax. 801 etti. 7
Natiri
Ommana Natiri Vootthuna Waya, Masi Yaahaana Omwaakhwaniherya. Atthu yaanimmana natiri vootthuna waya. Nto vaavo mulopwana ammana awe natiri mwaha wa nlamulo aahaana omwaakhwaniherya. Ole ammana natiri eemexerya okumi awe, ooniheryaka wira aamwakhwaniherya khula etthu oleihenrye awe. (Mot 30:2; munwehe aRo 1:31, 32.) Nlamulo naahimya so: “Mwamanela natiri Apwiya Muluku anyu . . . Mwapisa vale, munnaveha Apwiya Muluku anyu, vano awo khanihiya wokumiheryani mulattu”.—Otu 23:21, 22.
it-3 epaax. 801 etti. 4
Natiri
AIsarayeli yaaninvaha Muluku soovaha saya soohikhanyereriwa seiyo saahela muhina opaka etthu, ovaha etthu, ovara muteko wala osyaka itthu sooniwa okhala soohitthekeya. Natiri yaari etthu mutthu aaleiherya awe vootthuna wawe. (Mot 30:2; Mat 5:33) “Natiri” nivarihano mutthu onipaka awe okathi oniphavela awe opaka etthu.—Map 26:28; 31:44, 53.
w04 1/8 epaax. 27 etti. 3
Iponto Suulupale sa Eliivuru ya Mothakoni
30:6-8—Niireke mulopwana muKristau pooti omunteerya natiri amwaarawe? Nilavulaka sa natiri, Yehova onnimusuwela khula natiri mutthu onimpaka awe. Mwa ntakiheryo, wiivahererya wa Yehova natiri mutthu onimpaka awe mekhawe. (aGalasia 6:5) Mulopwana oothela khorina ediretu yoomukhoottiherya wala omuhiiha mwaarawe natiri ompanke awe. Nave, muthiyana ootheliwa ohaana osyaka ommana natiri ohinivarihana ni Nuulumo na Muluku aahiiso ni ehaakhi orina awe ni iyawe.
Itthu sa Efaita sa MBiibiliyani
it-2 epaax. 482 etti. 2
Yefte
Vaaniweryaneya onvahererya mutthu sintoko yoovaha wa Yehova wira onvareleke muteko mutabernaakulu. Eyo yaari ediretu anamuyari. Samuweli aari mmosa aatthu awo, yaavahereriwe wira amurumeeleke Yehova, ahinatthi oyariwa. Elikana iyawe Ana, aahimweemererya natiri ampanke awe mwaarawe. Nuumala Samuweli ohiihiwa waamwa, Ana aahimuroiha wira arumeeleke mutabernaakulu. (1 Sa 1:11, 22-28; 2:11) Ntakiheryo nikina ti na Sansoni, yoowo aavahereriwe wira avareke miteko sa Muluku ntoko muNaziri.—Mak 13:2-5, 11-14; Mulikanyiherye ni moolumo oowi ehaakhi ya Tiithi ni mwaana, ntoko enihimya aya yoolepa ya Mot 30:3-5, 16.
17-23 ya Maio
MIHAKHU SINIKHUMA MBIIBILIYANI | MOTHAKONI 32-33
“Nwoomole Atthu Otheene a Elapo Eyo”
w10 1/8 epaax. 23 etti. 4
Nyuwo Mwaanisuwela?
Mapuro xeeni ‘oottukhuwa’ anihimmwa ikwaha sinceene ni soolempwa sa aHeeberi?
Okathi aIsarayeli yaahala aya vakhaani okela Elapo Yooleiheriwa, Yehova aahaalela wira yaahaana opwetexa mapuro otheene ookokhorela a oKanani. Muluku aahimmye so: “Mwapwexakase amuluku aya . . . apakiwe ni maluku walá ni n’iyuma yohaniwa: mwahonone mapuro aya ottukhuwa othene”. (Mothakoni 33:52) Woonasa wene mapuro awo ookokhorela, yaakhala mapuro oowooneya, oottukhuwa wala mapuro makina ntoko vathi va mwiri wala mpooma. (1 Mamwene 14:23; 2 Mamwene 17:29; Ezekiyeli 6:3) Nto mapuro awo yaanikhala altari, miri wala itthu sikina saakokhoreliwa.
w08 15/2 epaax. 27 itti. 5-6
Mwiixutteke ni Soovonya sa aIsarayeli
Olelo-va, nave ninniviriha mixankiho sinceene sinlikana ni iye yaavirinhe aya aIsarayeli a khalai. Anamunceene olelo-va aakhalana amuluku aya eethiru. Amuluku awo anihela muhina mihakhu, atthu-oovuwa, mutthenkeso wa epoliitika, anamahoolela a etiini wala amusi. Itthu iya pooti opaceryaka okhala amuluku ahu. Nave waataana ni apatthani oohiloka pooti ohonona waataana wahu ni Yehova.
Orupihana woohiloka weiwo wiirela mpantta okokhorela wa Bayali waahiwiiriha aIsarayeli anceene ottheka. Muraakho mmosaru onniwiiriha arumeyi a Muluku olelo-va ohonona waataana waya ni Yehova. Mwa ntakiheryo, okathi nimmurumeela ahu komputatore nri ene mekhihu, pooti opaceryaka oweha itthu sikhanle oohonona murima ahu. Vaarowa okhala vooriipiha murima muKristau omorela muraakho wa oweha epornografia mwinternetini!
it-1 epaax. 417 etti. 2
AKaanani
Yoxuwa mwa miruku “khakhontte etthu, nto ahìra sothene ntoko Apwiya samurumalyaya Moise”. (Yox 11:15) Masi nloko na aIsarayeli naahihiya otthara ohoolela wooloka, ni khiyaapwetenxe moomalela itthu sotheene soohiloka sa elapo ele. Mwaha wa woohaapwetexa moomalela aKaanani, yaahiwiiriha aIsarayeli opaka itthu soohiloka ni muhoolo mwaya yaahikhwa atthu anceene, itthu seiyo sahaarowa waakhumelela vakhanle wira yaamwaapwetexa aKaanani otheene. (Mot 33:55, 56; Mak 2:1-3, 11-23; Esa 106:34-43) Yehova aahaalopola aIsarayeli wira exariya awe ni ophukela wawe khenimuthanla mutthu, ni vakhala wira aIsarayeli yampacerya waataana ni aKaanani, athelanaka naawo, atakaheryaka okokhorela waya, ni attharaka soolema saya soohiloka, moohanyiherya yaamwiikumiherya mixankiho mmansaya seiyo saarowa owiiriha otakhaliwa.—Okh 23:32, 33; 34:12-17; Ona 18:26-30; Otu 7:2-5, 25, 26.
Itthu sa Efaita sa MBiibiliyani
it-3 epaax. 695 etti. 1
Mukano
Sirumeeliwaka iparakha, khula nloko na wIsarayeli, naaniwerya osuwela opuro aya wookhala, masi nnaamwi yaarumeeliwa enamuna eyo, khula nloko naanivahiwa yoohiyeriwa aya moovarihana ni wunnuwa wa nloko nlo. (Mot 33:54) Moota waakaiwa aya opuro erumeeliwaka iparakha yaanipakiwa okathi wotheene, masi vaaniweryaneya opakiwa marukunuxo vakhala wira nloko nlo naari naamukhaani wala nuulupale. Mwa ntakiheryo, okathi wooniwe aya wira muttetthe wa oYuda waari muulupalexa, waahivukuliwa khuvahiwa mpantta mukina nloko na Simeyoni.—Yox 19:9.
24-30 ya Maio
MIHAKHU SINIKHUMA MBIIBILIYANI | MOTHAKONI 34-36
“Mutthyaweleke wa Yehova”
Niireke Munnimutthyawelela Yehova?
Masi, exeeni yaakhumelela okathi mwIsarayeli aamwiiva awe mutthu moohilakela? Hata mutthu aivale moohilakela, owo aanikhalana mulattu wa ephome ya mutthu aamwiivale awe. (Maph. 9:5) Masi okathi yaakhumelela aya eyo, Yehova aahihimya wira vaanitthuneya wooniherya omoriwa ikharari. Ole aamwiiva mukhwaawe moohilakela aahaana otthyawela muttetthe mmosa wa ntthyawelo wira ohinleliwe ikuhu ni mmusi awe mutthu ole omwiivale awe. Vaavo eemereriwa awe okhala mmuttettheni mmo, owo aanikhapeleliwa. Owo aahaana okhala mmuttettheni mmo mpakha okhwa muulupale a anamukuttho.—Moth. 35:15, 28.
Niireke Munnimutthyawelela Yehova?
Akhala wira mwIsarayeli moohilakela aanimwiiva mutthu, owo aahaana otthimakela muttetthe wa ntthyawelo, weemela vamukhora ni ‘wahimerya makhulupale a mmuttettheni’ etthu yaamukhumelenle. Makhulupale awo yaahaana omwaakhela. (Yox. 20:4) Nuuvira okathi awo yaahaana omuroiha nawiive owo wa makhulupale a epooma yaakhumelenle ehasara eyo. (Mmusome Mothakoni 35:24, 25.) Akhala wira makhulupale awo yanweha wira nawiive owo kholakenle, awo yaanimuttikiherya muttetthe wa ntthyawelo.
Niireke Munnimutthyawelela Yehova?
Akhala wira nawiive aanitthyawela muttetthe wa ntthyawelo, okumi awe waanivareleleya. Olavulaka sa mittetthe iyo, Yehova aahimmye so: “Mmo onowerya otthyawela-mo mutthu ti mutthu”. (Yox. 20:2, 3) Yehova khaaruma wira nawiive otthikeleke ophukeliwa mwaha wa mulattu mmosaru. Nave, mulipa-oowunla ikuhu kheemereriwa okela epooma eyo wira omwiive nawiive ole. Vaavo nawiive aakhala awe mmuttettheni mmo, owo aanaakihiwa ni Yehova. Moohaanyiherya owo khahiyo aari mukhatteya. Owo anwerya ovara muteko, waakhaliherya atthu akina, ni omurumeela Yehova mootaphuwa. Tthiri owo aaniwerya ophwanya ohakalala ni okumi wooloka!
Itthu sa Efaita sa MBiibiliyani
w91 15/2 epaax. 13 etti. 13
Mukuttho Woophwanelela Oniwoopola Atthu Otheene
Adamu ni Eva khanirowa woopoliwa. Okhala wira Nlamulo na Moise naahimya wira: “Namwive ohana wiviwa: khanwerya wopoliwa ni musurukhu. Aphwanenle wiviwa: iviweke pahi”. (Mothakoni 35:31) Adamu khaniphwanela woopoliwa, maana yaatthenke moolakelela aahiiso yaahithanla opaka etampi. (1 Timootheyo 2:14) Okhala wira Adamu ni Eva yaari atthu oomalela nto yaaniphwanelela okhwa mwaha woowi awo yaaroolakela ohiiwelela moomalela nlamulo na Muluku. Nto khivaarowa okhala va xariya Adamu ottottela mureerelo mukuttho wowoopola.
31 A MAIO–6 A JUNHO
MIHAKHU SINIKHUMA MBIIBILIYANI | OTUMERERYA 1-2
“Ophukela ti wa Muluku”
w96 15/3 epaax. 23 etti. 1
Yehova—Toophenta ni Onniphukela Mwa Xariya
Axitokweene a mmulokoni aakhalana ehaakhi ya waaphukela ale anipaka etampi mmulokoni. (1 aKorinto 5:12, 13) Okathi anipaka aya eyo, annuupuwela wira exariya ya Muluku ennaamorela ikharari ale atthenke khula okathi vanreerela aya. Masi atthu anittheka aahinattharuwa khivanreerela waamorela ikharari. Hata vari siiso, axitokweene khanimoomola mutthu owo otthenke mmulokoni mwaha woomunlela ikuhu. (Mulikanyihe ni eliivuru ya Ezekiyeli 18:23.) Attharaka ohoolela wa Kristu, axitokweene anniimananiha otthara exariya khula okathi, nto eyo enniwiiriha okhala ntoko “ntthyawelo okathi onòpaya epheyo”.—Yesaya 32:1, 2.
w02 1/8 epaax. 9 etti. 4
Mwiiweleleke ni Murima Wootheene Okhulupale Okumiheriwe ni Muluku
Wira arumeeleke ntoko alipa-oophuka, alopwana ale yaathanliwe ni Muluku khivaaphiyerya paahi osuwela Nlamulo. Mwaha wookhala ohimalela, axitokweene ale yaahaana okhalana ephoole mikhalelo saya soohiloka, ntoko nrima, nthalu, ni ohiphiyeriwa, itthu seiyo saarowa owiiriha waaphukela atthu moohixariya. Tivonto, Moise aalenle awe wira: “Mwaphukaka milattu, muhathanleké atthu: mwawiriyaneke atthu othene, ale ahinòneliwa vatthu n’ale alupale. Muhimoveké mutthu, mana exariya enikhuma wa Muluku”. Tthiri aphuki a wIsarayeli yaaphuka opuro wa Muluku. Tthiri eyo yaari eparakha yuulupale.—Otumererya 1:16, 17
Itthu sa Efaita sa MBiibiliyani
Soolopola sa Yehova ti Soororomeleya
Okathi aIsarayeli yaapacenrye aya weetta ekwaha yoorakama ni yooxankiha ya iyaakha 40 ‘mothakoni mowopiha’, Yehova khaahimmye itthu sotheene sa moota aarowa awe oweettihaka, waakhapelela ni waathokorerya. Orumeelaka neeku neemela ohoolo waya othana, ni neeku na mooro ohiyu, Yehova aaniwuupuxerya aIsarayeli wira owo aarowa waakhaliherya, vaavo aaruma awe wira avireke yeettaka muttetthe ole wootakhala. (Otum. 1:19; Okhum. 40:36-38) Yehova aanaavaha-tho itthu sootthuneya saathowa. ‘Sowara saya khisathanle, inawu saya khisaipale’. Tthiri khiivo ‘yahalenle’.—Neh. 9:19-21.
7-13 ya Junho
MIHAKHU SINIKHUMA MBIIBILIYANI | OTUMERERYA 3-4
“Malamulo a Yehova Anniphwanyiha Miruku ni Exariya”
it-1 epaax. 817 etti. 3
Wiiwexexa
Oluttuweliwa osoma ni ovarihela muteko Nuulumo ni malakiheryo a Muluku, pooti omwiiriha mutthu okhalana miruku sinceene waavikana ale animusomiha, ni okhalana osuwela woowaatta waavikana atthu oowuuluvala. (Esa 119:99, 100, 130; Mulikanyihe ni Luk 2:46, 47.) Mutthu a miruku onnisuwela wira ohaana wiiwelela Nuulumo na Muluku ni onvekela Muluku nikhaliheryo. (Esa 119:169) Nave onninyokha ‘iphiro sothene sowototha’. (Esa 119:104) Okathi Yesu aari awe valaponi, aahooniherya okhala a miruku okhoottaka weererya otthyawa okhwa vamwirini va nihaaxeryo, okhala wira Soolempwa saahimya wira Yena ahaana okhwa mwa enamuna eyo.—Mat 26:51-54.
w99 1/11 epaax. 20 itti. 6-7
Ovaha Voowaatta
Otikinihiwe ene mwaha wa ele aawiriyana awe ni oona awe, Pwiyamwene a Osaba aahihimya wira: “Òreriwa atthu anyu, òreriwa arumeyi anyu ala, okhala wira anniwerya okhala mahiku ene va maithoni vanyu ni wiwa miruku sanyu!” (1 Mamwene 10:4-8) Yena khahimmye wira arumeyi a Salomoni yaari oohakalala mwaha wookhala eriyari ya muhakhu. Masi arumeyi awo yaari ooreeriwa okhala wira khula okathi yaaniwiriyana osuwela wa Salomoni aavahiwe awe ni Muluku!
Pwiyamwene owo aahimuttottopela Yehova ohimyaka wira: “Ettottopeliwe Apwiya Muluku anyu”. (1 Mamwene 10:9) Tthiri pwiyamwene ole aahoona wira Yehova tanvanhe ankhili ni muhakhu, Salomoni. Nto eyo enivarihana ni ele Yehova aalenle awe aIsarayeli vahinatthi oriki: ‘mwettelaka’ ikano saka “munokhala atthu a ànkhili ni a miruku va maithoni vamaloko makina. Tthiri amàlapo, vanrowaya osuwela ikano iya sothene, anolaleya wira: ‘Vekekhai, atthu a nloko nla nulupale t’òsuwela ni t’ànkhili!’”—Otumererya 4:5-7.
w07 1/8 epaax. 29 etti. 13
Niireke Mwa “Thaaciri Vamaithoni va Muluku”?
Okathi Yehova onaareeliha awe arumeyi awe, khula okathi onnaavaha itthu soolokexa. (Yakobo 1:17) Mwa ntakiheryo, opuro Yehova aavanhe awe aIsarayeli wira akhaleke, yaari elapo yaakhoowa eleeti ni oravo. Tivonto Moise aahimmye awe wira: “Apwiya Muluku anyu [Yehova] annikhapelela elapo”. Ni moolumo makina, awo Yaarowa oruweryaka ni okhalana mireerelo, okhala wira Yehova aanaakhapelela. Tthiri vaavo aIsarayeli yaari aya oororomeleya wa Yehova, owo aanareliha ni yaari atthu ovirikana ni maloko makina. Moohaanyiherya mareeliho a Yehova ‘taniraliha’!—Mothakoni 16:13; Otumererya 4:5-8; 11:8-15.
Itthu sa Efaita sa MBiibiliyani
w04 15/9 epaax. 25 etti. 3
Iponto Suulupale sa Eliivuru ya Otumererya
4:15-20, 23, 24—Niireke okhoottihiwa opaka ilatarato sa amuluku eethiru ontaphulela wira ti vootthekeya opaka ilatarato sinreeriha mapuro ninkhala ahu? Naari. Maana ilatarato sinikhoottihiwa ti seiye atthu anipaka aya wira ‘akokhoreleké seiyo, arumeleké’. Soolempwa khasinkhoottiha opaka wala opintari ilatarato wira sireeriheke mapuro ninkhala ahu.—1 Mamwene 7:18, 25.
14-20 ya Junho
MIHAKHU SINIKHUMA MBIIBILIYANI | OTUMERERYA 5-6
“Nwiixuttiheke Aniinyu Omphenta Yehova”
w05 15/6 epaax. 20 etti. 11
Anamuyari Mwakhapeleleke Amusi Anyu ni Itthu Sinaathowa
Woonasa wene, khekhanle eliivuru ya mBiibiliyani enilavula vanceene sa waakhapelela amusi ovikana eliivuru ya Otumererya 6: 5-7. Nwehe wira wanipacerya, anamuyari anitumereriwa olipiha mukhalelo aya wa omunepani, yincereryaka omphenta waya Yehova ni Nuulumo nawe. Nto yapaka eyo, murima aya onoosareya ikeekhai sa mBiibiliyani, seiyo sinrowa owiiriha ootteeliwa murima, omoova ni omphenta Yehova. Yiira siiso, anookhalana itthu sinceene sooloka wira yaavahe anaaya.—Luka 6:45.
w07 15/5 ipaax. 15-16
Kinrowa Waakhaliherya Sai Anaaka Okhalana Osuwela wa Ekeekhai?
Miyuupuwelo sanyu, soolakela sanyu, ni soophavela sanyu sinooneya ohiya paahi ni moolumo anyu, masi ni itthu munipaka anyu. (aRoma 2:21, 22) Anamwane annisuwela itthu siri sootepa otthuneya wa anamuyari aya, yaawehaka axipapaya. Nto itthu sinikhala sootepa otthuneya wa anamuyari, sinnikhala sootthuneya-tho wa anamwane vaavo anninnuwa aya. Nto vakhala wira nyuwo munnimphenta Yehova, aniinyu animoona eyo. (Matheyo 6:33) Ohicompela wanyu mithukumano sa mmulokoni ni olaleya ihapari sooreera sa Omwene onimwaakhaliherya woona wira nyuwo munnivaha efaita miteko iyo.—Matheyo 28:19, 20; aHeeberi 10:24, 25.
w05 15/6 epaax. 21 etti. 14
Nyuwo Anamuyari, Mukhaliheryeke Emusi Anyu
Otumererya 6:7 onnooniherya wira anamuyari ahaana owiixuttihaka anaaya voohimya sa Muluku. Nyuwo pooti owiixuttiha aniinyu voohimya sa Muluku, okathi muneetta anyu mukwaha, munivara anyu muteko hoothe, wala muniphumurya anyu. Ekeekhai wira khivanitthuneya owiixuttihaka ikeekhai sa mBiibiliyani aniinyu khula okathi. Ohiya-vo, mmananiheke wiiriha ovaanela wanyu okhala woolipiha. Mwa ntakiheryo, erevista Nvenye! yookhalana myaha sinceene sinlavula itthu soovirikana. Myaha iyo pooti ohela muhina inama sipattuxiwe ni Yehova, mapuro ooreera a olumwenku, ovirikana wa makhalelo ni soolema sa atthu. Othokorerya myaha iyo, enoowiiriha amiravo ovirihaka okathi asomaka iliivuru sinikumiheriwa ni murumeyi oororomeleya ni ankhili.—Matheyo 24:45-47.
Itthu sa Efaita sa MBiibiliyani
Ophenta ni Exariya wIsarayeli wa Khalai
Etthu nniixutta ahu: Yehova onniweha ohiya paahi mukhalelo ahu wa ota. Owo onniweha mukhalelo ahu wa muhina aahiiso murima ahu. (1 Sam. 16:7) Khuuvo muupuwelo, moonelo aahiiso etthu envitheya vamaithoni va Yehova. Nave onniweha ni olipiha itthu sooloka nrina ahu. Masi owo oniphavela wira nisuweleke ni osyaka miyuupuwelo soohiloka sihinatthi oniiriha opaka etampi.—2 Wah. 16:9; Math. 5:27-30.
21-27 ya Junho
MIHAKHU SINIKHUMA MBIIBILIYANI | OTUMERERYA 7-8
“Muhaathele Axithiyana Aamalapo”
Xeeni Muluku Oniphavela Awe Wira Arumeyi Awe Athelaneke Yaaworu?
Yehova aanisuwela wira Satana aaphavela waahapuxa arumeyi awe wira yarumeeleke amuluku a ethiru. Tivo, Muluku aahaalopola arumeyi awe, aaleelaka wira vakhala wira yaamwaataana ni atthu yaahamurumeela yena yaamwaahapuxa ni yaarowa waarumeela aka amuluku aya. Khisareere itthu sinceene saahela muhina. Vakhala wira aIsarayeli yaamwaarumeelaka amuluku a ethiru, awo yaamuyeleela waataana waya ni okhapeleliwa ni Yehova, ni vaamukhweya awanani aya waatuphela. Vakhala wira eyo yaamwiiraneya, vaarowa oweryaneya sai okhumelela Mesiya yoowo aaleeiheriwe? Tthiri vannooneya wira Satana aahikhalana mathowa oowiiriha aIsarayeli othelana ni atthu yahaamurumeela Yehova.
Niireke Miruku Soowi ‘Muthelaneke Akristu-ru’—Nlelo Sinnivareleya Muteko?
Hata vari siiso, malakiheryo a Yehova ari mBiibiliyani a othelana aKristu-ru nlelo annivareleya muteko. Mwaha xeeni? Okhala wira owo onnisuwela etthu eri yooloka wa atthu awe. Khonipaka eyo mwaha woophavela waakhoottiherya arumeyi awe otthara ephiro yoohiloka paahi, masi oniphavela wira akhaleke oohakalala. Mahiku a Nehemiya, vaavo aYuda anceene yaathenle aya athiyana aamalapo yahaamurumeela Yehova, Nehemiya aahiromola ntakiheryo noohiloka na Salomoni. Nnaamwi Salomoni ‘aphentiwa ni Muluku awe, . . . owo ahitthekihiwa n’athiyana àmalapo’. (Neh. 13:23-26) Mwaha wa ophavela mureerelo wa arumeyi awe, Muluku onnaavaha malakiheryo arumeyi awe wira athelaneke aKristu-ru. (Esal. 19:8-11; Yes. 48:17, 18) MaKristau a ekeekhai annixukhurela niphento nawe ni anniroromela malakiheryo anivahiwa aya ni Muluku. Mwaha wa omwiiwelela ntoko Mwene aya, annooniherya wira annisuwela wira owo ti Namalamulela a Olumwenku Wotheene.—Mir. 1:5.
Mwaathanleke Saana Apatthani Anyu Mahiku Ala Ookiserya
Osuwela waathanla apatthani ti wootepexa otthuneya wa anna oohithela ni arokora oohitheliwa. Nuulumo na Muluku ninnilopola so: “Muhatàneke n’ale ahinamini; nyuwo khamunlikana ni yawo. Exariya enwerya sai watàna ni sotakhala? Vanikhala sai warya okhalaka n’epiphi?” (2 aKor. 6:14) Biibiliya onnaalakiherya arumeyi a Muluku animphavela mutthu oothelana wira “ethelaneke aKristu-ru”, eyo khenihimya othelana ni mutthu wiivaherenrye khupatisiwa paahi, masi onihimmwa mutthu onittharihela malakiheryo a Yehova. (1 aKor. 7:39) Othelana ni mutthu orina ahu waamini omosaru, onoonikhaliherya ovaraka vamosa miteko sa Yehova ni onikhaliherya okhala oororomeleya wa Muluku.
Itthu sa Efaita sa MBiibiliyani
w04 1/2 epaax. 13 etti. 4
Yehova Onninivaha Itthu Sinnithowa Khula Nihiku
Okathi Yehova aavanhe awe aIsarayeli emana kahiyo paahi aaphavela waavaha eyoolya, masi aaphavela owiixuttiha itthu sootepa otthuneya. Yoopacerya, ‘khula mmosa ahana ottotta [emana] vamphiyerya awe khula nihiku’. Okathi yaattotta aya ovikana ele yaaphiyerya va nihikuni, yaahala yaanintta enapacerya wunkha ni okhuma miyunku. (Okhuma 16:4, 20) Nto eyo, khiyiiraneya nihiku na neethanu namosa, vaavo yaattotta aya ovikana ele yaaphavela aya wira arumeeleke nihiku na esabado. (Okhuma 16:5, 23, 24) Emana ele yaahiwiixuttiha etthu aIsarayeli, wira yaahaana wiiwelela ni wira okumi aya khiwaalipa ni eyoolya paahi, masi ni “molumo othene Apwiya [Yehova] anihimyaya t’aninvaha ekumi mutthu”.
28 A JUNHO–4 A JULHO
MIHAKHU SINIKHUMA MBIIBILIYANI | OTUMERERYA 9-10
“Exeeni Yehova Muluku Anyu Onoovekelaweni?”
w09 1/10 epaax. 10 itti. 3-4
Exeeni Muluku Onnivekela Awe?
Exeeni ekhanle ooniiriha omwiiwelela Muluku ni murima ahu wotheene? Moise aahihimya etthu emosa, oriki: “Mwattittimihe Apwiya Muluku anyu ni wova”. (Eveersu 12) Enamuna ya woova enihimmwa-va, khahiyo woova mixankiho sinrowa onikhumelela, masi onihimmwa omuttittimiha Muluku ni malamulo awe. Vakhala wira nnoomuttittimihaka Muluku vanceene, hiyo nnoosyaka opaka itthu sahaarowa omusivela.
Tiivi eri yoolakela ahu naamwiiwelelaka Muluku? Moise onihimya so: “mwaphenteke Apwiya Muluku anyu, mwarumeleke ni murim’anyu wothene n’ikuru sanyu sothene”. (Eveersu 12) Omphenta Yehova khonitaphulela ohimya paahi wira ninimphenta. Ereferensia emosa enitthokiherya wira: “Ophenta, ikwaha sikina onihela muhina miteko mutthu owo onooniherya awe”. Mwa moolumo makina vakhala wira hiyo nnomphenta Muluku vekeekhai, nnoopakaka itthu simmusivela.—Miruku 27:11
w09 1/10 epaax. 10 etti. 6
Exeeni Yehova Onoovekelaweni?
Omwiiwelela ni murima wotheene onniphwanyiha mareeliho. Profeta Moise aahimmye so: “Mwiweleleke soruma s’Apwiya n’ikano kinovahakani olelo, mwirá siso, munoreriwa”. (Eveersu 13) Tthiri, khula yooruma ya Yehova, niire so, khula etthu ennivekela awe, onipaka eyo mwa mureerelo ahu. Exeeni eyo enooniherya aya? Biibiliya onihimya wira: “Muluku ti ophenta”. (1 Yohani 4:8) Opaka itthu sotheene Yehova onnivekela awe, enoonikhaliherya osyaka mixankiho sinceene olelo-va ni ophwanya mareeliho manceene Omwene wa Muluku onrowa aya okumiherya muhoolo.
cl epaax. 16 etti. 2
Niireke Vanniweryaneya ‘Omwattamela Muluku’?
Abrahamu aahikhalana eparakha eyo yoomwaattamela Muluku. Yehova aahimuhimya Abrahamu okhala ‘mpatthani awe’. (Yesaya 41:8) Tthiri Yehova aanimoona Abrahamu okhala mpatthani awe. Nto Abrahamu aahireelihiwa mwaha wookhalana waataana wooloka okhala wira ‘aanimwaamini Yehova’. (Yakobo 2:23) Nave olelo-va, Yehova onnaphavela atthu animurumeela mwa niphento. (Otumererya 10:15) Tivo Nuulumo nawe ninnitumererya aya niriki: “Mmwaattameleke Muluku, vano owo onoowaattamelani”. (Yakobo 4:8) Tthiri ni moolumo ala, Yehova onnooniherya wira onninilattula ni onninivaha nlipelelo.
Itthu sa Efaita sa MBiibiliyani
it-1 epaax. 127 etti. 5
Anaki
Yaari atthu oorekamexa ni a ikuru yaawo yakhala mittetthe sa omyaakoni sa oKaanani, ni mittetthe sikina soowaattamela ephareya aahiiso miro. Okathi omosa, anamwane araru Anaki, eyo piiyo, Ahimani, Xexayi ni Talimayi, yaakhala muttethe wa Hebroni. (Mot 13:22) Waari opuro yoowo anamahottela 12 yaawenhe aya ekwaha yoopacerya anamwane a Anaki, nave waari okathi yoowo anamahottela 10 yaavanhe aya muhupi woohiloka ni wowoopiha, ahimyaka wira alopwana ale yaari osuulu wa maneFili nave yiilikanyiha naawo, yaari ntoko ‘inenele’.—Otu 2:10, 11, 20, 21; 9:1-3.