Ireferensia sa Okumi ni Orummwa Ahu Ekaderno Enirumeeliwa Omuthukumanoni
5-11 YA JULYO
MIHAKHU SINIKHUMA MBIIBILIYANI | OTUMERERYA 11-12
“Enamuna Yehova Oniphavela Awe Wira Okokhoreliweke”
it-1 epaax. 93 etti. 4
Erooho Wala Mutthu
Omurumeela ni Erooho Ahu Yotheene. Moovarihana ni aBiibiliya akina nuulumo noowi “erooho” ninnirumeeliwa ophavelaka ohimmwa mutthu. Nave soolepa sikina sinnintumererya omphavela, omphenta, ni omurumeela Muluku ni ‘murima wothene ni ikuru sahu sothene’ (Otu 4:29; 11:13, 18), nto Otumererya 6:5 onihimya so: “Mwaphenteke Apwiya Muluku anyu ni murim’anyu wothene n’iroho anyu yothene n’ikuru sanyu sothene”. Nave Yesu aahihimya wira vaanireerela omurumeela Yehova ni murima wotheene, ikuru sotheene ni “muupuwelo wotheene”. (Mar 12:30; Luk 10:27) Nto omurumeela Yehova ni ‘murim’ahu wothene’ onihela muhina omutthu ahu wootheene nihihiyaka nnakhala etthu emosa, eyo piiyo, itthu ninvara ahu, ikuru sahu ni itthu nimphavela ahu opaka.—Mulikanyiherye ni Mat 5:28-30; Luk 21:34-36; aEef 6:6-9; aFil 3:19; aKol 3:23, 24.
it-1 epaax. 97 etti. 7
Altari
AIsarayeli yaahirummwa waapwexakasa altari otheene aamuluku eethiru, ni opwexakasa mapuro otheene yaakokhoreliwa yaawo yaakhanle mapuro awo. (Okh 34:13; Otu 7:5, 6; 12:1-3) Nave yaahaana osyaka otthara mweettelo wa atthu wala waavaha anaaya mukuttho, ntoko yaapaka aya aKaanani. (Otu 12:30, 31; 16:21) Ohiya okhalana mapuro manceene ookokhorela, aIsarayeli yaahaana okhalana opuro omosa paahi yaarowa aya omukokhorelaka Muluku a ekeekhai, ni yaahaana oteka opuro Yehova aarowa awe othanla.—Otu 12:2-6, 13, 14, 27;
Itthu sa Efaita sa MBiibiliyani
it-2 epaax. 208 etti. 6
Mwaako Garizimi
Woonasa wene, mahimo yeemenle omwaako Garizimi yaahaakhela mareeliho yaasommwale opuro ole, vano maloko makina yaahaakhela otakhaliwa waasommwale omwaako Ebali. Nnaamwi vahimmwaka wira mareeliho yaasommwa omwaako Garizimi waari mwaha wookhala opuro wooreera ni wooruwerya, moovirikana ni mwaako wa Ebali yoowo wahaaruwerya, Biibiliya khonihimya etthu voohimya sa mwaha ola. Ohiya-vo, onihimya wira moolumo ale yaahisommwa ohoolo wa “alopwana n’athiyana n’anamwane n’anamurwa yakhala eriyari aya”. (Yox 8:35) Hata vari siiso, muttitthi ole wanwerya owiriyana muhupi waasommwa hata myaako iye saari mapuro oovirikana.—Nwehe moolumo oowi: EBAL, MONTE.
12-18 YA JULYO
MIHAKHU SINIKHUMA MBIIBILIYANI | OTUMERERYA 13-15
“Moota Xeeni Nlamulo Nooniherya Aya Wira Yehova Anaathokorerya Atthu Ohaawa?”
Mpantta wa Namuloko
Vanikhala ntoko wira waahikhala mpantta wa namuloko mukina, mpantta wanenli wa namuloko, yoowo waapwehiwa khula mwaakha wira ovareliweke muteko itthu sikina, ohiya okhaliherya onamukuttho wa aLevi paahi, nnaamwi aLevi yaattottela mureerelo. Mpantte ola wa namuloko waanirumeeliwa wira nikhaliheriwe nloko na aIsarayeli okathi yaarweela aya meera a khula mwaakha. Mwaha woorekamela oYerusalemu, aIsarayeli yaanitumiha mireerelo saya, musurukhu ene yaanikuxa okathi yaarowa aya oYerusalemu wira yaathumeleke inama sa mukuttho ni wira yaarumeeleke wira elyihe emusi aya okathi ole wotheene yaarowa aya oviriha. (Otu 12:4-7, 11, 17, 18; 14:22-27) Savira iyaakha tthaaru wala iyaakha 6, aIsarayeli yaahaana ovalaanya mpantta mukina wira yaakhaliherye aLevi, anamurwa, axithiyana anaamukhweli, ni anamwane a ikwaasuni yaakhala mmuttettheni mwaya.—Otu 14:28, 29; 26:12.
it-3 epaax. 476 etti. 3
Mwaakha wa Neethanu Nenli
Mwaakha wa neetthanu nenli waari “mwakha w’olevelela [hash·shemit·tahʹ]”. (Otu 15:9; 31:10) Nave waari okathi wahalimmwa aya, etthaya yaphumurye aya, wala okathi wa omulevelela ole aakomphe. Nave naari nihiku ‘nolevelela n’Apwiya [Yehova]’, ni ovuwihiwa waya. Nnaamwi atthu akina yaarina moonelo woovirikana voohimya sa mwaha ole, awo anihimya wira mutthu aakopha khaaleveleliwa moomalela, masi ole akopheliwe kheemereriwa omukhanyererya muHeeberi ole aakomphe omuliva, okhala wira mwaakha ole khaarowa woona moota woomuliva; hata vari siiso, owo aaneemereriwa omulokiha namurwa.—Otu 15:1-3
it-1 epaax. 836 etti. 5
Epottha
Malamulo voohimya sa ipottha ni pwiya aya. Eriyari ya aIsarayeli saahikhala ipottha soovirikana, aHeberi ni anamurwa. Epottha yaahakhanle muHeeberi yaahaana omurumeela pwiya aya wa mahiku otheene ni vakhala wira epottha eyo yaamookhwa ahaana okuxiwa mwanaya wira okhale opuro wa apapawe (Ona 25:44-46), epottha muHeeberi yaahaana otaphuliwa mwaakha wa neetthaanu nenli wala mwaakha wa Yubileyo. Okathi wotheene epottha ya aHeeberi yaarowa aya orumeela, yaahaana othokoreriwa ntoko namuteko. (Okh 21:2; Ona 25:10; Otu 15:12) Vakhala wira epottha eyo yammurumeela namurwa wala mutthu mmosa a mweemusini mwawe, owo ahaana woopoliwa khula okathi aaphavela awe. Esisapo ya woopoliwa yaavarihana ni iyaakha saahala wira ophiye mwaakha wa Yubileyo aahiiso mwaakha wa neethanu nenli. (Ona 25:47-52; Otu 15:12) Okathi yaataphuliwa aya epottha muHeeberi, pwiya awe ahaana onvaha etthu yeeyo yooniherya wira aari ootaphuwa.—Otu 15:13-15
Itthu sa Efaita sa MBiibiliyani
w06 1/4 epaax. 31
Makoho Anikohiwa Naale Anisoma Irevista Sahu
Xeeni Nlamulo naakhoottiha aya okhuura wala waapeya enama nlelo eri ene mwaaxaana?
Yooruma ela eniphwanyaneya ikwaha tthaaru mBiibiliyani nave yiirela mpantta Nlamulo na Moise, enninikhaliherya wiiwexexa moonelo wa Yehova, nave enniniixuttiha omoriwa wawe ikharari. Ohiya-vo, ennooniherya wira owo onninyokha okokhorela woohiloka.—Okhuma 34:26; Otumererya 14:21.
19-25 YA JULYO
MIHAKHU SINIKHUMA MBIIBILIYANI | OTUMERERYA 16-18
“Malakiheryo a Moota Woophukela Mwa Xariya”
it-1 epaax. 479 etti. 5
Ohoona
Ohonona exariya mwaha woowaakhela makhwankwa waalikanyihiwa ni ohoona, nave Nlamulo naanivaha malakiheryo manceene voohimya sa waakhela makhwankwa, soovaha wala nthalu, okhala wira itthu iya saanimwiiriha mphuki ohoona ni ohonona exariya. Biibiliya onihimya so: “Makhwankw’awo annapwexa maitho ale anona orattene”. (Okh 23:8) “Makhwankwa annipwexa maitho àtthu a miruku”. (Otu 16:19) Mphuki hata ori ene a xariya, pooti weemererya makhwankwa hata osuwelaka wala ohisuwelaka okathi onivahiwa awe etthu. Nlamulo na Muluku khaninhimya paahi wira makhwankwa waakhela etthu, masi enihela muhina moonelo wa mphuki, okhala wira Biibiliya onihimya so: “Muhimuthanlé mutthu masikhini, walá muhimoveké mulipa-òwerya”. (Ona 19:15) Nto moohicikha makhalelo a mutthu wala mwaha woosuwelexiwa, mphuki aahaana osyaka onvaha exariya thaaciri mwaha wookhala thaaciri.—Okh 23:2, 3.
it-3 epaax. 106 etti. 7
Nummuru
Nummuru na Nenli. Nummuru nla ninnirumeeliwa ikwaha sinceene okathi woophukela. Vakhala wira atthu anli yaanivaha onamoona etthu emosa, yaakhala ya ekeekhai. Nave anamoona anli, wala araru, yaaniphiyerya ovaha onamoona ohoolo wa aphuki. Nave malakiheryo ala annivareleya muteko mmulokoni mwa eKristau. (Otu 17:6; 19:15; Mat 18:16; 2 aKo 13:1; 1 Ti 5:19; aHeeb 10:28) Nave Muluku aahittittimiherya mwaha ola okathi aamurumme awe Mwanawe wira Owoopole apinaatamu. Yesu aahimmye so: “Nave-tho, Munlamuloni mwanyu voolempwa wira: ‘Yakhala anamoona anli, mwaha owo ti weekeekhai’. Miyo kinniikhalela onamoona mmansaka, nave Tiithi, yoowo okirumme, onnikikhalela onamoona”.—Yoh 8:17, 18
it-3 epaax. 486 etti. 7
Alipa-Amukuttho
Alipa amukuttho yaahikhalana eparakha yootthokiherya nlamulo na Muluku, ni yaanivara muteko wa vameekha aya ya waaphukela aIsarayeli. Mittetthe yaakhala aya anamukuttho, awo yaanipaka sotheene yaawerya aya wira yaakhaliheryeke alipa oophuka, nave yaanivara vamosa ni aphuki awo wira aphukeke myaha sootepa ovila. (Otu 17:8, 9) Nave yaahaana okhala vamosa ni axitokweene a epooma ele vakhala wira mutthu aammwiiva moohilakela mukhwaawe, wira awehe vakhala wira yaanitthara saana malakiheryo ale wira akumihe nthowa na ephome epooma ele.—Otu 21:1, 2, 5
Itthu sa Efaita sa MBiibiliyani
it-2 epaax. 87 etti. 2
Woomoliwa Wala Okumihiwa
Moovarihana ni Nlamulo, wira ohukhummwe mutthu aaphwanela wiiviwa, yaahaana okhala anamoona anli. (Otu 19:15) Anamoona awo anli yaahaana opacerya onvonya maluku. (Otu 17:7) Eyo yooniherya wira yaaniiwelela nlamulo na Muluku ni ootteelihiwa wa nloko na aIsarayeli, nave eyo yaanaakhaliherya atthu akina osyaka ovaha onamoona woohiloka ni moopaphela.
26 A JULYO–1 A AGOSTO
MIHAKHU SINIKHUMA MBIIBILIYANI | OTUMERERYA 19-21
“Yehova Onnivaha Efaita Okumi wa Apinaatamu”
Mutakiheke Exariya ni Omoriwa Ikharari wa Yehova
Yehova aahipaka mareheryo wira mittetthe iye 6 sa ntthyawelo sikhaleke sookhweya ophiya. Owo aahaaruma aIsarayeli wira yaahaana othanla mittetthe miraru sootthyawela khula ekhopela ya muro Yordani. Mwaha wa xeeni? Wira mulipa-ootthyawa aakuveke ophiya mittetthe iye voohikhala mixankiho. (Moth. 35: 11-14) Iphiro saaviriwa oroiwaka mittetthe iyo, saanikhapeleliwa oratteene. (Otum. 19:3) Moovarihana ni soolema sa aYuda, vanihimmwa wira mphironi saahikhala ikanyeryo saamukhaliherya mutthu osuwela mittetthe iyo. Okhala wira saahikhala mittetthe iyo, nto mwIsarayeli aamwiiva mutthu moohilakela, khaatthuneya otthyawela ilapo sa amalapo, yaawo yaakokhorela amuluku eethiru.
Mutakiheke Exariya ni Omoriwa Ikharari wa Yehova
Nthowa nimosa saakhumiheriwe aya mittetthe sa ntthyawelo, naari waakhapelela aIsarayeli wira ahivahiwe nthowa na ephome mwaha wa omwiiva mutthu ohitthenke. (Onam. 19:10) Yehova onniphenta okumi ni onninyokha omwiiva mutthu. (Mir. 6:16, 17) Mwaha wookhala Muluku a xariya ni oowaarya, owo khaakhanle oomaala paahi okathi aiviwa awe mutthu hata moohilakela. Ekeekhai wira ole aamwiiva mukhwaawe moohilakela aaniwerya oleveleliwa. Masi aahaana toko waasuweliha mulattu awe axitokweene. Nto axitokweene yaweha wira mutthu ole khaalakenle, namattheka owo aahaana omaka mmuttettheni-mme mpakha muulupale a anamukuttho okhwa. Nto eyo enitaphulela wira ikwaha sikina, namattheka ole aahaana okhala muttetthe ole okumi awe wotheene. Nto mareheryo ala yaaniwooniherya aIsarayeli otheene wira Muluku onnivaha efaita okumi. Wira amuttittimihe Mpattuxa a okumi, awo yahaana opaka khula etthu yaawerya aya wira ohiiviwe mutthu.
it-3 epaax. 522 etti. 9
Ephome
Khula mutthu aahikhalana ehakhi yoopuha okumi aavahiwe awe ni Muluku, akhala mutthu ahaattittimiha okumi wa atthu akina aamwaakhula ohoolo wa Muluku. Eyo yaahooneya oratteene okathi Yehova aamuleelale awe nawiive Kayini wira: “Ephome ya muhim’anyu emwarenxanyu ennikikhuwelela miyo”. (Map 4:10) Hata mutthu aamunyokha mukhwaawe ni aaphavela wira aakhwiiye aahiiso omootherya wala ovaha onamoona woohiloka yeeyo yaarowa omwiiriha wiiviwa, aamukhalana nthowa na ephome.—Ona 19:16; Otu 19:18-21; 1 Yo 3:15.
Itthu sa Efaita sa MBiibiliyani
it-3 epaax. 741 etti. 1
Etribunaali Yoophukela
Opuro woophukela waakhala vamukhora wa epooma. (Otu 16:18; 21:19; 22:15, 24; 25:7; Rut 4:1) Okhala wira opuro ole waari wookhweya omphwanya namoona aarowa omukhaliherya ophuka myaha, ntoko otumihiwa wa mathala, ni itthu sikina, maana atthu anceene yaanikela ni yaanikhuma khula nihiku. Nave okathi waasuweliwa aya mwaha ole waanimukhaliherya mphuki okhalana ephoole ni ophuka mwa xariya myaha iye.—1 Sa 7:16, 17.
2-8 ya Agosto
MIHAKHU SINIKHUMA MBIIBILIYANI | OTUMERERYA 22-23
“Moota Nlamulo Nooniherya Aya Wira Yehova Onnithokorerya Inama”
it-2 epaax. 105 etti. 6
Muritti
Khalai, saanirumeeliwa inama wira siteexeke miritti, ni yaahirummwa aIsarayeli wira yaweha enama ya mutthu mukina yaahaiwanana aya emonre ene, ohiya othekela awo yaahaana ‘omukhaliherya nwanan’i aya opakhula n’umwemexa mwaburu awe’.—Okh 23:5
it-1 epaax. 701 etti. 3
Otumererya
Eliivuru ya Otumererya ennittittimiherya efaita saarina aya inama. AIsarayeli yaanikhoottiheriwa omukumiha mwaapalame mpuruni mwawe, okhala wira eyo yaari enamuna mwaapalame owo aakhapelela awe axaana awe wira aahikumiheriwe ehasara. Okathi mutthu aattotta awe epuru ya mwaapalame, aneemereriwa okuxa mooce masi ahaana omuhiya maama awe orowaka. Nto yaanimukhaliherya orela mooce opuro mukina. (Otu 22:6, 7) Nave kheemereriwa mulipa-oolima ohela opuro omosaru enyompe ni mwaabuuru wira silimeke, opaka eyo yaamukumiherya muxankiho enama ehiniiweryawerya. (Otu 22:10) Nave khiyeemiheriwa otthukwa eyano ya enyompe evaraka muteko, wira ehikhwe etala nnaamwi eyoolya eri ene vakhiviru vaya.—Otu 25:4.
w03 15/10 epaax. 32 itti. 1-2
“Muhaataneke Naale Ahinaamini”
Ntoko enooniherya aya ettima ela, ekamelo ni enyompe enivara muteko vamosa pooti ohikhumela saana. Okhala wira ekopo enuuranyiha, eyo piiyo, ekopo yeeyo epakeliwe inama soovirikana wira silimeke, pooti waakumiherya mixankiho. Olavulaka sa inama iyo sooreera, Muluku aaleelale aIsarayeli wira: “Muhivarihé muteko mmatta enyompe ni mwabùru vamosá”. (Otumererya 22:10) Nave malakiheryo ala yaanivareleya muteko ni inama iyo soopiili.
Vakhala wira mulipa-oolima khaapaka eyo khaarowa okumiherya mixankiho inama sawe. Masi ankhi vakhala wira khaarina inama soolikana? Owo aahaana orumeela inama piili soolikana saarina awe. Mwaha woovirikana munnuwelo ni olemela waya, mwaamunama aahiiwerya-werya aamuhaawa vanceene.
Itthu sa Efaita sa MBiibiliyani
it-1 epaax. 725 etti. 8
Okopha, Ole Onikopheliwa
Nlamulo na Muluku naanatumererya aIsarayeli, wira yaahaana okhala oovaha ni waareerela murima axinna aya okathi yaakopiha aya musurukhu, asyakaka waaliviha ni ixuuru. (Okh 22:25; Otu 15:7, 8; Esa 37:26; 112:5) Masi awo yaaneemereriwa waaliviha ni ixuuru anamurwa. (Otu 23:20) Moovarihana ni aYuda akina, awo anihimya wira nlamulo nlo naavarihana paahi ni myaha sa nakoso, ohiya okathi mutthu aakophawe mwaha woothoiwa. Okhala wira anamurwa yaari wIsarayeli khiyakhala okathi munceene, nave mwaha wookhala alipa-anakoso, awo yaahaana oliva ni ixuuru, vanceenexa okhala wira awo yanaakopiha atthu akina ni ixuuru.
9-15 ya Agosto
MIHAKHU SINIKHUMA MBIIBILIYANI | OTUMERERYA 24-26
“Moota Xeeni Nlamulo Nooniherya Aya Wira Yehova Onnaavaha Efaita Athiyana?”
it-3 epaax. 34 etti. 8
Muthiyana
Hata malamulo voohimya sa anakhotto yaanaakhaliherya athiyana ootheliwa vamosa ni axiiyaya, emweemereryaka mulopwana othenle niinaano, ohirowa okhottoni mpakha oviriha eyaakha emosa. Eyo yaanavaha eparakha yookhalana mwaana, yoowo aarowa ommaalihaka maama awe okathi iyaawe aarowa awe otthikela okhottoni wala vakhala wira aamookhwa.—Otu 20:7; 24:5.
it-3 epaax. 429 etti. 9
Ottotta Ihala-hala
Yaari etthu yoohakalaliha vanceene mareheryo ale yaapakiwe voohimya sa moota woowakhapelela atthu oohaawa a elapo ele, okhala wira eyo yaanaakhaliherya atthu anceene okhala oovaha, oophenta ni ororomela mareeliho a Yehova, nave eyo yaanaakhaliherya osyaka owana-wana. Nave ninnoona eyo ni moolumo a Davidi yoowo aahimmye wira: “Nkinamone naxariya onyanyaliwe ni Muluku, nkinawone amusi awe elolaka yolya”. (Esa 37:25) Mwaha wa Nlamulo, atthu oohaawa yaanittottela mureerelo ni khiyavoliwa etala nnakhala anaaya khiyavoliwa etala.
w11 1/3 epaax. 23
Niireke Mwaanisuwela?
WIsarayeli wa khalai, vakhala wira mulopwana aamookhwa ohimuyanre mwaana mwaamulopwana, naamukhweli aahaana otheliwa ni muhimaawe mulopwana ole okhwiiye wira omuyarele mwaana ni nloko nawe nihimalamale. (Maphattuwelo 38:8) Yoolema ele, yeeyo yiirela mpantta Nlamulo na Moise, yaasuweliwa okhala ekasamento ya aleviri.—Otumererya 25:5, 6
Itthu sa Efaita sa MBiibiliyani
it-1 epaax. 729 etti. 1
Omwalana
Epaphelo ya Omwalana. Khanikhanle oohimya wira, mwaha wa mixankiho, nlamulo na Moise naanaakhweiherya alopwana a wIsarayeli omwalana ni mwaara aya. Okhala wira yaahikhala malakiheryo a moota woopaka eyo. Nave yaahaana olepa edokumento aahiiso “epaphelo y’omwalana”. Mulopwana aamuhiya mwaarawe aahaana onvaha epaphelo eyo ni omoomola owannyawe. (Otu 24:1) Nave yaahaana okhala mathowa ookhalela wira amwalane, nave okathi malakiheryo awo yaatthariwa aya saana, eyo yaanaakhaliherya atthu akina ohimwalana mwaha wa etthu-pi-itthu. Nto, ediretu ni mireerelo sa muthiyana ole saanikhapeleliwa.
16-22 ya Agosto
MIHAKHU SINIKHUMA MBIIBILIYANI | OTUMERERYA 27-28
“Munoophwanya Oreeriwa Wotheene wa Khula Enamuna”
w10 15/12 epaax. 19 etti. 18
Mwaakhele Mareeliho Anikhuma wa Mwene Oneettihiwa ni Munepa wa Muluku
Owiriyana Nuulumo na Muluku ontaphulela weettela ni wiiwelela malakiheryo Yehova onnivaha awe. (Math. 24:45) Nave ontaphulela omwiiwelela Muluku vamosa ni Mwanawe. Yesu aahimmye so: “Wira mutthu okele Moomweneni wa wiirimu, khivamphiyerya okiirela, ‘Apwiya, Apwiya’! Ankela-mo taale aniira simphavela awe Tiithi aka ori wiirimu”. (Math. 7:21) Ohiya-vo, omwiiwelela Muluku onihela muhina wiiwelela moohinlaseya malakiheryo onninvaha awe, eyo piiyo, mmulokoni mwa eKristau ni axitokweene athanliwe, “[yaawo ari] soovaha”.—aEef. 4:8.
w01 15/9 epaax. 10 etti. 2
Niireke Nyuwo Munimwaakhela Mareeliho a Yehova?
Nuulumo na eHeeberi nirumeeliwe Otumererya 28:2 noowi “owiriyana”, nintaphulela etthu enipakiwa khula okathi. Arumeyi a Muluku ahaana onwiriyanaka Yehova khula okathi ni okumi aya wotheene. Yapaka eyo animwaakhela mareeliho.
w10 15/9 epaax. 8 etti. 4
Mphaveleke ni Murima Anyu Wotheene Mareeliho a Yehova
Mwa enamuna xeeni aIsarayeli yaarowa aya wiiwelelaka? Nlamulo na Muluku naahimya wira Yehova khaarowa osiveliwa ni arumeyi awe vakhala wira awo khiyaarowa omurumeelaka “votteliwa murima n’utthapa”. (Mmusome Otumererya 28:45-47.) Yehova khonaaphavela atthu ahimmwiiwelela ni murima aya wotheene, ntoko inama ni malaikha ootakhala anipaka aya. (Marko 1:27; Yak. 3:3) Omwiiwelela Muluku ni murima ahu wotheene onooniherya omphenta wahu. Nave eyo enihela muhina omurumeela moohakalala ni woona wira sooruma sawe khahiyo soovila weettela ni okupali wira “onnaatthuvela ale animwaavya ni murima aya wotheene”.—aHeeb. 11:6; 1 Yohani 5:3
Itthu sa Efaita sa MBiibiliyani
it-2 epaax. 767 etti. 3
Mukano
Nlamulo na Yehova naanikhoottiha osusiha mukano wa mutthu mukina. (Otu 19:14; nave munwehe Mir 22:28.) Mutthu ‘asusiha mukano wa namwattamanani awe’ aanitakhalihiwa. (Otu 27:17) Okhala wira axineene mathala yaalipa ni itthu yaahepha aya mmathalani mwaya, nto osusiha mukano waataphulela omukhoottiherya mutthu owo okhalana itthu saamuthowa. Eyo yaalikana ni wiiya, ni mutthu aapaka eyo aanithokoreriwa okhala nawiiye.—Yobi 24:2.
23-29 ya Agosto
MIHAKHU SINIKHUMA MBIIBILIYANI | OTUMERERYA 29-30
“Omurumeela Yehova Khahiyo Etthu Yoovilexa”
w09 1/11 epaax. 31 etti. 2
Yehova Oonivaha Eparakha Yoothanla Mootaphuwa
Niireke vannoovilani osuwela wala opaka etthu Muluku onoovekelaweni? Moise olempe so: “Molumo ala kinovahakani olelo khorikenleni vahinweryanyu wettela: khanvikana ikuru sanyu”. (Eveersu 11) Yehova khonnivekela mutthu etthu ehinwerya awe opaka. Nave sooruma sawe ti sookhweya wiiwelela nave nnoowerya weettela. Nave moolumo awe khahiyo etthu ehinsuweliwa.—Mikheya 6:8.
w09 1/11 epaax. 31 etti. 1
Yehova Oonivaha Eparakha Yoothanla Mootaphuwa
“Okathi munceene kinnoova opaka etthu yaarowa okiiriha ohiiya ororomeleya wa Yehova.” Ala moolumo yaalavuliwe ni murokora mmosa yoowo aaxankale vanceene mwaha wa itthu aapanke awe khalai oryeene mwaana seiyo saamphukela ni saamwiiriha oriipiwa murima. Niireke ekeekhai wira hiyo khaninwerya oxintta mixankiho sahu? Nnaari. Maana Yehova Muluku oonivaha eparakha ya othanla mootaphuwa wira niweryeke othanla itthu nimphavela ahu opaka mookumini mwahu. Nave owo oniphavela wira nipakeke soothanla sooloka, nave Nuulumo nawe Biibiliya ninnikhaliherya moota woopaka eyo. Nwehe moolumo Moise alavunle awe eliivuru ya Otumererya ekapiitulu 30.
w09 1/11 epaax. 31 etti. 4
Yehova Oonivaha Eparakha Yoothanla Mootaphuwa
Niireke Yehova onnivaha efaita soothanla nimpaka ahu? Aayo! Uupuxeriwaka ni Muluku, Moise aahimmye so: “Muthanleke ekumi”. (Eveersu 19) Nto ninrowa othanla sai okumi? Profeta Moise onnitthokiherya oriki: “Mwaphenteke Apwiya Muluku anyu, mwiweleleke molumo aya, mutthareke”. (Eveersu 20) Vakhala wira ninnimphenta Yehova, nnonwiriyanaka, omwiiwelela, omuroromela ni murima ahu wotheene, moocikha mixankiho sinrowa onikhumelela.—2 Pedru 3:11-13; 1 Yohani 5:3.
Itthu sa Efaita sa MBiibiliyani
it-3 epaax. 149 etti. 8
Naaru
Aarumeelaka arumeyi awe Yehova aahaahimya aIsarayeli okhala atthu oohiiwa ni oohiiwelela. (Yer 6:10; Mit 7:51) Vakhala ntoko yaattiyenle maaru aya wira ahiiweke. Maaru aya khiyaatthukuliwe ni Yehova, yoowo onaavaha ale animwiiwelela ni animphavela maaru aniiwexexa, masi ale ahinimwiiwelela onniwala maaru aya. (Otu 29:4; aRo 11:8) Murummwa Paulo aahihimya vahinatthi wira yamphiya mahiku atthu aniihimya okhala maKristau, yaarowa aya ohiya waamini, ahiphavelaka owiriyana Nuulumo na Muluku, ephavelaka otthara itthu aniphavela aya wiiwa, ni yaawiriyanaka awiixutti oowootha.—2 Ti 4:3, 4; 1 Ti 4:1
30 A AGOSTO–5 A SETEMBRO
MIHAKHU SINIKHUMA MBIIBILIYANI | OTUMERERYA 31-32
“Mwiixutteke ni Moolumo a Isipo Sowuupuxeriwa”
‘Mukivahe Murima Mmosaru Wira Kòve Nsina Nanyu’
Okathi vakhaani ahinatthi aIsarayeli okela Elapo Yooleiheriwa, Yehova aahimwiixuttiha Moise nsipo. (Otum. 31:19) Vano, Moise aahaana owiixuttiha aIsarayeli nsipo nne. (Mmusome Otumererya 32:2, 3.) Vaavo nnuupuwelela ahu eversiikulu 2 ni 3, ninnoona wira Yehova khaaphavela wira nsina nawe nihisuweliwe, maana nsina nawe ti noowaarya. Yehova oniphavela wira atthu otheene asuwele nsina nawe! AIsarayeli yaanoona okhala eparakha ya vameekhaaya, vaavo yaamwiiwa aya Moise owiixuttihaka itthu sinceene voohimya sa Yehova ni nsina nawe noowaarya. Moohaanyiherya, itthu Moise aawiixuttiha awe saanilipiha waamini waya ntoko siisaale epula enikhaliherya aya vanceene miri ni malaxi. Ninrowa owiixuttiha sai atthu akina mwa enamuna yoomaaliha ni yoolipiha?
Okathi ninlaleerya ahu empa ni empa, nihaana omurumeela Biibiliya wira niwooniherye atthu nsina na Muluku, Yehova. Nave nihaana waavaha iliivuru, owooniherya iviidiyu ni myaha sikina siri va jw.org wira nivuwihe nsina na Yehova. Ohiya-vo, omutekoni, oxikola wala okathi nneetta ahu mukwaha, nihaana wiimananiha waalaleerya atthu voohimya sa Muluku ahu ni mikhalelo sawe. Nave nihaana waaleela itthu sooloka Yehova onrowa awe onipakela ni onrowa awe opaka valaponi. Nto okathi aniiwa aya itthu iyo soohakalaliha, awo animoona wira Yehova onniniphenta vanceene. Musuweleke wira okathi nnaalaleerya ahu atthu akina wira Tiithi ihu a wiirimu onniniphenta, ninnikhaliherya otteelihiwa ni ovuwihiwa nsina na Muluku. Nave ninnaakhaliherya atthu osuwela wira yiixuttihiwa itthu sowoothiwa voohimya sa Yehova. Tthiri okathi aniixutta aya ikeekhai sa mBiibiliyani, awo annihakalala vanceene.—Yes. 65:13, 14.
w09 1/5 epaax. 14 etti. 4
Niireke Munoowerya Wiiwexexa Malikanyiho Ookhweya a MBiibiliyani?
Biibiliya onnimulikanyiha Yehova ni itthu sihineetta aahiiso sihinttikinyeya. Moovarihana ni aBiibiliya akina Yehova onnihimmwa okhala mwala a wIsarayeli ni ntthyawelo noolipa. (2 Samuweli 23:3; Esalimo 18:3; Otumererya 32:4) Itthu iya sinivarihana sai? Ntoko siisaale nluku nuulupale ni noolipa nihinttikinyeyaya, Yehova Muluku pooti okhala ntthyawelo nahu noolipa.
w01 1/10 epaax. 9 etti. 7
Mmutakiheke Yehova Okathi Muniwiixuttiha Anyu Aniinyu
Nrowe nuupuwelele ophenta Yehova aawoonihenrye awe aIsarayeli. Moise aahirumeela nlikanyiho nimosa wira ottittimiherye ophenta Yehova aawoonihenrye awe aIsarayeli. Hiyo ninsoma so: “[Muluku] onlikana ni murumasi onalipiha axan’awe, onavava vasulu vaya, onàtala mapupha wira awakhelele, onakuxa mmapuphani mwawe òrakama. Apwiya pahi t’awettihale atthu aya: khavo muluku mukina àkhalihenrye”. (Otumererya 32:9, 11, 12) Murumaasi-oothiyana, wira owiixuttihe axaana awe ovava, onnittikinya epuru awe, omanaka mapupha awe wira aakhaliherye axaana awe okhuma avavaka. Okathi axaana awo anikhuma aya mpuruni mwaya, awo anikhala musulu-sulu, nto maama aya onnivava vasulu vaya. Nto okathi vanikhala aya wira anrowa omorela vathi, owo onnaatala mapupha awe wira owaakhelele. Mwa enamuna emosaru, Yehova aahaakhapelela moophenta arumeyi awe aIsarayeli. Owo aahaavaha Nlamulo na Moise. (Esalimo 78:5-7) Nave ahaakhapelela oratteene arumeyi awe, ni anaakhaliherya okathi yaareerela aya okhaliheriwa.
Itthu sa Efaita sa MBiibiliyani
w04 15/9 epaax. 27 etti. 12
Iponto Suulupale sa Eliivuru ya Otumererya
31:12. Anamwane ahaana okilaathi vamosa ni anamuyari aya okathi wa mithukumano sa mmulokoni, nave-tho ahaana wiimananiha wira awiriyane ni wiixutta.